Уҡыусыларға көмөш миҙал да тапшырыласаҡ

Быйылдан Башҡортостан мәктәптәрендә сығарылыш уҡыусыларына алтын миҙалдан тыш, көмөшө лә тапшырыла. Был турала “Сәләм” тапшырыуында Мәғариф һәм фән министры урынбаҫары Светлана Антипина белдерҙе. Һүҙ аттестатта тик "бишле" билдәләре булған егет һәм ҡыҙҙар тураһында бара. Республикала дәүләт аттестацияһына 51 мең 9-сы, 15 мең ярым 11-се класс уҡыусыһы әҙерләнә. 24 май “Һуңғы ҡыңғырау” байрамынан һуң имтихандар башлана.

Ҡатмарлы туристик маршруттарға сығыусыларҙы махсус инструктор оҙатып барасаҡ

Башҡортостанда туристик эшмәкәрлек тураһындағы законға төҙәтмәләр әҙерләнә. Төп маҡсат - туристар хәүефһеҙлеген тәьмин итеү. - Эске туризм үҫешә, был баҙарҙа тәҡдимдәр күбәйә бара. Тауға менеү, йә мәмерйәгә инеү күптәр өсөн ғәҙәти шөғөлгә әйләнде. Бурыс - туристик һуҡмаҡтарҙы хәүефһеҙ итеү. Ҡатмарлы, махсус әҙерлек һәм ҡорамалдар талап иткән маршруттар айырым теркәлергә, унда сәфәр ҡылыусыларҙы профессиональ инструктор оҙатып барырға тейеш - тине Республика парламенты спикеры Константин Толкачев. Закон проекты 30 майҙа беренсе уҡыуға сығарыла.

«Көмөш» йәштәге туристар өсөн Белоруссия һәм Үзбәкстан буйлап турҙар ойошторола

Быйыл 20 мең кеше «Башҡортостан оҙон ғүмерлелеге. Туризм» программаһы сиктәрендә республика буйлап бер көнлөк бушлай сәйәхәткә сыға. Был хаҡта социаль селтәрҙәрҙә Радий Хәбиров яҙҙы. 2020 йылдан алып дәүләт программаһы менән 34 меңдән ашыу кеше файҙаланған.

Өфөнөң 450 йыллығына 450 биттән торған альбом барлыҡҡа киләсәк

Өфөнөң 450 йыллығына 450 биттән торған альбом. Баш ҡала юбилейына мегаполистың иң матур архитектураһы, иҫтәлекле урындары, халҡын һүрәтләгән фотокитап барлыҡҡа киләсәк. Уны «Комсомольская правда» гәзите мөхәриррҙәре һәм рәссамдары төҙөй. Әле улар баш ҡалала фото төшөрөү менән шөғөлләнә.

Аҡын районы Барахаевка ауылында йәшәүсе тимерҙән күҙ яуын алырлыҡ продукция етештерә

Уның ҡулында тимер йәнләнә. Аҡын районы Барахаевка ауылынан Эдуард Тимерғәлин тимерҙән күҙ яуын алырлыҡ продукция етештерә. «Атайсал» проекты сиктәрендә ул тыуған ауылын һәм районын төҙөкләндерә.

Ғафуриҙар махсус хәрби операция биләмәһенә сираттағы партия маскировка селтәрҙәре ебәрергә әҙерләнә

Был эш райондағы һәр бер ауыл советында көйләнгән. Ирекмәндәр һаҡланыу селтәрен махсус үрергә өйрәнеп, көн һайын тиерлек пункттарға йыйыла. Әйтәйек, Родина ауылында маскировка селтәрҙәрен үрергә хаҡлы ялдағылар ҙа, йәштәр ҙә йыйыла.

Йәш яҙыусы Рәзинә Зәйнетдинованың яны китабы донъя күрҙе

«Ҡашлы йөҙөк» тип исемләнгән китапҡа повесть, хикәйәләр, юморескалар ингән. Психологик характерҙа яҙылған әҫәрҙәрҙә күп ваҡыт телде һаҡлауға, иманға килеүгә ҡағылышлы проблемалар күтәрелә.Автор үҙен төрлө жанрҙа һынап ҡарай. Мажаралы повесть, детектив, фантастик хикәйәләр уҡыусыларҙың күңеленә хуш килер, тип уйлайбыҙ. "

— Китабымды сығарыуға ҙур өлөш индергән Яҙыусылар Союзы Рәйесе Айгиз Ғиззәт улы Баймөхәмәтовҡа, «Китап» нәшриәтенә рәхмәт! Унда индерелгән әҫәрҙәрҙең барыһы ла тиерлек «Шоңҡар», «Йәшлек», «Башҡортостан», «Йәншишмә»лә баҫылды. «Китап-Байрам»да уны һатып алырға мөмкин», — ти автор шатлығы менән бүлешеп.

