Салауат Юлаев һәйкәлен реставрациялау өсөн йыл ярымға тиклем ваҡыт кәрәк була

Был турала Мәҙәни мираҫ объекттарын һаҡлау һәм файҙаланыу буйынса үҙәктән хәбәр итәләр. - Суйын - үҙенсәлекле материал, уның менән дөрөҫ эш итергә кәрәк, - тип белдерелде. Өфөлә Салауат Юлаев һәйкәле һәм ул урынлашҡан ҡурған авария хәлендә. Әле федераль әһәмиәттәге объект буйынса экспертиза эштәре бара.

Дуҫтар! Был минең өсөн бик яуаплы сығарылыш. Башҡорт рок музыкаһы - ул минең ижади юлымдың башы...
_____________________________

Друзья! Для меня это очень ответственный выпуск. Башкирская рок музыка - это то, с чего начинался мой творческий путь...

Өфөлә «Рәсәй-Ҡаҙағстан» төбәк-ара форумы асылды

Хеҙмәттәшлек юлында. Өфөлә «Рәсәй-Ҡаҙағстан» төбәк-ара форумы асылды . Ике дәүләт араһында диалог ойоштороп , хеҙмәттәшлек юлдарын киңәйтеү өсөн уҙғарылған форумда 30 төбәктән 3 меңгә яҡын делегат ҡатнаша. Башҡортостан башлығы Радий Хәбиров форум ҡунаҡтарын сәләмләп, Өфөләге осрашыуҙың төбәктәр үҫеше өсөн мөһим проекттарға башланғыс буласағына ышаныс белдерҙе.

Халыҡ-ара форум сиктәрендә дуҫтарса хоккей матчы үтте

Боҙға Башҡортостандың «Салауат Юлаев» һәм Ҡаҙағстандың «КулагЕр-СКО» ветерандар командалары сыҡты. Юлаевсылар составында танылған уйынсылар, спорт мастерҙары булһа, ҡунаҡтар коллективында - Төньяҡ-Ҡаҙағстан өлкәһенең төп хоккей клубы ветерандары уйнаны.

Йыл башынан Башҡортостанда йәшәүселәр мутлашыусылар иҫәбенә 3 миллиард ярым һум аҡса күсергән

Күрһәткестең, былтырғы менән сағыштырғанда, артыуы күҙәтелә. Хоҡуҡ һаҡлау органдары мәғлүмәттәренә ярашлы, айырыуса компьютер мәғлүмәттәре өлкәһендә мутлашыуҙар күбәйгән. Был турала Дәүләт Йыйылышы - Ҡоролтайҙа киберенәйәтселеккә ҡаршы көрәш буйынса эшсе төркөмдөң сираттағы ултырышында билдәләнде. Кәңәшмәлә Рәсәй банкы һәм банктар берләшмәһе тарафынан мәғлүмәт-телекоммуникация технологиялары ҡулланып башҡарылған енәйәттәргә ҡаршы күрелгән саралар ҡаралды. Халыҡты иҫкәртеүҙе әүҙемләштереү, ҡануни яҡтан контролде көсәйтеү бурысы ҡуйылды.

Тыуған ил геройы: Эдуард Ғәтиәтуллиндың яҙмышы һәм әсәһенең ҡаһарманлығы

Һәр яугир миңә үҙ улым кеүек. Был турала Саҡмағош районы Зәмәй ауылында йәшәүсе Зөлфиә Ғәтиәтуллина белдерҙе. Ул быйыл көҙ гуманитар ярҙам туплауҙа ҡатнашып, ылау составында Донбасҡа барып ҡайтҡан. Зөлфиә Фәнис ҡыҙының улы Эдуард Ғәтиәттулин - ҡаһарманлыҡ, тыуған илгә һөйөү өлгөһө. Махсус хәрби операцияла ул һауа-десант ғәскәрҙәрендә хеҙмәт иткән. Ҡаты алыштарҙың береһендә яҡташыбыҙ үлемесле йәрәхәт ала.

Өфөлә Баймаҡ яҡташтар берлеге осрашыуы уҙҙы

Сарала юбилярҙар ҙурланды, райондың әүҙем ағзалары билдәләнде. Райондың тиҫтәгә яҡын абруйлы вәкиленә Башҡортостан Хөкүмәте Премьер-министры вазифаһын башҡарыусы Андрей Назаров Почет грамоталары һәм Рәхмәт хаттары тапшырҙы.

