Өфөлә квадрокоптерҙы рөхсәтһеҙ осорған кешегә штраф һалынды. Баш ҡаланың транспорт прокуратураһынан хәбәр итеүҙәренсә, Дим районында күл буйында пилотһыҙ осҡос һауаға күтәрелгән. Квадрокоптерҙы осороу өсөн алдан рөхсәт алынмаған һәм аппарат бер ҡайҙа ла теркәлмәгән булған. Ошо сәбәпле пилотһыҙ осҡос хужаһына 30 мең һум штраф һалынған. Башҡортостан Башлығы указына ярашлы, республика биләмәһендә квадрокоптер йәки дрондар осороу сикләнә.

Республикала яңы маҡтаулы исем булдырылды.

Ул “Башҡортостандың атҡаҙанған дәүләт һәм муниципаль хеҙмәткәре” тип атала. Дәүләт Йыйылышы-Ҡоролтай комитеты рәйесе Рөстәм Ишмөхәмәтов:

“Маҡтаулы исем намыҫлы эшләгән, эшенә яуаплы ҡараған һәм шәхси ҡаҙаныштары булған дәүләт власы һәм урындағы үҙиадара органдары хеҙмәткәрҙәренә тапшырыла. Был награда дәүләт һәм муниципаль хеҙмәткәрҙәрҙең абруйын күтәрер тип иҫәпләйбеҙ. Ул шулай уҡ йәмғиәттең дәүләт институтына ышанысын арттырырға тейеш. Исемде булдырғанда беҙ шулай уҡ һәләтле йәштәрҙе дәүләт хеҙмәтенә йәлеп итеү маҡсатын да ҡуйҙыҡ. Маҡтаулы исем кешеләрҙе яңы уңыштарға дәртләндерер тигән өмөттәбеҙ.”

Украина прокуратураһы ситтән тороп Башҡортостан Башлығы менән Өфө мэрын ғәйепләне

Ведомствоның рәсми сайтындағы текста уларҙың Рәсәй ғәскәрҙәренең ихтыяждарын матди яҡтан тәьмин итеүҙәре тураһында белдерелә. Үҙҙәренең сәйәси йоғонтоһон һәм административ ресурстарын файҙаланып, ғәйепләнеүселәр шәхсән Рәсәй армияһы өсөн хәрби техника, ҡорамалдар, кейем һатып алыуға бойороҡтар бирә. Судҡа тиклемге тикшереү менән Винница өлкәһендәге Украина хәүефһеҙлеге идаралығы шөғөлләнә.
Яңылыҡҡа Республика башлығы хакимиәтендә оператив яуап бирҙеләр. Матбуғат хеҙмәтендә белдереүҙәренсә, Украина яғынан булған актты Радий Хәбировтың махсус хәрби операцияға ярҙам итеүгә индергән шәхси өлөшөн таныу тип ҡарайҙар.

Радий Хәбиров Башҡортостан башлығы вазифаһына кандидатты хуплау ҡултамғалары менән исемлек тапшырҙы

Радий Хәбиров республиканың Үҙәк һайлау комиссияһына Башҡортостан башлығы вазифаһына кандидатты хуплау ҡултамғалары менән исемлек тапшырҙы. Радий Хәбиров менән бергә «Берҙәм Рәсәй» партияһының төбәк бүлексәһе етәксеһе Руслан Насретдинов һәм кандидаттың финанс вәкиле Максим Ульчев булды. Башҡортостан Башлығын һайлау өс көн дауамында - 6, 7, 8 сентябрҙә үтә.

