Өфөлә сәйер шарттарҙа юғалған ике үҫмерҙе эҙләү дауам итә

30 мартта 14 йәшлек Дамир Әҙеһәмов һәм 13 йәшлек Павел Паличев өйҙән сығып китә һәм дәрестән әйләнеп ҡайтмай. Улар бөгөнгәсә яҡындары менән бәйләнешкә сыҡмаған.

Һуңыраҡ эҙәрмәндәр малайҙарҙың сумкаһын урманда табып алды. Водолаздар Ағиҙел йылғаһына төшөп үҫмерҙәрҙе эҙләне, тик әлегә бер һөҙөмтә лә юҡ. Өфөнөң 40-сы мәктәбендә эҙләү штабы булдырылған, унда ирекмәндәр туплана. Теләгән һәр кем үҫмерҙәрҙе эҙләүҙә ҡатнашырға мөмкин.

Әгәр ниндәй ҙә булһа мәғлүмәт булһа, 112 йә 89373102112 телефон һандары буйынса хәбәр итеүегеҙ һорала.

Билдәле опера йырсыһы Сәлих Сөләймәнов вафат

Өфөлә билдәле опера йырсыһы, Башҡортостандың атҡаҙанған артисы Сәлих Сөләймәнов арабыҙҙан китте. Уға 67 йәш ине.

Сәлих Фәрих улы Сөләймәнов 1956 йылдың 1 октябрендә Күгәрсен районының Теләүембәт ауылында тыуған.

Ул бик сағыу характерлы артист булды. 1987 йылдан — Башҡорт дәүләт опера һәм балет театрының опера труппаһы солисы. Уның репертуарында Горо («Мадам Баттерфляй») һәм Пеппе («Паяцы»), Леопольд («Сильва») һәм Блинд («Летучая мышь»), Бомелий («Царская невеста») һәм Ротшильд («Скрипка Ротшильда»), Бохайыр («Салауат Юлаев»), Насир («Ҡаһым түрә») һәм Яппар («Ҡоҙаса») һәм башҡалар бар ине.

2002 йылда уға «Башҡортостан Республикаһының атҡаҙанған артисы» тигән маҡтаулы исем бирелде.

Сәлих Сөләймәнов балаларында ла сәнғәткә һөйөү уятҡан: скрипкасы һәм дирижер Рөстәм Сөләймәнов, телевидениела алып барыусы Ләйсән Мәзитова, 2019 йылда арабыҙҙан киткән хореограф Саръян Сөләймәнов.

🐻 «Башҡортостан» милли паркында беренсе айыу уянған

Бөрйән районының Ғәҙелгәрәй ауылынан Ридан Хәкимов Ағиҙел ярында айыу осратҡан. Яңы уянған тайыштабан һыу эргәһендә йөрөгән. Белгестәр фаразлауынса, хайуан өңөнә һыу төшөүгә бәйле килеп сыҡҡан.

Яҙ килә! 😊

«Пионер» руднигында ҡотҡарыу операцияһы туҡтатылды

Сөнки шахтаның ҡабаттан емерелеү хәүефе бар. Был хаҡта 1 апрелдә рудник етәкселеге хәбәр итте.

Иҫегеҙгә төшөрәбеҙ, 18 мартта «Пионер» руднигында тау тоҡомдары ишелеү һөҙөмтәһендә ун өс кеше 120 метрҙан ашыу тәрәнлектә емереклектәр аҫтында ҡалды. Уларҙың дүртәүһе — Сибайҙан, береһе — Учалынан, 31-48 йәшлек ир-егеттәр. Барыһы ла машинист булып эшләгән. Һәләк булыусыларҙың ғаиләләренә аҡсалата компенсация түләнәсәк.

Өфөнөң Бехтерев урамында ер ишелеп төшкән

Башҡортостан буйынса Ғәҙәттән тыш хәлдәр министрлығына 1 апрелдә Өфөнөң Бехтерев урамында ер ишелеүе тураһында хәбәр иткәндәр.

«Мәғлүмәт Өфөнөң Киров районы хакимиәтенә еткерелде. Күсмә кәңәшмә була, шунан һуң артабанғы саралар күреү тураһында ҡарар ҡабул ителәсәк. Соҡорҙоң ситендә гараждар тора, милекселәрҙе асыҡлайҙар», — тип белдерҙеләр республика буйынса Ғәҙәттән тыш хәлдәр министрлығының матбуғат хеҙмәтендә.

