Рәсәйҙә таҙа метанол етештереү һәм һатыу тыйыла

Ил хөкүмәте ошо турала документты хупланы. Метанол кеше сәләмәтлеге өсөн хәүефле. Ул төҫө, ҡуйылығы, еҫе менән этанолға оҡшаш. Шуға ағыуланыу хәүефе ҙур, ти белгестәр. Рәсәйҙә алкоголь менән күпләп ағыуланыу осрағы 2023 йылдың йәйендә булды. Ул ваҡытта 50 кеше контрафакт сидр эсеп үлде.

Башҡортостан урмандарын һауанан күҙәтәләр

Республика урман янғындарын иҫкәртеү һәм һүндереү үҙәге авиация патрулен ойоштороу буйынса контракт төҙөнө. Бының өсөн 30 миллион һум бүленә. Янғын хәүефе миҙгелендә республикала 4 мең квадрат метр биләмә өҫтәнән осоштар башҡарыла. 13 маршрут ҡаралған. Самолеттар Өфө, Стәрлетамаҡ, Белорет, Нефтекама ҡалаларында, Иҫке Собханғол, Йылайыр, Оло Ыҡтамаҡ, Аҡъяр, Иҫәнғол, Ҡолғона һәм Оло Кәркәле ауылдарында урынлаша.

Республикала етемдәргә торлаҡ бирелә

Быйыл Башҡортостанда етемдәрҙе торлаҡ менән тәьмин итеүгә 2 миллиард 800 миллион һум бүленә. Был турала премьер-министр Андрей Назаров белдерҙе. 63 ҡала һәм районда 749 кешегә йорт-фатир биреү планлаштырыла. Республикала торлаҡ алыуға сиратта 8 мең етем теркәлгән.

Радий Хәбиров Башҡортостандың дәүләт флагы көнө менән ҡотланы

Бөгөн - Башҡортостандың дәүләт флагы көнө. Ошо уңайҙан республикала йәшәүселәрҙе социаль селтәрҙә Радий Хәбиров ҡотланы. Төбәк етәксеһе билдәләүенсә, дәүләт флагы республикала йәшәүсе төрлө милләт һәм конфессиялар вәкилдәре, төрлө һөнәр эйәләрен берләштерә. Дәүләт символы яҡташтарыбыҙҙың ҡаҙаныштары һәм ҡаһарманлығы тураһында иҫкәртә, яңы үрҙәр һәм еңеүҙәргә әйҙәй.

Башҡортостандан махсус хәрби операция биләмәһенә сираттағы яугирҙар төркөмө юлланды

Ике аҙналыҡ отпускҡа ҡайтҡан ир-егеттәр ялын файҙалы үткәргән, яҡындары менән осрашҡан, көнкүреш мәсьәләләрен хәл иткән, йәш быуында илһөйәрлек рухы тәрбиәләүгә үҙ өлөшөн индергән. Ватан һаҡсылары алыҫ юлға бергә хеҙмәт иткән иптәштәренә күстәнәстәр ҙә алған. Был инде күптән яуҙағы ҡәрҙәштәргә ярҙам йолаһына әүерелгән. Шулай уҡ Бөрө районы ирекмәндәре лә хәрбиҙәргә посылкалар килтергән.

Өфөнөң Киров районы халҡы махсус хәрби операцияға сираттағы гуманитар ылау туплап ебәргән

Тәгәрмәстәр, генератор, бензобысҡыс, окоп шәмдәре һәм маскировка селтәрҙәре. Өфөнөң Киров районы халҡы махсус хәрби операцияға сираттағы гуманитар ылау туплап ебәргән. Был йүнәлештә баш ҡаланың бөтә райондары ла әүҙем эш алып бара. Тулыраҡ киләһе яҙмала.

М-12 федераль трассаһының Башҡортостан аша үткән өлөшө 72 процентҡа әҙер

Әле объектта инженер селтәрҙәре төҙөлә, яҡтыртыу системаһы булдырыла. Киләсәктә Өфөнән Дүртөйлөгә тиклем юлды киңәйтеү планлаштырыла. "Рәсәй" тигән транспорт маршруты Санкт-Петербургтан Владивостокка тиклем 12 мең километрға һуҙыла. Уның Дүртөйлөнән Әсеткә тиклем өлөшө - 272 километр. Был юл Башҡортостан, Пермь крайы, Свердловск өлкәһе аша үтә.