2028 йылға республикаға инвестициялар күләмен 1 триллион һумға еткереү күҙаллана

Башҡортостан башлығы Радий Хәбиров етәкселегендә үткән оператив кәңәшмәлә ҡатмарлы шарттарға ҡарамаҫтан иҡтисадты үҫтереү, төбәктә инвестиция проекттарын тормошҡа ашырыу, яңы эш урындары булдырыу һорауҙары ҡаралды. Радий Хәбиров ҡушыуы буйынса «Ватанды һаҡлаусылар» дәүләт фонды социаль координаторҙары муниципалитет етәкселәре менән әүҙемерәк эшләй башлаясаҡ. Бынан тыш, яугирҙарҙың шифаханаларға юлламаһын туғандарына күсереүҙе еңелләштереү мәсьәләләре ҡаралды.

Радий Хәбиров БРИКС илдәре уйындары еңеүселәре менән осрашты

Республика башлығы спортсыларҙы юғары ҡаҙаныштары менән тәбрикләп Маҡтау ҡағыҙҙары менән бүләкләне. Башҡортостан атлеттары Рәсәй йыйылма командаһы иҫәбенә шаҡтай ҙур өлөш индерҙе. Ҡазанда уҙған уйындарҙа яҡташтарыбыҙ 20 миҙал яуланы. Шуларҙың яртыһынан күбеһе алтын.

Башҡортостан колледждарында ҡабул итеү кампанияһы башланды

Төбәк Мәғариф һәм фән министрлығынан хәбәр итеүҙәренсә, быйыл абитуриенттарҙа машиналар эшләү, төҙөлөш, IT, мәғариф һәм медицина менән бәйле һөнәрҙәргә ҡыҙыҡһыныу юғары. Туғыҙынсылар өсөн 22 меңдән ашыу бюджет урыны әҙерләнгән.

Баймаҡ районында Урман һабантуйы үтте

Ат сабышы урынына тракторҙар ярышы, ә милли уйындарҙы ағас йығыу, бурау, тейәү, юныу буйынса конкурстар алмаштыра. Оҙайлы ямғырҙарға ҡарамаҫтан Баймаҡ районында шаулап-гөрләп икенсе Урман һабантуйы үтте. Был үҙенсәлекле сара 2022 йылда билдәле эшҡыуарҙар, ағалы-ҡустылы Тимур һәм Илсур Нәбиуллиндарҙың башланғысы менән уҙғарыла башлай. Быйыл Урман һабантуйы Башҡортостан башлығы Радий Хәбировтың грантына ойошторолған. Сарала оҙайлы йылдар урман хужалығында эшләгәндәргә дәүләт наградалары, ә конкурс еңеүселәренә ҡиммәтле приздар тапшырылды.

Өфөлә «Көньяҡ ҡапҡа» объекты әҙерлеге бөгөн 70 процент тәшкил итә

Яҡын арала төҙөүселәр яңы юлдың бер өлөшөн файҙаланыуға тапшырырға ниәтләй. Эш барышы менән БЮТ ижади төркөмө лә танышты.

Өфөнөң Почетлы граждандары рубрикаһының сираттағы геройы - Сәүиә Сираева

70 йылдан ашыу сәнғәткә тоғро. Рәсәйҙең атҡаҙанған, Башҡортостандың һәм Татарстандың халыҡ артисы Сәүиә Сираева - Өфөнөң Почетлы граждандары рубрикаһының сираттағы геройы. Ошо көндәрҙә «Нур» татар дәүләт театрында 32-се ижад миҙгеле ул уйнаған «Ғәлиәбаныу» спектакле менән тамамланды.

Рәсәйҙә льготалы кешеләр коммуналь хеҙмәттәр өсөн комиссияһыҙ иҫәпләшә ала. Дәүләт Думаһы тейешле закон проектын ҡабул итте. Пенсионерҙар, инвалидтар, хәрби хәрәкәттәр ветерандарынан, шулай уҡ күп балалы ғаиләләрҙән банк аша аҡса түләгәндә комиссия алып ҡалынмай. Ошондай мөмкинлек 1 июлдән көсөнә инде. Бынан тыш, башҡа кешеләргә “Дәүләт хеҙмәттәре. Йорт” ҡушымтаһы аша коммуналь хеҙмәттәргә түләгәндә комиссия алынмай.

