Башҡортостан башлығы вазифаһына кандидатлыҡҡа сығыу тураһында документ тапшырыу осоро тамамланды

Һайлауҙа ҡатнашырға биш парламент партияһы вәкиле теләк белдергән. Тәүгеләрҙән республика Үҙәк һайлау комиссияһына «Берҙәм Рәсәй» партияһынан тәҡдим ителгән Башкортостан башлығы Радий Хәбиров документтарын тапшырҙы. «Ғәҙел Рәсәй - Патриоттар хәҡиҡәт өсөн» партияһынан - Владимир Нагорный, ЛДПР-ҙан - Иван Сухарев, «Яңы кешеләр» партияһынан Илшат Тимерйәнов һәм КПРФ-тан Артур Шәйнуров сыҡҡан. Башҡортостан башлығын һайлау 3 көн - 6 сентябрҙән 8-нә тиклем дауам итә.

Өфөлә балалар баҡсаһы тәрбиәселәре өсөн гранттар конкурсының тәүге еңеүселәре билдәләнде

Иң яҡшы проект авторҙарына Башҡортостан башлығы Радий Хәбиров ярты миллион һумлыҡ сертификаттар тапшырҙы. Гранттар конкурсын төбәк етәксеһе былтыр Уҡытыусы һәм остаз йылында булдырғайны. Ул Рәсәйҙә беренсегә үткәрелә.

Әбйәлил районы Юлдаш ауылында яңы мәсет асылды

Әбйәлил районында тағы ла бер ауыл иман нурына ҡойондо. Юлдаш ауылында төбәктәге 55-се мәсет асылды. Берҙәм көс, уртаҡ теләк менән башҡарылған изге эш тә һанаулы ваҡыт эсендә тормошҡа ашырыла. Шуға ла тантаналы сара тотош район халҡын бергә йыйҙы.

Рәсәй Геройы Тамерлан Илһамовҡа 30 йәш тулған булыр ине

Әбйәлил районы егете, махсус хәрби операцияла ҡатнашыусы Тамерлан Илһамов 2022 йылда батырҙарса һәләк булды.

Бөгөн БСТ каналында геройҙың тыуған көнө уңайынан "Ключи от неба Тамерлана Ильгамова" фильмы күрһәтеләсәк.

Бөгөн илдә Хәтер һәм ҡайғы көнө

1941 йылдың нәҡ ошо көнөндә фашист Германияһы СССР-ға һөжүм итә. Был көн Рәсәй тарихында иң фажиғәле даталарҙың береһе һанала. Бөйөк Ватан һуғышында 27 миллион совет һалдаты һәләк була. Башҡортостандан иһә фронтҡа 700 меңләп кеше китә, уларҙың 300 меңе яу яланында ятып ҡала. Хәтер һәм ҡайғы көнөндә һәр кем дәһшәтле йылдарҙы иҫкә ала. Ҡалаларҙа митингылар ойошторола.

Радий Хәбиров республика ирекмәндәр лагерында ҡатнашыусылар менән осрашты

Рәсәй Геройы Максим Серафимов исемендәге «Патриот» хәрби-илһөйәрлек паркында үткән сарала бөтәһе 300 кеше ҡатнашты. Волентерҙар лагеры сиктәрендә улар бында ирекмәнлек эшмәкәрлегенә мотивацияны арттырыуға, социаль эштең иң яҡшы тәжрибәләре менән уртаҡлашыуға, активистарҙың ижади һәм мәҙәни үҫешенә йүнәлтелгән уҡыу курсын үтә. Осрашыуҙы асып, Радий Хәбиров республиканың ирекмәндәр хәрәкәте вәкилдәренә рәхмәт әйтеп, һуңғы йылдарҙа ирекмәнлек роле беҙҙең йәмғиәт өсөн ҙур әһәмиәткә эйә булыуын билдәләне.

Яраланған депутат йәнә Ватан һағына баҫты

Алексей Локотченко махсус хәрби операция биләмәһенә быйыл февралдә юллана, тәүге көндәрҙән үк алғы һыҙыҡта тора. Артиллерия расчеты командиры булып хеҙмәт итә, һуңынан взвод командиры итеп тәғәйенләнә. Хәрби хәрәкәттәр ваҡытында йәрәхәтләнә, эвакуация төркөмө яугирҙы оператив рәүештә госпиталгә алып килә, унда уға операция яһала.

Мәләүез районынан хәрби бәрелештәр ветеранына күп функциялы инвалид коляскаһы тапшырылған

Илдар Кәбиров «Ватанды һаҡлаусылар» дәүләт фондының адаптация программаһына ла эләккән. Алғы һыҙыҡтан яраланып ҡайтҡан яугирҙың социаль-көнкүреш һорауҙарының нисек хәл ителеүе хаҡында киләһе яҙмала.

