Өфөлә Президент һайлауҙарына әҙерлек буйынса матбуғат конференцияһы уҙҙы

Республика һайлауға әҙер тип иҫәпләйбеҙ. Был турала Башҡортостан Үҙәк һайлау комиссияһы рәйесе Азат Ғәлимханов журналистар менән осрашыуҙа белдерҙе. Бөгөн «Башинформ» агентлығында Президент һайлауҙарына әҙерлек буйынса матбуғат конференцияһы уҙҙы.

Төбәктә боҙҙо шартлатыу һәм ҡарайтыу эштәре башланды

Республика яҙғы ташҡынды етди әҙерлек менән ҡаршылай. Төбәктә боҙҙо шартлатыу һәм ҡарайтыу эштәре башланды. Башгидрометүҙәктең яҡынса фаразы буйынса, ташҡын күп йыллыҡ уртаса күрһәткестәрҙән юғарыраҡ буласаҡ. Әҙерлек ваҡиғалар үҫешенең иң ҡатмарлы осорон иҫәпкә алып барыла.

Өфөлә «Бейеү - халыҡ күңеле» халыҡ-ара хореография сәнғәте фестивале үтте

Рух һәм талант тантанаһы. Өфөгә «Бейеү - халыҡ күңеле» халыҡ-ара хореография сәнғәте фестивале сиктәрендә Надежда Надеждина исемендәге Дәүләт академия хореография ансамбле килде. Ижади коллектив сәхнәлә Фәйзи Ғәскәров исемендәге дәүләт академия халыҡ бейеүҙәре ансамбле менән бергә сығыш яһаны. Төрлө халыҡ бейеүҙәре оркестр башҡарыуындағы тере музыкаға оҙатылып барҙы.

Республика Профосоюздар федерацияһында әҙәби-музыкаль кисә үтте

Һаулыҡ мөмкинлектәре сикләнгәндәр тураһында хәстәрлек. Республика Профосоюздар федерацияһында уҡыусылар, хәйриә фондтары тәрбиәләнеүселәре һәм уларҙың ата-әсәләре өсөн әҙәби-музыкаль кисә үтте. Хәйриә сараһын Бөтә Рәсәй мәҙәниәт хеҙмәткәрҙәре профсоюзының Башҡортостан бүлексәһе ойошторҙо. Кисә барышында Мостай Кәримдең көндәлектәре һәм башҡа әҫәрҙәренән өҙөктәр яңғыраны. Әҙәби кисә композитор Урал Иҙелбаев ижад иткән милли көйҙәр менән оҙатылып барҙы.

Башҡортостанда бал ҡорттарын химикаттар менән ағыулауҙан ҡурсалайҙар

Дәүләт Йыйылышы – Ҡоролтай законға үҙгәреш әҙерләй. Былтыр депутаттар бал ҡорттарын пестицидтарҙан яҡлауға бәйле ҡанун ҡабул иткәйне. Төҙәтмәгә ярашлы, хужалыҡтар баҫыуҙарҙы ағыулау буйынса иғланды 10 көн алдан бирергә тейеш. Ул киң мәғлүмәт саралары аша хәбәр ителә. Закон проекты мартта пленар ултырышта ҡарала.

Башҡортостанда сәсеүгә 99 процент иген орлоғо әҙер

Ауыл хужалығы министрлығынан белдереүҙәренсә, мөһим баҫыу культуралары буйынса артыҡ ҡытлыҡ юҡ. Хәҙер сит илдән орлоҡ күпләп индерелмәй, үҙебеҙҙең селекция компанияларына өҫтөнлөк бирелә. Мәҫәлән, ужым өсөн орлоҡ республикала етештерелә. Быйыл яҙғы сәсеү 2 миллион гектарҙа планлаштырылған. Шәкәр сөгөлдөрө, майлы һәм мал аҙығы культуралары майҙандарын арттырыу ҡарала.

Өфөнән ишле ғаилә юл һәләкәтенә тарыған

Свердловск өлкәһендә Екатеринбург — Төмән федераль трассаһының 78-се саҡрымында юл фажиғәһе теркәлгән. Ете кеше имгәнгән. Урындағы дәүләт автоинспекцияһының матбуғат хеҙмәте хәбәр итеүенсә, «Тойота» менән «Хонг Ян» йөк машинаһы бәрелешкән.

«Тойота»ның водителе һәм алты пассажиры (уларҙың икәүһе — балалар) дауаханаға оҙатылған. Йөк машинаһы водителе зыян күрмәгән. Ул Чита өлкәһенән Мәскәүгә еләк алып китеп барған булған.

E1.RU мәғлүмәттәренә ярашлы, сит ил автомобилендәге ғаилә Төмәндән Өфөгә ҡайтып барған. Водитель — туғыҙ бала атаһы етди йәрәхәттәр алған, ул һаман дауаханала ята. Бынан тыш, уның ҡатыны һәм ике балаһы имгәнгән, башҡа пассажирҙарға ла медицина ярҙамы талап ителгән.

