"Торатау" ЮНЕСКОның глобаль геопаркы статусын алды

Бөгөн Чилиҙа ЮНЕСКО советы ултырышында белгестәр бер тауыштан хуплау белдергән. Был турала Радий Хәбиров социаль селтәрҙә хәбәр итә.
Бөтә донъя селтәренә ҡушылыу тураһында документтар 2021 йылда ебәрелде. 2022 йылда "Торатау"ға Ирландия һәм Испания белгестәре килде. Уларҙың тәҡдимдәре үтәлде."Торатау" Башҡортостанда глобаль селтәргә ингән икенсе геопарк. 2020 йылда ошондай статусты "Янғантау"алды.
Радий Хәбиров ғалимдарға, геопарк, профилле ведомстволар хеҙмәткәрҙәренә рәхмәт белдерҙе.

Башҡортостан яугирҙары алғы һыҙыҡта яраланып ҡалған яуҙаштарын бер ай буйы дрондар ярҙамында дауалай

Дошман һөжүменә эләккән һалдатты эвакуациялау мөмкин булмай. Яҡташтарыбыҙ Томск өлкәһе егетенә ҡоштар менән аҙыҡ-түлек, медикаменттар ташый. Яугир бәрелештәр һыҙығынан имен сыға. Хәрби туғанлыҡ һәм йәшәү көсө миҫалы булған мөғжизәле тарих тураһында Айнур Кәбиров яҙмаһы.

Өфөлә Раушания Бәҙретдинованың «Тормош хроникаһы» тип исемләнгән күргәҙмәһе асылды

Өфөләге Михаил Нестеров исемендәге Башҡорт дәүләт художество музейының «Ижад» күргәҙмә залында Башҡортостандың атҡаҙанған рәссамы, Рәсәй рәссамдары союзы ағзаһы Раушания Бәҙретдинованың «Тормош хроникаһы» тип исемләнгән күргәҙмәһе асылды. Рәсем һәм графика техникаларында төшөрөлгән ижади эштәр менән беҙҙең ижади төркөм дә танышты.

«Торатау» геопаркы «Юнеско»ның глобаль селтәренә индерелде

Халыҡ-ара комитеттың Чилиҙа үткән ултырышында эксперттар Башҡортостан объекты өсөн берҙәм тауыш бирҙе. Был ҡыуаныслы яңылыҡ менән Республика башлығы Радий Хәбиров бөгөн социаль селтәрҙәрҙә уртаҡлашты. Мәғлүм булыуынса, ғариза 2021 йылда уҡ бирелгәйне. Өс йыл элек «Торатау»ға Ирландия менән Испаниянан эксперттар килеп үҙ баһаһын бирҙе, кәңәш-тәҡдимдәрен еткерҙе.

Радий Хәбиров Баймаҡ районында эш сәфәре менән булды

Башҡортостан башлығы Радий Хәбиров Баймаҡ районында эш сәфәре менән булды. Төбәк етәксеһе «Мәҙинә « мәсетенә, православ диндарҙар өсөн сиркәү биналарына нигеҙ таш һалыуҙа ҡатнашты . Бынан тыш Радий Хәбиров Салауат Юлаев паркы реконструкцияһы , яугирҙарға ярҙам штабы эшмәкәрлеге менән танышты. 95 йыллыҡ юбилейын билдәләгән Баймаҡ районында хеҙмәт алдынғылары бүләкләнде . Байрам саралары менән берлектә Халыҡ-ара «Башҡорт аты» фестивале үтте.

Георгий Жуковтың шәхси әйберҙәре Рәми Ғарипов исемендәге гимназия-интернаты музейына тапшырылды

Йәнле тарих. Еңеү маршалы Георгий Жуковтың шәхси әйберҙәре Рәми Ғарипов исемендәге 1-се Башҡорт республика гимназия-интернаты музейына тапшырылды. Бындай хоҡуҡ Маршал Жуков исемендәге «Еңеү музейы» федераль конкурста уҡыусылар әҙерләгән ике проекттың беренсе урын алыуына бәйле мөмкин булды. Ҡәҙерле ҡомартҡыларҙы Еңеү маршалының бүләсәре Варвара Ерохина тапшырҙы. Был хаҡта тулыраҡ киләһе яҙмала.

Рәсәйҙең социаль өлкә лидерҙары Өфөлә тәжрибә туплауын дауам итә

«Социаль үҙгәрештәр буйынса кәңәшселәр институты»ның дүртенсе модулендә ҡатнашыусылар Башҡортостандың ғаилә, хеҙмәт һәм халыҡты социаль яҡлау министры Ленара Иванова менән осрашты. Ведомство етәксеһе төбәктә социаль өлкә үҫеше, яңылыҡтар менән таныштырҙы. Шулай уҡ студенттар өсөн тележурналист Әлиә Таһирова йәмәғәт киңлегендә социаль үҙгәрештәрҙең роле тураһында практикум уҙғарҙы. Мәғариф программаһына ярашлы, республиканың төрлө социаль учреждениелары эшмәкәрлеге менән таныштырыу маҡсатында экскурсиялар ҙа уҙғарылғайны, уңышлы практикалар өйрәнелә.

