Радий Хәбиров һәм Александр Куренков республика янғын һүндереүселәренә яңы техника тапшырҙы

Башҡортостан башлығы Радий Хәбиров һәм Рәсәй Ғәҙәттән тыш хәлдәр министры Александр Куренков республика янғын һүндереүселәренә яңы техника тапшырҙы. Тантаналы шарттарҙа ҡотҡарыусыларға 36 берәмек техника бүләк ителде.Бынан тыш видеобәйләнеш аша Красноусол ҡасабаһында янғын-ҡотҡарыу депоһы асылды.

Радий Хәбиров урман янғындарында ғәйеплеләрҙе ҡәтғи яуаплылыҡҡа тарттырға ҡушты

Башҡортостан Урман хужалығы министрлығы мәғлүмәттәренә ярашлы, быйыл бер кешегә ҡарата енәйәт эше ҡуҙғатылған. Республика менән идара итеү үҙәгендә ойошторолған оператив кәңәшмәлә һыу объекттарындағы хәл, Өфөнөң 450 йыллығына арналған саралар планы ла ҡаралды. Тулыраҡ киләһе яҙмала

1 июлдән Башҡортостанда коммуналь хеҙмәттәргә тарифтар үҙгәреүе көтөлә

1 июлдән Башҡортостанда, бөтә илдәге кеүек үк, коммуналь хеҙмәттәргә тарифтар үҙгәреүе көтөлә. Һүҙ йылытыу, ҡаты көнкүреш ҡалдыҡтарын сығарыу, һыу тәьминәте, һыу ағыҙыу, шулай уҡ электр энергияһы тураһында бара. Һуңғы тапҡыр тарифтар 2022 йылда күтәрелгәйне. Шул уҡ ваҡытта айырым категория граждандарға коммуналь түләүҙәргә льготалар ҡарала. Уларға кемдәр иҫәп тота ала һәм нисек яҡшы ташлама алыу мөмкинлегенә эйә булырға? Тулыраҡ киләһе яҙмала.

Федоровка районында Бөйөк Ватан һуғышында ҡатнашыусылар иҫтәлегенә мемориаль комплекс асылды

Федоровка районы Яңы Яуыш ауылында Ҡорбан ғәйете көнөндә Бөйөк Ватан һуғышында һәләк булған һәм еңеү яулап ҡайтҡан яҡташтар иҫтәлегенә мемориаль комплекс асылды. Яңы һәйкәл «Атайсал» проекты һәм ауылдаштар көсө менән төҙөлгән. Тулыраҡ киләһе яҙмала.

Башҡортостан яугирҙәре СВО биләмәһендә үҙ көсө менән мәсет төҙөгән

Донецк Халыҡ Республикаһында Салауат Юлаев исемендәге башҡорт батальоны яугирҙәре төҙөгән яңы мәсет асылды. Мәсет Донецк Халыҡ Республикаһының азат ителгән ауылдарының береһендә урынлашҡан.

Яҡташтарыбыҙ мосолмандарҙың иман йортона армия йондоҙҙары хөрмәтенә «Йондоҙ-рахман» исемен биргән. Мәсет хәрбиҙәр үҙҙәре йыйған аҡсаға һалынған. Төҙөлөш эштәре хеҙмәттән буш ваҡытта алып барылған.

Мәсет асылған көндә яугирҙәр намаҙ уҡыған һәм байрамса төшкө аш ойошторған. Бында тәүгеләрҙән булып заданиенан ҡайтҡан «юлаевсылар», Ростов өлкәһе мосолмандарының Диниә назараты вәкилдәре һәм Донецк Халыҡ Республикаһының муниципаль берәмеге етәкселәре килгән.

Башҡортостанда сүп-сар майҙансыҡтарында видеокамералар ҡуйыла

Республика Хөкүмәтендә үткән ултырышта ҡаты көнкүреш ҡалдыҡтары менән эш итеү мәсьәләһе ҡаралды. Сүп-сар һауыттарына ҡый үләндәре йәки малсылыҡ ҡалдыҡтарын ташлаған кешеләрҙе видеокамера төшөрөп ала һәм яуапҡа тарттырасаҡ. Бының өсөн айырым майҙансыҡтар бар. 58 район һәм ҡалала ҡый үләндәрен ташлау өсөн 567 урын, шулай уҡ малсылыҡ ҡалдыҡтары өсөн 800-ҙән ашыу мал зыяраты булдырылған.

