Белорет урамдары яҡтырҙы

Быйыл ҡалала 383 яңы фонарь урынлаштырылған. Бының өсөн 7 миллион һумдан ашыу аҡса тотонолған. Урамдарҙы яҡтыртыу буйынса эш дауам итә. Район хакимиәте башлығы Андрей Иванюта белдереүенсә, бөгөнгә 300 мең һум экономияланған. Был аҡса яҡтыртыу системаһын яңыртыуға йүнәлтелә.

Башҡортостанда 88 мең тонна шәкәр етештерелгән

Бөгөнгә 632 мең тонна шәкәр сөгөлдөрө эшкәртелгән. Ауыл хужалығы министрлығынан хәбәр итеүҙәренсә, республикала 2 миллион ярым тонна татлы тамыр йыйып алынды. Уңыш Шишмә һәм Раевкалағы ике заводта эшкәртелә. Сөгөлдөр ҡалдыҡтарынан - жом мал аҙығы итеп ҡулланыла. Ул экспортҡа ла сығарыла.

«РиаПласт» компанияһында яңы производство асылды

«РиаПласт» компанияһы - дәүләт ярҙамының бизнесты үҫтереүгә нисек булышлыҡ итеүенең яҡшы миҫалы. Яңыраҡ Өфөлә үткән еңел сәнәғәт форумында был предприятиела яңы производство участкаһы асылды.

«Башҡорт оҙон ғүмерлелеге» проекты сиктәрендә бер төркөм пенсионерҙар Үзбәкстанға сәйәхәткә осто

«Башҡорт оҙон ғүмерлелеге» проектының географияһы киңәйә. Бөгөн был программа сиктәрендә бер төркөм пенсия йәшендәге туристар «Өфө» аэропортынан Үзбәкстанға осто. Уларҙы БЮТ ижади төркөмө лә оҙатып ҡалды.

Өфөлә Дәүләт Йыйылышы - Ҡоролтайҙың 30 йыллығына әҙерлек саралары тикшерелде

Өфөлә Дәүләт Йыйылышы-Ҡоролтайҙың 30 йыллыҡ юбилейына әҙерлек буйынса ойоштороу комитеты ултырышы уҙҙы. Ул киләһе йыл билдәләнә. Сарала власть органдары, ғилми һәм белем биреү ойошмалары вәкилдәре, депутаттар ҡатнашты.

Өфө художество галерияһында «Башҡорт графикаһы» исеме аҫтында республика күргәҙмәһе эш башланы

Экспозиция акварель, баҫма һәм уникаль графика кеүек өс төрлө залға бүленгән. Ул йәмғеһе 93 рәссамдың 200-ҙән ашыу эшен берләштергән. Шуға ла баш ҡала халҡы һәм ҡунаҡтары күңеленә яҡын картиналарын таба ала. Өҫтәүенә, һәр ижадсының һынлы сәнғәттә ҡулланған техник алымын өйрәнеү, сағыштырыу, үҙенсәлеген дә тойорға мөмкин.

Радий Хәбиров эш сәфәре менән Октябрьский һәм Туймазы ҡалаларында булды

Сәнәғәт предприятиелары юғары һәм урта һөнәри уҡыу йорттары менән муниципаль-ара кимәлдә тығыҙ хеҙмәттәшлектә булырға тейеш. Был турала Башҡортостан башлығы Радий Хәбиров Октябрьский ҡалаһында ойошторолған күсмә «Сәнәғәт сәғәте»ндә билдәләп үтте. Эш сәфәре барышында төбәк етәксеһе республика кимәлендә тормошҡа ашырылған күләмле инвестиция проекттары менән дә танышты, әйтәйек, Туймазы районында уңышлы эшләгән компания беренсел сеймал өсөн һаҡлағыс ҡаптар әҙерләү буйынса тегеү производствоһын асҡан.

Туймазыға эш сәфәре барышында Радий Хәбиров Дәүләтовтар ғаиләһе менән осрашты

Зөлфиә Шамил ҡыҙы һәм Марат Низаметдин улы ете бала тәрбиәләй. 2021 йылдың июлендә булған ваҡиғалар ғаиләнең тормошон тамырынан үҙгәртә. Улдары Илназ көслө ток разряды алыу һөҙөмтәһендә ике ҡулһыҙ ҡала. Уҡыусы балаға алты ҡатмарлы операция яһала. Әммә Илназ барыһын да күтәрә. Фажиғәнән һуң ғаилә Туймазы ҡалаһына күсеп килә.

