Өфөлә ҡала халҡы ярҙамында 36 мең квадрат метрҙан ашыу биләмә ҡарҙан таҙартылды

Баш ҡала хакимиәте башлығы Ратмир Мәүлиев өмә иғлан итте. Торлаҡ-коммуналь хужалыҡ хеҙмәттәренә төрлө ойошма хеҙмәткәрҙәре, битараф булмаған халыҡ ярҙамға сыҡты. Өмәлә 35,5 меңдән ашыу кеше ҡатнашҡан, 700-ҙән ашыу берәмек махсус транспорт йәлеп ителгән. Ҡала урамдарынан 10 мең кубометр ҡар сығарылған. Өмөләр бөгөн һәм иртәгә лә дауам итә.

Федоровка районы Динес ауылы халҡы дәүләт программаһында ҡатнашырға ниәтләй

Федоровка районы Динес ауылы советы биләмәһендә йәшәүселәр урындағы башланғыстар программаһы ярҙамында Кирюшкин мәктәбенең спорт залын ремонтларға ниәтләй. Бинаның ҡыйығын һәм тәҙрәләрен алыштырыу талап ителә.

Рәсәйҙә спиртлы эсемлектәрҙе ҡойоп һатыу кибеттәрен ябырға рөхсәт ителде

Дәүләт Думаһы тейешле закон проектын ҡабул итте. Төбәктәр ресторан, бар, кафе һәм буфеттарҙа хәмер һатыуға талаптар ҡуя ала. Бынан тыш, күп фатирлы йорттар йәки улар эргәһендә урынлашҡан йәмәғәт туҡланыу урындарында иҫерткес эсемлектәр һатыу ваҡытын сикләргә рөхсәт ителә. Дәүләт Йыйылышы – Ҡоролтайҙа ла бындай кибеттәрҙе тыйыуға бәйле закон проекты әҙерләнә.

Өфөлә балалар онкологияһы һәм гематологияһы үҙәге асыу тантанаһы үтте

Рәсәй президенты Владимир Путин Өфөлә асылған балалар онкологияһы һәм гематологияһы үҙәген юғары баһаланы. Объект төҙөлөшө «Һаулыҡ һаҡлау» милли проекты буйынса алып барылғайны. Яңы учреждениела елек күсереп ултыртыу һәм интенсив терапия бүлексәһе, молекуляр-генетик лаборатория эшләйәсәк. Медицина учреждениеһын асыу тантанаһынан репортаж.

Радий Хәбиров вуз-ара студенттар кампусын республиканың ғилми берләшмәһенә тәҡдим итте

Евразия фәнни-мәғариф үҙәгенең вуз-ара студенттар кампусын төҙөү Владимир Путин ҡушыуы буйынса Һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә алып барыла. Хәтерегеҙгә төшөрәбеҙ, кисә ил субъекттарында заманса студент кампустарын асыу буйынса видеокәңәшмәлә уны асыуға старт бирелде.

Махсус хәрби операциянан ялға ҡайтҡан Сибай егеттәре ваҡыттарын файҙалы һәм һөҙөмтәле итеп үткәрә

Яугирҙар уҡыусылар, студенттар менән осраша, патриотик сараларҙа ҡатнаша. «Сибай» һәм «Кир» ҡушаматлы яугирҙар ҡала хакимиәте башлығы Азамат Юлдашбаев менән осрашып яҡташтарына рәхмәт һүҙҙәрен дә еткерҙе. «Сибай» алғы һыҙыҡҡа үткән йылдың майында контракт буйынса юлланған. .Әле яугир «Башҡортостан» полкы составында хеҙмәт итә. Ошо көндәрҙә ул тыуған яғына ялға ҡайтҡан, күптән түгел донъяға килгән ҡыҙын ҡулына алған. «Кир» ҡушаматлы Сибай егете лә махсус хәрби операцияға күңел ҡушыуы буйынса юлланған. Ул Башҡортостан халҡына даими ярҙамы өсөн рәхмәт белдерҙе.

Стәрлетамаҡта «Аврора» тарафынан уҡытыу курстары ойошторолған

«Аврора» таланттарҙы уҡыта. Робототехника йүнәлеше буйынса Бөтә Рәсәй олимпиадаһының төбәк этабында ҡатнашасаҡ малай-ҡыҙҙар белемдәрән камиллаштыра. «Аврора» тарафынан ойошторолған уҡытыу курстары Өфө фән һәм технологиялар университетының иң ҙур филиалы Стәрлетамаҡта үтә.