Өфөлә профессиональ бокс кисәһе үтә

Апрель аҙағында “Халыҡ-ара бокс ассоциацияһы чемпиондары төнө” тигән турнир ойошторола. Унда Рәсәй, Румыния һәм Конгонан спортсылар ҡатнаша. Төп алышта Башҡортостандан Артур Собханғолов һәм Румыниянан Джеймс Череджи осраша. Улар Европа чемпионы исеме өсөн көрәшәсәк.

Бөгөн Өфө эргәһендә радиоэлектрон технопаркының тәүге свайы ҡағылды

Бөгөн Өфө эргәһендә республика башлығы Радий Хәбиров ҡатнашлығында радиоэлектрон технопаркының тәүге свайы ҡағылды. Рв-1 радиоэлектрон технопаркы юғары технологиялы һәм инновацион продукция етештереүҙең тулы циклын ойоштороу маҡсатында булдырыла. Бында пилотһыҙ осоусы аппараттар һәм сенсорҙар, платалар, датчиктар етештереләсәк.

Республикала 14 йәшлек ҡыҙ ауырға ҡалған

Башҡортостанда 14 йәшлек ҡыҙ ауырға ҡалған. Республика райондарының береһендә 8-се класс уҡыусыһы быйыл март айында 28 аҙналыҡ ауыры менән йөклөлөк буйынсаиҫәпкә баҫҡан. Яңыраҡ уға 15 йәш тулған.

«КП-Өфө»нөң үҙ сығанағы мәғлүмәттәренә ярашлы, былтыр сентябрҙә уҡыусы 29 йәшлек ир менән енси мөнәсәбәткә ингән. Ир әлеге ваҡытта командировкала. Йөклө ҡыҙ тураһында урындағы бәлиғ булмағандар эштәре буйынса бүлеккә хәбәр иткәндәр.

«Башҡорт» позывнойлы яугирға Жуков миҙалы

Яҡташыбыҙ, Йылайыр районы егете махсус операция биләмәһендә күрһәткән батырлығы һәм ҡаһарманлығы өсөн юғары дәүләт наградаһы менән билдәләнде.

Жуков миҙалы менән Рәсәй Федерацияһы ҡануниәте буйынса хәрби хеҙмәт ҡарамағындағы Рәсәй Федерацияһы Оборона министрлығының, башҡа министрлыҡтар һәм ведомстволарҙың хәрби хеҙмәткәрҙәре Рәсәй Федерацияһының дәүләт мәнфәғәттәрен һәм Ватанды яҡлауҙа күрһәткән батырлыҡтары һәм ҡаһарманлыҡтары өсөн бирелә.

Егеттәргә еңеү менән, имен-һау тыуған яҡтарына әйләнеп ҡайтыуҙырын теләйбеҙ!

Радий Хәбиров республика медицина учреждениеларына файҙаланыуға яңы машиналар тапшырҙы

Дауаханаларға бүләк. Башҡортостан башлығы Радий Хәбиров республика медицина учреждениеларына файҙаланыуға яңы машиналар тапшырҙы. Һаулыҡ һаҡлау тармағы автопаркын яңыртыу сиктәрендә 163 автомобиль Башҡортостан район-ҡалаларына юлланды. Машиналар стоматология поликлиникалары, ашығыс ярҙам хеҙмәте, медицина колледждары һәм балалар шифаханаларына файҙаланыуға тапшырылды.

Махсус хәрби операция биләмәһендәге дин әһелдәрен ирекмәндәргә тигеҙләү тәҡдим ителә

Республика парламенты ошо туралағы закон проекты менән Дәүләт Думаһына сығырға ниәтләй. Документта билдәләнеүенсә, бәрелештәр барған ерҙә хеҙмәт итеүсе хәрбиҙәр, ирекмәндәр кеүек үк диндарҙар ҙа үҙ ғүмерҙәрен хәүеф аҫтына ҡуя. Һәм улар ҙа социаль яҡланған булырға тейеш. Закон ҡабул ителһә, дин әһелдәре ирекмәндәргә ҡаралған барлыҡ ташламалар, түләүҙәр менән файҙалана аласаҡ.

Бөрйән районы Байназар ауылында «Урал аръяғы йәштәр йыйыны» үтте

Форумда курше-тирә райондарҙан делегаттар ҡатнашты. Йәштәр урта һәм бәләкәй эшҡыуарлыҡты үҫтереү, илһөйәрлек тәрбиәләү, экстремизмға юл ҡуймау, финанс грамоталылыҡ буйынса түңәрәк өҫтәлдәрҙә ҡатнашты, Бөрйән оҫталарының ҡул эштәре күргәҙмәһе менән танышты.Сара йыр-моң менән үрелеп барҙы. Байназарҙағы йәштәр йыйыны «Айыҡ ауыл» конкурсы сиктәрендә ойошторолған.

