«Сәләм» телеканалы республика район-ҡалалары телестудиялары хеҙмәткәрҙәре өсөн уҡыуҙар ойошторҙо

Интенсив курста журналистар һәм операторҙар алдында тәжрибәле белгестәр сығыш яһаны, муниципаль телевидение хеҙмәткәрҙәре өсөн оҫталыҡ дәрестәре ойошторолдо. Белемде камиллаштырыу, тамашасыларға сифатлы контент әҙерләү маҡсатында ойошторолған уҡыуҙарҙа барлығы 62 муниципаль телекомпания хеҙмәткәре ҡатнашты.

Автоинспекция бәлиғ булмаған водителдәр өсөн язаны ҡәтғиләштерергә тәҡдим итә

Был тема Республика парламентында түңәрәк өҫтәлдә ҡаралды. Быйыл Башҡортостанда мототранспорт йөрөткән балалар ҡатнашлығында 48 авария булған. Уларҙа бер баланың ғүмере өҙөлгән, 50-гә яҡыны йәрәхәттәр алған. Шулай уҡ электр самокаттар менән аварияға тарыған 14 балаға табиптар ярҙамы күрһәтелгән.

Башҡортостанда Ырымбур өлкәһе менән сик буйына тиклем юл ремонтлана

Аҡъяр һәм Новочеркасск араһында төҙөкләндереү эштәре бара. Юлдың оҙонлоғо 14 километрға яҡын. Ул ҙур социаль әһәмиәткә эйә, ике төбәкте тоташтыра, тип хәбәр итәләр Республика юл хужалығы идаралығынан. Шулай уҡ Таналыҡ йылғаһы аша күпер капиталь ремонтлана. Эштәр билдәләнгән план буйынса бара.

Ил хөкүмәте мәктәптәрҙә тәмәке тартыуҙы тыйыу тураһында проектты хупланы

Административ кодексҡа төҙәтмәләр әҙерләнде. Республика парламенты рәйесе Константин Толкачев белдереүенсә, мәктәп һәм балалар баҡсалары биләмәләрендә тәмәке, шулай уҡ вейптар ҡулланыуҙы сикләү маҡсаты ҡуйыла. Штрафты 3 мең һумға тиклем еткереү тәҡдим ителә. Закон проекты Дума ҡарауына тапшырыла. - Статистика буйынса өлкән кластарҙы белем алыусыларҙың 60 проценты парта. Наркологтар быны электрон тәмәке, вейптарға мода булыуы аңлата. Бындай хәлде үҙгәртергә тейешбеҙ, - тине Константин Толкачев.

Башҡортостан башлығы гранттары фондына биш йыл тулды

Ошо ваҡыт эсендә ул коммерция булмаған ойошмаларҙың төрлө өлкәләрҙәге социаль әһәмиәтле башланғыстарына ярҙам күрһәтә. Төбәк етәксеһе Радий Хәбиров социаль селтәрҙәрҙә яҙыуынса, 2020-2024 йылдарҙа мәҙәниәт, спорт, һаулыҡ мөмкинлектәре сикләнгәндәргә ярҙам итеү, кинематография, киң мәғлүмәт саралары, йәштәр сәйәсәте, республика халыҡтары телдәрен һаҡлау һәм үҫтереү өлкәһендә 830 проектҡа грант бүленгән. Был ваҡыт эсендә 20 конкурс үткәрелә, уларға 4 меңдән ашыу ғариза ҡабул ителә.

Өфөлә ғалимдар Арктиканы үҙләштереү мәсьәләләре тураһында фекер алышты

Донъяның билдәле ғалимдары Валериан Альбанов исемендәге ҡотопсолар музейында Арктиканы үҙләштереү мәсьәләләре тураһында фекер алышты. Ҡунаҡтарға Өфө фән һәм технологиялар университеты хеҙмәткәрҙәре эшләгән поляр балҡыш һәм планетаның башҡа геофизик күренештәрен фаразлау мөмкинлеге биргән виртуаль модель күрһәтелде. Унда шулай уҡ Ер шарының төньяғын һәм төньяҡ боҙло океанды өйрәнеү буйынса мәсьәләләр ҡаралды.

