Айғырға 10 вагонлы "Финист" йөрөй башлай

Өфө-Белорет йүнәлешендә поездар һыйҙырышлығын арттырыу буйынса эш алып барыла.Ял көндәрендә туристар күпләп барған урынға "Финист" поезы ебәрелә. - Башҡортостанға заманса электр поезының икенсе составы килде. 10 вагонлы поезд 2 мең 400 кеше һыйҙыра, - тип белдерҙеләр Транспорт һәм юл хужалығы министрлығында. Быға тиклем Айғырға табан электричкаларҙа урын етешмәүе тураһында хәбәр ителде. Республика Башлығы ризаһыҙлыҡ белдерҙе, проблеманы хәл итергә ҡушты.

Радий Хәбиров Өфөләге парктарҙы төҙөкләндереү барышы менән танышты

Бөгөн баш ҡала буйлап эш сәфәрендә төбәк етәксеһе «Ғаилә скверы», «Ҡурай тотҡан малай» фонтаны, Ҡурсаҡ театры алдындағы майҙанда һәм Черниковка биҫтәһендә булды. Ҡала баҡсаларындағы үҙгәрештәр тураһында ентекләберәк киләһе яҙмала.

Радий Хәбиров «Китап» нәшриәтенең яңы магазинында булды

Өфө буйлап эш сәфәре барышында Башҡортостан башлығы Радий Хәбиров «Китап» нәшриәтенең яңы магазинында булды. Сауҙа нөктәһе уҙған аҙна - 14 сентябрҙә асылғайны. Баш ҡала үҙәгендә урынлашҡан магазинда «Башҡорт энциклопедияһы» нәшриәте продукцияһы ла урын алған, төрлө халыҡтарҙың милли әҙәбиәте менән танышырға була.

Өфөлә Ғәзим Шафиҡовҡа таҡтаташ асылды

Өфөлә шағир, прозаик, драматург һәм тәржемәсе, Салауат Юлаев исемендәге дәүләт премияһы лауреаты Ғәзим Шафиҡовҡа таҡтаташ асылды. Тантанаға Башҡортостан зыялылары, яҙыусының ҡәләмдәштәре, туғандары һәм яҡташтары йыйылды. Сараға Ауырғазы, Ғафури һәм Хәйбулла райондарынан делегациялар ҙа килгәйне. Быйыл әҙиптең тыуыуына ла 85 йыл тула.

Өфөлә «Бала саҡты ҡайтарып» төбәк фестивале тамамланды

Өфөлә бөгөн «Бала саҡты ҡайтарып» төбәк фестивале тамамланды. Өс көн дауамында барған сарала Рәсәйҙең тиҫтәнән ашыу төбәгенән 500-ҙән ашыу бала ҡатнашты. «Бала саҡты ҡайтарып» фестивале балалар йорттарына ярҙам итеү, етем һәм ата-әсә ҡарауынан мәхрүм балаларҙы социаль яраҡлаштырыу, һөнәри йүнәлеш биреү маҡсатында ойошторола.

Ырымбур өлкәһендә Рауил Бикбаевтың исеме мәңгеләштерелде

Аҡбулат ауылында Башҡортостандың халыҡ шағирына мемориаль таҡтаташ асылды. Ул уҙған быуаттың 50-се йылдарында ошонда педагогия училищеһында белем алған. Таҡтаташты Ырымбур башҡорттары ҡоролтайы әҙерләгән. Рауил Бикбаев 2019 йылда 80 йәшендә вафат булды.

Уҡыу йорттарының ятаҡтары капиталь ремонтлана

Башҡортостан федераль программала ҡатнаша. Был турала Радий Хәбиров студенттар менән осрашыуҙа белдерҙе. - Республика мәғариф һәм фән министрлығы тейешле ғариза тапшырҙы. Киләһе йылдан юғары уҡыу йорттары ятаҡтарында капиталь ремонт башлайбыҙ. Биш йылда уларҙы тулыһынса төҙөкләндереү маҡсатын ҡуябыҙ, - тине ул. Радий Хәбиров белдереүенсә, Башҡортостан шулай уҡ ҙур федераль фәнни-технологик проекттарҙа әүҙем ҡатнаша.

Өфөлә «Һөт иле, баллы баш ҡала» фестивале башланды

Өфөнөң «Ҡашҡаҙан» паркында «Һөт иле, баллы баш ҡала» фестивале башланды. Ғаилә йылына һәм баш ҡаланың 450 йыллыҡ юбилейына арналған күләмле сарала республиканың төрлө төбәктәренән һөт һәм бал етештереүселәр ҡатнаша. Майҙанда ауыл хужалығы ризыҡтарын ауыҙ итергә, оҫталыҡ дәрестәрендә ҡатнашырға мөмкин.

