Башҡортостанда иң яҡшы тәрбиәселәр асыҡланды

Өфөлә “Мәктәпкәсә белем биреү ойошмаһы педагогы” республика конкурсы финалы уҙҙы. Унда 90 белгес ҡатнашты. Һөнәри оҫталыҡ бәйгеһендә Өфөнөң 281-се балалар баҡсаһынан Гөлназ Ҡураева еңеү яуланы. “Туған тел тәрбиәсеһе” номинацияһында баш ҡаланың 18-се балалар баҡсаһынан Әлиә Ишдәүләтова иң яҡшыһы тип табылды.

Радий Хәбиров менән Игорь Комаров Башҡортостандың беренсе президенты һәйкәленә сәскә һалды

Бөгөн Өфөлә Волга буйы федераль округы советы ултырышы үтә. Ошо уңайҙан Башҡортостанға Рәсәй Президентының округтағы тулы хоҡуҡлы вәкиле Игорь Комаров килде.
Республика башлығы Радий Хәбиров менән Игорь Комаров Башҡортостандың беренсе президенты Мортаза Рәхимовтың һәйкәленә сәскә һалды. Рәсәйҙең күренекле дәүләт һәм йәмәғәт эшмәкәренең тыуыуына 90 йыл тулыу уңайынан ҡуйылған скульптура республика парламенты һәм Хөкүмәт биналары эргәһендә урынлашҡан

Хәйбулла районының Әбүбәкер ауылы «Айыҡ ауыл - 2022» республика конкурсы еңеүсеһе

Сәләмәт йәшәү рәүешен яҡлаусылар, лайыҡлы тормош алып барған өлгөлө ғаиләләр республика конкурсында уңышҡа ирешеүгә тос өлөш индергән. Күптән түгел төбәктә Бөтә донъя башҡорттары Президиумы ағзалары менән осрашыу үтте. Сара сиктәрендә ауыл тормошонда әүҙем ҡатнашҡан егет-ҡыҙҙар, өлгөлө ғаиләләр билдәләнде, уларға Рәхмәт хаттары тапшырылды. Төпкөлдә йәшәгән ауыл кешеләренең финанс грамоталылығын күтәреү маҡсатында ауыл китапханаһына махсус әҙәбиәт тапшырылды. Финанс грамотаһы буйынса күсмә китапхананы һәр ауылда ойоштороу күҙаллана.

Малайҙарға ҡыҙ исемдәрен ҡушыу тыйыла

Думала ошо турала закон проекты әҙерләнгән. Уның авторҙары әйтеүенсә, һуңғы ваҡытта ошондай осраҡтар йышая. Ҡыҙ балаға Михаил тигән исем биргәндәр. Башҡортостанда иһә малайҙарҙы Эльвира, Амелика, Тайла тип теркәү осраҡтары бар. Ғәмәлдәге закон буйынса ЗАГСтар ата-әсә теләгенә ҡаршы килә алмай. Яңы норма ҡабул ителһә балаға исем теркәгәндә уның енесе мотлаҡ иҫәпкә алынырға тейеш була.

Халыҡ шағирына һәйкәл асылды

Бөгөн Үрге Тәтешлелә Башҡортостандың халыҡ шағиры Әнғәм Атнабаевҡа һәйкәл асылды. Сарала әҙиптең яҡындары, дуҫтары, яҡташтары - Иҫке Күрҙем ауылы халҡы ҡатнашты. Тантананы Тәтешле районы башлығы Фәнүр Шәйхисламов асты. Сәләмләү һүҙе менән шағирҙың бер туған ҡустыһы Мәғдән Атнабаев сығыш яһаны.

Сара хаҡында тулыраҡ бөгөн 22:30 сәғәттә «Яңылыҡтар»ҙа.

Өфөлә Волга буйы федераль округы советы ултырышы үтте

Рәсәй президентының тулы хоҡуҡлы вәкиле Игорь Комаров етәкселегендә ойошторолған эшлекле осрашыуҙа власть органдары һәм урындағы үҙидаралыҡтарға ышаныс кимәлен арттырыу мәсьәләһе ҡаралды. Субъекттарҙа халыҡ менән бәйләнеш ойоштороуҙың яңы формалар индерелә, инцидент менеджмент системаһы уңышлы эшләй. Шулай уҡ төбәк менән идара итеү үҙәктәре сафҡа индерелде, иҫегеҙгә төшөрәбеҙ, Башҡортостанда ул 2021 йылдан алып халыҡты борсоған проблемаларҙы хәл итергә ярҙам итә. Төбәктерҙең йәмғиәттең ышанысын яулауҙа уңышлы эш тәжрибәләре - киләһе яҙмала.

