Әсәлек капиталының ҡалған суммаһын аҡсалата алырға мөмкин

Күп функциялы үҙәккә, почта бүлексәләренә йәки дәүләт хеҙмәттәре порталына мөрәжәғәт итеп, әсәлек (ғаилә) капиталының тотонолмаған өлөшөн (10 мең һумға тиклем) алырға мөмкин, тип белдерҙеләр Рәсәй Хөкүмәтендә.

Дәүләт башлығы Владимир Путин тәҡдиме менән балалы ғаиләләр әсәлек капиталының ҡалған өлөшөн (10 мең һумға тиклем) бер тапҡыр бирелә торған түләү формаһында алырға мөмкин. Ошондай түләүҙе алыу ҡағиҙәләре министрҙар кабинеты башлығы Михаил Мишустин ҡул ҡуйған ҡарар менән раҫланған.

«Һүҙ әсәлек капиталының күпселек өлөшө торлаҡ шарттарын яҡшыртыу, мәҫәлән, ипотекаға торлаҡ һатып алыу, балаларҙы уҡытыу, инвалид балалар өсөн тауарҙар һәм хеҙмәттәр, шулай уҡ башҡа маҡсаттар өсөн тотонолғандан һуң иҫәптә тороп ҡалған аҡса тураһында бара. Бер тапҡыр бирелә торған аҡса алырға хоҡуҡлы ғаиләләргә дәүләт хеҙмәттәре порталы аша тейешле белдереү ҡағыҙы ебәрелә», — тип асыҡлыҡ индерҙеләр Рәсәй хөкүмәтенең матбуғат хеҙмәтендә.

Өфөлә «Рәхмәт-2024» акцияһының суперприздары тапшырылды

Бәхетле билет хужаларын «Алға, патриот» ойошмаһы етәксеһе Ринат Хәбиров һәм Өфө ҡалаһы инвестиция-төҙөлөш комитетының генераль директоры Марат Вәсимов ҡотланы.

– «Рәхмәт» акцияһы 2024 йылдың яҙынан башлап үткәрелә. Әле үтә мөһим этап үтте, – тине Ринат Хәбиров. – Кемдәр отмаған, төшөнкөлөккә бирелмәгеҙ.

Еңеүселәрҙең барыһына ла юридик ярҙам күрһәтелә, тип белдерҙе Марат Вәсимов.

Өфөнән яңы фатирҙы Шишмә районының Үрге утарынан Әхмәҙиевтар ғаиләһе алды. Ғаилә башлығы Ильвир әйтеүенсә, уға был турала акция ирекмәндәре шылтыратып хәбәр иткән.

Бөрө районынан Плоховтар ғаиләһенә лә уңыш йылмайған. Отошло билет —әсәһе Галинаныҡы, әммә уны ҡыҙы Марина Сидоркина теркәгән.

- Шылтыратып әйткәс, ышанманыҡ, әммә шунда уҡ билетты тикшерҙек. Шок булды. Дөрөҫөн әйткәндә, һаман ышанып етмәйбеҙ, — тип тәьҫораттары менән уртаҡлашты Марина Сидоркина.

Радий Хәбиров Владислав Орловскийға Шайморатов миҙалын тапшырҙы

Уңыш һәр ваҡыт үҫеш юлында булғандарға, проблемаларҙы хәл итеү юлдарын эҙләгәндәргә йылмая. Һайлау үтте, башҡарылған эштәргә йомғаҡ яһалды, алда яңы бурыстар тора, тине Радий Хәбиров бөгөнгө оператив кәңәшмәлә. Республика башлығы министрлыҡ-ведомстволар етәкселәренә төп эш йүнәлештәрен билдәләне. Радий Хәбиров шулай уҡ Уҡсылар полкының медицина ротаһы госпитале етәксеһе Владислав Орловскийға Шайморатов миҙалын тапшырҙы, махсус хәрби операцияға юлланған Сибай ҡалаһы хакимиәте башлығы Азамат Юлдашбаевҡа оло ихтирамын белдерҙе.

Республикала коронавирус менән сирләүселәрҙең артыуы күҙәтелә

Һуңғы тәүлектә генә 143 осраҡ теркәлгән. Төбәктең һаулыҡ һаҡлау министрлығы мәғлүмәттәренә ярашлы, ауырыуҙың таралыуы миҙгелгә бәйле, хәл контролдә тотола. Инфекция госпиталдәрендә пациенттарҙы дауалау өсөн 165 койка әҙерләнгән, әле уларҙың 10 проценты буш. 1200-гә яҡын кеше амбулатор шарттарҙа дауалана.

