Өфөлә «Мин башҡортса һөйләшәм» башҡорт теле фестивале үтә

1 июнь. Өфөнөң Арт-квадрат майҙаны.

Өфөнән 3-cө класс уҡыусыһы Кирилл Ҡасимов Президент Владимир Путиндан бүләк алды

Дәүләт башлығы портретын Башҡортостан буйынса баш федераль инспектор Алексей Касьянов тапшырҙы. Өфөлә Рәсәй президентының ҡабул итеү бүлмәһендә мәктәп уҡыусыһы ғаиләһе менән осрашыу үтте. Быға тиклем Кирилл Ҡасимов Владимир Путинға хат яҙған. Ул автографлы президент фоторәсемен һораған һәм киләсәктә татамиҙа осрашырға теләк белдергән ине. Кирилл дәүләт башлығы кеүек дзюдо менән шөғөлләнә. Алексей Касьянов ҡабул итеү бүлмәһе буйлап экскурсия үткәрҙе һәм үҫмергә уңыштар теләне.

Өфөлә «Башҡортостан гүзәле» матурлыҡ бәйгеһе үтә

Бәйгелә биш йәштән алып ун ете йәшкә тиклемге балалар һәм үҫмерҙәр, шулай уҡ 18 - 35 йәшлек һылыуҙар ҡатнашырға мөмкин. Кастингта ҡатнашыу өсөн ғаризалар ҡабул ителә.

Беренсе урын алыусыға - 100 мең һумлыҡ приз, ҡиммәтле таж, призерҙарға бағыусыларҙан бүләктәр һәм приздар тапшырыла. Финалда ҡыҙҙарҙы Мәскәүҙән билдәле актер, «Холоп» фильмында уйнаусы артист Сергей Соцердотский бүләкләйәсәк.

Конкурстың финалы 5 июлдә «Торатау» конгресс-холы сәхнәһендә үтә.

Тулыраҡ мәғлүмәт рәсми төркөмдә: https://vk.com/bashguzel

Андрей Назаров Сауҙа һәм хеҙмәттәр министрлығына мәктәптәрҙә аш-һыуҙы төрләндерергә ҡушты

Башҡортостан Хөкүмәте Премьер-министры Андрей Назаров Сауҙа һәм хеҙмәттәр министрлығына мәктәптәрҙә аш-һыуҙы төрләндерергә ҡушты. Ведомство алдында бындай бурыс Республика йортонда район-ҡалалар хакимиәттәре башлыҡтары ҡатнашлығында үткән кәңәшмә йомғаҡтары буйынса ҡуйылды.

Ҡотҡарыусы штраф та һалыуы мөмкин

Башҡортостанда ҡотҡарыусыларға һыу ингән халыҡҡа штраф һалыу хоҡуғы бирелә. Дәүләт Йыйылышы – Ҡоролтай депутаттары закон проекты әҙерләгән. Уға ярашлы, рөхсәт ителмәгән урында йәки эскән килеш һыу ингән өсөн ябай кешеләргә 5 мең һумғаса штраф һалына. Пляжда хәүефһеҙлек сараларын тәьмин итмәгән өсөн юридик шәхестәргә 25 мең һум түләргә тура киләсәк. Закон проекты был аҙнала пленар ултырышта ҡарала. Өфөлә һыу инеү миҙгеле 1 июндә башлана, 10 пляж йыһазландырыла.

Ағиҙелгә 23 мең уҡбалыҡ ебәрелде

Бөрө районына балыҡтар Мәскәү өлкәһенән килтерелгән. Уларҙы үрсетеү менән һыу биоресурстарын тергеҙеү өлкәһендә эшләгән ойошма шөғөлләнә. Йәш уҡбалыҡтарҙың ауырлығы өс-биш грамм, ә дөйөм ауырлығы 96 килограмм самаһы тәшкил итә. Республикаға улар махсус транспортта килтерелде һәм һыуға гофралы торба ярҙамында ебәрелде.

