Башҡортостанда ниҙәр бар?

✅ Башҡортостанда 2025 йылға тиклем тағы ла 118 ауылға һәм ҡасабаға газ үтәсәк.

✅ Радий Хәбиров республика геройы, партизан Николай Киселёвтың ҡыҙына Шайморатов генерал орденын тапшырҙы.

✅ Быйыл Р-240 трассаһы реконструкцияһы барышында (Стәрлетамаҡ урау юлының 112-се саҡрымынан алып Стәрлебаш боролошона тиклем) ер эштәре башҡарыласаҡ, инженер селтәрҙәре күсереләсәк. Ә 2025-2026 йылдарҙа трассаның ҡалған ике һыҙаты һалынасаҡ.

✅ Радий Хәбиров урта махсус уҡыу йорттарында эшсе һөнәрҙәргә ҡабул итеү урындарын арттырырға ҡушты.

✅ Башҡортостан агросәнәғәт комплексына ямғыр ташҡыны килтергән зыян 1 миллиард һумға баһалана. Яҡынса 120,5 мең гектар майҙанда уңыш юҡҡа сыҡҡан, уларҙың 112,3 мең гектары иген һәм ҡуҙаҡлы культуралар.

✅ БР Һаулыҡ һаҡлау министрлығы диспансерлаштырыу барышында иң күп асыҡланған сирҙәрҙе атаны: ҡан әйләнеше, тын юлдары ауырыуҙары, шәкәр сире һәм яман шеш.

✅Уҙған аҙнала 55 авария теркәлгән, уларҙа дүрт кеше һәләк булған. 2024 йыл башынан Башҡортостан урмандарында 247 кеше юғалған.

✅Хәбиров Өфөләге буласаҡ башҡорт арбаты – Октябрь революцияһы урамында күсмә кәңәшмә уҙғарырға ҡушты.

✅2024 йылда республика халҡы (18 – 49 йәштәрҙәге ҡатын-ҡыҙҙар һәм 18 – 55 йәштәрҙәге ир-егеттәр) диспансерлаштырыу мәлендә өҫтәмә тикшереү үтергә мөмкин. Һүҙ репродуктив сәләмәтлек хаҡында бара.

✅Ишембайҙа ҡала көнөнә яңыртылған йәмәғәт киңлектәре асыла. Бында Башҡортостан нефтен тәүге асыусылар майҙанын төҙөкләндереү тамамланған. Унда һәйкәлде, скверҙы һәм Матросов исемендәге паркты яңыртҡандар. Һайран ауылында янғын депоһы асыласаҡ.

✅«Башҡорт аты» халыҡ-ара фестивале 11,5 мең кешене йыйған. «Башҡорт оҙон ғүмерлелеге. Туризм» проекты буйынса 300-ҙән ашыу турист барған. Фестивалдең аҙыҡ-түлек майҙанында Баймаҡ, Белорет райондарынан һәм Сибай ҡалаһынан 20 эшҡыуарҙың ризыҡтарыт тәҡдим ителгән. Уларҙың дөйөм килеме 800 мең һум тәшкил иткән.

Тауарҙар һатыу һәм күргәҙмәләр майҙанында Әбйәлил, Баймҡ, Белорет, Ейәнсура, Көйөргәҙе, Мәләүез, Стәрлетамаҡ, Учалы, Күгәрсен, Хәйбулла райондарынан һәм Күмертау ҡалаһынан «Башҡортостан продукты» программаһында ҡатнашыусы 25 дипломанттың тауарҙары һәм әйберҙәре тәҡдим ителгән. Уларҙың дөйөм килеме – 1 миллион һум.

✅ Быйыл Башҡортостан мәктәптәренә 519 мең бала уҡыуға бара. Төбәк Башлығы 1 сентябргә уҡыу йорттарының тирә-яғында тәртип булдырырға ҡушты.

✅ 1 сентябрҙә Башҡортостан биш мәктәп капиталь ремонттан һуң үҙ ишектәрен асасаҡ: Уҫаҡ-Кисеү ауылы мәктәбе (Бишбүләк районы), 3-сө Башҡорт республика гимназия-интернаты (Күмертау), Стәрлетамаҡтың 2-се лицей-интернаты, Красная Башкирия ауылы мәктәбе (Әбйәлил районы) һәм Өфөнөң 119-сы мәктәбе.

✅ Һуңғы ике йылда республикала 140 мәктәпкә капиталь ремонт яһалған. Июль айында Башҡортостан РФ Мәғариф һәм фән министрлығына 2025-2027 йылдарҙа мәктәптәрҙе ремонтлауға ғариза ебәргән. Бынан тыш, 2025-2027 йылдарҙа балалар баҡсаларын ремонтлау буйынса ғариза әҙерләнгән.