Асҡын районынан ике ғаилә өй туйлаясаҡ

Был йорттар «Ауыл биләмәләрен комплекслы үҫтереү» дәүләт программаһы ярҙамында төҙөлгән. Бының өсөн 10 миллион һум бүленгән. Торлаҡлы булған ғаиләләр шатлығын БЮТ ижади төркөмө лә уртаҡлашты.

Махсус хәрби операция ҡатнашыусыларына ярҙамға мотоцикл

Өфөнөң Октябрь районы хакимиәте яугирҙарға сираттағы гуманитар ылау әҙерләй. Был юлы яҡташтарыбыҙ мөрәжәғәте буйынса тупланған кәрәк-яраҡтар менән бергә, УАЗ машинаһы һәм ике тәгәрмәсле техника оҙатыласаҡ. Гуманитар ярҙам Өфө автотранспорт колледжы һәм Стәрлебаш районының социаль үҫешкә ярҙам итеү хәйриә фонды менән берлектә әҙерләгән.

Өфөнөң Дим районында 112-се Башҡорт кавалерия дивизияһы скверы төҙөкләндергәндән һуң асылды

Бөгөн Өфөнөң Дим районында 112-се Башҡорт кавалерия дивизияһы скверы төҙөкләндергәндән һуң асылды. Тантаналы сарала власть органдары, махсус хәрби операция һәм хәрби хәрәкәттәр ветерандары, кадеттар, мәктәп уҡыусылары, Миңлеғәле Шайморатовтың туғандары ҡатнашты.

Өфөгә рәсми эш сәфәре менән Алтай республикаһы вәкилдәре килде

Башҡортостан менән Алтай республикаһын аваибәйләнеш тоташтырасаҡ. Был төбәктәр араһында туризм һәм башҡа тармаҡтарҙы нығытыу өсөн яңы мөмкинлектәр бирәсәк. Бөгөн Өфөгә рәсми эш сәфәре менән Алтай республикаһы вәкилдәре килде. Делегацияны төбәк башлығы Андрей Турчак етәкләй. Ике яҡлы хеҙмәттәшлек тураһындағы документҡа ҡул ҡуйыр алдынан Радий Хәбиров менән Андрей Турчак Өфөләге мәғариф һәм һаулыҡ һаҡлау объекттарында булды.

Өфөлә «Берҙәм Рәсәй» партияһының Башҡортостан төбәк бүлексәһе кәңәшмәһе үтте

Дәүләт йыйылышы- Ҡоролтай бинаһында уҙған йыйылышта «Берҙәм Рәсәй « партияһының генераль советы секретары вазифаһын ваҡытлыса башҡарыусы, Федерация Советы рәйесенең беренсе урынбаҫары Владимир Якушев ҡатнашты. Партияның төбәк бүлексәһе секретары Радий Хәбиров бөтә ғәмәлдәр, проекттар, башланғыстар илдең иҡтисадын, уның оборона ҡеүәтен нығытыуға, халыҡтың тормошон яҡшыртыуға, һайлаусыларҙың наказдарын хәл итеүгә йүнәлтелгән, тип билдәләне.

Республиканан 138-се гуманитар ылау оҙатылды

Өфөнөң «Көрәш һарайы» алдындағы майҙандан бөгөн 138-се гуманитар ылау оҙатылды. Колоннала 8 берәмек техника. Башҡортостан хәрбиҙәренә адреслы ярҙам Миңлеғәле Шайморатов исемендәге ирекмәндәр штабы, дәүләт органдары, Дүртөйлө, Тәтешле, Шишмә райондары, шулай уҡ йәмәғәт ойошмалары һәм вайымһыҙ граждандар тарафынан тупланған.

Өфөнөң Көрәш һарайында «Zвезда» самбо буйынса Бөтә Рәсәй балалар турнирына старт бирелде

Күләмле ярыш Рәсәй Геройҙары иҫтәлегенә арнала. Башҡортостан башлығы Радий Хәбиров сараны асыу тантанаһында ҡатнашып, республикала был спорт төрө үҫешенә айырым иғтибар өсөн Бөтә Рәсәй самбо федерацияһына рәхмәтен белдерҙе. «Россия - Za самбо» форумының пленар ултырышында күтәрелгән мөһим мәсьәләләр, ҡабул ителгән ҡарарҙар һәм турнир барышы тураһында сюжет.

