Өфө лимонарийында ысын йәй башланды

Хеҙмәткәрҙәр башҡорт сакураһы тип йөрөткән миндаль ҡыуаҡлығы, бугенвиллия һәм башҡа үҫемлектәр шау сәскәгә күмелгән. Өфө лимонарийында барлығы 700 төр үҫемлек менән танышып, ял көндәрен йәшеллектә үткәрергә мөмкин.

Хмелевский ҡалды, Коледов китте

Александр Хмелевский "Салауат Юлаев" менән килешеүен оҙайтты. Уның менән өс йылға контракт төҙөлдө. Уҙған миҙгелдә һөжүмсе юлаевсылар өсөн 67 уйын уҙғарҙы, 27 шайба индерҙе, 29 һөҙөмтәле пас бирҙе.
Павел Коледов менән контракт өҙөлдө. Һаҡсы Өфө командаһы өсөн 2018 йылдан уйнаны. Юлаевсылар менән 355 осрашыуҙа ҡатнашты, тип хәбәр итә клубтың матбуғат хеҙмәте.

Радий Хәбиров Күсмә халыҡтар цивилизацияһы Евразия музейы төҙөлөшө буйынса күсмә кәңәшмә үткәрҙе

Башҡортостан башлығы Радий Хәбиров Күсмә халыҡтар цивилизацияһы Евразия музейы төҙөлөшө буйынса күсмә кәңәшмә үткәрҙе. Шишмә районындағы Турахан кәшәнәһе янында туристарҙы йәлеп итәсәк объектты асыу мәсьәләһе ҡаралды. Музейҙың визит-үҙәге быйыл 6 июлдә асылыр тип көтөлә. Бынан тыш, Радий Хәбиров биләмәләрҙе төҙөкләндереү һәм йәшелләндереү предприятиеһында, «Башҡорт ихаталары» программаһы буйынса яңыртылған биләмәлә булды, урындағы ауыл хужалығы колледжын төҙөкләндереү маҡсаты ҡуйылды.

Башҡортостандан махсус хәрби операция биләмәһенә сираттағы гуманитар ылау оҙатылды

Яугирҙарға гуманитар йөк туплауға тотош республика халҡы ҡушылған, предприятиелар ҙа, эшҡыуарҙар ҙа үҙ өлөшөн индергән. Ылауҙа төҙөлөш материалдары ла, медицина препараттары ла, кейем-һалым да, аҙыҡ-түлек тә бар.

Башҡортостандың исемле хәрби подразделениелары республиканан сираттағы ярҙам алды

123-сө гуманитар ылау адресаттарына барып етте. Башҡортостандың исемле хәрби подразделениелары республиканан сираттағы ярҙам алды. Был юлы ла яугирҙарға башлыса техника, элемтә ҡорамалдары һәм көнкүреш кәрәк-яраҡтары тупланған. Улар хәрбиҙәрҙең дислокация урынына уҡ алып барып етеп тапшырылды.

Бишбүләк районы «Атайсал» проектында әүҙем ҡатнаша

Ошо төбәктә тыуып үҫеп әле илдең төрлө мөйөштәрендә йәшәгән яҡташтар Кесе Ватанының тормошон яҡшыртыуға үҙ өлөшөн индерә. Улар социаль объекттарҙы ремонтлай, Бөйөк Ватан һуғышы ветерандарының иҫтәлеген мәңгеләштереү буйынса эш алып бара, һәйкәлдәрҙе, обелисктарҙы яңырта, балалар, спорт майҙансыҡтары төҙөй, йәшелләндереү буйынса экологик ацияларҙа ҡатнаша. Йәғни, бишбүләктәр ҡайҙа ғына йәшәһә лә, ниндәй генә дәрәжәләргә өлгәшһә лә атайсалынан айырылмай. Иттихат ауылында төҙөлгөн иман йорто ла ошо бәйләнештең бер сағылышы.

87 йәшен туйларға әҙерләнеүенә ҡарамаҫтан, бүләһе өсөн үҙ ҡулдары менән ике ҡатлы йорт һала

Бәхетле ҡартлыҡта. 87 йәшен туйларға әҙерләнгән Фәнис Сруровтың тормошо күптәргә өлгө булырлыҡ. Оло йәшенә ҡарамаҫтан физик күнекмәләр яһай, һигеҙ телдә иркен аралаша, бүләһе өсөн үҙ ҡулдары менән ике ҡатлы йорт һала. Төҙөлөш урынында Фәнис Фазыл улы менән БЮТ ижади төркөмө осрашты.