✅ Быйыл август кәңәшмәһе тәүге тапҡыр Стәрлетамаҡта үтте. Киләһе йыл кәңәшмә Бөрө ҡалаһында уҙасаҡ.

✅ «Бер тин дә бюджет аҡсаһы файҙаланылманы»: Стәрлемаҡта меценаттарҙың аҡсаһына «Купец 2.0» фестивале ойошторолған. Унда 71 мең кеше, 330 кәсепсе һәм 1250 кеше милли кейем парадында ҡатнашҡан.

✅ Өфө юбилейына 23 мәҙәни мираҫ объекты ремонтласаҡ.

Янғынға ҡаршы махсус тәртип бөтөрөлдө

Урман янғындары менән хәл тотороҡланыуға бәйле, 19 августан Башҡортостанда янғынға ҡаршы махсус тәртип ғәмәлдән сығарылды. Был турала бойороҡҡа Республика Хөкүмәте премьер-министры Андрей Назаров ҡул ҡуйған. 27 майҙа Башҡортостан биләмәһендә янғынға ҡаршы махсус режим индерелде. Төп маҡсат — урман янғындарына һәм ҡоро үлән яныуға бәйле хәлдәргә юл ҡуймау.

Башҡортостанда “Иғтибар - балалар!” операцияһы башланды

Акция 13 сентябргә тиклем дауам итә. Уның барышында юл хәрәкәте дәүләт инспекцияһы балаларҙы транспортта йөрөтөү ҡағиҙәләренең үтәлешен тикшерә, белем биреү учреждениеларында профилактик саралар ойоштора. Һуңғы ете айҙа балалар ҡатнашлығында 189 юл-транспорт ваҡиғаһы теркәлгән. Уларҙа 7 бала һәләк булған, 202 бала йәрәхәтләнгән.

Өфөлә хәрбиҙәрҙең сираттағы төркөмө махсус хәрби операция биләмәһенә оҙатылды

Ике аҙналыҡ ялдан һуң, йәнә алғы һыҙыҡҡа. «Өфө-Арена» комплексы майҙанынан хәрбиҙәрҙең сираттағы төркөмө оҙатылды. Яугирҙарҙың барыһы ла Запорожье йүнәлешендә хеҙмәт итә. Яҡташтарыбыҙҙы махсус хәрби операция биләмәһенә тиклем алып барыуға республика тарафынан транспорт бүленгән.

Радий Хәбиров шәхси эшҡыуарҙар менән осрашты

Евразия фәнни-мәғариф үҙәге кампусында үткән сарала эшҡыуарҙарға дәүләт ярҙамын юллау, үҫеш юлдары тураһында һүҙ барҙы. Радий Хәбиров ҡатмарлы иҡтисади осорҙа үҙ бизнесын ойоштороп әүҙем эшләүсе яҡташтарға рәхмәтен белдерҙе. Короновирус инфекцияһы осоронда сикләүҙәр, махсус хәрби операция менән бәйле сит ил санкциялары булыуға ҡарамаҫтан төбәк эшҡыуарҙары юғалып ҡалманы. Төбәк тулайым продукцияһының өстән бер өлөшө улар көсө менән етештерелә. Бәләкәй һәм урта бизнес өлкәһендә эшләгән 500 меңдән ашыу эшҡыуар төбәк иҡтисадын үҫтереүгә ярҙам итә, даими рәүештә инвестициялар йәлеп ителә.

Социологтар Башҡортостан Башлығы вазифаһына кандидаттар рейтингын иғлан итте

Башҡортостан гуманитар тикшеренеүҙәр үҙәге үткәргән социаль һорау алыуға ярашлы, һайлаусыларҙың 70 проценттан ашыуы сентябрь башында участкаға килә. Һәм теркәлгән кандидаттарҙың иң юғары танылғанлығы Радий Хәбировта. «Ғәҙел Рәсәй»ҙән Владимир Нагорныйҙы - 19,6, Либерал демократтарҙан Иван Сухаревты - 23,7, Коммунистарҙың яңы лидеры Артур Шәйнуровты - 16,4 һәм һорау алыныусыларҙың 16, 8 проценты «Яңы кешеләр»ҙән Илшат Тимерйәновты таный йәки ишетеп белә.

Шаран районы ирекмәндәре Күрск ҡалаһы халҡына ярҙам акцияһына ҡушылды

«Йөрәктән-йөрәккә». Башҡортостандың йәштәр сәйәсәте буйынса дәүләт комитеты ойошторған Күрск ҡалаһы халҡына ярҙам акцияһына Шаран районынан ирекмәндәр, ҡатын-ҡыҙҙар советтары, йәштәр бүлеге ҡушылды. Гуманитар ярҙамға район халҡы үҙ теләге менән 128 450 һум аҡса йыйған.

