Республикала православ христиандар өсөн 96 һыу инеү урыны йыһазландырыла

Был турала Ғәҙәттән тыш хәлдәр министрлығының Башҡортостан идаралығынан хәбәр итәләр. Һыуға сумыу йолаһын башҡарыу өсөн уңайлы шарттар булдырыла. Йылыныу, кейем алмаштырыу, туҡланыу пункттары асыла. 19 ғинуарҙа һыу ятҡылыҡтарында ҡотҡарыусылар, медицина хеҙмәткәрҙәре һәм полиция дежур итә. Өфөлә йәмәғәт транспорты төнгө 1-гә тиклем йөрөй. 7 мәкегә маршрут ойошторола.

Радий Хәбиров Өфөнөң 450 йыллығына әҙерлек буйынса кәңәшмә уҙғарҙы

Иң ҙур төҙөлөштәрҙең береһе - Өфөнөң Октябрь районындағы Көрәш һарайы. Бында эштәр планға ярашлы бара. Инорста ишкәкселәр өсөн комплекс төҙөлә. Уның тәүге өлөшө быйыл файҙаланыуға тапшырыла. Затонда Фехтование үҙәген октябрҙә асыу планлаштырыла. Шулай уҡ ҙур инфраструктура проекттары ғәмәлгә ашырыла. Пугачев урамында реконструкция бара. Эштәрҙе быйыл тамамлау көтөлә. Бынан тыш юбилей алдынан биләмәләр тәртипкә килтерелә, бина фасадтары, тротуарҙар, яҡтыртыу ҡорамалдары яңыртыла. - Төп объекттар буйынса эштәр планға ярашлы бара, - тине Радий Хәбиров.

Радий Хәбиров Салауат районынан әсә Ильнара Сафина тураһында яҙып сыҡты

Ул “Хеҙмәт итәм“ Бөтә Рәсәй конкурсы премияһына лайыҡ булды. Ильнара Сафина “Кеше яҙмышы- Ватан ғорурлығы” номинацияһында еңеүсе булды. Награданы “Кесе Ватан- Рәсәй көсө” форумы барышында Рәсәй президенты Владимир Путин тапшырҙы. Ильнара Сафина 2022 йылда ире үҙ ирке менән махсус хәрби операцияға юлланғас, ул биләгән вазифаны алды, Миәшәгәр ауыл хакимиәтен етәкләне.

Коммуналь инфраструктураға миллиардтар бүленә

Башҡортостанда коммуналь инфраструктураны яңыртыуға 13 миллиард һум тотонола. Аҡса 5 районда йылытыу системаһын яңыртыу, һыу торбаларын ремонтлауға тәғәйенләнә. Программаға ярашлы, 17 объектта 103 километр инженер селтәре алмаштырыла. - Әле ҡатмарлы һауа шарттары булһа ла, хәл тотороҡло. Республикала 17 мең километр - һыу, 4 мең километр йылытыу торбалары бар. Коммуналь инфраструктура 54 процентҡа иҫкергән, тип белдерҙе Премьер-министр Андрей Назаров.

Башҡортостан урман фондына бер йылда 64 миллион һумлыҡ зыян килтерелгән

Был турала Федераль тәбиғәтте файҙаланыу өлкәһен күҙәтеү хеҙмәте етәксеһе Светлана Радионова белдерҙе. Рөхсәтһеҙ урман киҫеү тураһында 96 енәйәт эше ҡаралған. Ғәйеплеләр урман фондына зыянды ҡапларға тейеш була, шулай уҡ Енәйәт кодексы буйынса яуапҡа тарттырыла.

Башҡортостанда халыҡ һәм бизнес өсөн берҙәм мәғлүмәт үҙәге булдырыла

Һәр кемдең шылтыратып дәүләт органдарынан консультация алыу мөмкинлеге була. Тейешле документҡа премьер-министр Андрей Назаров ҡул ҡуйҙы. Яңы система "Берҙәм контакт-үҙәк" тип атала. Ул Ситуация, Махсус хәрби операцияла ҡатнашыусыларға ярҙам күрһәтеү үҙәктәрен, бизнес проблемаларын хәл итеү сервисын берләштерә. Яңы системаны булдырыу менән Һанлы үҫеш министрлығы шөғөлләнә. Контакт-үҙәк киләһе йылдың февраль аҙағында эш башларға тейеш.