Рәсәйҙә балаларға энергетиктар һатырға ярамай

Дәүләт Думаһы беренсе уҡыуҙа закон проектын ҡабул итте. Уға ярашлы, бәлиғ булмағандарға алкоголһеҙ тонусты күтәргән эсемлектәр, шул иҫәптән энергетиктар, һатыу тыйыла. Магазинда сауҙа хеҙмәткәрҙәре паспорт һорарға хоҡуҡлы була. Энергетиктар һаулыҡ өсөн етди зыян килтерә. Бындай эсемлектәр юғары ҡан баҫымы, шәрәк диабеты, йөрәк-ҡан тамырҙары сирҙере сәбәпсе булыуы ихтимал, ти табиптар. Закон 1 сентябрҙән көсөнә инергә тейеш.

Дәүләт Йыйылышы-Ҡоролтайҙың Президиум ултырышында 4 тиҫтәгә яҡын закон проекты тикшерелде

Етемдәргә социаль ярҙам саралары, йылға порты объекттарын хосусилаштырыу үҙенсәлектәре, һунарға рөхсәт алыу өсөн электрон йәрәбә. Дәүләт Йыйылышы-Ҡоролтайҙың Президиум ултырышында ошо һәм башҡа закон проекттары ҡаралды.

Республикала һабантуй байрамдары дауам итә

Уҙған ял көндәрендә генә халыҡ байрамы тиҫтәнән ашыу төбәктә билдәләнде. Ауыл хужалығы алдынғыларын тәбрикләү менән бергә, төрлө күңел асыу саралары, конкурстар ойошторолдо.

Башҡортостанда бензин тағы ҡиммәтләнде

“Башнефть” компанияһы яғыулыҡҡа хаҡ арттырған. Бензин һәм дизель был юлы 40 тингә ҡиммәтләнде. Мәҫәлән, бөгөн 95-се марка бензин литры 54 һум 80 тингә һатыла. Шул уҡ ваҡытта 100-се марка бензин 20 тингә арзанайған. Быға тиклем 29 майҙа, 4 һәм 11 июндә яғыулыҡҡа хаҡ 20 тингә күтәрелгәйне.

Башҡортостандан көрәшсе Артур Зөлҡәрнәев үҙенсәлекле рекорд ҡуйҙы

Пермь крайында Бөтә Рәсәй ауыл һабантуйында яҡташыбыҙ бер минут эсендә дәғүәселәрен 25 тапҡыр бөгөлөп ташлаған. Бындай күрһәткес Рәсәй рекордтары китабына индерелде. Милли көрәш буйынса ярышта беҙҙең республика вәкилдәре Артур Зөлҡәрнәев, Юнир Закиров һәм Айгиз Зәйнетдинов үҙ ауырлыҡ үлсәмдәрендә еңеү яуланы.

Радий Хәбиров медицина ҡорамалдарының яңы производствоһын асыуҙа ҡатнашты

Производство ҡеүәттәрен арттырыуға 600 миллион һумлыҡ инвестиция. Өфөлә медицина йүнәлешендәге мебель һәм ҡорамалдар етештергән предприятие яңы производство-склад комплексын сафҡа индерҙе. Объектты асыу тантанаһында Башҡортостан башлығы Радий Хәбиров та ҡатнашты. Шулай уҡ төбәк етәксеһе баш ҡала биләмәһендә тормошҡа ашырылған тағы ла бер инвестиция проекты менән танышты.

Башҡортостан Йәмәғәт палатаһы 15 йыллығын билдәләй

Ойошма ағзаларын юбилей менән Башҡортостан башлығы тәбрикләне. Радий Хәбиров йәмәғәт эшмәкәрҙәренә фиҙаҡәр хеҙмәте өсөн рәхмәт белдереп дәүләт наградаларын тапшырҙы.