Башҡортостандан Курск өлкәһенә 100 дрон һәм ике радиоэлектрон көрәш аппараты оҙатыла

Чечен республикаһының Башҡортостандағы вәкиллеге Өфөләге дрондар етештереүсе «Новогрупп» компанияһы менән берлектә Башҡортостан хәрбиҙәре өсөн дрондар һәм радиоэлектрон көрәш ҡорамалы ебәрергә ҡарар иткән. Дрондар яуҙа дошманды юҡ итеүҙә иң кәрәкле ҡоралдарҙың береһе.

Республикала бишенсе тапҡыр «Боронғо Өфө» тарихи фестивале үтте

«Арт-Квадрат» майҙансығында ойошторолған сарала көршәксе, тимерсе, ювелир һәм күн оҫталарын күрергә мөмкин ине. Фестиваль ҡунаҡтары ҡул эштәре күргәҙмәһе менән танышты, йәрминкә, оҫталыҡ дәрестәре, тарихи конкурс һәм викториналарҙа ҡатнашты. Өфө балалар филармонияһы ижади коллективы сығыш яһаны. Ҡул эштәре һәм археологик ҡаҙылмалар экспозицияһын «Боронғо Өфө» республика тарихи-мәҙәни музей ҡурсаулығы тәҡдим итте.

Ғафури районында боронғо төрки хәрби сәнғәте «Ҡара ҡаплан» буйынса ярыштар уҙҙы

Ғафури районы Красноусол ауылында боронғо төрки хәрби сәнғәте «Ҡара ҡаплан» буйынса ярыштар уҙҙы. Икенсе тапҡыр ойошторолған сара Күрпәс бей иҫтәләгенә һәм шифахананың 100 йыллығына арналды. Ярышта республика төбәктәренән ир-егеттәр үҙ көсөн һынаны.

Рәсәйҙә хәрби хеҙмәткә көҙгө саҡырылыш ғәҙәти ҡағиҙәләр буйынса үтә

Ир-егеттәргә ҡағыҙ повесткалар ебәрелә. Дәүләт Думаһының Оборона комитеты рәйесе Андрей Картаполов ошо турала белдерҙе. Депутат әйтеүенсә, хәрби иҫәп алып барыу буйынса электрон реестр һынау үтә. Ул киләһе йылдың ғинуарынан тулыһынса эшләй башларға тейеш.

Башҡортостанда иген һәм ҡуҙаҡлы культура майҙандарының 80 проценты йыйып алынған

Барлығы 2 миллион ярым тонна уңыш келәттәргә һалынған. Гектар ҡеүәте 22 центнер. Төбәк башлығы Радий Хәбиров социаль селтәрҙәрҙә яҙыуынса, Дәүләкән, Ғафури, Баҡалы, Нуриман, Тәтешле, Йәрмәкәй, Бүздәк һәм Илеш райондары ураҡты тамамлау алдында. Стәрлетамаҡ районы 150 мең тонна тулайым иген йыйымы менән республикала беренсе урынды биләй. Илеш, Саҡмағош, Дәүләкән һәм Мәләүез хужалыҡтары 100 мең тоннанан ашыу иген һуғып алған. Хәҙер шәкәр сөгөлдөрөнә баҫым яһала, бөгөнгә бөтә майҙандарҙың 30 проценты ҡаҙып алынған. 770 мең тонна тамыраҙыҡ йыйып алынған, гектарынан уртаса - 450 центнерҙан ашыу. Барлыҡ аграрийҙарға рәхмәт, тип яҙған Башҡортотсан башлығы.

«Патриот» паркында «Геройҙар биләмәһе» беренсе патриотик слеты үтте

Өфөлә илдә иң ҙур «Салют» реабилитация-белем биреү үҙәге 7 октябрҙә асыла. Был хаҡта Башҡортостан башлығы Радий Хәбиров Рәсәй Геройы Максим Серафимов исемендәге «Патриот» паркында «Геройҙар биләмәһе» беренсе патриотик слетында белдерҙе. Унда республика төбәктәренән һаулыҡ мөмкинлектәре сикләнгән 140- ҡа яҡын үҫмер ҡатнашты. Ике көн дауам иткән программала малайҙар өсөн оҫталыҡ дәрестәре, тәрбиәүи саралар уҙғарылды.