Башҡортостанда яңы хәрби берәмек йыйыла башланы

Уға эләгеү өсөн, теләгән һәр кем илдең Оборона министрлығы менән хәрби хеҙмәт буйынса контракт төҙөй ала. Республика военкоматынан хәбәр итеүҙәренсә, контракт төҙөргә теләүселәр республиканың төрлө район-ҡалаларынан килә. Улар һаны аҙ түгел, көн һайын кәмендә бер нисә тиҫтә кеше. Контрактты бер йыл йәки күберәк ваҡытҡа төҙөргә мөмкин. Һәр кандидат медицина һәм психологик тикшереүе үтә, бөтә процестарҙа ҙа инструкторҙар оҙатып бара. Контракт төҙөүгә 18 йәштән 65 йәшкә тиклемге һаулығы ныҡ булған ир-егеттәр һайлап алына. Контракт төҙөүселәр өсөн федераль һәм төбәк түләүҙәре ҡаралған, ғаиләләре өсөн ҡырҡлап ярҙам төрө бар.

«Витязь» машиналар эшләү компанияһы алдынғы студенттарға стипендия булдырҙы

Алдынғы студенттарға - дәртләндереү сараһы. «Витязь» машиналар эшләү компанияһы Өфө фән һәм технологиялар университеты менән берлектә тәүге ике звенолы транспортерҙарҙың баш конструкторы Константин Осколков исемендәге стипендия булдырҙы. Тәүгеләрҙән булып уны вуздың Ишембайҙағы филиалы студенты Артур Байымов ала башланы. Легендар вездеходтары менән дан ҡаҙанған предприятие йәш кадрҙарҙы йәлеп итеүгә төп баҫым яһай.

Өфөлә «Ҡатын - ҡыҙ-милләт әсәһе» бөтә Рәсәй конкурсын йомғаҡлау тантанаһы үтте

Һигеҙенсе тапҡыр ойошторолған конкурсҡа илдең төрлө төбәктәренән 500-ҙән ашыу ғариза ҡабул ителгән. Быйыл йомғаҡлау тантанаһына Татарстандан, Ханты-Манси автономиялы округынан, Пермь крайынан, Мәскәүҙән, Удмуртиянан гүзәл заттар килде. Сарала «Ватанды Һаҡлаусылар» Фонды рәйесе Анна Цивилева ла ҡатнашты.

Өфө ҡалаһындағы Башҡорт архитектура, төҙөлөш һәм коммуналь хужалыҡ колледжында уҡыу үҙәге асылды

Буласаҡ төҙөүселәр өсөн яңы оҫтахана. Өфө ҡалаһындағы Башҡорт архитектура, төҙөлөш һәм коммуналь хужалыҡ колледжында уҡыу үҙәге асылды. Ул уҡыу йорто менән Өфө гипс компанияһының берҙәм проекты.

Өфөлә Рәсәй халыҡтарының туған телдәре буйынса өсөнсө федераль олимпиадаһының йомғаҡлау этабы үтте

Өфө фән һәм технологиялар университетында Башҡорт теле һәм әҙәбиәтенән Рәсәй халыҡтарының туған телдәре буйынса өсөнсө федераль олимпиадаһының йомғаҡлау этабы үтте. Һынауҙа республиканан өс йөҙҙән ашыу уҡыусы ҡатнашты.

Бөгөн Башҡортостан телевидениеһында даими тапшырыуҙар сыға башлауға 65 йыл

Башҡортостанда телевидение Өфөлә телевизион вышкалы телеүҙәк төҙөүҙән башланған. Башҡорт студияһында тәүге тура эфир 1959 йылға яңы йыл төнөндә була. 1 мартта телевидение тапшырыуҙары эфирға сыға башлай. Программа тәүҙә аҙнаһына өс тапҡыр көнөнә 2 сәғәт ярым сәғәт барған. Күп йылдар буйы йыйылған архив материалдар кассеталарҙан һанлы форматҡа күсерелде.

Радий Хәбиров баҡса ширҡәттәре өсөн гранттарҙы арттырырға тәҡдим итте

Бөгөн Өфөлә "СМАРТ-баҡсасы" Бөтә Рәсәй форумы үтә. Был йыйында илдең 15 төбәге вәкилдәре ҡатнаша. Улар алдында Республика Башлығы сығыш яһаны. Радий Хәбиров белдереүенсә, Башҡортостанда баҡса ширҡәттәренә дәүләт ярҙамы буйынса төп йүнәлештәр билдәләнгән. Ике йылда 366 миллион һум бүленгән. 300 баҡса ширҡәтенә ярҙам күрһәтелгән. Быйыл тағы 225 миллион йүнәлтелә. Республика Башлығы иң яҡшы баҡса ширҡәттәре рәйестәренә 500 мең һумлыҡ 10 сертификат тапшырҙы. Гранттар уҙған йылда булдырылды. Киләһе йылда уларҙың һанын 20-гә еткерергә тәҡдим ителде.

Саҡмағош районының Иҫке Ихсан ауылы «Айыҡ ауыл-2024» муниципаль этабында еңеү яулаған

Иҫке Ихсандар тиҙҙән республика күләмендә район данын яҡлаясаҡ. Конкурс сиктәрендә ойошторолған айыҡ саралар, спорт ярыштары хаҡында тулыраҡ киләһе яҙмала.

