Башҡортостан парламенты алдағы йылдарға бюджетты ҡабул итте

Закон проекты бөгөн Дәүләт Йыйылышы-Ҡоролтайҙың пленар ултырышында ҡаралды. Федераль ҡаҙнанан бүленгән аҡсаны иҫәпкә алып бюджетҡа төҙәтмәләр индерелде. Депутаттар алдында вице-премьер-Финанс министры Лира Иғтисамова сығыш яһаны. Алдағы йылдарҙа торлаҡ төҙөлөшө, юлдарҙы ремонтлау, мәктәптәрҙе яңыртыуға субсидия арта. Агросәнәғәт комплексында яңы проекттар, өлкәндәр һәм инвалидтарға ярҙам, спорт объекттары төҙөлөшөнә, электромобилдәр өсөн инфраструктура булдырыуға күберәк аҡса бүленә.

Владимир Путин йыл йомғаҡтарына арналған тура бәйләнеш үткәрҙе

Рәсәйҙә суверенитетты нығытыу - төп бурыстарҙың береһе. Был турала ил президенты Владимир Путин йыл йомғаҡтарына арналған Тура бәйләнеш барышында билдәләне. Дәүләт етәксеһе махсус хәрби операция, илдең иҡтисади ныҡлыҡ запасы, аҙыҡ-түлек хәүефһеҙлеге һәм башҡа һорау-мөрәжәғәттәргә аныҡлыҡ индерҙе. Тура бәйләнештә күтәрелгән төп темалар хаҡында ентекләберәк видеояҙмала.

Бөгөн Дәүләт Йыйылышы - Ҡоролтайҙың етенсе саҡырылышының дүртенсе ултырышы үтте

Көн тәртибенә 40-лап мәсьәлә ҡаралды. Депутаттар закон проекттарын тикшерҙе, урындарҙағы мирауай судъялар тәғәйенләнде. Ултырыштың төп темаһы Рәсәй һәм Башҡортостан конституцияларының 30 йыллығы.

Өфөлә «Белемле.ру» белешмә-мәғлүмәт порталы эш башланы

Республика башлығы гранты ярҙамында ул Тарих, тел һәм әҙәбиәт институты ғалимдары тарафынан тормошҡа ашырылған. Башҡорт теле көнөнә арналған саралар бөгөн мәғариф һәм ғилми учреждениеларҙа киң билдәләнде. Ғәли Ибраһимов исемендәге 2-се Башҡорт лицейы уҡыусылары флешмоб үткәрһә, ә «Остаз» республика конкурсы финалында Уҡытыусы һәм остаз йылына йомғаҡ яһалды.

Өфө фән һәм технологиялар университетында электр машиналары буйынса Бөтә Рәсәй конференцияһы асылды

Өфө фән һәм технологиялар университетында электр машиналары буйынса Бөтә Рәсәй конференцияһы асылды. Сара «Киләсәк моторҙары» алдынғы инженер мәктәбе башланғысы менән икенсегә ойошторолдо. Мәртәбәле осрашыуға партнер компаниялар вәкилдәре, күренекле ғалимдар, шулай уҡ башҡа алдынғы инженерлыҡ мәктәптәре вәкилдәре саҡырылды.

Киләһе йылдың 1 ғинуарынан пенсия арта

Социаль фондтан белдереүҙәренсә, индексация эшләмәгән граждандарҙың страховка пенсияһына ҡағыла. Шулай уҡ билдәләнгән түләү күтәрелә, 1 ғинуарҙан ул 8134 һум була. Шәхси пенсия коэффициенты хаҡы 133 һумға етә. Индексация автоматик рәүештә башҡарыла, соцфондҡа мөрәжәғәт итеү талап ителмәй.

Илеш районының Үрмәт ауылында яңы фельдшер-акушер пункты файҙаланыуға тапшырылды

Ул “Сәләмәтлек” милли проекты ярҙамында төҙөлгән. учреждение халыҡҡа сифатлы ярҙам күрһәтеү өсөн заманса ҡорамалдар менән йыһазландырылған. Унда процедура һәм прививка яһау кабинеттары, ҡабул итеү урыны, дарыу һаҡлау һәм персонал өсөн айырым бүлмәләр булдырылған. Яңы ФАП 400-ҙән ашыу кешене хеҙмәтләндерә.

Башҡортостанда яңы геопарк барлыҡҡа килеүе көтөлә

Хөкүмәттә шундай тәҡдим яңғыраны. Белорет районында “Ирәмәл” тәбиғәт паркы биләмәһендә геопарк булдырыу мәсьәләһе өйрәнелә. Уны грант аҡсаһы, инвесторҙар һәм бағыусылар иҫәбенә финанслау ҡарала. Республика Башлығы Радий Хәбиров профилле министрлыҡтарға тәҡдимде ентекләп тикшерергә ҡушты. Әле Башҡортостанда “Янғантау” һәм “Торатау” геопарктары эшләп килә.

"Теләктәр шыршыһы" республика балаларының хыялын тормошҡа ашыра

Ул "Берҙәм Рәсәй" партияһының төбәк бүлексәһе ярҙамы менән ойошторола. Акцияға Рәсәй составына быйыл ингән төбәктәрҙән, шулай уҡ махсус операцияла ҡатнашыусыларҙың балалары ҡушыла. “Башҡортостан” дәүләт концерт залына ингән урында махсус йәшник ҡуйыла. Яңы йыл теләктәре 29 декабргә тиклем ҡабул ителә.

