Баш ҡалала балалар арһында футбол буйынса ярыш үтте

Өфө кескәй футболсыларҙы ҡабул итте. Илдең Урал һәм Көнбайыш Себер зонаһы командалары турнир финалында көрәште. Төрлө төбәктәр араһында футбол буйынса ярыш республикала беренсе тапҡыр ғына ойошторолмай.

Йырсы Ринат Рамаҙановтың ғаиләһендә ауыр ҡайғы

«Арғымаҡ» төркөмө лидеры, йырсы Ринат Рамаҙановтың атаһының ҡустыһы махсус хәрби операцияла һәләк булған. Күңелһеҙ хәбәр менән йырсы социаль селтәрҙә уртаҡлашҡан.

— 10 ноябрь атайымдың тыуған көнө. 11 ноябрҙә уның ҡустыһы, яҡын ағайыбыҙ махсус хәрби операция биләмәһенә хеҙмәт итергә юлланды. Ошо көндәрҙә туғаныбыҙҙың һәләк булыуы хаҡында хәбәр иттеләр. Иманың юлдаш булһын, абзый!

Мәрхүмдең яҡындарының ауыр ҡайғыһын уртаҡлашабыҙ.

Мексика йәштәре башҡорт телен өйрәнә

«Тамыр» телеканалы мөхәррире Гөлгөнә Баһауетдинова Сочи ҡалаһында барған Бөтә донъя йәштәр фестивалендә ҡатнаша. Ул төрлө илдән йыйылған тиҫтерҙәренә башҡортса һүҙҙәр өйрәткән һәм мәҙәниәтебеҙ хаҡында һөйләгән. Шулай уҡ матур сувенирҙар менән бүләкләгән.

Гөлгөнәгә фестивалдә уңыштар теләйбеҙ!👏

Өфөлә «Смарт-баҡсасы» Бөтә Рәсәй форумы үтте

Минең баҡсам-Башҡортостан. Баҡсасылар өсөн ошондай исем аҫтында яңы мәғлүмәт платформаһы эшләй башлай. Дәүләт системаһына старт бөгөн Өфөлә үткән «Смарт-баҡсасы» Бөтә Рәсәй форумында бирелде. Өс йыл элек Башҡортостанда башланғыс баҡсасылар форумы быйыл федераль кимәлгән күтәрелгән. Сарала илдең 15 субъектынан ҡунаҡтар ҡатнаша. Форумда ҡатнашыусыларҙы Башҡортостан башлығы тәбрикләне, Радий Хәбиров баҡсасыларҙы көткән төп яңылыҡтар хаҡында билдәләп үтте.

Радий Хәбиров Көрәш һарайы төҙөлөшө менән танышты

Өфөнөң 450 йыллығына сафҡа индереләсәк иң төп объекттарҙың береһе - Көрәш һарайы әҙерлеге 68 процентҡа еткән. Башҡортостан башлығы Радий Хәбиров төҙөлөш майҙансығында булып, эш барышы менән танышты. Әле объектта тышҡы һәм эске яҡтан биҙәкләү эштәре башланған, инженер, елләтеү системалары монтажлана.

Стәрлетамаҡтан эшҡыуар 3Д-принтер ярҙамында пилотһыҙ осоусы аппараттарға ҡулайламалар эшләй

Барыһы ла еңеү өсөн. Стәрлетамаҡтан эшҡыуар Александр Кузьменко 3Д-принтер ярҙамында пилотһыҙ осоусы аппараттарға гранатаны теүәл ташлау ҡулайламалары эшләй. Махсус хәрби операция биләмәһенә ул «ҡанаттар»ҙан тыш, дрон өсөн өҫтәл, медицина кәрәк-яраҡтары - ампула, «самокол» тип исемләнгән шприц та оҙата. Пластиктан етештерелгән продукция менән БЮТ ижади төркөмө лә танышты.

Башҡортостан юлдаш каналының Яңылыҡтар хеҙмәте иғлан иткән акция дауам итә

«Үҙебеҙҙекеләрҙе ташламайбыҙ». Башҡортостан юлдаш каналының Яңылыҡтар хеҙмәте иғлан иткән акция дауам итә. Коллегабыҙ, «Журналист» ҡушаматлы яугир хеҙмәт иткән «Башҡортостан» мотоуҡсылар полкы өсөн аҡса йыйыу ойошторолған. Хәрбиҙәр һорауы буйынса тупланасаҡ суммаға DJI Mavic 3 квадрокоптеры һатып алынасаҡ. Бөгөнгә 100 мең һум тирәһе йыйылған. Изгелек ҡылыуҙа айырыуса Тирлән урмансылығы хеҙмәткәрҙәре ҙур әүҙемлек күрһәтә. Яҡташтарыбыҙҙың ғүмерен һаҡлауға һәм еңеүҙе яҡынайтыуға һәр кем үҙ өлөшөн индерә ала. Бының өсөн аҡсаны Һаҡлыҡ банкы картаһына ебәрергә мөмкин. 2202 2069 3314 9457 (Регина Салаватовна)

Миәкә районында 8-9 класс уҡыусылары өсөн бер нисә ауыл хужалығына экскурсия үткәрелде

Яңы быуын фермерҙары Миәкә районында тәрбиәләнә.Төбәктә 8-9 класс уҡыусылары өсөн бер нисә ауыл хужалығына экскурсия үткәрелде. Ойоштороусылар үҫмерҙәргә һөнәри йүнәлеш биреүҙе маҡсат итеп ҡуйған. Проект әле башланып ҡына тора, уны башҡа райондарҙа ла үткәреү иҫәбе бар.