Хөсәйен Әхмәтов исемендәге Башҡорт дәүләт филармонияһы 86-сы ижад миҙгелен асты

Тантаналы саралар мәҙәниәт учреждениеһының бер юлы ике залында үтте. Ҙур залдағы осрашыу мәҫәлән, 450 йыллығын билдәләгән Өфөгә төрлө заман композиторҙарынан музыкаль бүләктәр тажы бүләк итте. Сәхнәлә бер юлы ике коллектив - Башҡортостандың милли халыҡ уйын ҡоралдары оркестры менән әҙәби-музыкаль лекторий сығыш яһаны. Өфөгә арналған танһыҡ йырҙар тамашасыларҙы йәнә бер нисә быуын үҫкән көй-моңдарҙы иҫкә төшөрҙө. Улар араһында башҡорт профессиональ композиторҙар мәктәбе корифейҙары Мәсәлим Вәлиев, Заһир Исмәғилев, Таһирйән Кәримов, Нариман Сабитов кеүек һәм башҡа авторҙарҙың композициялары яңғыраны.

Дмитрий Губерниев Өфөгә халыҡ-ара спорт форумына саҡырҙы

«17-19 октябрҙә яратҡан Башҡортостанымда, күркәм Өфөлә «Рәсәй - спорт дәүләте» халыҡ-ара спорт форумы үтә. Күләмле ваҡиға баш ҡаланың 450 йыллығы менән тап килеүе символик мәғәнәгә эйә».
Был турала билдәле спорт комментаторы Дмитрий Губерниев белдерҙе. Ул яҙҙырған видеояҙманы республиканың Спорт министрлығы үҙенең telegram-каналында урынлаштырған. Телевидение алып барыусыһы билдәләүенсә, Башҡортостанда спортҡа ҙур иғтибар йәлеп ителгән. Республика үҫешә, спорт объекттары төҙөлә.
Шуға ла Өфөлә көслө пленар дискуссиялар һәм спорт саралары уҙа. Барығыҙҙы ла мәҙәни, мәғариф, спорт программаларында әүҙем ҡатнашырға саҡырам. Рәсәйҙе ысын мәғәнәһендә бөйөк спорт иле итәсәкбеҙ. Осрашҡанға тиклем! - тип әйткән Дмитрий Губерниев.

Өфөлә төҙөкләндерелгәндән һуң, сираттағы күп ҡатлы йорт ихатаһы файҙаланыуға тапшырылды

Өфөнөң Черниковка биҫтәһендә төҙөкләндерелгәндән һуң, сираттағы күп ҡатлы йорт ихатаһы файҙаланыуға тапшырылды. Тантаналы шарттарҙа үткән сара олоһон да, кесеһен дә бергә йыйҙы. 80-се йылдар башында туғыҙ ҡатлы йорт сафҡа ингәндән алып биләмәпә ремонт эштәре уҙғарылмаған. Мәсьәлә тик быйыл «Башҡорт ихаталары» республика программаһы ярҙамында хәл ителә. Һөҙөмтәлә, ҡала ихатаһы танымаҫлыҡ булып үҙгәрә.

Өфө юлдарында йыл аҙағына тиклем 70 видеокүҙәтеү ҡоролмаһы ҡуйыласаҡ

Интеллектуаль транспорт системаһы. Өфө юлдарында йыл аҙағына тиклем 70 видеокүҙәтеү ҡоролмаһы ҡуйыласаҡ. Күҙәтеү системаһы тығындар һәм транспорт ағымы менән бәйле хәлде Юл хәрәкәте хәүефһеҙлеге идаралығы үҙәгенә еткерә. Оператив мониторинг юл-транспорт ваҡиғаларын күҙ уңында тотоп юлдағы хәлде контролдә тоторға ярҙам итә.

Башҡортостан хужалыҡтары шәкәр сөгөлдөрө баҫыуҙарының яртыһын ҡаҙып алған

Йәй һауа торошо ҡырыҫ булыуына ҡарамаҫтан, уңыш ҡыуандыра. Техник культураны республиканың 19 районы үҫтерә. Ҡаҙыу менән бергә аграрийҙар техник тәьминәтте байытыуға ла иғтибар бүлә. Ғафури районының «Восход СТ» аграр предприятиеһы «Грим» шәкәр сөгөлдөрө комбайнын һынай. Иң һуңғы версиялы техника әле яҡшы һөҙөмтә күрһәтә.

Өфөлә һөнәри байрамдары уңайынан бер төркөм уҡытыусылар тәбрикләнде

Һөнәри байрамдары уңайынан бер төркөм уҡытыусыларға маҡтаулы исемдәр һәм юғары дәүләт наградалары, рәхмәт хаттары тапшырылды. Педагогтарҙы Федерация советының Фән, мәғариф һәм мәҙәниәт комитеты рәйесе Лилиә Ғүмәрова, Башҡортостандың мәғариф һәм фән министры вазифаһын башҡарыусы Илдар Мәүлетбирҙин тәбрикләне.

