Өфөлә билдәле рәссам Вәсил Ханнановты иҫкә алдылар

Мәңгелек палитраһы. Өфөлә билдәле рәссам Вәсил Ханнановты иҫкә алдылар. Рәсәйҙең атҡаҙанған, Башҡортостандың халыҡ рәссамы, график, ассамбляж һәм инсталляция оҫтаһы, Наил Латфуллин исемендәге заман сәнғәт республика музейына нигеҙ һалыусы, «Сыңғыҙхан» ижади берекмәһе етәксеһе Вәсил Ханнановтың эштәре халыҡсанлығы, тәрән фәлсәфәһе менән тамашасы күңелен яулай. Тормошҡа ашырған ҡыйыу проекттары ла актуаллеге менән үҙенсәлекле.

Милли йәштәр театрында «Бер ғүмер етмәй икән» спектакленең премьераһы үтте

Мостай Кәрим исемендәге Милли йәштәр театрында «Бер ғүмер етмәй икән» спектакленең премьераһы үтте. Махсус хәрби операцияла ҡатнашыусы яугирҙарға арналған пьесала республика хәрбиҙәренең батырлығы, ҡаһарманлығы һәм илһөйәрлеге сәхнәләштерелә. Спектаклдә Рәсәй Геройы Илдар Суфийәров, Батырлыҡ ордены кавалеры Фәнис Хөсәйенов һәм башҡа яугирҙарҙың йыйылма образдары сағылдырыла.

Башҡортостанда Ағиҙел портында яңыртылғандан һуң йөк причалы асыла

Бында 5 тоннаға тиклем йөк ташыусы караптарға яғыулыҡ ҡойола. Причал кәрәкле ҡорамалдар менән йыһазландырылған. Шулай уҡ караптарҙы һыу менән тәьмин итеү ҡарала, тип белдерҙе Транспорт һәм юл хужалығы министры Любовь Минакова.

Башҡортостандан герой-әсәнең дүрт улы МХО-нан ҡайтҡан

Тулҡынландырғыс видеояҙма. Күп балалы әсә Наталья Иванованың дүрт улы МХО-нан ҡайтып төшкән. Улар барыһы ла алғы һыҙыҡта хеҙмәт итә. Герой-әсәгә сюрпризды яугирҙарға арналған концертта эшләгәндәр.

Ағалы-ҡустылы яугирҙар ҡаһарманлығы өсөн Суворов миҙалы, «Хәрби хеҙмәте өсөн» һәм «Хәрби ҡаһарманлығы өсөн» ордендары менән наградаланған.
Видео - «Юрта» төркөмө.

Закон балаларҙы эттәрҙән һаҡлаясаҡ

Дума рәйесе Вячеслав Володин Ғаиләне яҡлау, ата, әсә һәм бала мәсьәләләре буйынса комитетҡа балаларҙы берәҙәк эттәр һөжүменән һаҡлау буйынса нормалар әҙерләргә ҡушты. - Тәртип урынлаштырырға кәрәк. Бала ғүмере күпкә ҡәҙерле. Эттәрҙе яҡлау кәрәклеге тураһында һүҙ йөрөтөүселәр өсөн яуап - хайуандарҙы ташларға ярамай, бында ла яуаплылыҡ булырға тейеш, - тине Вячеслав Володин. Күптән түгел, 23 февралдә Ставрополдә берәҙәк эттәр 9 йәшлек ҡыҙҙы талап үлтерҙе. Ғәмәлдәге закон буйынса хужаһыҙ этте тотоп, уға чип беркетеп бер аҙҙан кире ебәреү ҡаралған.

Башҡортостан йәштәре уйындар аша яңы технология өйрәнә

Башҡортостан вәкилдәре "Берлога" милли киберплатформаһы буйынса Бөтә Рәсәй конференцияһында ҡатнашты. Ул йәштәрҙе уйындар аша технологияларҙы өйрәнеүгә йәлеп итеүгә йүнәлтелгән. Башҡортостан был платформаны ҡулланыу буйынса алдынғы төбәк. Беҙҙең республикала уға мәғариф учреждениелары һәм технология компаниялары ҡушылған. Стратегик башланғыстар агентлығы мәғлүмәттәре буйынса йыл ярым ваҡыт эсендә платформала технологик суверенитет үҫеше йүнәлештәре буйынса 4 мең бушлай видеоуйын сыҡҡан.