Башҡортостанда дәүләт программаһы буйынса өс йылда 120 мәҙәниәт белгесе торлаҡ шарттарын яҡшыртҡан

Башҡортостанда «Ауыл мәҙәниәт хеҙмәткәре» программаһы буйынса өс йылда 120 мәҙәниәт белгесе торлаҡ шарттарын яҡшыртҡан. Ошо маҡсатта 75 миллион һум аҡса йүнәлтелгән. 2025 йылда проект ил күләмендә эшләй башлай, Рәсәй Президенты Владимир Путин Федераль Йыйылышҡа мөрәжәғәтнамәһе барышында ошо хаҡта иғлан итте. Программаның Шишмә районында тормошҡа ашырылыуы тураһында репортаж.

Билдәле режиссер Айрат Абушахманов 50 йәшлек юбилейын билдәләй

Бөгөн Мәжит Ғафури исемендәге Башҡорт академия драма театрының баш режиссеры, Башҡортостандың атҡаҙанған сәнғәт эшмәкәре, Салауат Юлаев исемендәге дәүләт премияһы лауреаты Айрат Абушахманов 50 йәшлек юбилейын билдәләй. Режиссер илдең төрлө театрҙарында 50-нән ашыу спектакль ҡуйған. Әле ул тыуған театрында премьера сәхнәләштереү менән мәшғүл.

Башҡортостан ауылдарында йәш педагогтар араһында грант алыусылар билдәләнде

Конкурсҡа 180 ғариза ҡабул ителгән. Мәғариф һәм фән министры Илдар Мәүлетбирҙин белдереүенсә, эксперттар комиссияһы белем биреү проекттарын баһаланған, 150 еңеүсе һайлап алынған. Ауыл уҡытыусыларына гранттар 2019 йылда Радий Хәбиров Указы менән булдырылды. Конкурста 35 йәшкәсә педагогтар ҡатнаша. Йыл һайын 690 мең һумлыҡ гранттар бирелә. Ҡабул ителгән талаптарға ярашлы, еңеүселәр ауыл мәктәбендә кәмендә 10 йыл эшләргә тейеш була.

БСТ-ла — төрөк сериалы!

Боронғо йолалар менән зиннәтле тормош киҫешкән урында Истанбул ҡалаһының үҙәгендә бер-береһен күрә алмаған ике көслө ғаилә йәшәй. Дошманлыҡ хөкөм һөргән ерҙә көтмәгәндә мөхәббәт тыуа! Ғашиҡ йәштәр ғаилә серҙәрен асып дошманлыҡты еңеп сыға алырмы?

БСТ телеканалында һәр эш көнөндә сәғәт 10-да төрөк сериалы премьераһы - «Һындырылған яҙмыштар».

Башҡортостанда тағы бер муниципалитет ҡала көнөн уҙғарыуҙан баш тартты

Стәрлетамаҡта шундай ҡарар ҡабул ителгән. Байрам 1 сентябрҙә булырға тейеш ине. Хакимиәт башлығы Рөстәм Ғәзизов белдереүенсә, хәҙерге ҡатмарлы шарттарҙа тамашалар өсөн тәғәйенләнгән бөтә аҡса махсус хәрби операцияла ҡатнашыусыларға йүнәлтелә. Быға тиклем Күмертауҙа ҡала көнөн уҙғарыуҙан баш тарттылар.

Өфөлә Салауат Юлаев проспекты аша күперҙәр төрлө төҫтәр менән биҙәлә

Ҡала хакимиәтенән хәбәр итеүҙәренсә, әле СССР-ҙың 50 йыллығы урамына ҡушылған урында эштәр алып барыла. Был күпер ҡыҙыл ут менән яна. Зәки Вәлиди урамына - зәңгәр, Октябрь революцияһы урамына - йәшел, Әй урамына - миләүшә, Революция урамына ҡыҙғылт-һары төҫтәр менән янған күпер аша күтәрелергә мөмкин. - -Төрлө төҫтәргә биҙәү водителдәр өсөн үҙенсәлекле навигация ла булып тора, - тип белдерәләр хакимиәттән.

Өфөлә 5-се тапҡыр «Аталыҡ даны» республика йәмәғәт наградаһы еңеүселәре билдәләнде

Республиканың төрлө район-ҡалаларынан йәмғеһе 50-нән ашыу ғаилә башлығы тантаналы шарттарҙа бүләкләнде. Йолаға ярашлы, ир-аттар «Батырлыҡ», «Күп балалы», «Иң әүҙем атай» һәм тағы ла бер нисә номинацияла иң яҡшыһы тип танылды. «Батырлыҡ» йүнәлешендә еңеүселәрҙе - махсус хәрби операцияла һәм башҡа хәрби бәрелештәрҙә ҡатнашҡан атайҙарҙы

Башҡортостанда махсус хәрби операцияла ҡтанашыусылар һәм уларҙың ғаиләләре өсөн өҫтәмә льгота булдырылды

Бынан һуң, һалдат үҙе, уның ата-әсәһе, тормош иптәше һәм балалары төбәк һәм муниципаль-ара түләүле юлдарҙан бушлай йөрөй ала. Тейешле указға Башҡортостан башлығы Радий Хәбиров ҡул ҡуйҙы. Указ махсус бойороҡҡа тиклем эшләй. Хәтерегеҙгә төшөрәбеҙ, Оборона министрлығы менән контракт төҙөүселәр өсөн түләү суммаһы 1 миллион 200 мең һумға тиклем артты.

