Башҡортостан халҡы экологияны яҡшы белә

Башҡортостан Бөтә Рәсәй экология диктантында ҡатнашыусылар һаны буйынса алдынғы төбәк тип танылды. Уҙған йылда был акцияла беҙҙең республиканан 350 меңдән ашыу кеше ҡатнашты, тип хәбәр итәләр хөкүмәттән. Ҡыҙыл китап, ҡурсаулыҡтар һәм экологик туризм темалары һайланды. Бөтә Рәсәй экология диктанты "Экология" милли проектында ярашлы уҙғарылып килә.

Салауат Юлаев исемендәге ирекле батальон яугирҙары махсус хәрби операция биләмәһенә юлланды

Йәнә яуҙаштар янына. Салауат Юлаев исемендәге ирекле батальон яугирҙары ҡыҫҡа отпускынан һуң, махсус хәрби операция биләмәһенә юлланды. Ял ваҡытында һалдаттар туғандары менән Яңы йыл ҡаршылаған, көндәлек мәсьәләләрен хәл иткән, кемдер никах уҡытып та өлгөргән.

Етем һәм ата-әсә ҡарауынан мәхрүм балаларға фатир асҡыстары

Благовещенда төҙөлгән йорттан уларға йәмғеһе 8 торлаҡ бүленде. Фатирҙарҙа ремонт эшләнгән, һыу, ут, газ үткәрелгән. Бер бүлмәле фатир хужалары араһында Виталий Иванушкин да бар. Егет 2018 йылдан сиратта тороп, ниһайәт, торлаҡлы булды.

Дәүләкән ҡалаһы һәм Бүздәк ауылында яңы «башҡорт ихаталары» үҫеп сыҡты

Был үтенес менән урындағы халыҡ Башҡортостан башлығына 2023 йылғы «Тура бәйләнеш» ваҡытында мөрәжәғәт иткән булған. Йыл да үтмәй, халыҡ башланғысы дәүләт ярҙамында тормошҡа ашырыла.

Өфө лимонарийы Рәсәйҙең төрлө төбәктәренән килгән туристарҙы цитрус емештәре менән һоҡландыра

Яңы йыл байрамдарында ла хужалыҡ теплицаһында эш туҡтатылмаған, тропик һәм субтропик үҫемлектәр айырым иғтибар талап итә. Шул уҡ ваҡытта бында экскурсиялар ҙа даими уҙғарыла.

«Торатау» геопаркында тағы бер визит үҙәк төҙөләсәк

Ул Ғафури районындағы «Таш Аҫты» биләмәһендә барлыҡҡа киләсәк. Был турала Радий Хәбиров Дәүләт Йыйылышы - Ҡоролтайға мөрәжәғәтнамәһендә Башҡортостандың эшҡыуарлыҡ һәм туризм министрлығына бурыс ҡуйғайны. «Торатау» геопаркы 2024 йыл эсендә миллионға яҡын туристы йәлеп иткән, уларҙың 350 меңе шихандарҙы күргән. Әйткәндәй, былтыр Торатау итәгендә яңы этнокомплекс сафҡа ингәйне.

Мәктәптәрҙә метапневмовирус арҡаһында сикләүҙәр ҡабул ителмәй

Был турала Мәғариф министры Сергей Кравцов белдерҙе. - Рәсәй белем биреү системаһы ғәҙәти тәртиптә эшләй, тине ул. Ҡайһы бер төбәктәрҙә метапневмовирус таралыуы тураһында мәғлүмәттәр бар. Рәсәйҙә уҡыусыларҙың каникулы был аҙнала тамамлана.

Башҡортостанда баҡса юлдары тәртипкә килтерелә

3 йылда 212 баҡсасылыҡ ширҡәтенә илткән юлдар ремонтланған. Был программа Радий Хәбиров башланғысы менән 2022 йылдан алып ғәмәлгә ашырыла. - 2024 йылда эштәрҙе башҡарып сығыу өсөн 154 миллион һум тотонолдо, быйыл да шундай сумма ҡаралған, тип хәбәр итәләр Транспорт һәм юл хужалығы министрлығынан.