Өфөлә Раушания Бәҙретдинованың шәхси күргәҙмәһе асылды

Өфөләге «Мираҫ» галереяһында Башҡортостандың атҡаҙанған рәссамы Раушания Бәҙретдинованың шәхси күргәҙмәһе асылды. Экспозицияға авторҙың төрлө осорҙа яҙылған картиналары ҡуйылған. Ижади эштәрендә яҡтыртылған төп тема тормош асылына бәйле - ғаилә, Кесе Ватан, тыуған илгә ҡарата оло һөйөү сағылыш тапҡан. Күргәҙмә декабрь аҙағына тиклем эшләй.

Уйынсыҡтар үҙебеҙҙә етештерелергә тейеш

2030 йылға шундай маҡсат ҡуйыла. Ил хөкүмәтендә алдағы йылдарға саралар планы әҙерләнгән. Уға ярашлы, балалар уйынсыҡтарын сифатлыраҡ итеү буйынса эш алып барыла, үҙебеҙҙә етештереүгә иғтибар арта. Башҡортостанда балалар тауарҙары һәм уйынсыҡтар етештереүселәр кластеры булдырылған. Ул беҙҙең республиканан 8 һәм Донецк республикаһынан 1 предприятиены берләштерә. Республика етәксеһе башланғысы менән Өфөлә "Әйҙә, уйнарға" тигән беренсе бөтә Рәсәй балалар уйынсыҡтары форум-күргәҙмәһе уҙғарылды.

Бөгөн Рәсәй менән Ҡаҙағстандың 20-се төбәк-ара хеҙмәттәшлек форумының икенсе көнө

Эшлекле программаға ярашлы, Көрәш һарайында ике дәүләт етәксеһе ҡатнашлығында пленар ултырыш уҙғарыла. Владимир Путин һәм Ҡасым-Жомарт Тоҡаев видеоконференция бәйләнеше аша сығыш яһай.
Рәсми ҡунаҡтарға килгәндә, бөгөн Башҡортостан башлығы Радий Хәбиров «Өфө» аэропортында Ҡаҙағстан Хөкүмәте Премьер-министры урынбаҫары - Аппарат етәксеһе Ғәлимжан Койшыбаев етәкселегендәге ҙур делегацияны ҡаршы алды. Көнсығыш-Ҡаҙағстан, Кустанай, Павлодар һәм Төньяҡ-Ҡаҙағстан өлкәләренең акимдары килгән.

Башҡортостан башлығы Радий Хәбиров Виталий Хоценко менән осрашты

Омск өлкәһе губернаторы Өфөгә Рәсәй менән Ҡаҙағстандың XX төбәк-ара хеҙмәттәшлек форумына килгән. Ике субъект етәкселәре иҡтисадта һәм социаль өлкәлә үҫеш мөмкинлектәрен тикшерҙе. Радий Хәбиров билдәләүенсә, нефть химияһы сәнәғәте үҙ-ара мөнәсәбәттәр үҫешенең яҡшы нөктәһе булырға мөмкин. «Беҙ шулай уҡ сауҙа әйләнешен арттырыу менән дә ҡыҙыҡһынабыҙ, айырым алғанда, ауыл хужалығы продукцияһы сегментында», - тине төбәк башлығы.

Донбасста «Башҡортостан» полкының ашханаһы музейға әйләнде

Донбасста тыуған яҡ киҫәге. «Башҡортостан» мотоуҡсылар полкының ремонт ротаһы үҙ ашханаһын тотош бер музейға әйләндергән. Хәҙер һалдаттар бында туҡланыу өсөн генә түгел, рухи аҙыҡ алыу өсөн дә йөрөй. Ашхана-музейҙы беҙҙең хәрби хәбәрселәр ҙә барып күрҙе.

Беренсе ҡатын-ҡыҙҙар отряды ирекмәндәре хәрби госпиталгә эшкә юлланды

Алдағы бер нисә аҙнала улар медицина хеҙмәткәрҙәренә ауырыу һәм яралы һалдаттарҙы ҡарарға ярҙам итәсәк. Ирекмәндәр сафында коллегабыҙ, Дәүләт Йыйылышы - Ҡоролтай депутаты Рәмзиә Кәримова ла бар.