Яңы «Мах» ҡушымтаһы ни өсөн хәүефһеҙ тип һанала?

«Мах мессенджерында ҡулланылған барлыҡ мәғлүмәт тик Рәсәй серверҙарында һаҡлана». Өр-яңы ҡушымтаның өҫтөнлөктәре бының менән генә сикләнмәй. Шикләнергә урын бармы? БЮТ хәбәрсеһе Әлфинә Килдейәрова Дәүләт идаралығының һанлы үҫеш министры урынбаҫары Динар Шәрәфетдиновтан белеште.

Радий Хәбиров «Геосаҡырыу» өсөнсө Халыҡ-ара геология чемпионатын асыу тантанаһында ҡатнашты

Башҡортостан башлығы Радий Хәбиров «Геосаҡырыу» өсөнсө Халыҡ-ара геология чемпионатын асыу тантанаһында ҡатнашты. Ер аҫты байлыҡтарын файҙаланыу буйынса федераль агентлыҡ менән республика Хөкүмәте тарафынан ойошторолған сара 17 сентябргә тиклем дауам итә. Ярышта ҡатнашыусыларға 12 төр һынау әҙерләнгән, ялан шарттарында ла эшләргә тура киләсәк. Рәсәй төбәктәренән һәм сит илдәрҙән килгән командаларҙың әҙерлеген тәүгеләрҙән булып беҙҙең ижади төркөм дә ҡараны.

Рәсәйҙең социаль өлкә лидерҙары Өфөлә тәжрибә тупланы

«Социаль үҙгәрештәр буйынса кәңәшселәр институты»ның дүртенсе модулендә ҡатнашыусылар республиканың социаль объекттарында булды, эш алымдары менән уртаҡлашты, фекер алышты. Социаль үҙгәрештәр буйынса кәңәшселәр ҡорон тап Башҡортостанда ойоштороу нигеҙһеҙ түгел. Төбәк социаль йүнәлештәге эш тәжрибәһе буйынса илдә алдынғы урынды биләй. Ҡунаҡтар эш программаһы сиктәрендә Өфө хосписы эшмәкәрлеге менән дә танышты.

Шишмә районында физик мөмкинлеге сикләнгән малайҙар өсөн республика слеты үтте

Шишмә районында урынлашҡан «Патриот» паркында физик мөмкинлеге сикләнгән малайҙар өсөн республика слеты үтте. Башҡортостандың төрлө ҡала-райондарынан йыйылған 130 уҡыусы ике көн дауамында хәрби әҙерлек нигеҙҙәрен өйрәнде, оҫталыҡ дәрестәрендә ҡатнашты, алғы һыҙыҡтағы яугирҙарға хаттар яҙҙы. Слетта ҡатнашыусы малайҙар һәм уларҙың ата-әсәләре Башҡортостан башлығы Радий Хәбиров менән дә осрашты. Сарала илһөйәрлек, батырлыҡ өлгөһө булған замандаштарыбыҙ-Рәсәй Геройы Денис Чернавин, илдең иң көслө кешеһе Эльбрус Ниғмәтуллин ҡатнашты.

Башҡортостанда юғары тиҙлектә йылғаға ҡолаған водителде һәм уның автомобилен эҙләйҙәр

Был турала дәүләт автоиспектецияһы етәксеһе Владимир Севастьянов хәбәр итте. Уның һүҙҙәренсә, авария Өфө-Яңауыл трассаһының Борай районы участкаһында теркәлгән. Ҡалтасынан 37 йәшлек ир 12-се модель «ВАЗ» автомобилендә төҙөлөп ятҡан күперҙең терәгенә бәрелә. Транспорт сараһына шундай уҡ ут ҡаба һәм ул Тере Танып йылғаһына ҡолай. Әлеге ваҡытта хоҡуҡ һаҡсылары водителде һәм уның автомобилен эҙләй.

Башҡортостанда уҡытыусыларҙың зона семинар-кәңәшмәләре башланды

Экстремизмға ҡаршы тороу һәм йәштәр мөхитендә радикаль күренештәрҙе иҫкәртеү.
Башҡортостанда уҡытыусыларҙың зона семинар-кәңәшмәләре башланды. Сараны мәғариф министрлығы менән психологик-педагогик, медицина һәм социаль ярҙам үҙәге ойоштора.