Сығарылыш синыф уҡыусылары рус теленән берҙәм дәүләт имтиханы тапшырҙы

Сығарылыш синыф уҡыусылары бөгөн рус теленән һынау тота. Был берҙәм дәүләт имтихандарында мотлаҡ предмет һәм ыңғай баһа алмай тороп урта дөйөм белем тураһында аттестация бирелмәй. Имтиханға инеү ҙә ябай түгел. Уҡыусылар декабрҙә үк инша яҙып уға инеү хоҡуғы ала. Бөгөн иһә улар тест ярҙамында белемен күрһәтә. Өфөнөң 94-се лицейында бөгөн 196 бала һынау тота. Йәмғеһе баш ҡаланың Совет районында 529 уҡыусы рус теленән имтихан тапшыра.

Баймаҡ районында сик буйы ғәскәрҙәре көнө билдәләнеләр

Бөгөн - сик буйы ғәскәрҙәре көнө. Ошо уңайҙан Баймаҡ районында бик күп саралар - Урал аръяғы агро-сәнәғәт колледжында хәрби-спорт ярышы, ҡаланың «Еңеү» паркында байрам митингы үтте. Йәшел фуражкалылар шулай уҡ хеҙмәттәштәрен дә онотманы районда автоуҙыш ойоштороп, уларҙың ғаиләләре менән осрашты.

😍Башҡорт ҡыҙҙары - Ҡытайҙа!

«Хазина» проекты! Һай, афариндар!

Ҡурайсы Земфира Рәшитов етәкләгән «Хазина» төркөмө фольклор һәм милли музыка чартының иң алдынғы 10 төркөм исемлегенә инде. Халыҡ-ара жюри тарафынан төркөм быйыл сығарған «Наза» альбомы иң уңышлыларының береһе тип табылған.

Өфөлә табиптар 780 грамлыҡ сабыйҙы ҡотҡарған

Өфөлә республика клиник перинаталь үҙәгендә 780 грамм булып тыуған сабыйға яңы ҡорамал ярҙамында беренсе операция яһағандар. Табиптар сабыйҙы ҡотҡарып ҡалған һәм һау-сәләмәт йәшәү мөмкинлеген биргән.

«Һаулыҡ һаҡлау» милли проектының «Һаулыҡ һаҡлауҙың беренсел звеноһын яңыртыу» программаһы ярҙамында беҙ үпкәне яһалма елләтеү өсөн өс аппарат һәм наркоз-тын алыу аппаратын алдыҡ. Яңы ҡорамал менән беренсе операцияны яһаныҡ та инде», — тип белдерҙеләр медицина үҙәгендә.

Өфөлә яңы «Башҡорт ихаталары» барлыҡҡа киләсәк

Ихата биләмәләрен төҙөкләндереү программаһы Башҡортостанда 2019 йылдан республика Башлығы Радий Хәбиров тәҡдиме менән тормошҡа ашырыла. Биш йыл эсендә 1300-ҙән ашыу ихата төҙөкләндерелгән. Әлеге ваҡытта Степан Кувыкин һәм Октябрь революцияһы урамдарында ике ихата төҙөкләндерелә. Проектты тормошҡа ашырыу һәм киләсәккә пландар хаҡында ентекләберәк киләһе яҙмала.

«Ватан һаҡсылары» фондының Башҡортостан филиалы эшләүенә бер йыл

«Ватан һаҡсылары» фондының Башҡортостан филиалында сенатор Олег Голов, фонд етәксеһе Гөлнур Ҡолһарина граждандарҙы ҡабул итте. Улар төрлө һорауҙар мөнән килгән тиҫтәнән ашыу кешенең мөрәжәғәтен ҡараны.
Республикала «Ватан һаҡсылары» фонды филиалы бер йыл дауамында эшләп килә. Ошо осорҙа махсус хәрби операцияла ҡатнашҡан яугирҙарҙан һәм уларҙың ғаилә ағзаларынан 44 меңдән ашыу мөрәжәғәт ҡабул ителгән.

Былтыр республикала эшҡыуарлыҡты үҫтереүгә 1 миллиард 100 миллион һум йүнәлтелгән

Ишембай районынан «Победа» ауыл хужалығы предприятиеһы ғына 12 миллион һумлыҡ дәүләт ярҙамы алған. Малсылыҡ һәм үҫемлекселек йүнәлешендә егерме йылдан ашыу уңышлы эшләгән хужалыҡта БЮТ ижади төркөмө лә булды.

