Башҡортостанда экология һәм тәбиғәттән файҙаланыу буйынса яңы проекттар тормошҡа ашырыла

Тирә-яҡ мөхиткә зыян килтермәй генә Башҡортостанды йәшәү өсөн иң яҡшы төбәк итергә. Республиканың Тәбиғәттән файҙаланыу һәм экология министрлығы эшмәкәрлегенең өҫтөнлөклө йүнәлеше ошо. Ведомствола былтырғы эш йомғаҡтары барланды.

Октябрьский ҡалаһы халҡы фронтҡа ярҙам итә

Октябрьский фронтҡа ярҙам итә. Ҡала халҡы һәм хакимиәте махсус хәрби операцияға гуманитар ылау туплап ебәргән. 21-се конвой менән «Нива», «Уаз» автомобилдәре, машиналарға запас өлөштәр, төҙөлөш материалдары, мейес, рабица селтәрҙәре, пилотһыҙ осоу аппараттарын билдәләү ҡоролмалары оҙатылған.

Мәләүез районы аша үткән трассала 9 машина ҡатнашлығында авария теркәлгән

Бөгөн иртән Мәләүез районы аша үткән трассала 9 машина ҡатнашлығында авария теркәлгән. Ғәҙәттән тыш хәлдәр министрлығы идаралығынан хәбәр итеүҙәренсә, һәләк булыусылар юҡ, ике кеше зыян күргән. Әле дәүләт автоинспекцияһы хеҙмәткәрҙәре фажиғә сәбәптәрен асыҡлай. Томан төшөүгә бәйле, юл хәрәкәте тик бер һыҙат буйынса ғына ебәрелгән. Шулай уҡ һауа торошо шарттары арҡаһында Стәрлетамаҡ районындағы Яңы Васильевка ауылынан Салауат ҡалаһына тиклемге арауыҡта ла юл хәрәкәте ваҡытлыса сикләнгән.

Башҡортостанға яҙ килергә ашыҡмай

Календарҙағы датаға иғтибар итмәгеҙ. Синоптиктар күҙаллауы буйынса, Башҡортостанға яҙ килергә ашыҡмай. 1 март төндә республикала 25 градусҡа тиклем һыуыта, тип хәбәр итә гидрометеорология буйынса төбәк идаралығы. Һауа температураһының ҡырҡа үҙгәреүе тик 5 мартҡа ғына көтөлә. 7 мартта термометр нулдән юғары күтәрелә. Халыҡ-ара ҡатын-ҡыҙҙар көнөнә һауа торошо тағы ла боҙола, ә тотороҡло йылы көндәр марттың тик икенсе яртыһында ғына башланыр тип күҙаллана.

Быйыл республикала торлаҡ йорттарҙағы иҫке лифттарҙың барыһын ла алмаштырыла

231 йортта 620 ҡоролманы яңыртыу күҙаллана. Башҡортостан Капиталь ремонт фондынан ошо турала белдерәләр. Лифт кабинаһын һәм юғарыға күтәреү ҡоролмаһын ҡулланыу мөҙҙәте 25 йыл. Был ваҡыт уҙғандан һуң, лифт алмаштырылырға тейеш. Аҡса етмәү сәбәпле, 1990-сы-2000-се йылдарҙа был нормативтар үтәлмәгән. Хәҙер проблема хәл ителәсәк, ти фонд белгестәре. Былтыр 23 йортта 78 лифт яңыртылған. Әле 40-ҡа яҡын йортта эш бара.

Радий Хәбиров суд системаһының уҙған йыл йомғаҡтарына арналған кәңәшмәлә сығыш яһаны

Судьяларҙың юғары профессионализмы - йәмәғәтселектең ышанысы нигеҙе. Башҡортостан башлығы Радий Хәбиров суд системаһының уҙған йыл йомғаҡтарына арналған кәңәшмәлә сығыш яһаны. Былтыр республика судтары тарафынан бер миллион 415 меңдән ашыу эш ҡаралған. Был күрһәткес буйынса төбәк Волга буйы федераль округында беренсе йыл ғына алдынғы урын биләмәй.

Өфөлә «Смарт-баҡсасы» форумы үтте

Быйыл баҡсасылар ширҡәттәренә 223 миллион һумлыҡ дәүләт ярҙамы йүнәлтеү планлаштырылған. Сумманың күп өлөшө биләмәгә тиклемгә юлдарҙы төҙөкләндереүгә иҫәпләнгән. Был турала «Смарт-баҡсасы» форумында билдәләнде. Башҡортостан башлығы Радий Хәбиров баҡсасылар менән осрашып, ширҡәттәрҙең үҫешенә бәйле көнүҙәк һорауҙарға яуап бирҙе. Күптәрҙе юлдарҙың торошо, газ, электр менән тәьминәт мәсьәләләре борсой. Яуаплы ведомстволар, район-ҡала хакимиәттәре менән берлектә уларҙы хәл итеү бурысы ҡуйылды.