Баҡалы ауылында йәшәүсе Бикйән Әптекәев 100 йәшлек юбилейын билдәләне

Бөйөк Ватан һуғышында ҡатнашыусы ветеран әле булһа телевизорҙан махсус хәрби операция яңылыҡтарын, Салауат Юлаев хоккей командаһы уйындарын яратып ҡарай. Ул үҙе Бөйөк Ватан һуғышы йылдарында радист булып хеҙмәт иткән. Ленинград блокадаһын , Эстония , Латвия һәм Польшаны фашистарҙан азат итеүҙә ҡатнашҡан. Хәрби хеҙмәтте Бикйән Әлтекәев Иосиф Сталиндың улы Василий Сталин менән бер батальонда үткән. Еңеүҙе Берлин ҡалаһы эргәһендә ҡаршы алған. Һуғыштан һуң оҙаҡ йылдар Баҡалы ауылы янғын һүндереү идаралығында эшләгән.

Башҡортостан менән Үзбәкстан араһында хеҙмәттәшлек яңы кимәлгә сыға

Уҙған йылдың 11 айы йомғаҡтары буйынса яҡтар араһында тышҡы сауҙа әйләнеше 2023 йылдың ғинуар-ноябре менән сағыштырғанда, яҡынса 20 процентҡа артҡан. Төбәктән экспорт - 14,7, ә импорт 68,5 процентҡа күбәйгән. Хеҙмәтәшлек даирәһен артабан да киңәйтеү маҡсатында республика сит ил парнерҙары менән сәнәғәт кооперацияһын үҫтерергә ниәтләй.

Нуриман районының Красный Ключ ауылында яңыртылған табип амбулаторияһы асылды

Ауылға сифатлы медицина. Нуриман районының Красный Ключ ауылында яңыртылған табип амбулаторияһы асылды. Медицина учреждениеһына Башҡортостан Башлығы Радий Хәбиров ҡушыуы буйынса капиталь ремонт үткәрелгән. Ошо маҡсатта 55 миллион һум аҡса йүнәлтелгән. Объект заманса ҡорамалдар менән йыһазландырылған. Алты ауыл халҡы өсөн стационар шарттарында уңайлы ҡабул итеү һәм дауалау ойошторолған . Был хаҡта ентекләберәк киләһе яҙмала.

Яңы технологиялар яу яланында хәл иткес роль уйнай

Роботтар һуғышы фантастика түгел, ә ысынбарлыҡ. Махсус хәрби операция яугирҙары күктә һәм ерҙә лә ситтән идара ителеүсе дрондар ҡуллана. Уларҙы һөжүм ваҡытында, хәрби комлект, ылау ташыуҙа, яралыларҙы эвакуациялауҙа , ғөмүмән кеше үтеп инә алмаҫлыҡ ерҙә күрергә мөмкин. «Башҡортостан» полкы инженерҙары дрондарҙы даими камиллаштырып тора. Оҫта ҡулдарҙа ябай арба ла утлы ҡоралға әйләнә.

Башҡорт дәүләт педагогия университетында Фирҙәүес Хисамитдинова исемендәге аудитория асылды

Билдәле ғалимә Фирҙәүес Хисамитдинованың тыуыуна 75 йыл уңайынан Мифтахетдин Аҡмулла исемендәге Башҡорт дәүләт педагогия университетында исемле аудитория асылды. Заманында ошо юғары уҡыу йортонда эшләп киткән ғалимә башҡорт телен донъяуи кимәлгә күтәреүгә өлгәшә. Уның етәкселегендә башҡарылған фәнни хеҙмәттәр әлегәсә уникаль иҫәпләнә.

Өфөлә билдәле рәссам Вәсил Ханнановты иҫкә алдылар

Мәңгелек палитраһы. Өфөлә билдәле рәссам Вәсил Ханнановты иҫкә алдылар. Рәсәйҙең атҡаҙанған, Башҡортостандың халыҡ рәссамы, график, ассамбляж һәм инсталляция оҫтаһы, Наил Латфуллин исемендәге заман сәнғәт республика музейына нигеҙ һалыусы, «Сыңғыҙхан» ижади берекмәһе етәксеһе Вәсил Ханнановтың эштәре халыҡсанлығы, тәрән фәлсәфәһе менән тамашасы күңелен яулай. Тормошҡа ашырған ҡыйыу проекттары ла актуаллеге менән үҙенсәлекле.

Милли йәштәр театрында «Бер ғүмер етмәй икән» спектакленең премьераһы үтте

Мостай Кәрим исемендәге Милли йәштәр театрында «Бер ғүмер етмәй икән» спектакленең премьераһы үтте. Махсус хәрби операцияла ҡатнашыусы яугирҙарға арналған пьесала республика хәрбиҙәренең батырлығы, ҡаһарманлығы һәм илһөйәрлеге сәхнәләштерелә. Спектаклдә Рәсәй Геройы Илдар Суфийәров, Батырлыҡ ордены кавалеры Фәнис Хөсәйенов һәм башҡа яугирҙарҙың йыйылма образдары сағылдырыла.

