Салауат Юлаев батальоны яугиры алғы һыҙыҡҡа килгән хат адресаты менән осрашты

Өфөнөң һаңғырауҙар һәм насар ишетеү-селәр өсөн 30-сы коррекция интернат тәрбиәләнеүселәре «Һалдатҡа хат» акцияһында ҡатнашҡан. «Симба» ҡушаматлы яугир уҡыусыларға хәрбиҙәрҙең рәхмәт һүҙҙәрен еткерҙе, уларҙың һорауҙарына яуап бирҙе. Һәр тәрбиәләнеүсе үҙенең яҡшы билдәләре, лайыҡлы тәртибе, алғы һыҙыҡҡа яҙған хаттары менән еңеүгә үҙ өлөшөн индерә, тип билдәләне Салауат Юлаев батальоны яугиры .

Өфөлә профсоюздар республика шыршы байрамы ойошторҙо

Ҡыш бабай, Ҡарһылыу һәм әкиәт геройҙары ҡатнашлығындағы сағыу байрамға профсоюз ойошмаһы ағзалары балаларынан тыш, социаль учреждениеларҙа тәрбиәләнеүселәр һәм махсус хәрби операция биләмәһендә ҡатнашҡан яугир ғаиәләренән балалар ҙа саҡырылды.

Башҡортостан ашлыҡ һатыуҙы икеләтә арттырған

Ауыл хужалығын күҙәтеү хеҙмәтенең төбәк идаралығынан хәбәр итеүҙәренсә, быйыл 11 айҙа 23 төбәккә 461 мең тонна иген оҙатылған. Улар араһында Алтай крайы, Ҡырым, Татарстан, Новосибирск өлкәһе, Луганск халыҡ республикаһы бар. Рәсәй төбәктәренә бойҙай, арпа һәм көнбағыш эшкәртеүгә экспортлана. Сеймал лабораторияларҙа ентекле тикшерелә.

Еңеү өсөн берләштек, - ти Бүздәк халҡы

Ҡала һәм райондарҙа йәшәүселәр махсус хәрби операцияға ярҙам итә. Халыҡ яугирҙәр өсөн кәрәк-яраҡ туплай, маскировка септәһе үрә, йылы ойоҡ, бейәләйҙәр бәйләй. Бүздәк халҡы ла еңеүҙе яҡынайтыуға өлөш индерә. Райондың “Сәхипьямал” татар ҡатын-ҡыҙҙары ойошмаһы вәкиле Фирүзә Буранғолова шулай тип белдерҙе.

Башҡортостанда грипп һәм һалҡын тейҙереп сирләгәндәр кәмегән

Уҙған аҙнала республика 29 мең кеше табиптарға мөрәжәғәт иткән. Был һан ике аҙна элек булған күрһәткестән 8 процентҡа аҙыраҡ. Ҡулланыусылар хоҡуғын күҙәтеү хеҙмәте төбәк идаралығынан белдереүҙәренсә, сирле бәләкәй пациенттар һаны кәмей бара. Ата-әсәләргә балаларҙа киҙеү асыҡланған осраҡта, мәктәпкә ебәрмәҫкә һәм табип саҡыртырға кәңәш ителә.

Мөғжизәгә бай тамаша!

Башҡортостан юлдаш телевидениеһы Яңы йыл шоуы тәҡдим итә.

Башҡортостан Башлығы Дәүләт Йыйылышы - Ҡоролтайға йыллыҡ мөрәжәғәтнамәһе менән сығыш яһаны

2024 йыл Башҡортостанда һаулыҡ мөмкинлектәре сикләнгән кешеләр тураһында хәстәрлек йылы тип иғлан ителде. Был турала Башҡортостан башлығы Радий Хәбиров Дәүләт Йыйылышы - Ҡоролтайға йыллыҡ мөрәжәғәтнамәһендә белдерҙе. Тәҡдимгә ярашлы, инвалид кешеләр йәшәгән ғаиләләргә, балаларға, махсус хәрби операцияла ҡатнашып һаулығына зыян килгән яугирҙарға күп яҡлы ярҙам сараларын ойоштороу күҙ уңында тотола. Радий Хәбиров сығышында алдағы йылдарға төбәктең социаль-иҡтисади үҫеш йүнәлешен билдәләп, йыл йомғаҡтарын барланы.