2017 йылда «Йәштәр тауышы» серияһында «Килен шәле» исемле китабы донъя күрҙе. Әйткәндәй, 25 майҙа 17:00 сәғәттә «Ҡашлы йөҙөк» китабының презентацияһы уҙасаҡ.

Радик Юлъяҡшин мәртәбәле награда менән бүләкләнде

Бөгөн, 23 майҙа, билдәле йырсы Радик Юлъяҡшиндың Өфөләге Йәштәр һарайында барған концерты мәлендә йырсыға «Башҡортостандың халыҡ артисы» исеме тапшырылды. Артист награданы Башҡортостан Башлығы Хакимиәте етәксеһенең эске сәйәсәт буйынса беренсе урынбаҫары Азат Бадранов ҡулынан алды.

Ихлас ҡотлайбыҙ!

Радий Хәбиров Виктор Басаргин менән осрашты

Былтыр республика юлдарында һәләк булыусыларҙы 390 кешегә кәметеүгә өлгәшелгән. Радий Хәбиров Транспорт өлкәһен күҙәтеү буйынса федераль хеҙмәт етәксеһе Виктор Басаргин менән осрашыуҙа ошо йүнәлештәге эш һөҙөмтәләре менән таныштырҙы.
Республика башлығы әйтеүенсә, төбәктә рөхсәтһеҙ пассажирҙар ташыуҙы иҫкәртеү, юл хәрәкте хәүефһеҙлеген тәьмин итеү, автомобиль трассаларын контролдә тотоу буйынса ҙур эш башҡарыла. Федераль ведомство етәксеһе лә Башҡортостандың транспорт өлкәһе ҡаҙаныштарын юғары баһаланы. Осрашыу һуңында Виктор Басаргин Башҡортостан башлығын «Хеҙмәттәшлек өсөн» ведомство миҙалы менән бүләкләне.

Рәсәйҙә Берҙәм дәүләт имтихандарының төп осоро башланды

Төбәктең мәғариф һәм фән министрлығы мәғлүмәттәренә ярашлы, быйыл Башҡортостанда урта дөйөм белем биреү программалары буйынса 15 мең ярым уҡыусы һынау тота. Уларҙың дүрт меңе география, рус әҙәбиәте, химия буйынса. Сығарылыш синыф уҡыусылары өсөн яуаплы һәм тулҡынландырғыс мәл тураһында киләһе яҙмала.

Башҡортостандың халыҡ артисы махсус хәрби операция ихтыяждарына 3 миллион һум аҡса тапшырған

«Әсән» ҡушаматлы яугир 20 көнлөк реабилитацияға ҡайтҡан. Яу яланында уның ҡабырғаһы һынған. Әммә хәрбиҙәр алған йәрәхәттәр менән сағыштырғанда, был еңелсә имгәнеү генә, ти билдәле яҡташыбыҙ. Шуға ла ул Оборона министрлығы бүлгән 3 миллион һум компенсацияны еңеүҙе яҡынайтыуға йүнәлтергә ниәтләгән. Республика башлығы кәңәшсеһе Алик Камалетдинов менән һөйләшкәндән һуң, ул «Башҡортостан» полкына пилотһыҙ осоу аппараттары һәм медицина ротаһына башҡа кәрәк-яраҡтар, ә инде ҡалған суммаға Бишбүләк һәм Дүртөйлө райондарында маскировка селтәрҙәре үреүсе ирекмәндәргә тейешле материалдар һатып алырға ҡарар иткән.

Башҡортостанда иң оҫта иретеп-йәбештереүсе билдәләнде

Һөнәрмәндәр ярышы бөгөн Өфөлә үтте. Республиканың төрлө предприятиеларынан килгән хеҙмәткәрҙәр теоретик һәм практик белемен һынап ҡараны. Төбәк еңеүсеһе Башҡортостан данын федераль округ кимәлендә яҡлаясаҡ.

Ғафури районы Красноусол ауылында Алмаз Шафиҡовҡа хәтер таҡтаһы асылды

Ғафури районы Красноусол ауылында махсус хәрби операцияла һәләк булған Алмаз Шафиҡовҡа хәтер таҡтаһы асылды. Объект һалдат тамамлаған 3-сө урта мәктәп бинаһына ҡуйылған.