Ҡариҙел районының Абдулла ауылында бағыр үрсетелә

Был кәсеп менән Ғиндуллиндар ғаиләһе 2016 йылдан алып шөғөлләнә. Балыҡтарҙы һыу менән өҙлөкһөҙ тәьмин итеү өсөн тау шишмәһе эргәһендә яһалма быуа быуылған. Дәүләт гранты ярҙамында фермер хужалығының матди-техник базаһы нығытылған. Төҙөкләнедереүҙән һуң бында туристар ҙа ял итә.

20 июндә Рәсәй вуздарында ҡабул итеү кампанияһы старт алды

Абитуриенттар өсөн ҡыҙыу осорҙоң ҡасанға тиклем дауам итеүе, уҡырға инеү ысулдары, яңы йүнәлештәр, бюджет урындар иҫәбе менән Республика йылдам һөнәри әҙерлек үҙәге етәксеһе урынбаҫары Гәүһәр Ғәлиева таныштырҙы. БЮТ хәбәрсеһе Гөлназ Хәйбуллина әңгәмәһе.

Башҡортостанда «Медицина һәм Профсоюз» һаулыҡ һаҡлау конкурсына йомғаҡ яһалды

Уға ярашлы аҡ халатлыларҙың эшмәкәрлеген яҡтыртыусы киң мәғлүмәт саралары белгестәре һәм коллективтар тәбрикләнде. Конкурс һөҙөмтәләре буйынса «Башҡортостан» телерадиокомпанияһы акционерҙар йәмғиәте иң яҡшыһы тип табылды.

Арҙаҡлы шәхес Рәшит Шәкүр вафат

Бөгөн халҡыбыҙҙың арҙаҡлы улы, Башҡортостандың халыҡ шағиры, Салауат Юлаев исемендәге дәүләт премияһы лауреаты Рәшит Шәкүр вафат булған, тип хәбәр итә «Башинформ».

Яҡындарының туғандарының ауыр ҡайғыһын уртаҡлашабыҙ.

«Рәшит Шәкүр халҡыбыҙға әхлаҡи йүнәлеш биреүсе ине»

Башҡортостан Башлығы ошо көндәрҙә донъя ҡуйған ғалим һәм яҙыусы Рәшит Шәкүр тураһында фекерен белдерҙе.

«Республика йәнә ауыр юғалтыу кисерҙе. Уҙған аҙнала халыҡ уҡытыусыһы Лиза Ҡыям ҡыҙы Әғәҙуллинаны һуңғы юлға оҙаттыҡ. Яҡты күңелле кеше һәм уҡытыусы.

Бөгөн республикабыҙҙың халыҡ шағиры Рәшит Шәкүр баҡыйлыҡҡа күсте. Ул матур тормош юлы үтте, абруйлы ғалим, шағир, публицист ине. Тыуған илен һәм халҡын сикһеҙ яратты. Барыбыҙ өсөн дә аҡыллы өлкән иптәш, әхлаҡи йүнәлеш булды. Яҡты хәтер. Бик йәл».

Башҡортостанда был аҙнала алкоголь һатыу сикләнә

Йәштәр көнөндә “ҡоро закон” ғәмәлдә була. Ҡануниәткә ярашлы айырым даталарҙа республика биләмәһендә хәмер һатыу тыйыла. Бындай исемлектә Йәштәр көнө лә күрһәтелгән. Закон 2022 йылда көсөнә инде. Рәсәй Президенты Владимир Путин указына ярашлы, Йәштәр көнө йыл һайын июндең аҙаҡҡы шәмбеһе үткәрелә. Быйыл ул 29 июнгә тура килә.

Радий Хәбиров Ҡырым һәм Дағстанда терактар сәбәпле ҡайғы уртаҡлашты. Бөгөн оператив кәңәшмә тынлыҡ минутынан башланды. Севастополгә ракета һөжүме булды, Махачкала һәм Дербентта террорсылар менән бәрелештә полиция хеҙмәткәрҙәренең ғүмере өҙөлдө. Башҡортостан Башлығы һәләк булғандарҙың яҡындарының ҡайғыһын уртаҡлашты. Ҡырым һәм Дағстанда терактар сәбәпле матәм көндәре иғлан ителде.

Башҡортостанда юл-транспорт ваҡиғаларында ете бала ғүмере өҙөлгән. Республика буйынса дәүләт автоинспекцияһынан белдереүҙәренсә, быйыл 6 айҙа бәлиғ булмағандар ҡатнашлығында 135 автомобиль аварияһы теркәлгән. Унда 143 бала йәрәхәтләнгән. Үҫмерҙәр үҙҙәре лә юл-транспорт ваҡиғаһы сәбәпсеһе була. Бөгөнгә 16 йәшкәсә 800-гә яҡын водитель тотолған. Рулгә рөхсәтһеҙ ултырған балалар арҡаһында өс юл-транспорт ваҡиғаһы теркәлгән. Бындай аварияларҙа өс үҫмер йәрәхәтләнгән. Әле республикала “Хәүефһеҙ йәй” тигән социаль кампания бара. Ул балалар араһында юл-транспорт ваҡиғаларын иҫкәртеү маҡсатынан үткәрелә.