Иҡтисад фәндәре кандидаты Илдар Ғәбитов вафат булды

Илдар Миҙхәт улы 1961 йылда Әбйәлил районы Буранғол ауылында күп балалы ғаиләлә тыуған. Урта мәктәпте тамамлағандан һуң Дондағы Ростов дәүләт университетының иҡтисад факультетын тамамлай. 1983-1990 йылдарҙа Өфө дәүләт авиация техник институты, 1990-1997 йылдарҙа Өфө юридик институты доценты була. 2004 йылдан Башҡорт дәүләт университетында (хәҙерге Өфө фән һәм технологиялар университетының Финанстар институтында) эшләй.
80-дән артыҡ ғилми хеҙмәт, күп публицистик әҫәрҙәр, төрлө башватҡыстар авторы.

Өфөлә яугирҙарҙың сираттағы төркөмө махсус хәрби операция биләмәһенә юлланды

Ҡыҫҡа ваҡытлы отпусктан һуң йәнә Ватанды һаҡларға. Бөгөн яугирҙарҙың сираттағы төркөмө махсус хәрби операция биләмәһенә юлланды. Һауа торошо боҙолоп тороуын иҫәпкә алып оҙатыу сараһы «Өфө-арена» боҙ һарайы фойеһында үтте. Хәрби хеҙмәткәрҙәр яңы йылды ғаиләләре менән ҡаршылаған, яҡындары һәм иптәштәре менән осрашҡан, көнкүреш мәсьәләләрен хәл иткән. Яугирҙар алыҫ юлға үҙҙәренең әйберҙәренән тыш, хеҙмәттәштәренә посылкалар ҙа алған.

Өфөлә иҡтисад фәндәре кандидаты Илдар Ғәбитов арабыҙҙан китте

Өфө фән һәм технологиялар унивеситеты доценты, иҡтисад фәндәре кандидаты Илдар Ғәбитов арабыҙҙан китте. Уға 63 йәш ине. Илдар Миҙхәт улы 1961 йылда Әбйәлил районы Буранғол ауылында тыуған.

Кушнаренко ауылында Яңы йыл байрамдары алдынан 320 урынға иҫәпләнгән поликлиника асылды

Заманса медицина ҡоролмалары менән йыһазландырылған учреждение ғинуарҙан тулы ҡеүәтенә эшләй башлаған - бында балалар ҙа, өлкәндәр ҙә ҡабул ителә. «Һаулыҡ һаҡлау» милли проекты буйынса төҙөлгән поликлиникала төрлө йүнәлештә диагностика үтеү, дауаланыу бүлектәре ҡаралған. Яңы объект эшмәкәрлеге менән Башҡортостан башлығы Радий Хәбиров танышты.

Республикала Рәсәй оборона министрлығы менән контрактҡа ҡул ҡуйған ир-егеттәргә түләүҙәр арттырылды

Башҡортостанда яңы йылдан Рәсәй оборона министрлығы менән контрактҡа ҡул ҡуйған ир-егеттәргә түләүҙәр арттырылды. Хәҙер бер тапҡыр бирелә торған аҡса күләме 2 миллион һумға етә, ә һуңынан ай һайын 210 мең һум тирәһе эш хаҡы бирелә. Шулай итеп, хеҙмәттең беренсе йылында һәр контрактсы кәмендә 4 миллион ярым аласаҡ. Бынан тыш яугирҙарға һәм уларҙың ғаилә ағзаларына 40-тан ашыу ярҙам сараһы ҡаралған. Контрактҡа хәрби комиссариатта йәки «Защитник» берҙәм үҙәгендә ҡул ҡуйырға мөмкин.

Башҡортостан юлдарын ҡарҙан таҙартыу тәүлек әйләнәһенә алып барыла

Федераль, төбәк һәм муниципаль әһәмиәттәге трассаларға 800-ҙән ашыу берәмек техника йәлеп ителгән. Өфө урамдарына ғына йәмғеһе 262 транспорт сараһы сығарылған.