Радий Хәбиров быйылғы уҡыу йылында олимпиадаларҙа еңеү яулаған уҡыусылар менән осрашты

Башҡортостан башлығы Радий Хәбиров быйылғы уҡыу йылында Халыҡ-ара һәм Бөтә Рәсәй олимпиадаһының йомғаҡлау этабында еңеү яулаған уҡыусылар менән осрашты. Сара Евразия фәнни белем биреү үҙәгенең халыҡ-ара студент кампусында үтте.

Башҡорт бал ҡорттары яҡлауға һәм һаҡлауға мохтаж

Бөгөн республика умартасылары менән бергә, лабораторияларҙа ла әүҙем эш алып барыла. Сит ил бал ҡорттарын индермәүгә бәйле, ҡануниәттә махсус саралар ҙа ҡаралған.

Стәрлетамаҡта Комаров урамындағы юл файҙаланыуға ваҡытынан алда тапшырылған

Стәрлетамаҡта «Хәүефһеҙ һәм сифатлы юлдар» милли проекты буйынса төҙөкләндерелгән Комаров урамындағы юл файҙаланыуға ваҡытынан алда тапшырылған. Эш ҡуйылған пландан бер айға иртәрәк тамамланған. Йәмғеһе быйыл ҡаланың төрлө өлөшөндә 8 саҡрымға яҡын арауыҡ ремонтлана. Ә республикала 1000 саҡрым юлдарҙы тәртипкә килтереү ҡаралған.

Баймаҡ районы Төркмән мәктәбенә - 100 йыл

Бер быуатлыҡ белем усағына был көндә элекке уҡыусылары, балаларға белем һәм тәрбиә биреүгә бағышлап, хаҡлы ялға сыҡҡан ветеран уҡытыусылар йыйылды.

Ғафури районында бер көндө ике иман йорто асылды

Йөҙимән һәм Ибраһим ауылдары халҡының мәсет асыу шатлығын БЮТ ижади төркөмө лә уртаҡлашты.

Мәсетле районы башҡорттары ҡоролтайы үтте

Ул VI Бөтә донъя башҡорттары Ҡоролтайына әҙерлек сиктәрендә уҙғарылды. Осрашыуҙа оло йыйынға делегаттар һайлау мәсьәләһе ҡаралды, шулай уҡ ойошманың башҡарған эштәренә йомғаҡ яһалды, киләсәккә пландар билдәләнде.

Рәсәйҙең һәм Башҡортостандың халыҡ уҡытыусыһы Лиза Әғәҙуллина вафат

«Лиза Ҡыям ҡыҙы иң билдәле химия уҡытыусыһылыр, моғайын, ул бар ғүмерен ошо эшкә арнаны. Уның уҡыусылары араһында йөҙҙән ашыу Бөтә Рәсәй олимпиадаһы еңеүселәре һәм призерҙары, шулай уҡ уның методикаһы буйынса эшләүсе бер нисә быуын уҡытыусылар бар», - тип яҙа социаль селтәрҙә ҡайғы уртаҡлашып, республика Башлығы Радий Хәбиров.

Бәхил бул, уҡытыусы! Мәрхүмәнең яҡындарының һәм туғандарының ауыр ҡайғыһын уртаҡлашабыҙ.

Республикала 19 йәшлек студент төркөмдәш ҡыҙын туҡмаған

Сибай медицина колледжында ыҙғыш ҡупҡан. 19 йәшлек студент практика ваҡытында бер төркөмдә уҡыған ҡыҙҙы туҡмаған. Был хәл видеоға эләккән. Кадрҙа күренеүенсә, ятаҡта егет ҡыҙҙы үлтереү менән янай, һуңынан уға йоҙроғо менән бер нисә тапҡыр һуға.

Студент егет төшкө аш ваҡытында оҙағыраҡ ял итергә теләгән һәм төркөмдәштәренә был хаҡта бер кемгә лә әйтмәҫкә ҡушҡан. Тик бер ҡыҙ ризалашмаған. Шуға ул ҡыҙҙы йәмһеҙ һүҙҙәр менән йәберләй башлаған, йоҙроғо менән һуғырға ла тартынмаған. Хәҙер уның ҡылығын полиция тикшерә.