Республикала яҙғы ташҡын ваҡытында поездар йәлеп ителә

Башҡортостанда Куйбышев тимер юлында оло һыуҙы үткәреү буйынса әҙерлек эштәре бара. Бының өсөн 5 махсус поезд йәлеп ителә. Күсмә состав ҡырсын таш һәм ҡом менән тултырылған. Поездар Аксаков, Дим, Әшә, Стәрлетамаҡ һәм Белорет станцияларында урынлаша. Республикала яҙғы ташҡынды үткәреү буйынса оператив штабтар ойошторолдо. Әҙерлек эштәрен ай аҙағына тиклем тамамлау бурысы ҡуйылған.

😔 26 йәшлек егет машина тәгәрмәсе аҫтына ҡалып һәләк булған

Авария кисә киске сәғәттәрҙә Аксёнов - Шишмә - Ҡырғыҙ-Миәкә трассаһының 16-сы саҡрымында булған. «Лада Калина» машинаһына идара иткән 50 йәшлек ир юл уртаһынан барған 26 йәшлек Бәләбәй егетен бәрҙергән. Йәйәүле фажиғә урынында һәләк булған.

Белгестәр фажиғә сәбәптәрен асыҡлай.

Өфөлә үҫмерҙәр Мәңгелек утты һүндергән

Был хәл Яҡутов исемендәге паркта булған. Бында Граждандар һуғышы һәм Октябрь революцияһы геройҙары ҡәберендә Мәңгелек ут яна. Тәртип боҙоусыларҙың 4-еһенең дә шәхесе асыҡланған. Улар менән тәфтишселәр эшләй, тип хәбәр итәләр Эске Эштәр министрлығынан.

Бөгөн Өфөнөң Дим районына 80 йыл тула

Был биҫтәгә нигеҙ Бөйөк Ватан һуғышы йылдарында һалына. Әле Дим баш ҡаланың иң йылдам үҫешкән райондарының береһе. Һуңғы йылдарҙа ғына 2 белем усағы һәм 3 балалар баҡсаһы сафҡа индерелгән. Юл һалыу әүҙем алып барыла, йәмәғәт биләмәләре төҙөкләндерелә. Дим районында ҡала клиник дауаханаһы, поликлиникалар, ике тиҫтәнән ашыу мәктәп һәм балалар баҡсалары уңышлы эшләп килә.

Башҡортостанда ташҡын башланыу ваҡыты билдәле булды

Ғәҙәттән тыш хәлдәр буйынса дәүләт комитетынан хәбәр итеүҙәренсә, ҙур һыу март аҙағында - апрель башында көтөлә. Бөгөн 300-ҙән ашыу ауылды һыу баҫыу хәүефе бар. Ҡотҡарыусылар бригадалары, махсус техника әҙерләнә.

Бөгөндән Өфөлә Ағиҙел күперенең бер һыҙаты ябыла

Сикләү төнгө сәғәттәрҙә ҡабул ителә. Бында капиталь ремонт эшләнә. Ошо айҙа арканы һүтеп алыу һәм яңыһын урынлаштырыу көтөлә. Машиналар йөрөшөндә үҙгәреш 22 мартҡа тиклем була. Ағиҙел аша күпер 1956 йылда төҙөлгән. Капиталь ремонт өсөн 4 миллиард һумдан ашыу аҡса ҡаралған.

Дәүләкән районында «Атайсал. Илһөйәрлек көсө.» зона-ара форумы уҙҙы

Атайсал берләштерә. Дәүләкән районында «Атайсал. Илһөйәрлек көсө.» тип аталған зона-ара форум уҙҙы. Йыйылышта Архангел, Ауырғазы, Әлшәй, Бәләбәй, Йәрмәкәй, Бишбүләк, Ҡырмыҫҡалы райондары вәкилдәре үҙ проекттары менән сығыш яһаны.

