Башҡортостанда сәнәғәт үҫешкән

Быйыл 11 айҙа күрһәткестәр 6,8 процентҡа яҡшырған. Һөҙөмтәләр ил буйынса һандарҙан яҡшыраҡ. Статистика хеҙмәтенән хәбәр итеүҙәренсә, иң ҙур үҫеш эшкәртеү сәнәғәтендә һәм энергетикала теркәлгән. Республикала тармаҡта ыңғай күрһәткестәр апрель айынан күҙәтелә.

Владимир Путиндан Яңы йыл менән ҡотлау килде

Президент Владимир Путин Республика Башлығы Радий Хәбиров исеменә Яңы йыл менән ҡотлау ебәрҙе. - Был байрамды иң изге хистәр менән ҡаршы алабыҙ. Теләктәр ҡабул булһын, - тиелә Президент ҡотлауында. Хөкүмәт рәйесе Михаил Мишустиндан да ҡотлау бар. - Уҙып барған йыл илебеҙ өсөн мөһим ваҡиғаларға бай булды. Ул беҙҙе тағы берләштерҙе. Ҡаршылыҡтарҙы үтергә, ҡуйылған маҡсаттарға ирешергә өйрәтте. 2024 йыл уңышлы булһын, ныҡлы һаулыҡ теләйем, - тиелә ҡотлау хатында. Радий Хәбиров исеменә Президенттың Волга буйы округындағы тулы хоҡуҡлы вәкиле Игорь Комаровтан да ҡотлау килде.

Республика кардиоүҙәгенә яңы медицина ҡорамалдары тапшырылды

“Йөрәк-ҡан тамырҙары ауырыуҙары менән көрәш” төбәк программаһына ярашлы, УЗИ һәм ИВЛ аппараттары ҡайтарылды. Бының өсөн 17 миллион һум бүленде. Яңы ҡорамалдар медицина ярҙамы күрһәтеү сифатын яҡшыртырға мөмкинлек бирә, тип хәбәр итәләр Һаулыҡ һаҡлау министрлығынан.

Республикала 1 ғинуарҙан сүп-сар түләү өсөн хаҡ артмай

Тәбиғәттән файҙаланыу һәм экология министрлығынан белдереүҙәренсә, тариф күтәрелеүгә бәйле хәбәрҙәр дөрөҫлөккә тап килмәй. Социаль селтәрҙәрҙә киләһе йылдан сүп-сар түләү өсөн хаҡ 160-320 һумға күтәреләсәк тигән имеш-мимеш таралғайны. Республика 5 зонаға бүленгән. Төбәк операторҙары һәр кешенән 90-109 һум ала. Ҡаты көнкүреш ҡалдыҡтарын сығарыу өсөн тариф 1 июлдә 3-9 процентҡа күтәрелә.

Рәсәйҙә яңы йылдан кредит каникулы даими ғәмәлдә була

Матди хәле ауырлашҡан кеше түләүҙе кисектәре ала. Кредит каникулы менән 6 айға тиклем файҙаланырға мөмкин. Бының өсөн банкка тейешле белешмә тапшырырға кәрәк. Кредит каникулы кеүек алым 2020 йылда коронавирус пандемияһы ваҡытында индерелде. 2022 йылда махсус хәрби операция башланғас ул ҡайтанан ҡулланылды. 2024 йылдан кредит каникулы даими була.

Бөгөн Республикала Спорт һәм сәләмәтлек 10 көнлөгө старт ала

Каникулда 500-ҙән ашыу сара уҙғарыла. Бөгөн һәр кеше "Вәғәҙәләр йүгереше"ндә ҡатнаша ала. Республика баш ҡалаһында Ленин майҙанында, "Карауанһарай"ҙа һәм "Ҡашҡаҙан" паркында йыйылыусылар 2 мең 24 метрға йүгерә. Өфөлә был көндәрҙә 32 каток, 22 саңғы трассаһы халыҡты ҡабул итергә әҙер. Шулай уҡ фехтование, биатлон, шахмат буйынса ярыштар уҙғарыла.

Республикала бер кеше янып үлгән

2024 йылда ут сығыуға бәйле тәүге фажиғә Шишмә районында теркәлде. Кузьминка ауылында бер ҡатлы йорт янып киткән. Уның хужалары утты үҙ аллы һүндерергә маташҡан. 55 йәшлек ир һәләк булған. 64 йәшлек ҡатындың тәне бешкән, ул дауаханаға һалынған, тип хәбәр итәләр Ғәҙәттән тыш хәлдәр министрлығының республика идаралығынан.