Ишембай районы Ураҙбай ауылында йәшәүсе ирекмәндәр яугирҙар өсөн гуманитар ярҙам туплаған

Изге ниәт менән. Ишембай районы Ураҙбай ауылында йәшәүсе ирекмәндәр яугирҙар өсөн гуманитар ярҙам туплаған. Гүзәл заттар тырышлығы менән махсус хәрби операцияла ҡатнашыусыларға быҡтырылған ит, балыҡ, бауырһаҡ һәм башҡа аҙыҡ-түлек оҙатыла. Бынан тыш, ҡатын-ҡыҙҙар алғы һыҙыҡтағы ир-егеттәргә маскировка селтәрҙәре, йылы кейемдәр әҙерләй.

Өфөлә «Шень Ко: ғилми-техник эштәр донъяһы» ғилми-популяр туры асылды

Яңы асыштарға сәйәхәт. Фән һәм технологиялар ун йыллығы башланғыстарын тормошҡа ашырыу буйынса Евразия ғилми-мәғариф үҙәге ғалимдары Башҡортостандың ғилми һәм туристик мөмкинлектәрен асҡан туғыҙ эскурсия маршруты төҙөгән. Гуманитар, химия, биология-медицина, IT, физика-математика - һәр береһе бер йүнәлешкә арналған.

Ауылдағы иң яҡшы уҡытыусыға - 690 мең һум

Башҡортостан башлығы гранты йәмғеһе 150 педагогҡа тапшырыласаҡ. Тик уларҙың ауыл мәктәбендә эшләүе шарт. Конкурс уҡытыусы һөнәренең абруйын күтәреү һәм уларға матди ярҙам күрһәтеүҙе маҡсат итеп ҡуя. Еңеүселәрҙең берәүһе Кушнаренко гимназияһында эшләй. Ирина Тяптина педагогик хеҙмәткә 16 йыл ғүмерен арнаған.

Өфөлә «Рәхмәт-2024» акцияһы суперприздарын тапшырыу тантанаһы үтте

Хәтергеҙгә төшөрәбеҙ, уҙған аҙнала Башҡортостан юлдаш каналында төп бүләктәр уйнатылды. «Сәләм» тапшырыуы тура эфирында өс яңы фатир, автомобиль, дүрт квадроцикл, Сочиға ғаилә юллмаһы һәм республиканың ял базаһына ял туры хужалары билдәләнде. Акцияла бөтәһе миллиондан ашыу QR-билет теркәлгән. Өфөнән яңы фатирҙы Шишмә районынан Әхмәҙиевтар ғаиләһе еңде. Ошондай уҡ бәхет Бөрө районынан Плоховтар ғаиләһенә лә йылмайҙы. Ә бына «Нива» автомобиле Октябрьскийҙа йәшәүсе Сәфәровтарға юллана. Туймазынан Ғарифйәновтар Сочиға ял итергә барасаҡ.

Ҡағалым ҡалаһында «Мираҫ» этно-үҙәге һәм йәкшәмбе мәктәбе асылды

Башҡортостандан ситтә лә милләттәштәребеҙ туған телен өйрәнә, халҡыбыҙ йолаларын, ғөрөф-ғәҙәттәрҙе онотмай Ханты-Манси автономиялы округы - Ҡағалым ҡалаһында «Мираҫ» этно-үҙәге һәм йәкшәмбе мәктәбе асылды.

Ҡырмыҫҡалы районында тарихи- крайҙы өйрәнеү музейы эшләй башланы.

Илтуған ауылындағы ябылған мәктәп бинаһында Ҡырмыҫҡалы районының тарихи- крайҙы өйрәнеү музейы эшләй башланы. Йыл башында үҙ ишектәрен асҡан музейҙа Өфөнөң һуҡыр һәм насар күргән уҡыусылар өсөн 28-се коррекция мәктәп-интернаты уҡыусылары булды.

Күлдәк уйнатабыҙ!

БСТ каналының телеграм-каналында шәп отоштар дауам итә. Каналға яҙылған дуҫтарыбыҙ араһында матур күлдәк уйнатабыҙ. Еңеүсе 25 сентябрҙә иғлан ителәсәк. Отоштоң бағыусыһы — «Имран» милли кейем магазины.

Бының өсөн «БСТ | Яңылыҡтар» һәм «Йәм» телеграм-каналдарына яҙылырға кәрәк!

«Йәм» телеграм-каналы: https://t.iss.one/yamleofo

Республикала юғалған кешеләр арта

Үткән аҙнала ошондай 9 осраҡ теркәлгән. Был турала Ғәҙәттән тыш хәлдәр буйынса дәүләт комитетынан хәбәр итәләр. Белгестәр тәбиғәткә сыҡҡан кешеләрҙе иғтибарлы булырға саҡыра. Маршрутты алдан билдәләү, сәфәргә юлланыу хаҡында туғандарҙы һәм яҡындарҙы иҫкәртеү мөһим. Шулай уҡ һауа шарттарын иҫәпкә алырға кәрәк. Мобиль телефондың заряды тулы булырға тейеш. Берҙәм ҡотҡарыу хеҙмәтенең телефоны: 112.