Былтыр Башҡортостан судтарында 1 миллион 300 меңдән ашыу эш һәм материал ҡаралған

Бер инстанция буйынса ғына 14 процентҡа үҫеш күҙәтелә. Башҡортостан Юғары судында ойошторолған кәңәшмәлә суд системаһының бер йыллыҡ эшмәкәрлегенә йомғаҡ яһалып, алдағы осорға пландар билдәләнде. Эшлекле сарала төбәк етәксеһе Радий Хәбиров сығыш яһап, суд системаһы хеҙмәткәрҙәренә фиҙаҡәр һәм намыҫлы хеҙмәт өсөн рәхмәт белдерҙе. «Судьяларҙың эше - юғары бурыс, дәүләт һәм йәмғиәткә яуаплы хеҙмәт итеү», - тине ул. Закондарҙы, хоҡуҡ ҡулланыу практикаһын тәрән белеүҙән тыш, юғары әхлаҡи сифаттар талап ителә

Бөрө ҡалаһы һайлау комиссия ағзалары сәйәси кампанияға әүҙем әҙерләнә

6 марттан Рәсәйҙә территориаль һайлау участка комиссия эше башланды. Ил Президенты өсөн тауыш биреүгә Башҡортостанда 3 меңдән ашыу һайлау участкаһы ойошторола. Бөрө ҡалаһы һайлау комиссия ағзалары сәйәси кампанияға әүҙем әҙерләнә. Территориаль участкаларға бюллетендәр еткерелгән, мобиль һайлаусы программаһы буйынса тауыш биреүгә ғаризалар ҡабул ителә. Тулыраҡ мәғлүмәт киләһе яҙмала.

Республика балалар онкологияһы һәм гематология үҙәге бөгөн тулы көстә эш башланы

Билдәле булыуынса, әлегә был диагноздар буйынса меңгә яҡын бала иҫәптә тора. Дауахана эргәһендә 92 урынлыҡ яңы корпус асылыуы - сирлеләргә юғары технологиялы медицина ярҙамы күрһәтергә булышлыҡ итә. Тулыраҡ киләһе яҙмала.

Республика һунарсылыҡ хужалыҡтарында йәнлектәрҙе иҫәпләү ҡышҡы миҙгеле тамамланыу алдында

Инспекторҙар урман тереклеген ҡарҙағы эҙҙәр буйынса билдәләй. Популяциялар ҙурлығынан һунарсыларға бирелгән путевкалар һаны тора. Был тәбиғәттә баланс һаҡлау өсөн кәрәк.

БСТ каналынан иҫтәлеккә

«Иң батыры минең атайым» фотоконкурсы тамам. Еңеүгә Шишмә районынан Алиса Латыпова лайыҡ булды.

Конкурстың бағыусыһы - Әбйәлил районының Яңауыл ауылы егете, күн оҫтаһы Таһир Һибәтов. Ул күндән заманса билдектәр, сумкалар һәм янсыҡтар эшләй. Өфө районының Михайловка ауылында үҙенең оҫтаханаһын булдырған. «Тамъян» күн әйберҙәр оҫтаханаһы.

Бүләк оҡшанымы һеҙгә, дуҫтар?

Башҡортостанда яҙғы сәсеүҙе 10 апрелдән һуң башлау планлаштырыла

Быйыл яҙ 2 миллион гектарҙан ашыу майҙан сәселә. Был турала вице-премьер-Ауыл хужалығы министры Илшат Фәзрахманов белдерҙе. - Уҙған көҙ республикала 390 мең гектарҙа ужым сәселгән. Уның 95 проценттан күберәге яҡшы ҡышлаған. 3 миллион 300 мең тонна иген урылған, 1 миллион 600 мең тонна шәкәр сөгөлдөрө ҡаҙып алынған.

Өфөлә халыҡ күп йәшәгән райондар аталды

Ҡалала 1 миллион 180 мең кеше йәшәй. Уларҙың күбеһе, 22 процентҡа яҡыны - Октябрь районында теркәлгән. Икенсе урында - Калинин районы. Бындай 209 мең кеше бар. Унан һуң Совет, Киров, Орджоникидзе һәм Ленин райондары урынлашҡан. Иң аҙ халыҡ - Дим районында, 84 меңдән ашыу кеше тип хәбәр итәләр Статистика хеҙмәтенән.

Ҡот осҡос аварияла тотош ғаиләнең ғүмере өҙөлгән

Силәбе өлкәһендә, Башҡортостан сигенә яҡын ғына урында, дүрт кеше һәләк булған юл-транспорт ваҡиғаһы теркәлгән. Аварияла күп балалы ғаиләнең ғүмере өҙөлгән. Силәбе өлкәһенең ЮХХДИ идаралығынан хәбәр итеүҙәренсә, сит ил автомобиленең 20 йәшлек водителе хәүефле боролошта ҡаршы һыҙатҡа сыҡҡан һәм «ВАЗ-21102» менән бәрелешкән.