Башҡортостан йылғаларында боҙ шартлатыу башланды

Ҡотҡарыусылар һәм махсус хеҙмәттәр тәүге шартлатыу эштәрен Шишмә районының Петряев ауылы эргәһендә башҡарҙы. Яҙғы ташҡын эҙемтәләрен кәметеүгә йүнәлтелгән саралар хаҡында киләһе яҙмала.

Мосолмандар өсөн изге ай - Рамаҙан башланды

Бөгөн кис, ҡояш байығас, изге Рамаҙан айы башланды һәм тәүге тәрәуих намаҙы уҡылды. Был айҙа мосолмандарға Ураҙа тотоу фарыз һанала.

Башҡорт академия дәүләт театрында Антон Чеховтың «Ваня ағай» пьесаһы буйынса премьера көтөлә

Мәжит Ғафури исемендәге Башҡорт академия дәүләт театрында Антон Чеховтың «Ваня ағай» пьесаһы буйынса премьера көтөлә. Санкт-Петербург режиссеры Степан Пектеев ҡуйған әҫәрҙә мәңгелек ҡиммәттәргә заманса ҡараш күрһәтелә. Антон Чеховтың бөйөк әҫәре башҡорт телендә сәхнәләштерелә. Премьера 13-14 мартта. Тулыраҡ мәғлүмәт киләһе яҙмала.

Рәшиҙә Мәһәҙиеваға – 60: журналистикаға тоғролоҡ һәм ижади мираҫ

Рәсәйҙең атҡаҙанған журналисы, Шәһит Хоҙайбирҙин исемендәге республика хөкүмәт премияһы лауреаты, филология фәндәре кандидаты Рәшиҙә Мәһәҙиеваға - 60 йәш. Юбилей уңайынан ойошторолған ижад кисәһендә ҡәләм оҫтаһының дәрәжәләр исемлеге тағы ла бер награда - Бөтә донъя башҡорттары ҡоролтайының «Ал да, нур сәс халҡыңа!» миҙалы менән тулыланды. «Заман һәм журналист» тип исемләнгән осрашыуҙа журналист яңы китабы менән дә таныштырҙы.

Радий Хәбиров Өфөнөң элекке «Еңеү» кинотеатрын реконструкциялау барышы менән танышты

Йыл ярым эсендә мәҙәни мираҫ объектын тәртипкә килтерергә кәрәк. Радий Хәбиров Өфөнөң элекке «Еңеү» кинотеатрын реконструкциялау барышы менән танышты. Эш тамамланғас, унда фильмдар күрһәтелмәйәсәк, әммә бинаның тәғәйенләнеше элекке кеүек ҡала. Ул тамашасыларҙы ҡыуандырыуын дауам итәсәк.

Радий Хәбиров республика халҡын изге Рамаҙан айы башланыуы менән ҡотланы

«Алда - Ураҙа тотоу һәм доға ҡылыу ваҡыты. Иманыбыҙ нығынған, башҡалар хаҡында ҡайғыртҡан ваҡытта, бөтәбеҙгә лә тыныслыҡ һәм именлек теләйбеҙ. Рамаҙан айы барыбыҙға ла көс һәм зирәклек алып килһен, рухи терәккә эйә булырға ярҙам итһен. Аллаһы Тәғәлә һәр берегеҙгә фәтихаһын бирһен. Һеҙгә һәм яҡындарығыҙға һаулыҡ һәм именлек теләйем! Хуш киләһең, Рамаҙан!», - тип яҙған Башҡортостан башлығы.

Донъя мосолмандары өсөн изге Рамаҙан айы башланды

Быйыл ул 29 мартҡа тиклем дауам итә. Ай буйына диндарҙар таң атҡандан ҡояш байығанға тиклем ашап-эсеүҙән тыйылып торасаҡ. Һәр бәлиғ булған һәм һау мосолман изге айҙа Ураҙа тоторға һәм билдәләнгән ҡағиҙәләрҙе үтәргә бурыслы.

