Өфөлә Мәжитов уҡыуҙары башланды

Ул танылған тарихсы һәм остаз Нияз Мәжитовың 90 йыллығына арнап ойошторола. “Боронғо дәүерҙә һәм Урта быуаттарҙа Үҙәк Евразия күскенселәре донъяһы” тигән темаға халыҡ-ара фәнни конференция уҙғарыла. Форумда Төркиә, Әзербайжан, Ҡаҙағстан, Ҡырғыҙстан һәм Үзбәкстан белгестәре ҡатнаша. “Быйылғы йыйын айырыуса үҙенсәлекле”, - ти Башҡортостан Күсемһеҙ мираҫ ҡомартҡыларын һаҡлау һәм файҙаланыу буйынса ғилми-етештереү үҙәк етәксеһе Данир Ғәйнуллин.

“Ватанды һаҡлаусылар” фондына 9 мең мөрәжәғәт ҡабул ителгән

Фондтың төбәк филиалы етәксеһе Гөлнур Ҡолһарина ошо турала белдерҙе. Ҡала һәм райондарға “Ярҙам поезы” сыға, белгестәр консультация бирә. “Ярҙам поезы” белгестәре 1 декабрҙә Бөрө ҡалаһында халыҡты ҡабул итә. Фонд филиалы Өфөнөң Минһажев урамындағы 107-се йортта урынлашҡан. Ул көн һайын иртәнге сәғәт 9-ҙан киске 6-ға тиклем эшләй. Бәйләнеш телефоны: 8-347-268-01-02.

Өфө районында кадеттар өсөн слет ойошторолдо

100-ҙән ашыу үҫмер «Огонек» лагеры базаһында ике көн дауамында кинологтар һәм ҡотҡарыусылар хеҙмәте менән яҡындан танышты, беренсе медицина ярҙамы күрһәтергә өйрәнде.

Республикала бөтә йорттарға йылы бирелгән

Башҡортостанда бөтә муниципалитеттар йылылыҡ миҙгелгә әҙерлек паспорттары алған. Торлаҡ-коммуналь хужалыҡ министры вазифаһын башҡарыусы Ирина Голованова Хөкүмәттә оператив кәңәшмәлә шулай тип белдерҙе. Иҫкәрмә яһалған район һәм ҡалалар етешһеҙлектәрҙе бөтөргән һәм тейешле документ алған.

Баш ҡалала Халыҡ-ара географик диктант ойошторолдо

Халыҡ-ара географик диктант Рус география йәмғиәте тарафынан йәмғиәттең попечителдәр советы рәйесе, Рәсәй Президенты Владимир Путин тәҡдиме буйынса үткәрелә. Мәғрифәтселек сараһы быйыл туғыҙынсы тапҡыр ойошторолдо.

Өфөлә Артур Әхмәтханов иҫтәлегенә арналған Бөтә Рәсәй турниры тамамланды

Өфөлә полиция генерал-лейтенанты Артур Әхмәтханов иҫтәлегенә арналған милли көрәш буйынса Бөтә Рәсәй турниры тамамланды. Быйылғы бәйгелә илдең төрлө төбәктәренән 150-нән ашыу спортсы ҡатнашты. Һәр ваҡыттағыса лидерҙар үҙҙәренең оҫталығын раҫланы, әммә турнирҙа көтөлмәгән асыштар ҙа булды, шул иҫәптән ярыш дебютанттарынан.

Кушнаренко районында янғынға ҡаршы рейд үтте

Һүндерелмәгән тәмәке төпсөгө, электр линияһындағы ҡыҫҡа ялғаныш, уларҙың иҫкереүе, хәүефһеҙелек ҡағиҙәләрен инҡар итеү. Ғәҙәттән тыш хәлдәр буйынса дәүләт комитеты хеҙмәткәрҙәре янғын хәүефһеҙлеге буйынса тикшереү үткәрҙе. Кушнаренко районы Шәрип ауыл биләмәһендә янғынға ҡаршы рейд һөҙөмтәһендә ут һүндереүселәр күп кенә етешһеҙлектәргә тап булды. Белгестәр тикшереү өсөн Шәрип ауылын юҡҡа ғына һайламаған, йыл башынан бында 6 кешенең ғүмере ут эсендә өҙөлгән.