1 октябрҙә Өфөнөң көньяҡ ҡапҡаһы асыла

Бөгөн Радий Хәбиров рәйеслегендә уҙған оператив кәңәшмәлә билдәләнеүенсә, объект 75 процентҡа әҙер, тирә-яҡ биләмәне төҙөкләндереү, юл билдәләре ҡуйыу кеүек эштәр ҡалған. Кәңәшмәлә шулай уҡ «Рәсәй-спорт дәүләте» халыҡ-ара спорт форумы, йылытыу ҡаҙанлыҡтарының ҡышҡы миҙгелгә әҙерлеге, ишле ғаиләләргә яңы социаль ярҙам саралары тураһында ла һүҙ барҙы.

«Башҡортостан» полкы Ватан һағында

Мотоуҡсылар полкының Сергей Зорин исемендәге танк батальоны яугирҙары Красный Лиман йүнәлешендә дошмандың терәк пункттарын, артиллерияһын һәм бронетехникаһын юҡ итә. Көн һайын һәр экипаж заманса Т 90 м «Прорыв» танктарында бер нисә тапҡыр хәрби заданиеға сыға. Башҡорт танкистарының Ватан өсөн нисек көрәшеүе һәм ни өсөн яугирҙар махсус хәрби операцияға барырға ҡарар итеүҙәре хаҡында киләһе репортажда.

Башҡортостанда иген һәм ҡуҙаҡлы культура майҙандарын урып - йыйыу эштәре аҙағына яҡынлаша

Барлығы 2 миллион ярым тонна уңыш келәттәргә һалынған. Гектар ҡеүәте 22 центнер. Көслө ямғырҙар арҡаһында райондарҙа ғәҙәттән тыш хәл иғлан ителһә лә, хужалыҡтар бирешмәй, уңыш өсөн көрәшә. Благовещен районы ла ошо исемлектә. Ҡырыҫ һауа торошо арҡаһында районда борсаҡ, ужым бойҙайы һәм арышы зыян күргән.

Өфө коррекция мәктәп-интернаты уҡыусылары башҡорт телен брайль шрифты ярҙамында өйрәнә башланы

Белем алыр өсөн сиктәр юҡ. Өфө коррекция мәктәп-интернаты уҡыусылары башҡорт телен брайль шрифты ярҙамында өйрәнә башланы. Күреү һәләтен юғалтҡан балалар өсөн яңы дәреслектәр әҙерләнгән. Тактиль башҡорт алфавиты һәм махсус һүрәттәр менән байытылған уҡыу әсбаптары Башҡортостан башлығы гранты скитәрендә тормошҡа ашырыла.

Ишембайҙағы Башҡорт кадет корпусы Волга буйы округында иң яҡшыһы тип танылды

Был турала Республика Башлығы хәбәр итте. - Бында тәрбиәләнеүселәр ысын ир-егет була. Кадет корпусында әле 320 бала белем ала. Рәсәй Герой Александр Доставалов исемен йөрөткән уҡыу йортонда 6-сы кластан 11-се класҡа тиклем белем алалар. Бер нисә тел өйрәнергә мөмкин, түңәрәктәр, секциялар бар, спортҡа ҙур иғтибар бүленә, - ти Радий Хәбиров.

Башҡортостанда күп ҡатлы йорттар йылытыу миҙгеленә әҙер

Торлаҡ-коммуналь хужалыҡ министрлығынан хәбәр итеүҙәренсә, йәй айҙарында гидравлик һынауҙар уҙғарылған, торбаларға ремонт эшләнгән. Бөгөнгә йорттарҙың барыһы ла әҙерлек паспорты алған. Йылытыу буйынса һорауҙар менән ҡыҙыу элемтәгә мөрәжәғәт итергә була. Һандары ведомство сайтында күрһәтелгән. 5 тәүлек рәттән уртаса температура 8 градустан күтәрелмәһә йорттарға йылы бирелергә тейеш.

Башҡортостанда түләүле парковкала түләмәгән өсөн штраф һаласаҡтар

Транспорт һәм юл хужалығы министрлығында ошо турала закон проекты әҙерләнгән. Штраф суммаһын 1 500 һумдан билдәләү тәҡдим ителә. Бындай эштәрҙе административ комиссия ҡарарға тейеш була. Штрафты протоколһыҙ ҙа һалыуҙары мөмкин, был осраҡта фото, йә видеотеркәү приборҙарынан мәғлүмәттәр иҫәпкә алына.