Әбйәлил районына дауыл эҙемтәләрен бөтөрөүҙә ярҙам күрһәтелә

Радий Хәбиров хөкүмәттә үткән оператив кәңәшмәлә шул турала белдерҙе. Уҙған шәмбе көслө ел Йәнгел ауылы мәктәбе бинаһының ҡыйығын алып ташланы, шулай уҡ йорттар зыян күрҙе. Северный ауылында ете йорт өлөшләтә ҡыйыҡһыҙ ҡалды. Озерный ауылында ҡойма ямғыр сәбәпле ике шәхси йортто һәм 76 ихатаны һыу баҫты. Район хакимиәте башлығы Илдар Нафиҡов дауыл эҙемтәләрен бөтөрөүгә ярҙам һорап мөрәжәғәт итте.
Радий Хәбиров вице-премьер Алан Марзаевҡа мәсьәләне шәхси контролгә алырға һәм хәл итергә ҡушты.
Синоптиктар хәбәр итеүенсә, бөгөн дә республикала урыны менән көслө ел сығыуы, ямғыр яуыуы көтөлә. Халыҡҡа уяу булырға кәңәш ителә.

Башҡортостан вәкилдәре БРИКС илдәре Спорт уйындарында 20 миҙал яуланы

Радий Хәбиров бөгөн хөкүмәттә үткән оператив кәңәшмәлә Спорт министры Руслан Хәбибовҡа мөрәжәғәт итте. Республика Башлығы турнир еңеүселәре һәм призерҙары менән осрашыу ойошторорға ҡушты.
БРИКС илдәре Спорт уйындары Ҡазан ҡалаһында үтте. Унда Башҡортостан спортсылары 12 алтын, 7 көмөш һәм 1 бронза миҙал яуланы.

Радий Хәбиров аҙналыҡ оператив кәңәшмәлә дауыл эҙемтәләрен тиҙ арала бөтөрөргә ҡушты

Ямғыр һәм дауыл эҙемтәләрен тиҙ арала бөтөрөргә, юлдарҙа авариялар һанын кәметергә. Башҡортостан башлығы Радий Хәбиров яуаплы ведомстволарға дауылдан килгән зыянды бөтөрөү маҡсатын ҡуйҙы. Бынан тыш, төбәк юлдарында үлемесле авариялар мәсьәләһе иғтибарға алынды. Быйыл уҙған йыл менән сағыштырғанда, 42 кешегә күберәк үлем осрағы теркәлгән. Төбәк башлығы муниципалитет етәкселәренә махсус хәрби операцияла ҡатнашып ҡайтҡан яугирҙарҙы йәмәғәт тормошона әүҙемерәк йәлеп итергә ҡушты.

«Сибай - Аҡъяр» трассаһы тәртипкә килтерелә башланды

«Сибай - Аҡъяр» трассаһын төҙөкләндереүҙә тотҡарланған ваҡытты ҡыуып етеү өсөн юлсыларға ике йыл эшләргә тура киләсәк. Эш дөрөҫ ойошторолмаған һәм быны танырға кәрәк, тине Радий Хәбиров. Республика башлығы ремонт тамамланыу ваҡытын урындағы халыҡҡа хәбәр итергә ҡушты. Һәм эш барышына бәйле контролде көсәйтеүҙе талап итте. Төбәк етәксеһе әйтеүенсә, юл оҙон һәм ныҡ емерелгән, шуға ла уны этапҡа бүлеп тәртипкә килтереү күҙаллана. Беҙҙең ижади төркөм мәсьәләне асыҡлау өсөн Көньяҡ Урал райондарға юлланды.

Башҡортостан йәмәғәтселеге Башҡортостандың халыҡ шағиры Рәшит Шәкүрҙе һуңғы юлға оҙатты

Башҡортостан йәмәғәтселеге Башҡортостандың халыҡ шағиры, күренекле ғалим, Рәсәйҙең һәм Башҡортостандың журналистар һәм яҙыусылар союзы ағзаһы, филология фәндәре докторы, профессор Рәшит Закир улы Шәкүрҙе һуңғы юлға оҙатты. Ил ағаһына 87 йәш ине. Мәтам сараһы Хөсәйен Әхмәтов исемендәге Башҡорт дәүләт филармонияһында уҙҙы. Шәхес менән хушлашырға туғандары, яҡындары, ҡәләмдәштәре, Башҡортостан башлығы һәм башҡа дәүләт эшмәкәрҙәре килде. Сарала ил ағаһының исеме мәңгеләштерелеү, баҫылмаған әҫәрҙәрен нәшер итеү тураһында белдерелде.