Газонда автомобиль ҡалдырыу йыш теркәлгән тәртип боҙоу булған

Юстиция эштәре буйынса дәүләт комитеты рәйесе Владимир Спеле әйтеүенсә, быйыл 10 айҙа газонда автомобиль ҡалдырған өсөн 37,6 мең протокол төҙөлгән. Тәртип боҙған водителдәргә 44 миллион һум штраф һалынған. Владимир Спеле билдәләүенсә, административ комиссиялар әүҙем эш алып бара.
Радий Хәбиров ҡала һәм райондарҙа административ комиссиялар эшмәкәрлеген юғары баһаланы. “Белгестәр республикала тәртип урынлаштырырға ярҙам итә”, тине Башҡортостан Башлығы.

Радий Хәбиров халыҡ һорауҙарына яуап бирәсәк

Республика Башлығы тура эфирҙа буласаҡ әңгәмә тураһында иғлан итте. “Бөтә көнүҙәк мәсьәләләргә аныҡлыҡ индерергә тырышасаҡмын”, - тине Радий Хәбиров. Радий Хәбиров менән тура бәйләнеш 29 ноябрҙә киске сәғәт етелә башлана. Трансляция республиканың төп телеканалдарында, “Юлдаш” радиоһында, шулай уҡ социаль селтәрҙәрҙә эфирға сыға. Һорауҙар ҡабул ителә башланы. Видеомөрәжәғәттәрҙе 28 ноябрҙә киске 7-гә тиклем ҡалдырырға мөмкин. Башҡа һорауҙар тура эфир барышында ла ҡабул ителә.

Башҡортостан депутаттары тәбиғәткә килгән зыянды баһаларға ниәтләй

Дәүләт Йыйылышы–Ҡоролтайҙа Экологик кодексҡа үҙгәреш әҙерләнә. Уға ярашлы дәүләт власы органдарына тирә-яҡты һаҡлау мөнәсәбәттәре өлкәһендә вәкәләттәр өҫтәлә. Сүплектәр һәм ҡаты көнкүреш ҡалдыҡтары полигондары, элекке сәнәғәт ойошмалары майҙансыҡтарын иҫәпкә ҡуйыу бурысы тора. Бындай мәғлүмәт экологик зыян эҙемтәләрен бөтөрөү өсөн планлы эш алып барырға мөмкинлек бирәсәк, тип белдерәләр парламенттан. Закон проекты был аҙнала Дәүләт Йыйылышы – Ҡоролтайҙың пленар ултырышында ҡарала.

Өфөлә Ҡыш бабай ихатаһы яңы урында була

Баш ҡала хакимиәтенән белдереүҙәренсә, Яңы йыл тылсымсыһы резиденцияһы Ленин исемендәге майҙанда урынлаша. Уны 24 декабрҙә рәсми асыу сараһы була. Ҡыш бабай халыҡты 9 ғинуарға тиклем ҡабул итә. Резиденция көндөҙгө сәғәт 12-нән киске 8-гә тиклем асыҡ була. Былтыр Өфөлә Ағиҙел яры буйында урынлашҡан Ҡыш бабай ихатаһына 100 меңдән ашыу кеше килгән.

Өфөлә Росгвардия ветерандарына наградалар тапшырылды

Тантаналы ултырыш Федераль хеҙмәттең Башҡортостан идаралығында үтте. «Росгвардия» ветерандарының Башҡортостан бүлексәһе уңышлы эшләгән йәмәғәт ойошмаларының береһе. Бында һөнәри бурысын үтәгәндә һәләк булғандарҙың, хәрби бәрелештәрҙә ҡатнашҡан батырҙарҙың исемен мәңгеләштереү буйынса даими эш алып барыла.

Николай Басков башҡортса йырлай

Эстрада йондоҙо “Рәсәй” телеканалында “Ну-ка, все вместе!” музыкаль конкурсында ошо турала белдерҙе. Проектта Башҡортостандан йырсы Әлфиә Ниғмәтуллина сығыш яһаны. Николай Басков Өфөнөң 450 йыллығына арналған сарала бергәләп сығыш яһарға тәҡдим итте.
Былтыр Өфөлә Николай Басковҡа “Башҡортостандың халыҡ артисы” тигән исем тапшырылды. Республика Башлығы Радий Хәбиров йырсыны Бөйөк Еңеү көнөнә арналған концерт барышында бүләкләне.