Башҡортостанда Ағиҙел портында яңыртылғандан һуң йөк причалы асыла

Бында 5 тоннаға тиклем йөк ташыусы караптарға яғыулыҡ ҡойола. Причал кәрәкле ҡорамалдар менән йыһазландырылған. Шулай уҡ караптарҙы һыу менән тәьмин итеү ҡарала, тип белдерҙе Транспорт һәм юл хужалығы министры Любовь Минакова.

Башҡортостандан герой-әсәнең дүрт улы МХО-нан ҡайтҡан

Тулҡынландырғыс видеояҙма. Күп балалы әсә Наталья Иванованың дүрт улы МХО-нан ҡайтып төшкән. Улар барыһы ла алғы һыҙыҡта хеҙмәт итә. Герой-әсәгә сюрпризды яугирҙарға арналған концертта эшләгәндәр.

Ағалы-ҡустылы яугирҙар ҡаһарманлығы өсөн Суворов миҙалы, «Хәрби хеҙмәте өсөн» һәм «Хәрби ҡаһарманлығы өсөн» ордендары менән наградаланған.
Видео - «Юрта» төркөмө.

Закон балаларҙы эттәрҙән һаҡлаясаҡ

Дума рәйесе Вячеслав Володин Ғаиләне яҡлау, ата, әсә һәм бала мәсьәләләре буйынса комитетҡа балаларҙы берәҙәк эттәр һөжүменән һаҡлау буйынса нормалар әҙерләргә ҡушты. - Тәртип урынлаштырырға кәрәк. Бала ғүмере күпкә ҡәҙерле. Эттәрҙе яҡлау кәрәклеге тураһында һүҙ йөрөтөүселәр өсөн яуап - хайуандарҙы ташларға ярамай, бында ла яуаплылыҡ булырға тейеш, - тине Вячеслав Володин. Күптән түгел, 23 февралдә Ставрополдә берәҙәк эттәр 9 йәшлек ҡыҙҙы талап үлтерҙе. Ғәмәлдәге закон буйынса хужаһыҙ этте тотоп, уға чип беркетеп бер аҙҙан кире ебәреү ҡаралған.

Башҡортостан йәштәре уйындар аша яңы технология өйрәнә

Башҡортостан вәкилдәре "Берлога" милли киберплатформаһы буйынса Бөтә Рәсәй конференцияһында ҡатнашты. Ул йәштәрҙе уйындар аша технологияларҙы өйрәнеүгә йәлеп итеүгә йүнәлтелгән. Башҡортостан был платформаны ҡулланыу буйынса алдынғы төбәк. Беҙҙең республикала уға мәғариф учреждениелары һәм технология компаниялары ҡушылған. Стратегик башланғыстар агентлығы мәғлүмәттәре буйынса йыл ярым ваҡыт эсендә платформала технологик суверенитет үҫеше йүнәлештәре буйынса 4 мең бушлай видеоуйын сыҡҡан.

Ейәнсура районынан 8 йәшлек Әмир Мәһәҙиев планшетҡа тип йыйған аҡсаһын яугирҙарға тапшырған

Ейәнсура районынан 8 йәшлек Әмир Мәһәҙиев махсус хәрби операция яугирҙарына планшетҡа тип йыйған аҡсаһын тапшырған. Бының өсөн малайға копилкаһын ватырға тура килә.
Бала үҙенең ҡарарын аҡсаның әлеге ваҡытта һуғышта кемдәрҙеңдер аталары булған яугирҙарға кәрәгерәк булыуы менән аңлата. Әмирҙең башланғысына дуҫтары һәм таныштары, класташтары ла ҡушыла, һөҙөмтәлә балалар ике рацияға етерлек аҡса йыйған. Был сумманы Әмир масхус хәрби операция яугирына шәхсән тапшыра, яҡташыбыҙ фронтҡа яңы рациялар менән юллана.

Мәләүез районында ирекмәндәр махсус хәрби операция яугирының дауаханалағы әсәһенең хәлен белеште

Ханымдың улы алғы һыҙыҡҡа былтыр үҙ теләге менән ҡушылған. Ирекмәндәр Михайловтар ғаиләһенә лә барҙы. Ошо көндәрҙә уларҙың улдары отпуск ялына ҡайтырға тейеш. Яңыраҡ яугир Жуков миҙалы менән бүләкләнгән. Шулай уҡ Ватанды һаҡлаусылар көнө менән ҡотлау һәм бүләктәр яугирҙар атаһы Бәҙретдин Зәйнәғәбдиновҡа ла тапшырылды.