1 май — Яҙ һәм хеҙмәт байрамы менән!

Күгебеҙ аяҙ, еребеҙ тыныс, донъялар имен булһын! Һәммәгеҙгә ныҡлы һаулыҡ, бәхет һәм именлек теләйбеҙ!

Маҡсатлы йүнәлтмә буйынса ҡабул итеү ҡағиҙәләре үҙгәрә

Яңы норма ил буйынса бөгөндән ғәмәлгә инә. Республика менән идара итеү үҙәгенән хәбәр итеүҙәренсә, хәҙер бер йүнәлтмә менән бер генә ВУЗды һайларға мөмкин. Уҡыу йорто ярты йыл һайын студенттың нисек өлгәшеүе тураһында мәғлүмәт биреп бара. Диплом алып сыҡҡас студентты уҡытыуға заказ биргән ойошмала кәмендә 3 йыл эшләргә кәрәк була.

Һөжүмсе Джошуа Ливо Өфөлә ҡала

"Салауат Юлаев" Канада һөжүмсеһе менән контрактты оҙайтты. Килешеү бер йылға иҫәпләнгән. Джошуа Ливо уҙған миҙгелдә 47 уйында 19 шайба индерҙе, 28 һөҙөмтәле пас бирҙе. Шулай уҡ Александр Хмелевский менән контракт оҙайтылды. Һаҡсы Павел Коледов менән килешеү өҙөлдө. Ҡапҡа һаҡсыһы Илья Ежов карьераһын тамамланы.

Тәүлек эсендә "112 системаһы"на һыу баҫыу тураһында хәбәр килмәгән

Өфө ҡалаһы янында ҙур йылғалар кимәле бер аҙ кәмегән. Күгәрсен һәм Көйөргәҙе райондарында Ағиҙелдә һыуҙың күтәрелеүе теркәлгән, тип хәбәр итәләр Ғәҙәттән тыш хәлдәр буйынса дәүләт комитетынан. Бөгөн Баймаҡ, Шишмә райондарында, Өфө ҡалаһында һыу баҫыуға бәйле 7 хәл даими контролгә алынған.

Радий Хәбиров «Өфө-хеҙмәт ҡаһарманлығы ҡалаһы» стелаһына сәскә һалды

Бөгөн - яҙ һәм хеҙмәт байрамы. Байрам айҡанлы Башҡортостан башлығы Радий Хәбиров, дәүләт һәм йәмәғәт эшмәкәрҙәре «Өфө-хеҙмәт ҡаһарманлығы ҡалаһы» стелаһына сәскә һалды. Яҙ һәм хеҙмәт байрамына арналған тантаналар икенсе йыл инде ошо стела янында башлана. Дуҫлыҡ Монументы аҫтында, Ағиҙел йылғаһы ярында урынлашҡан һәйкәл халҡыбыҙҙың Бөйөк Ватан һуғышы йылдарындағы хеҙмәт батырлығын мәңгеләштерә.

Ҡырмыҫҡалы районынан Николай Астафьев 79-сы Еңеү яҙын ҡаршылырға әҙерләнә

97 йәшлек ветеран Һәүәләй ауылында йәшәй. Николай Дмитриевич Бөйөк Ватан ғына түгел, Рус-япон һуғышын да үткән. Оло йәштәге яугир хаҡында киләһе яҙмала.

Өфөлә «Милләттәр кросы» үтте

Иглиндәр тыныслыҡ, яҙ һәм хеҙмәт байрамын еңел атлетика буйынса ярышта ҡатнашып ҡаршыланы. «Милләттәр кросы» халыҡсан спорт сараһы хаҡында киләһе яҙмала.

Башҡорт ҡыҙы Forbes рейтингына ингән!

Опера йырсыһы Айгөл Әхмәтшина Forbes-тың «30 йәшкә тиклемге иң уңышлы 30 кеше» рейтингына ингән. Был исемлеккә 30 йәшкә тиклем Бөтә Рәсәй һәм донъя кимәлендә ҙур танылыу яулаған шәхестәр инндерелә.