Бөгөн Боден күле өҫтөндәге фажиғәгә 22 йыл

2002 йылдың 2 июленә ҡарай төндә Өфөнән Испанияға осҡан самолет Германияның Боден күле өҫтөндә һәләкәткә осрай. Диспетчер ғәйебе арҡаһында, “Башҡортостан һауа юлдары” авиакомпанияһының “ТУ-154” лайнеры “Боинг” йөк самолеты менән бәрелешә. Фажиғәлә 71 кеше, шул иҫәптән, 52 баланың ғүмере өҙөлә.

Авиаһәләкәт булған Юберлинген ҡалаһы янында һәйкәл ҡуйылған. Ул “Өҙөлгән ынйы теҙмәһе” тип атала. Өфөләге Көньяҡ зыяратта фажиғәлә һәләк булғандар иҫтәлегенә мемориаль комплекс бар.

Башҡортостанда “Мәктәпкә йыйынырға ярҙам ит” хәйриә акцияһы башланды. 31 августҡа тиклем “Ғаилә” үҙәктәренә уҡыу кәрәк-яраҡтары тапшырырға була. Ярҙам күрһәтеләсәк ойошма һәм ғаиләләр исемлеген Республика ғаилә, хеҙмәт һәм халыҡты социаль яҡлау министрлығы тәҡдим итә.
☎️ "Ғаилә" үҙәктәренең берҙәм телефоны: 8-800-347-5000.

#мәктәпкәйыйынырғаярҙамит
#центрысемьярб #помогисобратьсявшколу

Ишембайҙа 72 йәшлек кейәү менән 66 йәшлек кәләш никахлашҡан

Башҡортостан Юстиция эштәре буйынса дәүләт комитетының матбуғат хеҙмәте хәбәр итеүенсә, быйыл тәүге ярты йыллыҡта Ишембай районы һәм ҡалаһының ЗАГС бүлегендә никахҡа инеү тураһында 162 акт яҙмаһы теркәлгән.

Улар араһында иң йәшт — 25 йәшлек егет менән 17 йәшлек ҡыҙ.

Ә иң өлкәне — 72 йәшлек кейәү менән 66 йәшлек кәләш. 2024 йылдың 29 июнендә Владимир Лефлер һәм Любовь Глазырина сәстәрен сәскә бәйләгән.

Стәрлетамаҡта фатирҙа газ шартлаған

Бөгөн Стәрлетамаҡ ҡалаһының Артем урамындағы йортта көнкүреш газы шартлаған. Фажиғәлә ете кеше йәрәхәтләнгән, уларҙың икәүһе - балалар. Бер кеше үлгән, тип хәбәр иттеләр Стәрлетамаҡ хакимиәтендә.

Ваҡиға урынында оператив штаб булдырылған, етәксеһе - муниципалитет башлығы Рөстәм Ғәзизов. Авария-ҡотҡарыу хеҙмәттәре, шулай уҡ өс берәмек янғын һүндереү техникаһы һәм өс берәмек ашығыс ярҙам бригадаһы эшләй.

Башҡортостан халҡы “Ваҡыт капсулаһы” өсөн фекерҙәр тәҡдим итә ала. Шулай уҡ әйберҙәр тапшырырға була. Киләһе быуындарға тәғәйенләнгән капсула быйыл һалына. Идеялар өсөн “Бәйләнештә” социаль селтәрендә Өфө тарихы музейы төркөмөндә тауыш бирергә мөмкин. Иҫтәлекле предметтарҙы Ленин урамындағы 72-се йортта тапшырырға була.