Өфөлә юғалған ике үҫмерҙе эҙләү буйынса штаб тәүлек әйләнәһенә эшләй

Малайҙарҙы табырға ярҙам ҡулы һуҙырға теләгән ирекмәндәр 40-сы мәктәптә йыйыла. Бөгөн ирекмәндәр өс йөҙҙән ашып китте. Ҡотҡарыусылар ҙа эшен дауам итә. Урман биләмәләренән тыш, улар йылғаларҙы, боҙ өҫтөн һәм аҫтын да тикшерә. Үҫмерҙәрҙе эҙләү операцияһы тураһында киләһе яҙмала.

Радий Хәбиров ҡушыуынса махсус хәрби операция биләмәһенә 118-се гуманитар ылау юлланды

Йөк автомобилдәрендә республика муниципалитеттарынан, ойошмалар, битараф булмаған граждандар әҙерләгән әйберҙәр оҙатылды. Конвой Рәсәйҙең 3 яңа субъектында урынлашҡан 11 хәрби бүлексә өсөн тәғәйенләнгән.

Өфөлә «Профессионалдар» һөнәри оҫталыҡ буйынса чемпионаттың төбәк этабы еңеүселәре билдәләнде

Өфөнөң «Торатау» Конгресс-холлында «Профессионалдар» һөнәри оҫталыҡ буйынса чемпионаттың төбәк этабы еңеүселәре билдәләнде. Күләмле ярыш ике аҙна дауам итеп, 186 компетенция буйынса 3 меңдән ашыу ҡатнашыусыны берләштерҙе.

Өфөлә онкология һәм гематология үҙәге пациенттарына Көлкө көнө уңайынан байрам ойошторолдо

Ҡатмарлы сир менән ауырыусы сабый һәм үҫмерҙәрҙең кәйефен күтәреү өсөн. Республика балалар клиник дауаханаһының яңыраҡ асылған онкология һәм гематология үҙәге пациенттарына Көлкө көнө уңайынан байрам ойошторолдо. Уны «Изгелек эшлә» командаһы үткәрҙе. Әле үҙәктә 50-нән ашыу бәләкәй пациент дауалана.

Дыуан районында «Сыңрау торна» башҡорт фольклорының төбәк фестивале конкурсы тамамланды

Халыҡ ижадын халыҡҡа еткереүселәр майҙан тотто. Дыуан районында «Сыңрау торна» башҡорт фольклорының төбәк фестивале конкурсы тамамланды. Ике көн дауамында барған сарала республиканың ике тиҫтәләп ижади коллективы тамашасыларға үҙ ерлегенә хас йолаларҙы сәхнәләштерҙе.

Өфөлә Бөтә Рәсәй инклюзив фестивалдең республика этабы башланды

Сараға педагогтар, психологтар, табиптар, йәмәғәт эшмәкәрҙәре, ата-әсәләр һәм аутизм сирле балалар саҡырылған. Фестиваль майҙанында түңәрәк өҫтәлдәр, оҫталыҡ дәрестәре, ҡул эштәре, ижад емештәре күргәҙмәһе, махсус китаптар һатыу ойошторолған. Ошонда уҡ аутист балалар өсөн тәғәйенләнгән аш-һыу менюһы менән танышырға мөмкин

Яҙғы ташҡынға әҙерлек юғары кимәлдә

Өҙлөкһөҙ яуған ямғыр һәм көндәр йылытыу һөҙөмтәһендә республиканың тиҫтәнән ашыу районында урынлашҡан тораҡ пункттар һыу ҡамауында ҡалды. Оло һыуға эләккән тәүге райондарҙа ҡотҡарыу эштәре хаҡында киләһе яҙмала.

Республика халҡы бер тәүлектә мутлашыусыларға 2 миллион һум аҡса күсергән

Эске эштәр министрлығынан хәбәр итеүҙәренсә, 82 йәшлек пенсонерға шылтыратып, ҡыҙының йәнәһе лә авария ойоштороуҙа ғәйепле булыуы тураһында хәбәр иткәндәр. Енәйәт эшен башламау өсөн 600 мең һум күсерергә күндергәндәр. Өфөнән тағы бер ҡатын аҡсаһын инвестиция итеп һалырға ҡарар иткән. 79 йәшлек ханым йәнәһе табыш килтереүсе интернет-баҙарға 470 мең һум һалған. Унан һуң тағы шунса суммаға кредит алған. Салауат ҡалаһынан 34 йәшлек ҡатынға шылтыратып аҡсаһын һаҡлап ҡалыу кәрәклеге тураһында әйткәндәр. Шәхси мәғлүмәттәрҙе асыҡлағандан һуң мутлашыусылар уның иҫәбенә 566 мең һумлыҡ кредит алған.