Айгөл Әхмәтшина — Ҡырғыҙ-Миәкәлә тыуып үҫкән, Өфө сәнғәт училищеһын тамамлаған йырсы. Яҡташыбыҙ Decca Classic донъя кимәлендәге лейблының артистары иҫәбенә индерелде. Ул — һуңғы 30 йылда контракт төҙөгән беренсе меццо-сопрано.

Афарин!

❤Йырсы Йәмил Баймырҙин кәләш алған!

Талантлы йырсы Йәмил Баймырҙин Ғаилә йылында кәләшле булған.

Хәйбулла районының Байғусҡар ауылында тыуып үҫкән Йәмил Баймырҙин (Ябай Малай) үҙенең сәхифәһендә кәләш алыуы хаҡында хәбәр иткән. "Яңы ғаилә. Баймырҙиндар ғаиләһе. Ғаилә йылы- 24" тигән хештег менән никах фотоһын һалған.

Йәш ғаиләгә оло мөхәббәт, шатлыҡ-ҡыуаныстар теләйбеҙ!

Өфөлә юл фажиғәһендә иҫән ҡалған егетте дауахананан сығаралар

Башҡортостандың Һаулыҡ һаҡлау министрлығынан биш кеше һәләк булған юл фажиғәһендә иҫән ҡалғандарҙың хәле тураһында хәбәр иттеләр.

Хәтерегеҙгә төшөрәбеҙ, 19 апрелдә Өфө — Ырымбур юлының 1-се саҡрымында «ВАЗ-2115» автомобиле «КамАЗ» йөк машинаһы менән бәрелешкән. Юл-транспорт ваҡиғаһында водитель һәм уның пассажирҙары, 22 һәм 20 йәшлек егеттәр һәм 18 йәшлек ике ҡыҙ һәләк булған. 21 йәшлек егет менән ҡыҙ иҫән ҡалған. Уларҙың барыһы ла — Өфө районында йәшәгән, бер ҡыҙ — Өфөнән.

«Пациентты бөгөн сығаралар. Ҡыҙ ауыр хәлдә реанимацияла ята», — тип белдерҙеләр министрлыҡта.

Өфөлә ҡыҫҡа ваҡытлы отпускыға ҡайтҡан яугирҙарҙы оҙатыу тантанаһы үтте

«Өфө-Арена» комплексы алдындағы майҙанда ҡыҫҡа ваҡытлы отпускыға ҡайтҡан яугирҙарҙы оҙатыу тантанаһы үтте. Хәрбиҙәрҙең күбеһе өсөнсө-дүртенсе тапҡыр ялда булып, тыуған яғында көс туплап, йәнә алғы һыҙыҡҡа юлланды.

Бишбүләк ауыл советы коммуналь автопаркы өр-яңы техника менән тулыланды

Бергәләп таҙартабыҙ. Бишбүләк ауыл советы коммуналь автопаркы өр-яңы техника менән тулыланды. Быға тиклем файҙаланылған 4 «Белорус»ҡа ярҙамға күп функциялы тейәгес «Амкодор» һатып алынған. Район үҙәгенең экологик именлегенә урындағы халыҡ та ҙур өлөш индерә. был турала киләһе яҙмала.

Өфөгә дүрт палубалы «Александр Пушкин» теплоходы килде

Премиум класслы һыу судноһы Түбәнге Новгород - Өфө-Түбәнге Новгород маршруты буйынса сәйәхәт итә. Круиз 120 турист өсөн ҡыҙыҡлы ял программаһы тәҡдим итә. Сәйәхәтселәрҙе Башҡортостан милли музейы, Өфө буйынса экскурсия, «Торатау» геопаркы, милли ризыҡтар һәм мәҙәни тамаша көтә.

Өфөлә бер ир күперҙән һикермәксе булған

Видео авторы һөйләүенсә, бөгөн улар Затон күперен үткәндә күпер ситендә торған бер ирҙе күреп ҡалған. Ир йылғаға һикерергә йыйынған. Шаһиттар туҡтап, уны был аҙымға бармауын үтенгән, тәмәке тәҡдим иткән.

Ир ярҙамға килгән кешеләргә ғаиләһендә проблемалар булыуы, ҡатыны ташлап сығып китеүе, эскегә бирелеүе хаҡында һөйләгән.

Ҡотҡарыусылар килеп еткәнсе ир ике тапҡыр һикерергә ынтылған. Үтеп барыусылар уны ергә һалып, ярҙам килгәнсе тотоп торған. Психолог һөйләшкәндән һуң ирҙе полиция алып киткән.