Өфөнөң 112-се Башҡорт кавалерия дивизияһы музейында «Минең Башҡортостаным» күргәҙмәһе асылды

Өфөнөң 112-се Башҡорт кавалерия дивизияһы музейында бөгөн ҡул эштәре оҫталары Ләлә Камалетдинова менән Зөләйха Ырыҫҡолованың «Минең Башҡортостаным» тип исемләнгән күргәҙмәһе асылды.

Радий Хәбиров Педагогик хеҙмәт коллективын һәм ветерандарын һөнәри байрамдары менән ҡотланы

Бөгөн - Халыҡ-ара уҡытыусылар көнө. Педагогик хеҙмәт коллективын һәм ветерандарын һөнәри байрамдары менән Башҡортостан башлығы Радий Хәбиров ҡотланы.

Экологик акция сиктәренда Өфөнөң Булат Имашев урамына емеш ағастары ултыртылды

«Йәшел Башҡортостан» экологик акцияһы сиктәрендә Өфөнөң Булат Имашев урамына алмағастар, йүкәләр ултыртылды. Йәшелләндереү акцияһына өлкәндәр, балалар, ирекмәндәр йәлеп ителде. Шәмбе өмәһен ойоштороусылар «Йыл миҙгелдәре» тип аталған йәйге баҡса урындағы халыҡтың яратҡан ял урынына әйләнер тигән өмөттә.

«Башҡортостан» полкының хәрби хеҙмәткәре махсус хәрби операция биләмәһендә батырлыҡ күрһәтә

«Волк» ҡушматлы яугир пилотһыҙ осоу операторы булып хеҙмәт итә. Ул төндә дошман оборонаһының алғы сиген разведкалау ваҡытында «Баба-яга» тибындағы дронды күреп ҡала. Был осоу аппараттары башлыса шартлатҡыс хәрби припастар ташый, улар менән оборона позицияларын зарарлай. Был юлы ла ул «Башҡортостан» полкын тар-мар итергә йыйынған була. Яҡташыбыҙ дошман ҡоролмаһын юҡ итә, шул уҡ ваҡытта үҙенең коптерын да һаҡлап ҡала.

Шишмә районында «Хәрби бурысын үтәгәндә һәләк булған иптәштәргә» мемориал комплексы асылды

12-се айырым гвардия инженер бригадаһы урынлашҡан частә «Хәрби бурысын үтәгәндә һәләк булған иптәштәргә» тип исемләнгән мемориал комплекс асылды. Обелиск Бөйөк Ватан һуғышында, локаль бәрелештәрҙә һәм махсус хәрби операцияла һәләк булған хәрбиҙәр иҫтәлегенә арналған.

Борай районында дәүләт программаһы сиктәрендә Аҡҡош күле тәртипкә килтерелгән

Аҡҡоштар ҡайтһын күлгә. Борай районында «Ауыл биләмәләрен комплекслы үҫтереү» дәүләт программаһы сиктәрендә Аҡҡош күле тәртипкә килтерелгән. Был урында йәшәүселәрҙең генә түгел, туристарҙың да яратҡан урыны. Тик һуңғы йылдарҙа биләмә ташландыҡ хәлдә була. Ундағы үҙгәрештәрҙе БЮТ ижади төркөмө лә барып күрҙе.

«Айыҡ ауыл» конкурсы еңеүселәре Өфө районы Шамонин ауылына слетҡа йыйылды

Сарала республиканың 30 районынан 51 ауыл вәкилдәре ҡатнашты. Слет сиктәрендә конкурсты ойоштороу комитетының киңәйтелгән ултырышы ла үтте. Эшмәкәрлекте камиллаштырыу буйынса төп темалар һәм тәҡдимдәр тураһында репортаж.

Өфө эргәһендәге Иҫке Турбаҫлы ауылында яңы мәсет сафҡа инде

Башҡортостанда бөгөн йәнә бер ауыл аҙан тауышына күмелде. Өфө эргәһендәге Иҫке Турбаҫлы ауылында яңы мәсет сафҡа инде. Иман йортон асыу тантанаһы ауылдаштарҙы ғына түгел, республика район-ҡалаларынан бик күп кешеләрҙе бергә йыйҙы.

Башҡортостанда эттәргә чип беркетелә

Бының өсөн ике йылда республика ҡаҙнаһынан 57 миллион һум тотоноу ҡарала. Парламент спикеры Константин Толкачев белдереүенсә, ошо турала закон ҡабул ителгәндән һуң бөтә эттәр мотлаҡ теркәлергә тейеш була. Тәүге ике йылда чип беркетеү өсөн аҡса алынмай. Киләсәктә эттәрҙе теркәү өсөн түләргә кәрәк була. Чипта эт һәм уның хужаһы тураһында мәғлүмәттәр яҙыла. Республикала законға төҙәтмәләр әҙерләнгән.