Өфөлә сығарылыш уҡыусылары ҙур вальста әйләнә

Бөгөн республикала Һуңғы ҡыңғырау була. Мәктәптәрҙә тантаналы саралар ойошторола. Өфөлә “Торатау” Конгресс-холының аҫҡы майҙансығында сығарылыш уҡыусылары өсөн байрам ойошторола. Егеттәр һәм ҡыҙҙар вальс бейей, уҡытыусылар хоры яңғырай һәм флешмоб була. Сара серпантин фейервергы менән тамамлана. Быйыл Өфөлә 4 мең 300-ҙән ашыу уҡыусы 11-се класты тамамлай.

Өфөлә юбилей алдынан трамвайҙар биҙәлә

"Меморандум" тигән проектҡа ярашлы, транспорт сағыу төҫтәргә буяла. Ҡала хакимиәтенән хәбәр итеүҙәренсә, 18-се маршуттағы бер трамвай милли балаҫ төҫтәре менән биҙәлде. Тағы өс трамвайҙы биҙәү планлаштырыла. Өфө быйыл 450 йыллығын билдәләй. Төп саралар август айында була.

Өфөлә күп балалы әсә 10-сы сабыйын тапҡан

Башҡорт дәүләт медицина университеты клиникаһынан унынсы бәпесен тапҡан әсә сыҡты. Күп балалы ғаиләне БР һаулыҡ һаҡлау министры Гөлнара Зиннурова ҡотланы.

Нальгиевтар ғаиләһендә биш малай һәм биш ҡыҙ тәрбиәләнә. Һаулыҡ һаҡлау министрлығы мәғлүмәттәре буйынса, әсә ун сабыйын да үҙаллы тапҡан. Әлегә ғаилә яңы тыуған сабыйға исем һайламаған.

Нальгиевтар ғаиләһенә Башҡортостан башлығынан һәм клиниканан Рәхмәт хаты, бүләктәр тапшырылды.

Радий Хәбиров «Китап-байрам» икенсе халыҡ-ара китап йәрминкәһен асыу тантанаһында ҡатнашты

Башҡортостан башлығы Радий Хәбиров «Китап-байрам» икенсе халыҡ-ара китап йәрминкәһен асыу тантанаһында ҡатнашып, Совет майҙанында ойошторолған әҙәби майҙансыҡтар менән танышты. Рәсәй почтаһы күләмле сара символикаһы менән конверт сығарған, почта маркаһына йәрминкәне асып мисәт һуғылды. Шулай уҡ төбәк етәксеһе «Әҙәби прививка» акцияһынан да ситтә ҡалмай, яратҡан китаптарын бүләк итте.

Өфөлә ялға ҡайтҡан яугирҙарҙы махсус хәрби операция биләмәһенә оҙаттылар

Ялдан һуң, кире яуға. Башҡортостандан, ҡыҫҡа ваҡытлы ялдан һуң, махсус хәрби операция биләмәһенә сираттағы төркөм яугирҙар юлланды. Йөҙҙән ашыу яугир өсөн уңайлы автобустар бүленгән. Колонна Донбассҡа ике көндә барып етәсәк.

📚 Башҡортостандың меңәрләгән сығарылыш класс уҡыусылары өсөн бөгөн мәктәптәрҙә һуңғы ҡыңғырау яңғыраны.

Өфөнөң Совет майҙанында Башҡортостан Башлығы Радий Хәбиров баш ҡала мәктәптәренең береһен тамамлаусы ҡыҙ менән мәктәп вальсы бейене.

Хәйерле сәғәттә, аҡ юлдар!

Өфөлә «Туғанлыҡ» VIII халыҡ-ара милли театрҙар фестивале тамамланды

Аҙна дауамында Өфөнөң өс театр майҙансығында 16 фестиваль спектаклен Башҡорт академия драма театрының баш режиссеры Айрат Абушахманов етәкселегендәге эксперт советы ҡараны. Иң яҡшы спектаклдәр һигеҙ төп номинацияла приздар менән бүләкләнде. Фестивалдә Башҡортостандан Салауат башҡорт драма театрының «Ярлыҡау» спектакле «Милли классиканың заманса сиселеше номинацияһында иң яҡшыһы тип танылды. Фестиваль еңеүселәренә тирмә формаһындағы статуэткалар тапшырылды.

Өфөнөң Совет майҙанында «Китап-байрам» Халыҡ-ара китап йәрминкәһе старт алды

Өфөнөң Совет майҙанында «Китап-байрам» Халыҡ-ара китап йәрминкәһе старт алды, ул өс көн дауам итә. Башҡортостан башлығы Радий Хәбиров икенсегә уҙғарылған сараны асыу тантанаһында ҡатнашып, уның йәмәғәтселек өсөн оло әһәмиәткә эйә булыуын билдәләне. Быйыл йәрминкәлә ҡатнашҡан нәшриәт, китап магазиндары артыуы күҙәтелә.