Радий Хәбиров «Йәмәғәт киңлектәре сәғәте» форматында кәңәшмә үткәрҙе

Осрашыуҙа тораҡ пункттарҙы төҙөкләндереү проекттары тикшерелде. Торлаҡ-коммуналь хужалыҡ министры Ирина Голованова, Өфөнөң Урмансылар һәм Ленин исемендәге парктарын яңыртыу эштәре, «Башҡорт ихаталары» программаһы үтәлеше менән таныштырҙы, шулай уҡ бәләкәй ҡалаларҙа һәм тарихи ауылдарҙа уңайлы ҡала мөхитен булдырыу буйынса Бөтә Рәсәй конкурсында еңеүсе проекттарҙы тормошҡа ашырыу хаҡында һөйләне.

18 июлдә Учалы районының Ҡотой ауылында «Олотау йыйыны» халыҡ-ара футбол фестивале башлана

18 июлдә Учалы районының Ҡотой ауылында алтынсы «Олотау йыйыны» халыҡ-ара футбол фестивале башлана. Быйыл турнир өс көн дауам итә һәм унда рекордлы һанда командалар, шулай уҡ тарихтағы иң ҙур приз фонды уйнатыласаҡ. Сараға әҙерлек сиктәрендә Өфөлә йәрәбә ойошторолдо.

Ялға ҡайтҡан һалдат ғаилә ҡорған

"Турист" позывнойлы һалдат ҡыҫҡа ваҡытлы ялға ҡайҡас, етди ҡарар ҡабул итә һәм яратып йөрөгән ҡыҙына тәҡдим яһай.
Яна (кәләше), әлбиттә, ризалығын белдерә. Йәштәр оҙаҡ уйлап тормай, туғандарын һәм дуҫтарын йыйып, бата уҡыта һәм мөнәсәбәттәрен законлаштыра. Әйткәндәй, "Турист" махсус хәрби операция башланғас та өлөшләтә мобилизацияға эләгә.

- Яна менән күптән дуҫлашып йөрөйбеҙ. Ул мине көтөп ала, оҙатып ҡала. Был юлы ялға ҡайтҡанда ғаилә ҡорорға булдым. Йәремә барыһы өсөн дә рәхмәтлемен, - ти "Турист".

Йәштәргә бәхетле тормош теләйбеҙ!

«Патриот» хәрби-илһөйәрлек паркында ауыл биләмәләре хакимиәте башлыҡтарының семинары асылды

Ике көн дауам итәсәк сарала ҡатнашыусыларҙы Башҡортостан башлығы Радий Хәбиров сәләмләне. Осрашыуҙа ауыл халҡын борсоған көнүҙәк мәсьәләләр күтәрелде. Биләмәләрҙе төҙөкләндереү, торлаҡ-коммуналь өлкә, социаль инфраструктура, экология мәсьәләләре, туризмды үҫтереү һәм башҡа һорауҙар тикшерелде. Махсус хәрби операцияла ҡатнашыусыларға ярҙам, сентябрҙә уҙасаҡ һайлауға әҙерлек саралары ла иғтибар үҙәгенә ҡуйылды.

Радий Хәбиров махсус хәрби операцияла ҡатнашыусыларға ярҙамын дауам итәсәк

Радий Хәбиров, хәүеф-хәтәргә ҡарамаҫтан, махсус хәрби операцияла ҡатнашыусыларға ярҙамын дауам итәсәк. Хәтерегеҙгә төшөрәбеҙ, кисә Украина прокуратураһы ситтән тороп Башҡортостан Башлығы менән Өфө мэрына яла япты. Уларҙы Рәсәй ғәскәрҙәренең ихтыяждарын матди тәьмин итеүҙә ғәйепләйҙәр. Атап әйткәндә, һүҙ ҡорамалдар, техника һатып алыуҙа, гуманитар конвойҙарҙы махсус хәпби операция биләмәһенә ебәреүҙә ярҙам итеү тураһында бара. Бындай белдереүгә аңлатма һәм ниндәй эҙемтәләргә килтереү ихималлығы хаҡында киләһе яҙмала.