Тәтешле районында Башҡортостандың халыҡ шағиры Әнғәм Атнабаевҡа һәйкәл асылды

Ирәкте ырыуының данлы улы - Әнғәм Атнабаевтың исеме мәңгеләштерелде. Башҡортостандың халыҡ шағирына һәйкәл Үрге Тәтешле ауылында асылды. Ул район халҡы, меценанттар һәм әҙиптең туғандары ярҙамында тормошҡа ашырылған.

Башҡортостандан махсус хәрби операция биләмәһенә 114-се гуманитар ылау оҙатылды

Сираттағы ярҙам дәүләт вәкилдәре, йәмәғәт ойошмалары һәм 8 муниципалитет халҡы тарафынан тупланған. Яугирҙарға ағас материалдары, «Урал» мотоциклы, генератор, маскировка селтәрҙәре, аҙыҡ-түлек, медикаменттар һәм исемле посылкалар еткереләсәк. Бынан тыш, ғәскәри частар командирҙары һорауы буйынса квадрокоптерҙар, пилотһыҙ осоу аппараты детекторҙары, антидрон мылтыҡтар, металл эҙләүсе, тепловизиорҙар, прицелдар һәм рациялар һатып алына. Бының өсөн республика бюджетынан 20 миллион һумдан ашыу аҡса бүленгән.

Хәйбулла районының Оло Әбеш ауылында төбәк-ара фәнни-ғәмәли форум үтте

«Имен тәбиғәт - һау киләсәк» тип исемләнгән сара «Айыҡ ауыл-2024» республика конкурсы сиктәрендә ойошторолдо. Ғалимдар, крайҙы өйрәнеүселәр, уҡытыусылар, мәктәп уҡыусылары ҡатнашлығында үткән эколлогияға арналған сара хаҡында тулыраҡ киләһе яҙмала.

«Салауат Юлаев» хоккейсылары «Трактор» менән серияла иҫәпте тигеҙләүгә өлгәште

Континенталь хоккей лигаһының икенсе плей-офф уйыны юлаевсылар файҙаһына 4:1 иҫәбе менән тамамланды. Яҡташтарыбыҙҙан шайбаларҙы Александр Хмелевский, Данил Башкиров һәм ике тапҡыр Джош Ливо индерҙе. Шулай итеп дүрт еңеүгә тиклемге серияла иҫәп бергә бер.

Ейәнсура районында йәш егет кешене янғындан ҡотҡарған

Бикбау ауылында Юбилей урамында шәхси йорт янып киткән. 21:00 сәғәт тирәһендә Эмиль Исламов ауылға ҡартатаһы янына юлланған. Юлда йорт яныуын күреп ҡалған. Егет туҡтап, ярҙам тәҡдим иткән. Был ваҡытҡа ут өйҙө тулыһынса ялмап алған, ә янғын һүндереүселәр килеп етмәгән.

Эстә кешеләр барлығын белеп ҡалғас, Эмиль ярҙамға ташланған. Ул тәҙрәне ярып инеп, өйгә үтеп ингән. Төтөн араһынан бәләгә ҡалған кешене эҙләп табып, тышҡа ҡарай һөйрәгән. Шулай итеп, йәш егет кеше ғүмерен һаҡлап ҡалған.

Афарин! 👏

Рәшиҙә инәй яугирҙәр өсөн бер айҙа 30 пар ойоҡбаш бәйләгән

Күгәрсен районының Исем ауылынан Рәшиҙә Хәмзинаның изге эше хаҡында район хакимиәте башлығы Марат Исҡужин үҙенең сәхифәһендә яҙған.

"Рәшиҙә апай ғүмер буйы ауыл хужалығы өлкәһендә эшләгән, хәҙер хаҡлы ялда. Уның улы хәрби хәрәкәттәрҙә ҡатнаша, шуға күрә ул, һис шикһеҙ, беҙҙең һалдаттарға ярҙам итергә ҡарар иткән. Һеҙгә һәм һеҙҙең ҡулдарығыҙға ныҡлы һаулыҡ, Рәшиҙә апай! Һеҙ бәйләгән ойоҡбаш балаларыбыҙҙы йылытһын! "– тип яҙған район хакимиәте башлығы.

Афарин, Рәшиҙә инәй!