Янғын иҫкәртеү приборҙары 1 мең 100-ҙән ашыу кеше ғүмерен һаҡлап ҡалған

Уларҙың 438-е - балалар. Был турала социаль селтәрҙә Радий Хәбиров хәбәр итә. Быйыл йәй инвалидтар, хәрәкәт итә алмаған кешеләрҙең йорттарында GSM модулле приборҙар ҡуя башланыҡ. Янғын тураһында сигнал шунда уҡ ашығыс хеҙмәттәргә, йорт хужаһының туғандарына һәм башҡа номерҙарға ебәрелә. Үҙ аллы сыға алмаған кешене ҡотҡарып була, ти Радий Хәбиров. Әле бындай приборҙар Благовещен, Ишембай, Стәрлетамаҡ һәм Тәтешле райондарында урынлаштырыла.

Салауат вариҫтары сигенә белмәй!

Шайморатов генералдың һүҙҙәре бөгөн дә көнүҙәк. 27 августа, Миңлеғәле Шайморатовтың тыуған көнөндә, БСТ каналында «Батырҙар дәүере» телемарафоны үтә.

Легендар командир һәм 112-се Башҡорт кавалерия дивизияһы тураһында тапшырыуҙар, Бөйөк Ватан һуғышы геройҙары юлын дауам итеүсе хәрбиҙәр менән бәйләнеш, контракт төҙөгән уҙамандар, ветерандар менән әңгәмә, яугирҙар һәм уларҙың ғаиләләренә ҡаралған федераль һәм төбәк түләүҙәре.

Быларҙың барыһы тураһында - 27 августа БСТ-ла «Батырҙар дәүере. Шайморатовҡа -125» телемарафонында!

Радий Хәбиров «Аталыҡ даны» конкурсында еңеүсе ир-аттар менән осрашты

«Патриот» хәрби илһөйәрлек паркында үткән сарала атайҙар төбәк етәксеһе менән аралашып үҙҙәрен борсоған һорауҙарға яуап алды. Осрашыуҙа күп бала тәрбиәләп үҫтергән, балалар йортонан тәрбиәгә сабый алған, инвалид бала ҡараған, улдарын Ватан һаҡсылары итеп үҫтергән әүҙем ҡарашлы атайҙар ҡатнашты.

ПОЛИЭФ етештереү ҡеүәтен арттыра

Һуңғы йылдарҙа предприятие 4 миллиард һумдан ашыу инвестиция йәлеп итеп полиэтилентерефталат химик матдәһен сәғәтенә 4 тонна етештерә ала. Гранула киләсәктә төрлө һауыттар, төҙөлөш материалдарын эшләү өсөн ҡулланыла. Шулай уҡ компания биләмәһендә 11 футбол майҙанына тиң ҡояш электростанцияһы сафҡа ингән. Был проекттарҙың барыһы ла Инвестиция сәғәте форматында үткән кәңәшмәлә ҡаралып, хуплау тапҡайны.

«Ғаилә ҡунаҡ бүлмәһе» проекты - миһырбанлыҡ нигеҙе

«Ғаилә ҡунаҡ бүлмәһе» йәки «СВОя семейная гостиная» исемле проект - миһырбанлыҡ нигеҙе. Сара «Ватанды һаҡлаусылар» дәүләт фондының Башҡортостандағы филиалы «Башҡорт ҡатын-ҡыҙҙары» йәмғиәте ойошмаһы менән берлектә тормошҡа ашырыла. Ул Республика башлығы гранты ярҙамында махсус хәрби операцияла яҡындарын юғалтҡан ғаиләләргә булышлыҡ итеү маҡсатында булдырылған.

Туймазы районы Төмәнәк урта мәктәбе Бөтә Рәсәй конкурсында приз яуланы

Туймазы районы Төмәнәк урта мәктәбе «Иң яҡшы һанлы практика» Бөтә Рәсәй конкурсының «Илдең иң яҡшы һанлы мәктәптәре» номинацияһы призеры. Мәғариф милли проекты сиктәрендә «Үҫеш нөктәһе», инициативалы бюджетлау программаһы буйынса «Hi - tech park» фәнни-инновацион үҙәге, шайморатовсылар класы булған мәктәп ҡаҙаныштары хаҡында репортаж.