Эшлекле бәйләнештәр

Башҡортостан менән Ҡаҙағстан араһындағы хеҙмәттәшлек нисек үҫешә? Форум ниндәй ҡаҙаныштарға юл аса?
https://vk.com/video-27097047_456285632

«Башҡорт ғөрөф-ғәҙәттәренә таянып уңышлы бизнес ойошторорға мөмкин»

Башҡорт тоҡомло аттарҙы үрсетеүсе эшҡыуар Денис Өмөтбаев - БСТ каналының күсмә студияһында ҡунаҡта. Бөгөн Өфөлә Рәсәй һәм Ҡаҙағстан төбәктәренең форумы дауам итә.
https://vk.com/video-27097047_456285619

Өфөлә «Рәсәй-Ҡаҙағстан» төбәк-ара форумының пленар ултырышы үтте

Видеобәйләнеш аша форумда ҡатнашыусыларҙы ил Президенты Владимир Путин сәләмләне. Дәүләт башлығы Ҡаҙағстан Рәсәйҙең ышаныслы партнерҙарының береһе тип белдерҙе. Уҙған йыл һөҙөмтәләре буйынса ике дәүләт араһында тауар әйләнеше 30 миллиард һум тәшкил иткән. Ҡаҙағстан иҡтисадына Рәсәйҙән 13 миллиард һум инвестициялар йәлеп ителгән. Гуманитар өлкәлә хеҙмәттәшлеккә етди иғтибар бүленә. Рәсәй юғары уҡыу йорттарында байтаҡ Ҡаҙағстан студенттары белем ала.
Ҡаҙағстан президенты Ҡасым-Жомарт Тоҡаев Өфөлә ойошторолған 20-се юбилей форумды юғары баһалап оло рәхмәтен белдерҙе. Ҡаҙағстан һәм Рәсәй араһында 49 күләмле проект ғәмәлгә ашырыла һәм дәүләт-ара хеҙмәттәшлекте артабан киңәйтеү маҡсаты ҡуйыла.

Рәсәй менән Ҡаҙағстандың 20-се төбәк-ара хеҙмәттәшлек форумының икенсе көнө үтте

Башҡортостан башлығы Радий Хәбиров рәсми ҡунаҡтар менән бергә форум майҙансығында ойошторолған берҙәм проекттар, халыҡ кәсептәре күргәҙмәләрен ҡараны. Шулай уҡ ике ил дизайнерҙарының эштәре менән танышты.

Өфөлә МХО ветерандары һәм уларҙың ғаилә ағзалары араһында ойошторолған фестиваленең финалы үтте

Илһөйәрлек рухы менән һуғарылған байрам. Өфөләге «Атайсал» мәҙәни үҙәгендә махсус хәрби операция ветерандары һәм уларҙың ғаилә ағзалары араһында ойошторолған Асыҡ төбәк-ара фестиваленең финалы үтте.
Конкурсҡа 100-ҙән ашыу ғариза ҡабул ителгән, гала-концертҡа уларҙың 15-е һайлап алынған. Ҡатнашыусылар араһында ижади коллективтар ҙа, яңғыҙ башҡарыусылар ҙа бар. Сәхнәнән патриотик йырҙар, шиғырҙар яңғыраны, шулай уҡ, үҙешмәкәр артистар музыка ҡоралдарында уйнаны

Күҙәтеү советы ағзалары Салауат Юлаев һәйкәлен реставрациялауға бәйле һорауҙарҙы тикшерҙе

Фәнни проект документацияһы менән улар Башҡортостандың мәҙәни мираҫ объекттарын дәүләт һаҡлауы буйынса идаралыҡта таныштылар.
Осрашыу күҙәтеү советы ағзалары, йәмәғәт эшмәкәрҙәре үтенесенә ярашлы ойошторолдо. Әлеге ваҡытта Салауат Юлаев һәйкәлен реставрациялауға әҙерлек буйынса фәнни проект Мәскәүҙә федераль экспертиза үтә.

Өфөлә Сәриә Миржанованың 100 йыллығына арналған ғилми-ғәмәли конференция үтте

Рәсәй халыҡтары телдәре диалектологияһының көнүҙәк проблемалары бөгөн Рәсәй фәндәр акаедмияһы Тарих, тел һәм әҙәбиәт институтында үткән ғилми-ғәмәли конференцияһында күтәрелде. Был юлы сара күренекле төркиәтсе Сәриә Миржанованың 100 йыллығы сиктәрендә үтте. Сәриә Фәзулла ҡыҙы башҡорт тел ғилеменә тос өлөш индергән шәхес. Ғалимәнең эштәре бөгөн дә көнүҙәклеген юғалтмай, төрки донъя халыҡтарында ла миҫалға алына.