Бөрйән районы ҡатын-ҡыҙҙары яугирҙарға өс бармаҡлы бирсәткәләр бәйләй

Бөрйән районы ҡатын-ҡыҙҙары махсус хәрби операциялағы яҡташтарбыҙға өс бармаҡлы бирсәткәләр бәйләй. Әле һәр ауыл клубында кис ултырыуҙар бара. Оҫталар шулай уҡ блиндаж шәмдәре лә эшләй. Бөрйәндәрҙең күңел йылыһы ҡушып әҙерләгән гуманитар ылауҙары тураһында репортаж.

Өфөлә Ростех корпорацияһының етештереү-уҡытыу үҙәге Башҡортостан заводтары өсөн белгестәр әҙерләй

Үҙҙәренә кадрҙар әҙерләп. Өфө моторҙар төҙөү производство берекмәһендә Ростех корпорацияһының етештереү-уҡытыу үҙәге Башҡортостан заводтары өсөн белгестәр әҙерләй. Был Рәсәйҙәге беренсе майҙансыҡ. Унда эшсе һөнәрҙәрҙен үҙләштереү буйынса заманса программа тормошҡа ашырыла

“Башҡорт ихаталары” программаһы киләһе йылда ла ғәмәлгә ашырыла

Был турала Радий Хәбиров Дәүләт Йыйылышы –Ҡоролтайға Мөрәжәғәтнамәһендә белдерҙе. “Халыҡ проектҡа бик рәхмәтле һәм төҙөкләндереүҙе дауам итеүҙе көтә” - тине Республика Башлығы. Башҡортостанда киләһе йылдан тағы бер программа - “Башҡорт йорто” проекты тормошҡа ашырыла башлай. Радий Хабиров Республика Хөкүмәтенә 1 апрелгә тиклем концепция программаһын һәм финанс мәсьәләләрҙе хәл итергә ҡушты.

Рәсәйҙә Яңы йыл байрамдарында сикләү һәм битлек тәртибе булмай

Баш санитар табип Анна Попова шулай тип белдерҙе. Илдә грипп һәм тын юлдары менән ауырыуҙары менән сирлеләр һаны артыуы күҙәтелә. Ҡайһы бер төбәктәрҙә күрһәткестәр юғары ҡала. Башҡортостанда сирлеләр һаны кәмеүе теркәлгән, тип белдерҙеләр Ҡулланыусылар хоҡуғын күҙәтеү буйынса төбәк идаралығынан. “Ҡышҡы каникулға бәйле сикләүҙәр булмай, ләкин шәхси санитар-гигиена профилактикаһын онотмаҫҡа кәрәк”, - тип иҫкәртте Анна Попова.

Өфө программистары милли технологиялар конкурсында еңеү яулап 100 миллион һумлыҡ призға лайыҡ булды

Башҡортостан командаһы составында өс кеше - Сәлим Байгилдин, Илназ Фәтҡуллин,Тимур Иҙрисов. Улар өсөһө лә республикалағы юғары уҡыу йорттарын тамамлаған. Егеттәр юғалған кешеләрҙе эҙләү буйынса программа әҙерләгән. Ошо маҡсатта улар 6 мең мәғлүмәтте, йәғни фотоһүрәттәрҙе һәм кординаталарҙы үҙ эсенә алған күләмле база туплаған. Нейроселтәр ярҙамында пилотһыҙ аппараттарҙы ҡулланып юғалған кешеләрҙе табып була.

Ишембай районы Торатау итәгендә Ҡыш бабай ауылы асылды

Шихан ауылында урынлашҡан Ҡыш бабай тирмәһендә БЮТ ижади төркөмө лә булды.