Татарстанда пилотһыҙ осоу аппараттары ике предприятиеға һөжүм иткән

Татарстанда пилотһыҙ осоу аппараттары «Алабуға» махсус иҡтисади зонаһы территорияһына, республиканың Алабуға һәм Түбәнге Кама предприятиеларына һөжүм иткән. Ете кешенең яраланыуы тураһында билдәле.

«Етди емереклектәр юҡ, предприятиеларҙың технологик процесы боҙолмаған. Ҡыҙғанысҡа ҡаршы, Алабуғала бинаның емерелеүе һөҙөмтәһендә зыян күреүселәр бар. Уларға барлыҡ тейешле ярҙам күрһәтелә», – тиелә рәсми хәбәрҙә.

Башҡортостанда халыҡ һаны кәмегән

Республикала 4 миллион 64 меңдән ашыу кеше йәшәй. Бер йыл элек был һан 13 меңгә күберәк булған. Ил буйынса ла шундай хәл күҙәтелә. Бер йылда халыҡ һаны 296 меңгә кәмегән. Әле Рәсәйҙә 146 миллион 447 мең кеше теркәлгән, тигән мәғлүмәттәр бирә Статистика хеҙмәте.

⚡В небе над Уфой и пригородами во вторник будет летать БПЛА самолетного типа

Сегодня 2 апреля над территорией уфимского Затона и северной части столицы будут летать дроны и БПЛА самолетного типа. Эта техника участвует в поисках двух пропаших подростков - Павла Паличева и Дамира Адигамова. Напомним, сотрудники МЧС, МВД и волонтеры поисково-спасательного отряда "Лиза Алерт" занимаются поиском школьников уже трое суток.

Как сообщили телеканалу БСТ в ПСО "Лиза Алерт", сегодня в рамках поисковой операции было принято решение поднять в воздух БПЛА для того, чтобы исследовать поверхность реки Белая и окрестностей. В связи с этим жителей Уфы, пригородов и Благовещенского района предупреждают о появлении в воздухе беспилотника самолетного типа

Татарстанда пилотһыҙ осҡостар һөжүмендә һәләк булғандар юҡ

Бөгөн төндә һәм иртән Түбәнге Кама ҡалаһында заводты һәм “Алабуға” махсус иҡтисади зонаһында шартлауҙар булған. Биналарға өс пилотһыҙ осҡос һөжүм иткән. Ваҡиғала алты кеше зыян күргән, етди емереклектәр юҡ, заводтар эшмәкәрлеге туҡтатылмаған.

Өфөлә юғалған үҫмерҙәрҙе эҙләүҙә дрондар ҡулланыла

Баш ҡала граждандарҙы яҡлау идаралығынан хәбәр итеүҙәренсә, Октябрь һәм Орджоникидзе райондарында баҡсасылыҡ ширҡәттәре һәм урман биләмәһендә, шулай уҡ Ағиҙел йылғаһы буйында пилотһыҙ осҡостар һауаға күтәрелә. Халыҡҡа артыҡ хафаланмаҫҡа һәм уяу булырға үтенәләр. 13 һәм 14 йәшлек үҫмерҙәр 30 март кис юғалды. Уларҙы эҙләүҙә 100-ҙән ашыу ҡотҡарыусы, волонтер йәлеп ителгән.

Афарин, БСТ!

Әлеге минуттарҙа Өфөнөң «Динамо» стадионында легендар диктор Әхәт Мортазин иҫтәлегенә волейбол турниры бара.

Матбуғат баҫмалары, телевидение һәм радио компания хеҙмәткәрҙәре һәм республика артистары ҡатнашҡан ярышта БСТ каналының йыйылма командаһы лайыҡлы өсөнсө урын яуланы. Беренсе урын өсөн көрәште «Рәсәй-Башҡортостан» телеканалы командаһы һәм Әхәт Мотаһар улы Мортазиндың туғандары дауам итә.

Еңеүселәргә ҡиммәтле приздар һәм бүләктәр тапшырыласаҡ.

Мәрйәм Бураҡаева исемендәге Иҫәнғол ауылы башҡорт гимназияһында был эш юғары кимәлдә ойошторолған

Уҡыусыларға профориентация. Мәрйәм Бураҡаева исемендәге Иҫәнғол ауылы башҡорт гимназияһында был эш юғары кимәлдә ойошторолған. Йәш тарихсылар, журналистар, экскурсоводтар эшмәкәрлеге менән беҙҙең ижади төркөм дә танышты. Был хаҡта тулыраҡ киләһе яҙмала.