Ауылдарҙа ФАПтар файҙаланыуға тапшырыла

Ауылдарға заманса медицина. Федоровка районы Златоустовка ауылында һәм Ҡариҙел районы Ҡарышйылға ауылында яңы модулле фельдшер-акушер пункттары файҙаланыуға тапшырылды. Медицина учреждениелары “Сәләмәтлек” милли проекты буйынса төҙөлгән. Унда процедура һәм прививка яһау кабинеттары, ҡабул итеү урыны, дарыу һаҡлау өсөн айырым бүлмәләр булдырылған. Медицина пункты Златоустовка ауылында - 220, Ҡарышйылғала 20-нән ашыу кешене хеҙмәтләндерә.

Башҡортостанда яңы йыл каникулында спиртлы эсемлек һатыу сикләнә

Сауҙа һәм хеҙмәттәр министрлығынан хәбәр итеүҙәренсә, республикала 3, 4 һәм 5 ғинуарҙа магазиндарҙа киске биштән һәм иртәнге унға тиклем алкоголь һатыу тыйыла. 6 ғинуарҙа 17 сәғәттән төнгө 11-гә тиклем сикләү ғәмәлдә була. Яңы йыл каникулында спиртлы эсемлектәр һатыуҙы тыйған закон 3 йыл элек ҡабул ителде.

Башҡортостандан быйыл 11 айҙа сит илдәргә 9 мең 200 тонна он оҙатылған

Был күрһәткес былтырғы ошо осорға ҡарағанда өс тапҡырға күберәк, тип хәбәр итәләр Ауыл хужалығын күҙәтеү буйынса төбәк идаралығынан. Әзербайжан, Әрмәнстан, Грузия, Ҡаҙағстан, Төркмәнстан һәм Үзбәкстанға он һатылған. Тауар ентекле тикшереү үткән һәм тейешле сифат баһаһын алған. Быйыл беренсегә Афғанстанға ла башҡорт оно экспортланды.

Башҡортостандың иң яҡшы йорттары.


Радий Хәбиров социаль селтәрҙә йыл һайын торлаҡ-коммуналь хужалыҡ министрлығы ойошторған конкурста еңгән ихаталар һәм подъездар тураһында яҙып сыҡты. Еңеүселәр «Иң яҡшы күп фатирлы йорт», «Иң яҡшы йорт алды ихатаһы», «Иң яҡшы подъезд» - барлығы өс номинацияла асыҡланған.

Инвесторҙарға көнкүреш химияһы тауарҙары етештерергә тәҡдим итәләр

Республика Хөкүмәтенән хәбәр итеүҙәренсә, Благовещен районында завод асыу ҡарала. Бында тәҙрә һәм һауыт-һаба йыйыу өсөн шыйыҡса сығарыласаҡ. Проект 234 миллион һумға баһалана, 42 кешегә эш урыны була. Инвесторға дәүләт яғынан ярҙам күрһәтелә.

Башҡортостан Ҡытайға етен оҙата

Ауыл хужалығын күҙәтеү төбәк идаралығынан хәбәр итеүҙәренсә, Әбйәлил районынан сит илгә 62 тимер юл вагонында 1 мең 615 тонна майлы культура ебәрелгән. Етендең сифаты лабораторияларҙа тикшерелгән һәм тейешле талаптарға тура килә.

Өфөлә Зинин юл үткәргесендә төҙөлөш эштәре 17 декабргә тиклем дауам итә

Башҡортостан Транспорт һәм юл хужалығы министрлығынан белдереүҙәренсә, объектта етешһеҙлектәр бөтөрөлә, өҫтәмә монтаж эштәре башҡарыла. Зинин ауылы эргәһендә тимер юл аша сыҡҡан күпер “Хәүефһеҙ сифатлы юлдар” милли проекты буйынса тормошҡа ашырыла.

Шаран районының Түбәнге Зәйет ауылы халҡы «Урындағы башланғыстарҙы яҡлау программаһы»нда ҡатнаша

Шаран районының Түбәнге Зәйет ауылы халҡы Башҡортостанда тормошҡа ашырылған «Урындағы башланғыстарҙы яҡлау программаһы»нда ҡатнаша. Ауыл халҡы программа ярҙамында юлдарҙы төҙөкләндерергә, мәҙәниәт йортон ремонтларға ниәтләй. Сара сиктәрендә Түбәнге Зәйеттәр бәлеш байрамы ойошторҙо.

Һөйөнсө!

Башҡортостан хөкүмәте премьер-министры урынбаҫары, СВО яугиры Азат Бадранов өсөнсөгә атай булған! Азат Шамил улының позывнойы - «13», тап 13 декабрҙә уның ҡыҙы тыуған!

Сабыйға һәм яҡындарына ныҡлы сәләмәтлек, бәхет һәм ғаилә именлеге теләйбеҙ!

#Һалдатҡахат

«Бүре» позывнойлы һалдатҡа Башҡортостандың халыҡ артисы Венер Камаловтан.

Башҡортостан Башлығы бөгөн эш сәфәре менән Баймаҡ районында булды

Радий Хәбиров төбәктә төҙөлгән һәм капиталь ремонт үткәрелгән социаль объекттарҙа булып эш сифатын тикшерҙе, киләсәккә бурыстарҙы билдәләне.