Өфөлә сик буйы ғәскәрҙәре ветерандарын ҡотланылар

Бөгөн Рәсәйҙә сик буйы ғәскәрҙәре көнө билдәләнә. Йәшел фуражкалылар байрамы илдең бөтә төбәктәрендә, шул иҫәптән Башҡортостанда ла үтте. Өфө пограничниктары Еңеү паркында йыйылып, йола буйынса бер-береһен байрам менән ҡотланы, ветерандарға хөрмәт күрһәтте һәм һәләк булғандарҙы хөрмәтләп иҫкә алды.

БДМУ клиникаһында операция үткәргән пациенттарҙы реабилитациялауҙа виртуаль күҙлектәр йәлеп ителә

Башҡорт дәүләт медицина университеты клиникаһында операция үткәргән пациенттарҙы реабилитациялауҙа виртуаль күҙлектәр йәлеп ителә. Белгестәр фекеренсә, виртуаль күҙлектәр пациенттарға ыңғай хис-тойғолар туплап тиҙерәк һауығырға булышлыҡ итәсәк. Әмәлиәттән һуң борсолоу, депрессия хәлендә булған пациенттарҙы тынысландырыу ысулы тиҙҙән киң ҡулланылыр тип күҙаллана.

Өфө районы Жуков күлендә ҡотҡарыусылар 4-се разрядлы водолаз таныҡлығын алыуға һынау тотто

Ҡотҡарыусылар һөнәри белемен камиллаштыра. Өфө районы Жуков күлендә бөгөн улар 4-се разрядлы водолаз таныҡлығын алыуға һынау тотто. Бының өсөн белгестәр өс аҙналыҡ уҡыу үтте.

Өфөлә «Һаумы, һаумы, әкиәт!» дүртенсе төбәк-ара конкурсы еңеүселәрен бүләкләнеләр

Башҡортостандың мәғариф һәм фән министрлығы ойошторған ижади бәйгелә республика халыҡтарының туған телдәрендә әкиәт һөйләүселәр ҡатнашҡайны. Конкурсҡа балалар баҡсаһы тәрбиәләнеүселәре, мәктәп уҡыусылары һәм ғаилә фольклор коллективтарынан барлығы 500-ҙән ашыу эш ҡабул ителгән.

Баш ҡаланың Нуғай ауылында Рус мәҙәниәте үҙәге асылды

Музейҙағы экспонаттар араһында бер быуатлыҡ экспонаттар ҙа бар. Тарихи майҙанды ауыл мәҙәниәт хеҙмәткәрҙәре дәүләт ярҙамында булдырған. Бынан тыш, клубтың техник тәьминәтте байытылған, яңы костюмдар һатып алынған.

1 июнь Өфөлә - «Мин башҡортса һөйләшәм» фестивале!

Ситтә ҡалмағыҙ, милләттәштәр!

Электр самокатты йөрөтөү ҡағиҙәһен боҙоусыларға штраф ҡарала

Дәүләт Думаһының Ҡала төҙөлөшө һәм закондар сығарыу комитеты ошо турала ҡанун проектын хуплаған. Уны башҡа депутаттарға ла ҡабул итергә тәҡдим яһаған. Самокатты иҫерек килеш йөрөткәндәргә 20 меңдән 30 мең һумға тиклем түләргә тура килә. Юл-транспорт ваҡиғаһы урынын ҡалдырғандарға 4 меңдән 5 мең һумға тиклем штраф һалыу ҡарала.

Өфөнөң «Гидравлика» агрегат предприятеһы заводына 85 йыл

Башҡортостан башлығы Радий Хәбиров Өфөнөң «Гидравлика» агрегат предприятеһын заводҡа нигеҙ һалыныуға 85 йыл тулыу менән ҡотланы. Социаль селтәрҙә төбәк башлығы әлеге ваҡытта «Технодинамика» «Ростех» дәүләт корпорацияһы холдингына ингән предприятиены республиканың сәнәғәт флагманы тип атаған.