Башҡортостан һәм Алтай республикалары парламенттары хеҙмәттәшлек тураһында килешеүгә ҡул ҡуйҙы

Өфөлә Дәүләт Йыйылышы - Ҡоролтай менән Алтай Республикаһы дәүләт Йыйылышы - Эл Ҡоролтай араһында килешеүгә ҡул ҡуйыу тантанаһы үтте. Документҡа ике республика парламенттары рәйестәре Константин Толкачев һәм Эжер Ялбаков ҡул ҡуйҙы. Парламент-ара бәйләнештәрҙе үҫтереү төбәктәр араһында сәйәси, иҡтисади һәм мәҙәни бәйләнештәрҙе нығытыуға булышлыҡ итәсәк. Килешеүҙе тормошҡа ашырыу буйынса юл картаһын әҙерләү планлаштырыла.

Өфөлә «Байыҡ -2024» республика телевизион конкурсының гала-концерты уҙҙы

Республиканың төп сәхнәһе -»Башҡортостан» концерт залында «Байыҡ -2024» телевизион конкурсының иң яҡшы бейеүҙәрҙән тупланған гала-концерты уҙҙы. Өр-яңы постановкалар, сағыу костюмдар, осҡон сәсрәтеп халыҡсан бейеү башҡарыусылар хаҡында киләһе яҙмала.

Бөрйән районы башлығы киләсәккә пландары менән бүлеште

Халыҡ мәнфәғәте өсөн халыҡ менән бергә эшләү мөһим. Бөрйән районы хакимиәтене башлығы үҙенә ошондай бурыс ҡуйған. Хәтерегеҙгә төшөрәбеҙ, октябрь аҙағында Бөрйән муниципаль районы хакимиәтендә яңы етәксе һайланды. Рәмил Абдуллин яңы вазифаға тәғәйенләнгә тиклем Ишембай районы хакимиәте башлығының беренсе урынбаҫары булып эшләне. БЮТ хәбәрсеһе Азат Ғәлиуллин Рәмил Миңлеәхмәт улы менән осрашып, киләсәккә пландары менән ҡыҙыҡһынды.

Өфөлә хәрби темаға күргәҙмә асылды

“АРТ-ХУПЛАУ. Беҙҙекеләр өсөн” тигән экспозиция 112-се Башҡорт кавалерия дивизияһы музейында ойошторолған. Унда башҡорт рәссамдарының 60-тан ашыу эше тәҡдим ителә. Шулай уҡ Владислав Пегов һәм Александ Скорняковтың картиналары ҡуйылған. Һүрәттәрҙә алғы һыҙыҡта батырлыҡ һәм ҡыйыулыҡ күрһәткән ир-егеттәр төшөрөлгән. “Беҙ сәнғәт аша халыҡҡа махсус хәрби операцияла ҡатнашҡан яугирҙарыбыҙҙың ҡаһарманлығы тураһында һөйләргә тырышабыҙ”, - тип белдерҙе Башҡортостандың атҡаҙанған рәссамы Александр Скорняков. Республикала тыуып үҫкән 12 ир-егет Рәсәй Геройы исеменә лайыҡ булды. Уларҙың һигеҙе һәләк булғандан һуң юғары наградаға күрһәтелде. Художниктарҙың картиналары менән 15 декабргә тиклем танышырға була. Күргәҙмә киләһе йылда Татарстан халҡына тәҡдим ителә.

Республикаға китапханаларҙы яңыртыу өсөн аҡса бүленә

Федераль ҡаҙнанан 37 миллион һум бирелә. Киләһе йылда Башҡортостанда яңы быуынға ҡараған 3 китапхана булдырыла. Мәҙәниәт министрлығының матбуғат хеҙмәтенән ошо турала белдерәләр. Ишембай районы Урман-Бишҡаҙаҡ, Ҡыйғы һәм Тәтешле райондары үҙәк китапханалары Рәсәй Мәҙәниәт министрлығы үткәргән конкурста еңеү яулаған. “Беҙ федераль аҡса йәлеп итеү буйынса әүҙем эшләйбеҙ. Яңыртылған китапханалар ауылда йәшәүселәр өсөн белем алыу һәм ял итеү үҙәгенә әйләнә бара”, - тип белдерҙе Мәҙәниәт министры вазифаһын башҡарыусы Әминә Шафиҡова.