Мәләүездә газ тултырыу станцияһы төҙөлә

Бының өсөн 82 миллион һум тотонола. Проект Республика инвестиция сәнәғәтендә хупланды. Станция быйыл көҙ асылырға тейеш. Бында шулай уҡ бәләкәй сауҙа үҙәге булдырыла. Проект өҫтөнлөклө статус алды. Инвесторҙың сығымының бер өлөшө ҡаплана. - Автомобилдәрҙе арзан һәм экологик яҡтан таҙа газ яғыулығына күсереү өсөн бындай станциялары күберәк төҙөйбөҙ, - тип белдерҙе Радий Хәбиров.

Өфө ҡалаһы хакимиәтендә «Луна» ҡушаматлы яугир менән брифинг үтте

Беҙҙең заман геройҙары. Бөгөн Өфө ҡалаһы хакимиәтендә «Луна» ҡушаматлы яугир менән брифинг үтте. «Луна» Ҡариҙел районы ҡыҙы, алғы һыҙыҡта ике йылға яҡын. Район үҙәк дауаханаһының ашығыс медицина ярҙамы станцияһында эшләгән медицина хеҙмәткәре махсус хәрби операцияға тәүҙә Башҡортостан һаулыҡ һаҡлау министрлығы бригадаһы составында бара. Ә үткән йылдың яҙынан контракт буйынса «Башҡортостан» батальонының медицина ротаһында хеҙмәт итә.

Башҡортостандың 4 муниципалитеты 82 миллион һум ала

"Иң яҡшы муниципаль тәжрибәләр" Бөтә Рәсәй конкурсы еңеүселәре өсөн шундай бүләкләү ҡаралған. Вице-премьер-Иҡтисади үҫеш һәм инвестиция сәйәсәте министры Рөстәм Моратов белдереүенсә, был аҡса биләмәләрҙе тәртипкә килтереүгә һәм матди-техник базаны нығытыуға йүнәлтелә. Октябрьский, Учалы һәм Асҡын районы Ҡашҡа ауыл биләмәһе "Халыҡ менән һөҙөмтәле эшләү" номинацияһында еңде. Стәрлетамаҡ "Муниципаль финанс менән идара итеү" номинацияһында баһаланды.

Быйыл республикала 4 мең пилотһыҙ осҡос етештереү ҡарала

Шулай уҡ уларҙы ҡулланыу мөмкинлеге киңәйтелә. Аппараттар ярҙамында төпкөлдәге ауылдарға медицина кәрәк-яраҡтары илтергә була. Бынан тыш Башҡортостанда төбәк операторы ойошторола. Ул пилотһыҙ осҡостар ярҙамында хеҙмәтләндереү күрһәтеү өсөн яуап бирә.

Ғәҙәттән тыш хәлдәр министрлығы республикала йәшәүселәрҙе иғтибарлы һәм уяу булырға саҡыра

Һепертмә буран, елдең тиҙлеге секундына 18 метрға етә. Ғәҙәттән тыш хәлдәр министрлығы республикала йәшәүселәрҙе иғтибарлы һәм уяу булырға саҡыра. Насар һауа шарттарына бәйле, төрлө райондарҙа юлдар ябылды.

Баш ҡаланың ҡар иретеү пункты ике ай эсендә 40 мең кубометр ҡар эшкәрткән

Эш тәүлек әйләнәһенә туҡтамай. Баш ҡаланың Сәғит Агиш урамында төҙөлгән яңы ҡар иретеү пункты ике ай эсендә 40 мең кубометр ҡар эшкәрткән. Совет, Киров, Октябрь райондары урам-ихаталарын ваҡытында ҡарҙан бушатырға ярҙам иткән ҡулайлама мөмкинлектәре тураһында репортаж.

Башҡортостанда туған телдәрҙе үҫтереү буйынса кәңәшмә үтте

Республикала мәктәп уҡыусыларының 78,5 проценты, йәғни 408 меңдән ашыу бала башҡорт телен дәүләт теле булараҡ һайлаған. Әлеге күрһәткес уҙған йылға ҡарағанда, 42 мең уҡыусыға күберәк. Был турала «Туған телдәр сәғәте»ндә Мәғариф һәм фән министры Илдар Мәүлетбирҙин белдерҙе. Кәңәшмәне Башҡортостан башлығы Радий Хәбиров үткәрҙе.

Ауырғазы районында белгестәр автоһәүәҫкәрҙәр менән осрашып, аңлатыу эштәре алып барҙы

Тимер юлында рейд. Бөгөн Ауырғазы районында белгестәр автоһәүәҫкәрҙәр менән осрашып, аңлатыу эштәре алып барҙы. Сара йыл башында теркәлгән бәхетһеҙ осраҡҡа бәйле ойошторолдо. Тулыраҡ киләһе яҙмала.