Ейәнсура районынан 8 йәшлек Әмир Мәһәҙиев планшетҡа тип йыйған аҡсаһын яугирҙарға тапшырған

Ейәнсура районынан 8 йәшлек Әмир Мәһәҙиев махсус хәрби операция яугирҙарына планшетҡа тип йыйған аҡсаһын тапшырған. Бының өсөн малайға копилкаһын ватырға тура килә.
Бала үҙенең ҡарарын аҡсаның әлеге ваҡытта һуғышта кемдәрҙеңдер аталары булған яугирҙарға кәрәгерәк булыуы менән аңлата. Әмирҙең башланғысына дуҫтары һәм таныштары, класташтары ла ҡушыла, һөҙөмтәлә балалар ике рацияға етерлек аҡса йыйған. Был сумманы Әмир масхус хәрби операция яугирына шәхсән тапшыра, яҡташыбыҙ фронтҡа яңы рациялар менән юллана.

Мәләүез районында ирекмәндәр махсус хәрби операция яугирының дауаханалағы әсәһенең хәлен белеште

Ханымдың улы алғы һыҙыҡҡа былтыр үҙ теләге менән ҡушылған. Ирекмәндәр Михайловтар ғаиләһенә лә барҙы. Ошо көндәрҙә уларҙың улдары отпуск ялына ҡайтырға тейеш. Яңыраҡ яугир Жуков миҙалы менән бүләкләнгән. Шулай уҡ Ватанды һаҡлаусылар көнө менән ҡотлау һәм бүләктәр яугирҙар атаһы Бәҙретдин Зәйнәғәбдиновҡа ла тапшырылды.

Баймаҡ районында дауам иткән үҙешмәкәр сәнғәт конкурсы һәр ауылда үтә

Баһалама ағзалары 22 ауыл биләмәһендә булып, иң сағыу сығыштарҙы йомғаҡлау концертына һайлап аласаҡ. Бикеш ауыл биләмәһенең һәүәҫкәр артистары әҙерләгән концерт та яңы исемдәр асты

Бөрйән районы Иҫке Монасип ауылында «Ауыл батырҙары» асыҡланды

Иҫке Монасип ауыл хакимиәте биләмәһенә ҡараған өс ауыл ир-егеттәре араһында көс экстримы буйынса ярыштар ойошторолдо. Ярыш төрҙәренә утын ярыу, суҡмар, түмәр ташлау, машина һөйрәү, тәгәрмәс әйләндереү, ағас һөйрәү, бүрәнә күтәреү, сөй ҡатыу, ҡылыс сөйөү индерелгәйне. Таһыллыҡҡа һәм етеҙлеккә 11 ир-егет көс һынашты.

Хәйбулла районы Федоровка ауылы ирекмәндәре дронға ҡаршы юрғандар әҙерләгән

Айыҡ халыҡ йәшәгән ауылдан дронға ҡаршы юрғандар. Дрон һөжүменә ҡаршы 170 берәмек юрғанды махсус хәрби операция биләмәһенә Хәйбулла районы Федоровка ауылы ирекмәндәре әҙерләгән. Был юрғандар яугирҙарҙың ғүмерен һаҡларға булышлыҡ итәсәк. Иҫегеҙгә төшөрәбеҙ, Федоровка ауылы «Айыҡ ауыл» республика конкурсының муниципаль этабында еңеүгә бүленгән 100 мең һум аҡсаға һалдаттарға дронға ҡаршы юрған тегеү өсөн материал һатып алыуға йүнәлткән. Киләһе репортаж фронтҡа ебәрелгән ярҙам тураһында.

Ғафури районында махсус хәрби операцияла һәләк булған ике яугир иҫтәлегенә мемориаль таҡтаташ асылды

Ғафури районы Аҡкүл ауылында махсус хәрби операцияла һәләк булған ике яугир иҫтәлегенә мемориаль таҡтаташ асылды. Илшат Харисов менән Алексей Коротковҡа бағышланған стела батырҙар уҡыған мәктәптә ҡуйылды. Хәтер таҡтаһын асыу тантанаһына яугирҙарҙың туғандары, уҡыусылар, республика һәм район етәкселеге вәкилдәре йыйылды.

Башҡортостан Хөкүмәте Премьер-министры Мәскәүҙә белем алған Башҡортостан студенттары менән осрашты

Башҡортостан Хөкүмәте Премьер-министры Андрей Назаров Мәскәүҙә белем алған Башҡортостан студенттары, аспиранттары һәм уҡытыусылары менән осрашты . Эшлекле аралашыу Башҡортостандың Рәсәй Президенты ҡарамағындағы Тулы хоҡуҡлы вәкиллегендә уҙҙы.