Өфөнөң Ленин майҙанында ҡышты оҙатыу байрамы үтте

Яҙ айының тәүге көнө. Өфөнөң Ленин майҙанында ҡышты оҙатыу байрамы үтте. Баш ҡаланың үҙәк майҙанында яҙҙы ҡаршы алыу тантанаһында төрлө быуын һәм милләт вәкилдәре ҡатнашты. Сара күңелле ярыштар, милли уйындар менән үрелеп барҙы. Майҙанда махсус хәрби операцияла ҡатнашыусыларға ярҙам итеү өсөн ҡоймаҡ бешереп һатыу акцияһы ла ойошторолдо. Акцияға Башҡортостан башлығы Радий Хәбиров та ҡушылды. Тулыраҡ мәғлүмәт киләһе яҙмала.

Рәсәй Геройы Александр Доставаловтың ҡаһарманлығына - 25 йыл

Бөгөн Рәсәй Геройы Александр Доставаловтың ҡаһарманлығына - 25 йыл. Ике меңенсе йылдың 1 мартында Чечен республикаһының Аргун уйһыулығында яҡташыбыҙ етәкселегенләге десантсылар үлемһеҙ батырлыҡ күрһәтә. Йөҙгә лә тулмаған Рәсәй һалдаттары мең ярымдан ашыу боевиктарға ҡаршы тора һәм сик буйын үтергә юл ҡуймай. Гвардия майоры Александр Доставаловҡа ҡыйыу алышта һәләк булғандан һуң Рәсәй Геройы исеме бирелә. Бөгөн иһә ҡаһарман яҡташыбыҙ исемендәге батальон штурмлаусылары Оборона министрлығының башҡа подразделениелары менән берлектә нацистарҙы тар-мар итә. Яугирҙар Донецк халыҡ республикаһының бик күп ауыл- ҡалаларын азат итеүҙә, дошман нығытмаларын юҡ итеүҙә ҡатнаша. Доставалосыларға иң яуаплы заданиелар йөкмәтелә һәм улар намыҫ, батырлыҡ менән үтәлә. Бәрелештәр һыҙығынан тыл районына ротацияға сыҡҡан штурм төркөмөн беҙҙең хәрби хәбәрселәр ҙә ҡаршы алды.

«Салауат Юлаев» хоккейсылары араһында ла Ураҙа тотоусылар бар

Шуларҙың береһе Илдан Ғәзимов. Был көндәрҙә һаҡсы команда менән Алыҫ Көнсығышта. Иртәгә яҡташыбыҙ Владивостоктың «Адмирал» клубы менән икенсе осрашыуын үткәрә. Тәүге уйын буллиттар серияһында юлаевсылар файҙаһына 3-2 иҫәбе менән тамамланды. Илдан Ғәзимов әйтеүенсә, уның өсөн мосолман байрамдары айырыуса әһәмиәтле. Сөнки ул ислам дине ҡанундары һәр ваҡыт үтәлгән ғаиләлә үҫкән. Шуға ла ул бөгөн Рәсәйҙең һәм сит илдең ниндәй генә ҡалаһында булыуына ҡармаҫтан, буш ваҡытында мәсеткә йөрөргә тырыша.

Башҡортостанда баҡсасы көнө булдырыла

Радий Хәбиров шундай башланғыс менән сыҡты. Яңы байрам яҙын билдәләнергә тейеш. Был көндө өмәләр уҙғарыу планлаштырыла. - Берҙәм эште башланыҡ. Әйтелгәндәр - үтәлә. Юлдарҙы тәртипкә килтергәс, газ үткәрелә, һәр ширҡәттә контейнер майҙансығы урынлаштырыла. Тәҡдим ителгән баҡсасы көнөндә биләмәләрҙе тәртипкә килтереү мөмкинлеге буласаҡ, тине Радий Хәбиров.

Рәсәйҙә шәхси йорттар төҙөлөшөнә контроль артты

Закон халыҡты намыҫһыҙ төҙөүселәрҙән яҡлай. Уға ярашлы, эште башҡарыусы компания йорт төҙөлөп бөтөп уға хоҡуҡ теркәлгәндән һуң ғына түләү ала. Аҡса иһә банкта махсус иҫәптә һаҡлана. Төҙөлөш тамамланмаһа аҡса хужаһына кире ҡайтарып бирелә.

Өфөлә нефть эшкәртеү заводында янғын һүндерелгән

Һауала зарарлы матдәләр миҡдары норманын артмаған. Был турала Ғәҙәттән тыш хәлдәр министрлығынан хәбәр итәләр. Янғын бөгөн төндә башланды. Утты һүндереүгә 100 хеҙмәткәр 28 техника йәлеп ителде.