Юл фажиғәһендә «ВАЗ-21102» машинаһындағы ғаиләнең барыһы ла тиерлек һәләк булған: 42 йәшлек ир, уның ҡатыны, 7 йәшлек ҡыҙҙары һәм өс айлыҡ улдары. Дүрт йәшлек улдары мөғжизә менән генә иҫән ҡалған, әммә авариянан һуң уның хәле бик ауыр.

Радий Хәбиров республика ҡатын-ҡыҙҙарын тәбрикләне

Яҙҙың иң матур байрамдарының береһе - 8-се март уңайынан Башҡортостан башлығы Радий Хәбиров республика ҡатын-ҡыҙҙарын тәбрикләне. Өфөлә үткән тантаналы ултырышта гүзәл заттарға дәүләт наградалары тапшырылды. Радий Хәбиров, ныҡлы һәм ышаныслы тыл ойоштороусы, иҡтисадты үҫтереүсе, ғаилә терәге булып торған ҡатын-ҡыҙҙарға оло рәхмәтен еткерҙе.

Шишмә районында йәшәүсе махсус хәрби операцияла яраланып ҡайтҡандан һуң яңынан тормош көтөргә өйрәнә

Тормошҡа тимер ҡулдар менән йәбешеп. Шишмә районы Ҡалмаш ауылында йәшәүсе Илмир Мансуров махсус хәрби операцияла яраланып ҡайтҡандан һуң яңынан тормош көтөргә өйрәнә. Яуҙа дрондар һөжүме аҫтында ҡалған егеттең ҡулдары бөтөнләй эшлектән сыға. Әле ул экзоскелет ярҙамында реабилитация үтә.

Ишембайҙағы «Иҙел Нефтемаш» предприятиеһында техник ҡорамалдарҙы яңыртыу планлаштырылған

Өс йыл элек Ишембайҙағы «Иҙел Нефтемаш» предприятиеһы техник ҡорамалдарҙы яңыртыу буйынса ҙур программа башлағайны. Ошо маҡсатта компания тарафынан миллиард һум аҡса йүнәлтеү планлаштырылған. Әлегә сумманың биштән бер өлөшөнә юғары сифатлы заманса ҡорамалдар һатып алынған, һаҡсыл производство йүнәлештәренең береһе - 5S системаһы индерелгән, уға ярашлы эш урындары дөрөҫ ойошторола.

Стәрлетамаҡта «Өлгөлө башҡорт ғаиләһе» асыҡ республика конкурсы еңеүселәрен бүләкләү тантанаһы үтте

Стәрлетамаҡ ҡалаһында «Өлгөлө башҡорт ғаиләһе» асыҡ республика конкурсы еңеүселәрен бүләкләү тантанаһы үтте. Унда Ғаилә йылына һәм Башҡорт ғаиләһе көнөнә арналған проект финалына үткән 14 пар ҡатнашты.

Көйөргәҙе районы Ермолаев ауылында саңғы ярышы үтте

Республика кимәлендә ойошторолған бәйге Башҡортостанда иғлан ителгән Һаулыҡ мөмкинлектәре сикләнгән кешеләр тураһында хәстәрлек йылын асып ебәрҙе. Старт һыҙығына төрлө район-ҡалаларҙан йыйылған коррекция мәктәп-интернаттары уҡыусылары сыҡты.

Юл хәрәкәте хәүефһеҙлеге дәүләт инспекцияһы гүзәл заттарҙы байрам менән ҡотланы

Юл хәрәкәте хәүефһеҙлеге дәүләт инспекцияһы хеҙмәткәрҙәре гүзәл заттарҙы Халыҡ-ара ҡатын-ҡыҙҙар көнө менән ҡотланы. Хоҡуҡ һаҡсылары иртәнән үк таныҡлыҡ алған гүзәл заттарҙы сәскә менән бүләкләне. Инспекторҙар руль артында йөрөгән ҡыҙҙарҙы ла ҡыуандырҙы. Полиция хеҙмәткәре талабы буйынса туҡтаған автоһәүәҫкәрҙәрҙе көтөлмәгән ҡотлау көттө - открытка һәм байрам символы - ләлә сәскәләре. Бындай иғтибар руль артындағы бер ханымды лы битараф ҡалдырманы.