Быйыл Башҡортостанда 709 метр оҙонлоҡтағы 10 күпер норматив хәлгә килтереләсәк

Быйыл Башҡортостанда «Тормош өсөн инфраструктура» милли проекты буйынса 709 метр оҙонлоҡтағы 10 күпер норматив хәлгә килтереләсәк. Улар туристик объекттарға алып барған юлда, терәк юл селтәренә ингән трассаларҙа урынлашҡан. Мәҫәлән, Хәйбулла районы Таналыҡ йылғаһы күперендә капиталь ремонт башланған да инде. Ул Ырымбур өлкәһе сигенә хәүефһеҙ һәм уңайлы юл булдыра. Төҙөлөш Архангел районындағы Ағиҙел йылғаһы күперендә лә бара.

Яндекс сервистары хәҙер башҡортса телмәрҙе лә аңлай

Мәғлүмәт эҙләү системаһы башҡортса һүҙҙәрҙе таныуҙа нейроселтәрҙе файҙаланған. Бынан һуң, Яндексҡа башҡортса яҙырға ғына түгел, өндәшергә лә була. Был мөмкинлек Тәржемә ҡушымтаһында, эҙләү системаһы һәм клавиатурала булдырылған. Тәржемәсе төрлө телдәргә тәржемә итеүгә лә һәләтле. Ошо рәүешле бер-береһен аңламаған төрлө милләт вәкилдәре үҙ-ара иркен диалог ҡора ала.

Билдәле шағир, прозаик һәм журналист Әхмәр Үтәбаев яҡташтары менән осрашты

Баймаҡ биләмә-ара үҙәк китапханаһында ойошторолған әҙәби кисә ижадсының 65 йәшлек юбилейына арналды. Тулыраҡ киләһе яҙмала.

Аҡъяр тау колледжы студенттары юнармеецтар хәрәкәте сафын тулыландырҙы

Тыуған илгә тғролоҡ. Аҡъяр тау колледжы студенттары юнармеецтар хәрәкәте сафын тулыландырҙы.
Аҡъяр Тау колледжында 1 курс студенттарын юнармеецтар отрядына бағышлау сараһы тантаналы шарттарҙа үтте. Студенттар араһында хәрби клубҡа инеүгә төрлө өлкәләрҙә юғары һөҙөмтә күрһәтеүселәр генә һайлап алынған. Сарала Рәсәй ғәскәрҙәрендә хәрби юл үткән уҡытыусылар, махсус хәрби операция яугирҙары, Хәйбулла районы ветерандары ла ҡатнашты.

Башҡортостан баҡсасылар форумына әҙерләнә

Был аҙнала беҙҙең республикаға илдең 12 төбәгенән 2 меңдән ашыу баҡсасы килеүе көтөлә. Шулай уҡ Таиланд һәм Беларусь делегациялары була, тип хәбәр итәләр Ауыл хужалығы министрлығынан. Пленар ултырыш баҡса биләмәләренә газ үткәреү темаһына була. Форум иртәгә башлана һәм ике көн дауам итә.

Башҡортостанда ужым яҡшы ҡышлаған

Ауыл хужалығы министрлығынан хәбәр итеүҙәренсә, көҙҙән сәсеп ҡалдырылған иген баҫыуҙарының 91 проценты һәйбәт баһа алған. Ужымдың майҙаны 248 мең гектар. Уның ҙур өлөшөн бойҙай алып тора. Яҙын 2 миллион 800 мең гектарҙа сәсеү ҡаралған.

Быйыл талпан иртәрәк уянасаҡ

Ҡулланыусылар хоҡуҡтарын яҡлау хеҙмәте белгестәре фекеренсә, йылы ҡыш һәм иртә көтөлгән яҙ арҡаһында бөжәктәр ғәҙәттәгенән әүҙемерәк булыуы мөмкин. Уҙған йылда Башҡортостанда 9 мең кеше талпан ҡаҙалып медицина учреждениеларына мөрәжәғәт иткән. Йыл һайын халыҡ күпләп йөрөгән биләмәләр махсус препараттар менән эшкәртелә. Талпан ғәҙәттә апрелдә әүҙемләшә, иң күп мөрәжәғәттәр май айында теркәлә.