Башҡортостанда “Мәҙәниәт һәм сәнғәтте үҫтереү” дәүләт программаһы раҫланды

Республика Хөкүмәте ҡабул иткән документ интернетта рәсми хоҡуҡи мәғлүмәт порталында урынлаштырылған. Программала мәҙәни сараларға халыҡты күберәк йәлеп итеү, рухи-әхлаҡи ҡиммәттәр нигеҙендә илһөйәр кешеләр тәрбиәләү бурысы ҡуйыла. Ҡала һәм райондарға модулле мәҙәниәт йорттары төҙөү, китапханалар һәм виртуаль концерт залдары асыу өсөн конкурс шарттарында субсидиялар бирелә.

Былтыр 490 меңдән ашыу кеше контракт төҙөп махсус хәрби операцияға ҡушылған

Оборона министрлығы уҙған йылға йомғаҡ яһаны. Махсус хәрби операция барышында 320 меңдән ашыу яугиргә дәүләт наградалары тапшырылған, 272 кеше Рәсәй Геройы исеменә лайыҡ булған. Башҡортостандан 7 яугир юғары хәрби дәрәжәгә эйә булды.

Башҡортостанда ҡояш күберәк яҡтырта

Өфө планетарийынан хәбәр итеүҙәренсә, төньяҡ ярымшарҙа декабрҙән алып февраль аҙағынаса көн оҙонлоғо 3 сәғәт ярымға арта. Ҡояш юғарыраҡ күтәрелә һәм әкренләп йылыта башлай. 2 февралдә көн оҙонлоғо 8 сәғәт 45 минут булһа, ай аҙағына ул ике сәғәткә күберәк була.

Башҡортостанда Рәсәй Президентын һайлау барышында 10 меңгә яҡын бойондороҡһоҙ күҙәтеүсе эшләйәсәк

Ғәҙел һәм асыҡ һайлау. Башҡортостанда Рәсәй Президентын һайлау барышында тауыш биреү участкаларында 10 меңгә яҡын бойондороҡһоҙ күҙәтеүсе эшләйәсәк. Махсус уҡыу үткән күҙәтеүселәр йәмәғәт палатаһы штабы тарафынан әҙерләнә. Өфөлә йәмәғәт күҙәтеүселәрен уҡытыу уҙған йылда ноябрь айында уҡ башланды. Уларҙың күбеһе сәйәси кампаниялар барышын тикшергән тәжрибәле белгестәр. Юристар, уҡытыусылар, студенттар, ауыл эшсәндәре һәм башҡа һөнәр эйәләре бойондороҡһоҙ рәүештә тауыш биреү процессын күҙәтеп барасаҡ.

Салауат районында «Сәләмәтлек» милли проекты йылдам тормошҡа ашырыла

Быйыл районда 7 заманса модулле фап асыу күҙаллана. Тимәк, яңы шарттарҙа халыҡ йәшәгән урынында диспансер тикшереүе үтә, һаулыҡ торошон күҙәтә ала. Бындай мөмкинлектән Салауат районы Мәсетле ауылында йәшәүселәр ҙә ҡуллана.

Өфөнән ҡул эштәре оҫтаһы коллекционерҙарҙа ҙур ҡыҙыҡһыныу уятҡан блайз уйынсыҡтар етештерә

Һәр ҡурсаҡ - ысын сәнғәт өлгөһө. Өфөнән ҡул эштәре оҫтаһы Гүзәл Исмәғилева коллекционерҙарҙа ҙур ҡыҙыҡһыныу уятҡан блайз уйынсыҡтар етештерә. Ҙур башлы, күҙҙәренең төҫөн алмаштырып булған ҡурсаҡтарҙы эшләү процессын беҙҙең ижади төркөм дә күҙәтте.

Башҡортостан федераль кинокомпанияларҙы йәлеп итергә ниәтләй

Дәүләт Йыйылышы – Ҡоролтайҙа рибейт системаһын индереү мәсьәләһе өйрәнелә. Бындай алымға ярашлы айырым төбәктә кино төшөргән компанияға субсидия бирелә. Рибейт системаһы Пермь һәм Краснодар крайҙарында “Чебурашка”, “По щучьему велению”, “Семейный бюджет” фильмдарын төшөрөүҙә ҡулланылған. “Федераль кинокомпаниялар Башҡортостанды танытыуға булышлыҡ итәсәк”, - тип билдәләй парламент депутаттары.