Баш ҡалала балалар арһында футбол буйынса ярыш үтте

Өфө кескәй футболсыларҙы ҡабул итте. Илдең Урал һәм Көнбайыш Себер зонаһы командалары турнир финалында көрәште. Төрлө төбәктәр араһында футбол буйынса ярыш республикала беренсе тапҡыр ғына ойошторолмай.

Йырсы Ринат Рамаҙановтың ғаиләһендә ауыр ҡайғы

«Арғымаҡ» төркөмө лидеры, йырсы Ринат Рамаҙановтың атаһының ҡустыһы махсус хәрби операцияла һәләк булған. Күңелһеҙ хәбәр менән йырсы социаль селтәрҙә уртаҡлашҡан.

— 10 ноябрь атайымдың тыуған көнө. 11 ноябрҙә уның ҡустыһы, яҡын ағайыбыҙ махсус хәрби операция биләмәһенә хеҙмәт итергә юлланды. Ошо көндәрҙә туғаныбыҙҙың һәләк булыуы хаҡында хәбәр иттеләр. Иманың юлдаш булһын, абзый!

Мәрхүмдең яҡындарының ауыр ҡайғыһын уртаҡлашабыҙ.

Мексика йәштәре башҡорт телен өйрәнә

«Тамыр» телеканалы мөхәррире Гөлгөнә Баһауетдинова Сочи ҡалаһында барған Бөтә донъя йәштәр фестивалендә ҡатнаша. Ул төрлө илдән йыйылған тиҫтерҙәренә башҡортса һүҙҙәр өйрәткән һәм мәҙәниәтебеҙ хаҡында һөйләгән. Шулай уҡ матур сувенирҙар менән бүләкләгән.

Гөлгөнәгә фестивалдә уңыштар теләйбеҙ!👏

Өфөлә «Смарт-баҡсасы» Бөтә Рәсәй форумы үтте

Минең баҡсам-Башҡортостан. Баҡсасылар өсөн ошондай исем аҫтында яңы мәғлүмәт платформаһы эшләй башлай. Дәүләт системаһына старт бөгөн Өфөлә үткән «Смарт-баҡсасы» Бөтә Рәсәй форумында бирелде. Өс йыл элек Башҡортостанда башланғыс баҡсасылар форумы быйыл федераль кимәлгән күтәрелгән. Сарала илдең 15 субъектынан ҡунаҡтар ҡатнаша. Форумда ҡатнашыусыларҙы Башҡортостан башлығы тәбрикләне, Радий Хәбиров баҡсасыларҙы көткән төп яңылыҡтар хаҡында билдәләп үтте.

Радий Хәбиров Көрәш һарайы төҙөлөшө менән танышты

Өфөнөң 450 йыллығына сафҡа индереләсәк иң төп объекттарҙың береһе - Көрәш һарайы әҙерлеге 68 процентҡа еткән. Башҡортостан башлығы Радий Хәбиров төҙөлөш майҙансығында булып, эш барышы менән танышты. Әле объектта тышҡы һәм эске яҡтан биҙәкләү эштәре башланған, инженер, елләтеү системалары монтажлана.

Стәрлетамаҡтан эшҡыуар 3Д-принтер ярҙамында пилотһыҙ осоусы аппараттарға ҡулайламалар эшләй

Барыһы ла еңеү өсөн. Стәрлетамаҡтан эшҡыуар Александр Кузьменко 3Д-принтер ярҙамында пилотһыҙ осоусы аппараттарға гранатаны теүәл ташлау ҡулайламалары эшләй. Махсус хәрби операция биләмәһенә ул «ҡанаттар»ҙан тыш, дрон өсөн өҫтәл, медицина кәрәк-яраҡтары - ампула, «самокол» тип исемләнгән шприц та оҙата. Пластиктан етештерелгән продукция менән БЮТ ижади төркөмө лә танышты.

Башҡортостан юлдаш каналының Яңылыҡтар хеҙмәте иғлан иткән акция дауам итә

«Үҙебеҙҙекеләрҙе ташламайбыҙ». Башҡортостан юлдаш каналының Яңылыҡтар хеҙмәте иғлан иткән акция дауам итә. Коллегабыҙ, «Журналист» ҡушаматлы яугир хеҙмәт иткән «Башҡортостан» мотоуҡсылар полкы өсөн аҡса йыйыу ойошторолған. Хәрбиҙәр һорауы буйынса тупланасаҡ суммаға DJI Mavic 3 квадрокоптеры һатып алынасаҡ. Бөгөнгә 100 мең һум тирәһе йыйылған. Изгелек ҡылыуҙа айырыуса Тирлән урмансылығы хеҙмәткәрҙәре ҙур әүҙемлек күрһәтә. Яҡташтарыбыҙҙың ғүмерен һаҡлауға һәм еңеүҙе яҡынайтыуға һәр кем үҙ өлөшөн индерә ала. Бының өсөн аҡсаны Һаҡлыҡ банкы картаһына ебәрергә мөмкин. 2202 2069 3314 9457 (Регина Салаватовна)