Башҡортостанда «Көс урыны» исемле фәнни - популяр фильм төшөрөлә

Шишмә районындағы Турахан кәшәнәһе янында Евразия күсмә халыҡтары цивилизациялары музейының тәүге этабы төҙөлә. Башҡортостанда музей төҙөү, күскенселәр тормошон сағылдырған «Көс урыны» исемле фәнни - популяр фильм төшөрөлә. Ул кинематография өлкәһендә Республика башлығы Гранты ярҙамында тормошҡа ашырыла.

Хәйбулла районында «Айыҡ ауыл» конкурсы сиктәрендә «Шәп егет» телевизион проекты уҙғарыла

Ауыл халҡына сәм, ҡот өҫтәүсе «Айыҡ ауыл» конкурсының муниципаль этабы тамам. Хәйбулланан быйыл Оло Әбеш ауылы район данын республика күләмендә яҡлаясаҡ. Оло Әбештәрҙең «Айыҡ ауыл» конкурсы сиктәрендә уҙғарылған «Шәп егет» телевизион проекты хаҡында тулыраҡ киләһе яҙмала.

Башҡортостан Башлығы Рәсәй президентын һайлауҙа тауыш бирҙе

Бөгөн Башҡортостан Башлығы ҡатыны менән бергә Рәсәй Президентын һайлауҙа үҙ тауыштарын бирҙе. Каринэ һәм Радий Хәбировтар Өфөнөң «Башҡортостан» дәүләт концерт залында урынлашҡан 109-сы һайлау участкаһында һайланы.

«Иң мөһиме халыҡ тауыш бирә алһын өсөн уңайлы шарттар булдырыу ине. Тауыш биреү өс көн бара. Был һайлау, ысынлап та, хәл иткес. Алдағы алты йылда илебеҙҙең үҫешен билдәләйбеҙ. Йүнәлеш шул уҡ – алға табан барыу. Минеңсә, һайлауға барыһы ла әҙер. Халыҡ иртәнән үк һайлау участкаларына килә башланы. Һайлау лайыҡлы, тейешле кимәлдә үтер тип уйлайым. Тағы ла ҡабатлайым: барлыҡ хеҙмәттәр, һайлау комиссияларының системаһы уны үткәрергә әҙер. Беҙ уны яҡшы, йылы шарттарҙа уҙырбыҙ ышанам», – тип белдерҙе Башҡортостан Республикаһы Башлығы Радий Хәбиров.

Һайлауға ҙур теләк менән

15-17 мартта Рәсәй президентын һайлау көндәрендә Дәүләкәндең һайлау участкаларының береһендә ысын һабантуй ойошторолдо.

Башҡорт милли кейемендәге ҡатын-ҡыҙҙарҙың гармун көйөнә дәртле итеп бейегәнен күреп, гражданлыҡ бурысын үтәргә килгән һайлаусылар ҙа бейеүгә төшкән.

Политологтар Башҡортостанда халыҡтың 70% ашыуы һайлауҙа ҡатнашыр тип фаразлай.

Радий Хәбиров Өфөнөң 109-сы һайлау участкаһында тауыш бирҙе

Бөгөн Рәсәй Президентын һайлау башланды. Иртәнге сәғәт 8-ҙә республикала барлыҡ һайлау участкалары ла үҙ ишеген асты. Тәүгеләрҙән булып гражданлыҡ бурысын Башҡортостан башлығы үтәне.
Радий Хәбиров тормош иптәше Каринэ Владимировна менән Өфөнөң «Башҡортостан» концерт залында урынлашҡан 109-сы һайлау участкаһында тауыш бирҙе. Һайлау өс көн дауам итә. Был сәйәси ваҡиға илебеҙ, уның киләсәге өсөн мөһим һәм хәл иткес әһәмиәткә эйә. Башҡортостан сәйәси кампанияны үткәрергә әҙер, тине Башҡортостан башлығы. Республикала бөтәһе 3 мең 308 һайлау участкаһы эшләй, тауыш биреү хоҡуғына эйә граждандарҙың иҫәбе 2 миллион 887 мең.

Бөгөн Өфөлә «Рәсәй Президентын һайлау-2024» йәмәғәт матбуғат үҙәге асылды

Унда саҡырылған йәмәғәт ойошмалары вәкилдәре, сәйәсмәндәр, ойоштороусылар, күҙәтеүселәр, белгестәр, эксперттар һайлау барышы тураһында һөйләй һәм журналистарҙың һорауҙарына яуап бирә. «Рәсәй Президентын һайлау-2024» йәмәғәт матбуғат үҙәгендә БЮТ хәбәрсеһе Айнур Кәбиров эшләй

Өфөнөң 185-се һайлау участкаһында «Башҡортостан» телерадиокомпанияһы хеҙмәткәрҙәре эшләй

Өфө ҡалаһындағы 185-се һайлау участкаһы комиссияһы ағзалары беҙҙең хеҙмәттәштәр, «Башҡортостан» телерадиокомпанияһы хеҙмәткәрҙәре. Мөһим компания башланған иртәлә участкаларҙа БЮТ хәбәрселәре эшләй.