Халыҡ үтенестәрен хәл итеү буйынса иң әүҙем район һәм ҡалалар аталды

Республика менән идара итеү үҙәге 2023 йыл һөҙөмтәләре буйынса рейтинг әҙерләгән. Унда социаль селтәрҙәрҙә халыҡ мөрәжәғәттәренә яуап биреү һәм мәсьәләләрҙе ни тиклем тиҙ хәл итеү күрһәткесе иҫәпкә алынған. Ҡалалар араһында Октябрьский, Салауат, Сибай, Межгорье һәм Нефтекама, райондарҙан – Стәрлетамаҡ, Благовещен, Ҡалтасы, Яңауыл, Баймаҡ алдынғылар исемлегендә күрһәтелгән.

Яңы йыл төнөндә күп балалы ғаилә йортһоҙ ҡалған

Бөгөн төндә Дүртөйлө районы Әңгәсәк ауылында янғын булған.  8 кешенән торған ғаилә янғын иҫкәртеү приборын ишетеп тышҡа сығып өлгөргән. Тәүге мәғлүмәттәр буйынса ут ихатаны биҙәгән гирлянданан сыҡҡан, тип  хәбәр итәләр Ғәҙәттән тыш хәлдәр министрлығынан. Бөгөн төндә  Шишмә районында ла янғын булған. Бер кешенең ғүмере өҙөлгән.

Башҡортостанда инвестиция шарттары яҡшыра

Республикала быйыл 66 миллиард һумлыҡ 130-ҙан ашыу инвестиция проекты тормошҡа ашырыла башлаған. Башҡортостан Үҫеш корпорацияһы белгестәре бизнесҡа ярҙам итә. Инвесторҙарға төҙөлөш өсөн ер сауҙа үткәрелмәйенсә бирелә, ҡайһы бер проекттар өҫтөнлөклөләр исемлегенә индерелә һәм һалым льготалары тәҡдим ителә. Эшҡыуарҙарға уңайлы булһын өсөн буш майҙансыҡтар буйлап виртуаль тур эшләнгән. Әле 400-гә яҡын биләмәне онлайн ҡарарға була.

"Өфө" сик буйы патруль карабы илде һаҡлау буйынса бурысын үтәй башлай

Тейешле һынауҙар үткәрелде. Был турала Өфө ҡала хакимиәте башлығы Ратмир Мәүлиев хәбәр итә. 2022 йылдың 4 июнендә Федераль именлек хеҙмәтенең сик буйы хеҙмәте етәкселеге ҡарары менән патруль караптарының береһенә "Өфө" исеме бирелде. Бындай караптар һыу биләмәләрен һаҡлау, балыҡсылыҡ эшмәкәрлеген контролдә тотоу өсөн ҡулланыла.

Башҡортостанда хәмер һатыу сикләнә

Яңы йыл каникулында, 3, 4 һәм 5 ғинуарҙа киске биштән иртәнге 10-ға тиклем спиртлы эсемлек алып булмай. 6 ғинуарҙа бындай сикләү сәғәт биштән төнгө 11-гә тиклем ҡаралған. Закон кафе, ресторан һәм барҙарға ҡағылмай. Сикләүҙе боҙған ойошмаларға 300 мең һумға тиклем штраф һалына.

Өфөлә 8 автобус маршруты бөтөрөлә

Ҡала хакимиәтенән белдереүҙәренсә, уларҙың ҡайһы берәүҙәре башҡа маршруттарҙы ҡабатлай, шулай уҡ халыҡ аҙ йөрөгән йүнәлештәр бар. Ошоно иҫәпкә алып яңы йылдан 243-сө, 285-се, 204-се һәм башҡа маршруттарҙы ябыу тураһында ҡарар ҡабул ителгән. Тулы исемлек менән хакимиәт сайтында танышырға мөмкин.

Водитель танытмалары ғәмәлдән сыҡмай

2024-25 йылда алмаштырылырға тейешле водитель танытмаларын тағы өс йыл ҡулланып була. Был турала Эске эштәр министрлығынан хәбәр итәләр. Хөкүмәт ҡарары менән рәсми мәғлүмәттәр порталында танышырға мөмкин. Был яңылыҡ ил буйынса 5 миллиондан ашыу водителгә ҡағыла.