Өфө марафонында 10 меңдән ашыу кеше ҡатнашты

Рәсәйҙең 52 төбәге һәм донъяның 38 иле. Быйылғы Өфө марафонының географияһы айырыуса киң булды. Стартҡа 10 меңдән ашыу кеше сыҡты. Был марафон тарихында рекордлы күрһәткес.
Сәләмәт тормош һөйөүселәр 5 дистанцияға, атап әйткәндә, 2 километрҙан 42 километрға тиклем араға йүгерҙе. Иң өлкән ҡатнашыусыға- 87 йәш, иң кесеһенә алты ай ғына ай ине. Был юлы ҡатнашыусыларҙың артыуына яҡшы һауа торошо ла үҙ өлөшөн индерҙе.

2026 йылда Өфө аръяғы биләмәһендә коммуналь инфраструктура төҙөлөшө башлана

Бөгөн Хөкүмәттең аҙналыҡ оператив кәңәшмәһендә Радий Хәбиров төбәккә 13 миллиард ярым һум күләмендә федераль ярҙам бүленеүе тураһында хәбәр итте.
Проект өс этапта, 2025-2030 йылдарҙа тормошҡа ашырыласаҡ. Хәтерегеҙгә төшөрәбеҙ, августа Хөкүмәт комиссияһы президиумы 8 миллиард ярым һумлыҡ проекттың беренсе сиратын тормошҡа ашырыуға ғаризаны хупланы.

«Геосаҡырыу» чемпионатында ҡатнашыусыларға ҡыҙыҡлы экскурсия программаһы әҙерләнгән

«Геосаҡырыу» өсөнсө Халыҡ-ара геология чемпионатында ҡатнашыусы йәштәргә сәмле ярыштан тыш ҡыҙыҡлы экскурсия программаһы ла әҙерләнгән. Баш ҡалабыҙҙың иҫтәлекле урындары менән танышҡан ҡунаҡтарҙың тәьҫораттары хаҡында киләһе яҙмала.

Башҡортостандан үҙәкләштереп оҙатылған 160-сы гуманитар ылау Донбасҡа барып етте

Уны республиканың исемле батальондары, «Башҡортостан» полкы һәм мобилизациялған яугирҙар ҡаршы алды. Тыуған яҡтан һалдаттарға юғары үтемле автомобилдәр, мотоциклдар, төҙөлөш материалдары, аҙыҡ-түлек һәм көнкүреш кәрәк-яраҡтары оҙатылды. Йөк автомобилдәре уларҙы яугирҙар хеҙмәт иткән хәрби частәрҙең дислокацияһына тиклем алып барып етте.

Өфөлә журналистар яугирҙар өсөн сәксәк бешерҙе

Бөгөн журналистарҙың халыҡ-ара теләктәшлек көнө. Ошо уңайҙан республика Матбуғат йортонда яугирҙар өсөн сәксәк бешереү өмәһе үтте.
Эште башлар алдынан журналистарҙы Башҡортостан журналистар союзы рәйесе Вәдүт Исхаҡов, «Башҡортостан» нәшриәт йорто директоры Зөлфиә Рәхмәтуллина тәбрикләне. Улар алғы һыҙыҡтағы егеттәребеҙгә әүҙем ярҙам иткән журналистарға рәхмәт һүҙҙәрен еткерҙе, маҡтау ҡағыҙҙарын тапшырҙы.

Башҡортостан яңылыҡтарын хәҙер MAX милли мессенджерында ҡарарға һәм уҡырға мөмкин

БСТ MAX-та үҙ каналын асҡан беренсе төбәк телеканалы. Мессенджерҙың аудиторияһы көн һайын арта. MAX милли мессенджерында каналды асыу-Башҡортостан юлдаш телеканалының интернет-тапшырыуҙарын үҫтереүҙең сираттағы этабы. Үткән ял көндәрендә үткәрелгән ябыҡ тест һөҙөмтәләренә ярашлы, яңылыҡтарҙа күрһәтелгән видеосюжеттар бында тиҙ урынлаштырыла, был, һис шикһеҙ, яңылыҡтар контентының асыҡлығына йоғонто яһай. MAX мессенджерында Башҡортостан юлдаш телеканалына яҙылығыҙ һәм республиканың бөтә яңылыҡтары менән танышып барығыҙ.

«Үҙебеҙҙекеләрҙе ташламайбыҙ»: Өфөлә балалар хәйриә футбол турниры үтте

«Үҙебеҙҙекеләрҙе ташламайбыҙ». Өфөнөң Жилин ауылында ойошторолған футбол буйынса ярыш шулай аталды. Балалар хәйриә турниры Бөйөк Еңеүҙең 80 йыллығына, шулай уҡ махсус хәрби операцияла ҡатнашыусыларға һәм уларҙың ғаиләләренә ярҙам итеүгә арналды. «РгоФУтбол» спорт комплексына 27 команда йыйылды, улар өс йәш категорияһында көс һынашты.