Зинин ауылы янындағы күпер декабрь уртаһында асыла

Өфөлә Зинин юл үткәргесен асыу көнө иғлан ителде. Өфө ҡала хакимиәтенең Төҙөлөш һәм юл ремонты идаралығынан белдереүҙәренсә, объект 12 декабрҙән 17-һенә тиклем файҙаланыуға тапшырылырға тейеш. “Һауа торошо ла әһәмиәткә эйә”, - тине идаралыҡ етәксеһе Константин Паппе.

“Рәсәй” халыҡ-ара күргәҙмәһендә Башҡортостан шыршыһы ҡуйылды

Урман ҡунағы милли ҡурсаҡтар, алтын сармат боландары, башҡорт милли уйын ҡоралдары, милли биҙәүестәр менән биҙәлгән. “Рәсәй шыршылары” проекты буйынса Мәскәүҙә 89 яңы йыл шыршыһы урынлаштырыла. Улар Халыҡ хужалығы ҡаҙаныштары күргәҙмәһе биләмәһенең төп аллеяһында ҡуйыла. 3 декабрҙә форумда Башҡортостан көнө үтә.

Өфөлә үткән Рәсәй һәм Белоруссия төбәктәренең унынсы форумына йомғаҡ яһалды

Федерация советында быйыл июндә Өфөлә үткән Рәсәй һәм Белоруссия төбәктәренең унынсы форумына йомғаҡ яһалды. Кәңәшмәлә Башҡортостан башлығы Радий Хәбиров ҡатнашты. Ил парламентының юғары палатаһы рәйесе Валентина Матвиенко республиканың башҡарған эшен юғары баһаланы. Майҙансыҡтарҙа Рәсәй менән Белоруссия төбәктәре һәм компаниялары араһында рекордлы һанда килешеүҙәр төҙөлгән.

Башҡортостан Фәләстанды ташлап китергә мәжбүр булған граждандарҙы ҡабул итергә әҙер

Башҡортостан башлығы Радий Хәбиров Фәләстанды ташлап китергә мәжбүр булған граждандар өсөн ваҡытлыса урынлашыу пункттарын ойошторорға ҡушты. Рәсәйҙең Ғәҙәттән тыш хәлдәр министры Александр Куренков сил ил ҡасаҡтарын урынлаштырыу мәсьәләһе буйынса кәңәшмә үткәрҙе. Ултырышта 250-гә яҡын кешене Башҡортостанға ебәреү мөмкинлеге ҡаралды.

Тыуған яғына ялға ҡайтҡан яугирҙар отпусктан һуң махсус хәрби операцияға юлланды

Мобилизацияланған яҡташтарыбыҙҙы алғы һыҙыҡҡа оҙатырға Башҡортостан Хөкүмәте Премьер-министры урынбаҫары Ирек Сәғитов, егеттәрҙең яҡындары, дуҫтары килде. Егеттәр махсус хәрби операция биләмәһендә бер йылдан ашыу, ошо ваҡыт эсендә улар икенсе тапҡыр ялға ҡайтҡан. Ҡыҫҡа ваҡытлы отпуск мәлендә яугирҙар туғандары, дуҫтары янында булған, балалар, студенттар менән осрашыуҙарҙа ҡатнашҡан.

Өфөлә «Ватан һаҡсылары кубогы» төбәк-ара комплекслы физкультура сараһы башланды

Өфөлә махсус хәрби операция ветерандары араһында «Ватан һаҡсылары кубогы» төбәк-ара комплекслы физкультура сараһы башланды. Турнир Рима Батталова исемендәге спорт әҙерлеге үҙәгендә ике көн дауамында барасаҡ. Унда Волга буйы һәм Урал федераль округтарынан тиҫтәләрсә ветеран ҡатнаша. Башҡортостан намыҫын 14 яугир яҡлаясаҡ.

Өфө-Инйәр-Белорет трассаһында төҙөкләндереү эштәре тамамланды

Өфө-Инйәр-Белорет трассаһында төҙөкләндерелгәндән һуң Ҡамайылға аша күпер транспорт хәрәкәтенә асылды. Объектта эш «Хәүефһеҙ һәм сифатлы юлдар» милли проекты буйынса башҡарылды.