Хәйбулла районы Ивановка ауылында Динис Бикбов иҫтәлегенә хәтер таҡтаһы асылды

Батырҙар онотолмай. Хәйбулла районы Ивановка ауылында махсус хәрби операцияла һәләк булған Динис Бикбов иҫтәлегенә хәтер таҡтаһы асылды. Илһөйәрлек сараһында яугирҙың яҡындары, хәрби хәрәкәт ветерандары, йәмәғәт ойошмалары вәкилдәре ҡатнашты. Динис Бикбов былтыр июлдә махсус хәрби операцияға үҙ теләге менән юлланған. Октябрҙә һауа-десант ротаһында хәрби бурысын үтәгәндә уның ғүмере өҙөлгән. Яҡташтары яугирҙы яуаплы, илһөйәр, тоғро шәхес тип иҫкә алды.

Башҡортостанда парковкалар өсөн түләүҙе иҫәпләү системаһы раҫланды

Документҡа Премьер-министр Андрей Назаров ҡул ҡуйҙы. Уға ярашлы, парковка өсөн сумма машинаны ҡалдырыу ваҡыты, йәмәғәт транспортына йөрөү тарифына бәйле була. Шулай уҡ транспорт сараһы иҫәпкә алына, мәҫәлән, мотоцикл хужалары аҙыраҡ түләйәсәк. - Парковканың төп маҡсаты - аҡса эшләү түгел, юл хәрәкәтен көйләү, инфраструктураны яҡшырыу, - тип яҙылған документта.

Республика парламентының быйылғы тәүге пленар ултырышы 25 ғинуарҙа була

Президиум ултырышында проекттар раҫланды. 25 ғинуарҙа Бала хоҡуҡтары буйынса вәкилдең доклады тыңлана. Дәүләт мөлкәтен хосусилаштырыу тураһында законға төҙәтмәләр тәҡдим ителә. Шулай уҡ Ғаилә кодексына үҙгәрештәр әҙерләнгән. Улар ғаиләне тарҡатыу сәбәптәренә ҡағыла. Бынан тыш, енесен үҙгәрткән кешеләргә балаларҙы уллыҡҡа һәм ҡарауға алыуҙы тыйыу индерелә.

Быйыл Әсәлек капиталы индексациялана

Беренсе бала өсөн уның суммаһы 630 мең һум була. Икенсе бала тыуғас тағы 202 мең һум өҫтәлә. Ил президенты ҡушыуы буйынса 2022 йылдан алып Әсәлек капиталы инфляция кимәленә ҡарап индексациялана. Ғаиләләрҙең күбеһе сертификатты торлаҡ шарттарын яҡшыртыу өсөн тотона.

Башҡортостанда агросәнәғәт форумы уҙғарыла

Ауыл хужалығы министрлығынан хәбәр итеүҙәренсә, бында алдынғы компаниялар, агрохолдингтар, ойошмалар, федераль һәм төбәк власы органдары вәкилдәре, эксперттар ҡатнаша. Форумда һөт һәм ит етештереү сәнәғәтен үҫтереү, урындағы брендтарҙы танытыу, сауҙаны арттырыу темаларына ҙур иғтибар бирелә. Аграр тармаҡ вәкилдәре йыйыны март аҙағында Өфөлә үтә, уның барышында "Агрокомплекс" күргәҙмәһе ойошторола.

Башҡортостанда радиоэлектрон технопарк булдырыла

Төҙөлөш быйыл башлана. Проект өсөн 1 миллиард 200 миллион һум инвестиция һалына, тип белдерәләр Сәнәғәт, энергетика һәм инновациялар министрлығынан. Киләһе йылда иһә пилотһыҙ осоу аппараттары фәнни-етештереү үҙәгенә нигеҙ һалына. Башҡортостанда шулай уҡ авиацияның яңы тармағы өсөн кадрҙар әҙерләнә.

Башҡортостанда ҡышҡы әүҙем ялды үҙ итеүселәр арта

Быйыл республика тәбиғәт парктарында 2 мең 173 турист булған. Был уҙған йылдың ошо осорондағынан күберәк. Тәбиғәттән файҙаланыу һәм экология министрлығынан хәбәр итеүҙәренсә, халыҡ "Ирәмәл"гә күпләп килгән. Шулай уҡ "Мораҙым тарлауығы" һәм "Ҡандракүл"дә ял итеүселәр байтаҡ теркәлгән.