Яңы йылдың тәүге сәғәттәрендә Башҡортостанда 10 сабый донъяға ауаз һалған

Уларҙың 6-ы ҡыҙ һәм дүртәүһе малай. Сабыйҙарҙың ата-әсәләрен социаль селтәр аша республика башлығы Радий Хәбиров та тәбрикләне. Төбәк етәксеһе,ш улай уҡ медицина хеҙмәткәрҙәренә лә рәхмәт һүҙҙәре еткереп, аҡ халатлылар эш көндәрендә һәм байрамдарҙа ла үҙ эшен сифатлы һәм ихлас башҡара, тип билдәләне.

Радий Хәбиров, һауа шарттары үҙгәреүен күҙ уңында тотоп, республика халҡына мөрәжәғәт итте

Үҙегеҙҙе һаҡлағыҙ! Башҡортостан башлығы Радий Хәбиров, һауа шарттары үҙгәреүен күҙ уңында тотоп, республика халҡына мөрәжәғәт итте. «Башҡортостанда 2 градустан 20 градусҡаса һыуытты. Көн ҡояшлы, матур. Әммә юлда һаҡ булығыҙ. Тауҙарға, сәйәхәткә сығырҙан алда, тәңҙә 112 телефонына шылтыратып, ҡайҙа барыуығыҙҙы һәм ҡасан ҡайтырға йыйыныуығыҙҙы хәбәр итегеҙ. Барығыҙға ла уңыштар теләйем! Үҙегеҙҙе һаҡлағыҙ, тип белдергән төбәк етәксеһе.

Баш ҡалала уҙған «Терра Ҡыш» фестивале сиктәрендә самауырҙар бәйгеһе үтте

Еҙ, әтәс, сиған һәм электр самауырҙары. Баш ҡалала уҙған «Терра Ҡыш» фестивале сиктәрендә самауырҙар бәйгеһе үтте. Унда Башҡортостандың һәм Рәсәйҙең төрлө төбәктәренән шәхси коллекционерҙар, йәмәғәт туҡланыуы ойошмалары, район хакимиәттәре ҡатнашты. Совет майҙанында боҫлап ҡайнаған самауыр сәйенән репортаж.

Ауырғазы районынан кәсепсе Өфөнөң 450 йыллығына балсыҡтан сувенирҙар әҙерләй башлаған

Өфөнөң 450 йыллығына балсыҡтан сувенирҙар. Ауырғазы районынан кәсепсе Зәки Нагаев күләмле байрам сараларына әленән әҙерлек башлаған. Ҡунаҡтарға ул баш ҡала тураһында иҫтәлеккә магнит, визитка һалыу ҡулайламалары, панно, тирмәләрҙең бәләкәй күсермәһен эшләй. Оҫтаханала урындағы колледж студенттары ла ижади һәләттәрен аса.

Башҡортостанда урман янғындарын һүндереү техникаһы алына

Киләһе йылда бының өсөн 39 миллион һумдан ашыу тотоноу планлаштырыла. "Экология" милли проекты буйынса шунда сумма ҡаралған. Был аҡса 7 янғын һүндереү машинаһын алыуға тәғәйенләнә. Урман хужалығы министры Марат Шәрәфетдинов белдереүенсә, 2023 йылда 49 яңы техника алынған, заманса машиналар урман биләмәләрен һаҡлап ҡалыуға булышлыҡ итә.

Быйыл "Башҡортостан тауары" проектына 800 компания ҡушыла

Был турала Премьер-министр Андрей Назаров социаль селтәрҙә хәбәр итә. - Башҡортостандың һәр районы уникаль тауары менән билдәле. Бал, икмәк, он, һөт продукцияһы, колбаса, шоколад, ҡаҡ, сәй, май, ҡош-ҡорт һәм башҡаһы. Иң сифатлы тауар махсус билдә менән тамғалана. 2024 йылда проектта ҡатнашыусылар һанын арттырырға планлаштырабыҙ. "Башҡортостан тауарына" өҫтөнлөк биреүселәр күбәйә бара, - тип яҙа ул. Проект республикала 2013 йылдан ғәмәлгә ашырыла.