Башҡортостан мәктәптәрендә аш-һыу төрләндерелә

Сауҙа һәм хеҙмәттәр министры вазифаһын башҡарыусы Алексей Гусев белдереүенсә, яңы меню уҡыусыға үҙе теләгән ризыҡты һайлау мөмкинлеген бирә. Проект 16 районда ғәмәлгә ашырыла. Киләсәктә, ата-әсәләр ризалығын алғандан һуң вариатив меню 42 район һәм ҡала округында ҡулланыла башларға тейеш.

Өфөлә өс үҫмер миллион һумға яҡын аҡса урлаған

Тәфтиш мәғлүмәттәре буйынса был хәл июлдә булған. Үҫмерҙәр береһенең туғаны йыйған аҡсаны урлау тураһында килешкән. План әҙерләгәндәр. Бер үҫмер тирә-яҡты күҙәткән, икәүһе фатирға үтеп инеп сейфты асып, 945 мең һум аҡса алып сыҡҡан. Балалар был суммының бер өлөшөн тотоноп өлгөргән, полиция тотҡандан һуң 500 мең һумды ҡайтарғандар. Енәйәт эше суд ҡарауына тапшырылған, тип хәбәр итәләр прокуратуранан.

Балалар баҡсалары тәрбиәселәре өсөн гранттар артты

Республика Башлығы Радий Хәбиров указға төҙәтмәләр индерҙе. Уға ярашлы, йәш педагогтар өсөн йыл һайын бирелгән гранттар һаны 50-нән 75-кә еткерелде. Һәр береһенең суммаһы - 575 мең һум. Мәғариф һәм фән министрлығынан хәбәр итеүҙәренсә, быйылдан башлап йыл һайын 75 йәш тәрбиәсе грант ала. Быйыл 50 грант бирелгән, тағы 25 грант алыусы асыҡлана.

Өфө Бойондороҡһоҙ дәүләттәр берләшмәһе илдәренең ижади һәм ғилми интеллигенцияһы форумын ҡабул итте

Мәртәбәле сарала Белоруссия, Ҡаҙағстан, Үзбәкстан, Ҡырғыҙстан, Төркмәнстан, Тажикстан һәм Әзербайжан делегациялары ҡатнаша. Башҡортостан башлығы Радий Хәбиров форумды асып, гуманитар өлкәлә халыҡ-ара бәйләнештәрҙе нығытыу мөһимлеген билдәләне.

Өфөлә «Тамға» Халыҡ-ара башҡорт милли кейеме оҫталары конкурсы үтте

Бойондороҡһоҙ дәүләттәр берләшмәһе илдәренең ижади һәм ғилми интеллигенцияһы форумында ҡатнашыусылар «Тамға» Халыҡ-ара башҡорт милли кейеме оҫталары конкурсы финалын да күҙәтте. Төньяҡ-көнбайыш, төньяҡ-көнсығыш, көньяҡ һәм көньяҡ-көнсығыш башҡорттарының традицион кейемдәре халыҡ иғтибарына тәҡдим ителде.

Нефтекамала Сик буйы ғәскәрҙәре ветерандары махсус хәрби операциялағы яҡташтарыбыҙға ярҙам итә

Урындағы халыҡ менән бергә улар гуманитар ылау туплап яугирҙарыбыҙға алып бара. Кәрәк-яраҡтар ир-егеттәрҙең заказы буйынса йыйыла.

Өфө Граждандарҙы яҡлау идаралығының эҙләү-ҡотҡарыу отрядына арналған мурал барлыҡҡа килде

Өфө Граждандарҙы яҡлау идаралығының эҙләү-ҡотҡарыу отряды ойошторолоуға 25 йыл тулыу уңайынан мурал барлыҡҡа килде.
Комсомол урамы, 12/1 адресы буйынса урынлашҡан бинаның фасадында рәссамдар 2023 йылда Төркиәләге ер тетрәүҙән һуң емереклектәрҙе таҙартыуҙа эшләгән ҡотҡарыусының образын һүрәтләгән.

Өфөлә юл хәрәкәте хәүефһеҙлеге дәүләт идаралығы белгестәренә яңы автомобилдәр тапшырылды

Башҡортостан эске эштәр министры Александр Прядко инспекторҙарға 60 машина асҡысын бүләк итте. «Хавал» автомобилдәре оператив ярҙам күрһәтеү, юл-транспорт ваҡиғалары урынына барып етеү, патруль эше алып барыу һәм башҡа маҡсаттарҙа файҙаланыласаҡ. Яңы транспорт саралары «Хәүефле һәм сифатлы автомобиль юлдары « проекты буйынса һатып алынған. Федераль программа сиктәрендә республикаға тағы ла бер партия машиналар тапшырыласаҡ.