Башҡортостанда «Герой ҡатыны» федераль проекты буйынса фотосессиялар дауам итә

Акцияла яҡындары махсус хәрби операцияла булған гүзәл заттар, уларҙың балалары ҡатнаша. Фотостудияла эш барышын БЮТ ижади төркөмө күҙәтте.

Башҡортостанда яңы уҡыу йылынан ике яңы фән уҡытыла башлай

Дәүләт Йыйылышы – Ҡоролтайҙан хәбәр итеүҙәренсә, федераль законға үҙгәреш индерелде. Дәреслеккә “Тыуған илде яҡлау һәм хәүефһеҙлек нигеҙҙәре”, шулай уҡ “Хеҙмәт” (“Технология”) тигән фәндәр индерелә. Мәғариф өлкәһендәге үҙгәрештәргә ярашлы, уҡыусылар мәктәп мөлкәтенә һаҡсыл ҡарарға, таҙалыҡ һәм тәртип һаҡларға тейеш.

Башҡортостанға ретропоезд килә

Рәсәй ҡалаларынан"Еңеү паровозы" үтәсәк. Уға бер нисә Т-34 танкы урынлаштырылған платформа ла тағыла. Ретропоезд 27 апрелдә ҡуҙғала. Маршрутҡа 11 станция ингән, паровоз Өфөлә һәм Стәрлетамаҡта туҡтала.

Бөгөн Өфөлә Айрат Ҡобағошовты иҫкә алалар

Өфөлә танылған композитор һәм педагог Айрат Ҡобағошовҡа арналған хәтер кисәһе үтә. Унда ижадсының дуҫтары, коллегалары, уҡыусылары һәм яҡташтары ҡатнаша. “Ул әҫәрҙәре менән халыҡ һөйөүен яулаған ижадсы булды. Уҡытыусы, остаз, патриот”, - ти Көйөргәҙе район хакимиәте башлығы урынбаҫары Данил Акилов.
“Айрат Ҡобағошов ябай, эскерһеҙ булды. Ундайҙар тураһында яҡты күңелле кеше тиҙәр. Коллегалары һәм студенттары уны ихтирам итте, яратты”, - ти сәнғәт белгесе Гөлназ Галина.
Айрат Ҡобағошовҡа арналған кисә бөгөн Өфө сәнғәт училищеһында ойошторола, киске сәғәт биштә башлана.

Башҡортостан урман хужалыҡтары махсус хәрби операцияла ҡатнашыусыларға ярҙам итә

Әбйәлил һәм Балаҡатай хужалыҡтары 25 кубик метр ағас материал оҙатҡан. Таҡта оборона ҡоролмаларын төҙөүҙә ҡулланыла. Башҡортостан урмансылары быға тиклем 1 мең кубометрҙан ашыу ағас оҙатҡан. Хәрбиҙәр өсөн шулай уҡ утын әҙерләнә.

Үҙ теләге менән МХО-ға ҡушылған район хакимиәте башлығы пилотһыҙ осоу аппараттары отрядында хеҙмәт итә

Етәксе костюмын бронежилетҡа, ә йылы кабинетты окоп һәм блиндаждарға алмаштырҙы. Былтыр үҙ теләге менән махсус хәрби операцияға ҡушылған район хакимиәте башлығы пилотһыҙ осоу аппараттары отрядында хеҙмәт итә. Әле подразделение фронттың иң ҡыҙыу урындарында тора. Алғы һыҙыҡта БЮТ хәбәрселәре лә булды.

Башҡортостанда «Урындағы башланғыстарға ярҙам итеү» программаһы сиктәрендә йомғаҡлау йыйылыштары башланды

Юлдарҙы төҙөкләндереү, зыяраттарҙы кәртәләү, спорт майҙансыҡтары төҙөү, почта бүлексәләре асыу - проект йүнәлештәре күп төрлө. Конкурс сиктәрендә төбәктәрҙә мәҙәни һәм спорт саралары ойошторола. Бынан тыш, субсидияның бер өлөшө урында йәшәүселәрә көсө менән ҡапланырға тейеш.