Башҡортостан халҡын ҡыҫҡараҡ эш аҙнаһы көтә

Быйыл 8 март – Халыҡ-ара ҡатын-ҡыҙҙар көнө йомаға тура килә. Шуға өҫтәмә ял була. 7 март эш көнө бер сәғәткә кәмей. Халыҡ-ара ҡатын-ҡыҙҙар көнө 1966 йылдан башлап дәүләт байрамы булараҡ билдәләнә һәм ял көнө иҫәпләнә.

Рәсәйҙә күп балалы ғаиләләргә ярҙам арта

Хөкүмәт ҡарарына ярашлы, Герой-Әсә һәм “Ата-әсәлек даны” ордены һәм миҙалдары менән бүләкләнгәндәргә бер тапҡыр аҡсалата түләү була. Бының өсөн бюджеттан 30 миллион һум бүленә. Башҡортостанда былтыр 6 Герой-Әсә һәм 16 ғаиләгә “Ата-әсәлек даны” ордены һәм миҙалдары тапшырылды.

Нефтекаманан 53 йәшлек ир мутлашыусыларға 4 миллион һум күсергән

Башҡортостан буйынса Эске эштәр министрлығынан хәбәр итеүҙәренсә, аферистар электән ҡулланылған алым буйынса алдаған. Ир-уҙаманға үҙен полиция хеҙмәткәре итеп таныштырған кеше шылтыратҡан. Ул билдәһеҙ кешеләрҙең ир исеменә кредит алырға теләгәндәрен белдергән. Быны булдырмаҫ өсөн үҙ аллы займдар юлларға һәм бөтә аҡсаны “хәүефһеҙ иҫәп”кә күсерергә ҡушылған. Ваҡиға буйынса енәйәт эше ҡуҙғатылған. Хоҡуҡ һаҡсылары таныш булмаған иҫәп йәки телефон номерҙарына аҡса күсермәҫкә кәңәш итә. Шикле осраҡта полицияға мөрәжәғәт итергә була.

Ҡаты көнкүреш ҡалдыҡтарын тикшереү буйынса мәғлүмәт системаһы эшләй

“Рәсәй экология операторы” компанияһы төбәктәр рейтингын әҙерләгән. Федераль дәүләт мәғлүмәт системаһын тулыландырыу буйынса беҙҙең республика илдә тәүге бишәү исемлегенә ҡуйылған. Башҡортостанда ҡаты көнкүреш ҡалдыҡтарын сығарыу һәм эшкәртеүгә бәйле комплекслы эш алып барыла. Әле 88 меңдән ашыу сүп-сар контейнеры иҫәпләнә, 37 меңдән ашыу урында көнкүреш ҡалдыҡтары йыйыла. Бөтә эш мәғлүмәт системаһында теркәлеп бара.

Иглин районынан Бөйөк Ватан һуғышы ветераны 102 йәшен билдәләне

Сталинград өсөн яуҙарҙа ҡатнашҡан Бөйөк Ватан һуғышы ветеранына 102 йәш. Рәйфә Насирова Иглин районында йәшәй. Хеҙмәт юлын Баҡалы районында башлай, математиканан уҡыта. Ил өсөн һынылышлы ваҡытта ир-егеттәр менән йәнәш ут эсендә йөрөп Еңеүҙе яҡынайтыуға тос өлөш индерә. Йөҙйәшәрҙең тормош тәжрибәһе, фиҙаҡәр хеҙмәте йәштәргә Ватанға тоғролоҡ, илһөйәрлек өлгөһө лә булып тора. Рәйфә Ғәбдерәүеф ҡыҙы алты бала әсәһе. Ветерандың 14 ейәне, 8 бүләһе бар. Күптән түгел бүләсәре тыуған. Сал сәсле ветеран Бөйөк Еңеүҙең 80 йыллығын ҡаршыларға теләй.

Башҡортостан ҡатындары байрамға ниндәй бүләк алырға теләгәндәрен әйткән

SuperJob интернет-порталы фекер алышыу ойошторған. 8 мартҡа күптәр сәскә гөлләмәләре алырға теләй, һәр унынсы гүзәл зат вәкиле сәйәхәт итергә йәки аҡсалы булырға хыяллана. Ҡиммәтле биҙәүестәр һәм гаджеттар күрергә теләгәндәр ҙә юҡ түгел. Ҡатын-ҡыҙҙарҙың 5 проценты иһә бөтөнләй бүләк алырға теләмәй.

Өфөлә бокс буйынса оҫталыҡ дәресе ойошторолдо

Өфөлә спорт мәктәбе тәрбиәләнеүселәре һәм махсус хәрби операцияла ҡатнашҡан яугирҙарҙың балалары өсөн бокс буйынса оҫталыҡ дәресе ойошторолдо. Уны Николай Валуев исемендәге бокс буйынса олимпия резервы спорт мәктәбендә саҡырылған билдәле спортсылар үткәрҙе.