«Өйәҙе-тау» тау саңғысылары комплексында булған низағҡа ойошма етәкселеге аңлатма бирҙе

Диагнозды үҙҙәре ҡуйған, табиптарға мөрәжәғәт итеүсе булмаған. «Өйәҙе-тау» тау саңғысылары комплексында булған низағҡа ойошма етәкселеге аңлатма бирҙе. Мәскәү туристарының ял урыны тураһында насар баһаһынан һуң, Роспотребнадзор белгестәре урында тикшереү ойошторҙо. Ғауға сәбәптәрен БЮТ ижади төркөмө асыҡланы.

Республика кардиология үҙәге хирургтары сираттағы уникаль операция яһаны

Яңы йыл байрамдарында улар йөрәк сире менән яфаланған пациентҡа стент-графт урынлаштырҙы. Ҡан тамырҙарын нығытыу өсөн ҡулланылған көпшәне индереү ҡатмарлы әмәлиәт. Өфө белгестәре уны үҙенсәлекле ысул менән яһай. Һөҙөмтәлә операция күпкә тиҙерәк үтә һәм уның сифаты ла яҡшы. Пациент та әле үҙен яҡшы тоя.

“Башҡорт ихаталары” программаһы буйынса 98 ихата төҙөкләндерелә

Торлаҡ-коммуналь хужалыҡ министрлығынан белдереүҙәренсә, һуңғы биш йылда 1326 ихатаны тәртипкә килтереү өсөн алты миллиард һумдан ашыу аҡса тотонолған. Программаны ғәмәлгә ашырыуға аҡса башлыса республика бюджетынан бүленә. Уҙған йылда 143 ихатаға ремонт эшләнгән. Бының өсөн республика ҡаҙнаһынан яҡынса 1 миллиард һум йүнәлтелгән. Ихаталарҙы төҙөкләндергәндә хәүефһеҙ резина япмалы балалар һәм спорт майҙансыҡтары төҙөү, йәшелләндереү, парковка урындарын тәртипкә килтереү, яҡтыртыу, видеокүҙәтеү, эскәмйәләр, урналар ҡуйыу мотлаҡ башҡарылырға тейешле эштәр булып тора.

Сабыйҙарға ҡушылған иң үҙенсәлекле исемдәр аталды

ЗАГС реестры 1 ғинуарҙан 8-енә тиклемге мәғлүмәттәрҙе иғлан итте. Ҡыҙҙарға һирәк исемдәр араһында Дилиә, Мәликә, Рамина, Камилла һәм Ғәйшә. Малайҙарға Сармат, Альмир, Мөхәммәт һәм Данияр тигән үҙенсәлекле исемдәр ҡушылған. Иң популяр исемдәр Әминә, Йәсминә, Эмилия, Мирослава, Артем, Эмир, Матвей, Әмир һәм Даниэль булған.

Башҡортостанда китапханалар ремонтлана

2019 йылдан башлап 289 бина капиталь төҙөкләндерелгән. 19 китапхана өсөн заманса ҡорамалдар һатып алынған. Эштәр "Мәҙәниәт" милли проектына ярашлы башҡарылған. Республика мәҙәниәт министрлығынан хәбәр итеүҙәренсә, китапханалар 81 миллион һумлыҡ гранттар алған. Шулай уҡ хеҙмәткәрҙәргә адреслы ярҙам күрһәтелә.

Республика юлдарында транспорт хәрәкәте өсөн барлыҡ сикләүҙәр ҙә алынған

Һауа шарттарына бәйле, кисәнән алып сикләүҙәр 12 юл участкаһында индерелгәйне. Хәл айырыуса ҡатмарлы юл участкаларында Ғәҙәттән тыш хәлдәр министрлығы ҡотҡарыусылары тарафынан дежур постар ойошторолған, йылытыу пункттары йәйелдерелгән. Төндә ҡотҡарыусылар М-5, М-7 трассалары һәм һәм Өфө-Инйәр-Белорет автомобиль юл-транспорт осрағына тарып туңа башлаған 5 кешегә ярҙамға килгән.