Башҡортостанда Бөрө йылғаһы аша күперҙә капиталь ремонт аҙағына яҡынлаша

Мишкә районында 33 метрлыҡ объект ремонтлана. Бының өсөн 30 миллион һумдан ашыу аҡса бүленде. “Күпер халыҡ өсөн кәрәк. Ул Бөрө-Таҙтүбә-Һатҡы юлы аша ята. Республиканың төньяҡ-көнсығыш райондары күрше төбәктәр менән тоташтырыла,” - тине Транспорт һәм юл хужалығы министры Александр Клебанов. Эштәр "Хәүефһеҙ сифатлы юлдар" милли проекты буйынса ғәмәлгә ашырыла. Күпер киләһе йылда файҙаланыуға тапшырыла.

Башҡортостан тыуым буйынса илдәге алдынғы төбәктәр исемлегендә

Һүҙ октябрь айы күрһәткестәре тураһында бара. Көҙҙөң икенсе айында республикала 2 мең 865 сабый донъяға килгән. Чечня республикаһы һәм Ростов өлкәһенән ҡала был өсөнсө һан. Ғаилә, хеҙмәт һәм халыҡты социаль яҡлау министрлығы мәғлүмәттәре буйынса Башҡортостанда быйыл 29 мең 900 бала тыуған.

Республикала юлдар төҙөкләндерелә

Башҡортостанда милли проект буйынса Өфө һәм Стәрлетамаҡ агломерацияларында 32 километр юл тәртипкә килтерелгән. Транспорт һәм юл хужалығы министрлығынан хәбәр итеүҙәренсә, быйыл 14 урында ремонт үткәрелгән. Бының өсөн 502 миллион һум тотонолған. Өфө, Иглин, Нуриман, Благовещен, Архангел, Стәрлетамаҡ, Ғафури, Кушнаренко райондарында юл төҙөкләндерелде. “Хәүефһеҙ сифатлы юлдар” милли проекты буйынса Өфө һәм Стәрлетамаҡ агломерацияларында ремонт киләһе йылда ла дауам итә.

Рәсәйҙә инфляция 7,5 процентҡа еткән

Үҙәк Банктан хәбәр итеүҙәренсә, бер айҙа был күрһәткес яҡынса 1 процентҡа артҡан. Ноябрҙә емеш һәм йәшелсә, йомортҡаға хаҡ күтәрелгән, туризм һәм пассажирҙар йөрөтөү хеҙмәттәре ҡиммәтләнгән. Эксперттар фекеренсә, йыл аҙағына инфляция 7,5 процент кимәлендә ҡалырға тейеш.

Торатау итәгендә Ҡыш бабай резиденцияһы асылды

Ҡыш бабай менән Ҡарһылыу тирмәлә ҡунаҡтарҙы 7 ғинуарға тиклем ҡабул итә. Ауылға барыу өсөн 8 (987) 254-20-24 телефоны буйынса алдан яҙылырға кәрәк. Ҡыш бабайҙың Өфөләге резиденцияһы 24 декабрҙә эш башлай. Быйыл ул “Азимут” ҡунаҡханаһы алдындағы скверҙа урынлаша.

Баймаҡта балалар поликлиникаһы 29 декабрҙә асыла

Был турала Һаулыҡ һаҡлау министры Айрат Рәхмәтуллин белдерҙе. “Бөтәһе лә яңы объектты килеп күрһен өсөн асыҡ ишектәр көнөн үткәрәбеҙ”, - тине ведомство етәксеһе. Башҡортостан Башлығы Радий Хәбиров был көндө эш сәфәре менән республиканың төньяҡ-көнсығышына барырға йыйыныуын әйтте. Шуға ла һаулыҡ һаҡлау учреждениеһын асыу тантанаһы видеоконференция тәртибендә ойошторола.

Махсус хәрби операцияла ҡатнашҡандарға бушлай ер биләмәһе бирелә

Республика Ер һәм мөлкәт мөнәсәбәттәре министры Наталья Полянская әйтеүенсә, был программа хәрби наградалар менән бүләкләнгән һалдаттар йәки алғы һыҙыҡта һәләк булған яугирҙәрҙең ғаиләләре өсөн тәғәйенләнгән.Яугирҙәр һәм уларҙың ғаиләләре һаулыҡтарын да нығыта ала. Бының өсөн бушлай сертификат тапшырыла. Республикала махсус хәрби операцияла ҡатнашҡандарға һәм уларҙың ғаиләләренә 40-ҡа яҡын ярҙам сараһы булдырылған.