Башҡортостанда өс ветеринар лабораторияға төҙөкләндереү өсөн сарыф ителгән сығымдар кире ҡайтарылған

Модернизацияға субсидия. Башҡортостанда өс ветеринар лабораторияға төҙөкләндереү өсөн сарыф ителгән сығымдар кире ҡайтарылған. Был «Халыҡ-ара кооперация һәм экспорт» милли проекты сиктәрендә мөмкин булған. 2023 йылда субсидияның дөйөм күләме 11 ярым миллион һум тәшкил иткән.

Ауырғазы районының «Салауат» крәҫтиән-фермер хужалығында яңы он тирмәне эш башланы

Быға тиклем хужалыҡҡа уңышты күмәртәләп арзан хаҡҡа һатырға тура килһә, бөгөн крәҫтиән-фермер хужалығының әҙер продукцияһын Ҡырмыҫҡалы, Иглин, Ғафури райондары икмәкханалары ала. Йәшелсә үҫтереүсе йүнселдәр яңы теплицалар төҙөүгә ирешкән.

Башҡортостанда өйләнешеүҙәр күп булған ай аталды

Статистика хеҙмәтенең төбәк идаралығынан белдереүҙәренсә, былтыр 10 айҙа 20 меңгә яҡын никах теркәлгән. Июль һәм августа өйләнергә теләгән парҙар күберәк булған. Былтыр ғинуарҙан октябргә тиклем 14 меңдән ашыу ғаилә тарҡалған.

Республика халҡы Мортаза Рәхимовты иҫкә ала

1 йыл элек 88 йәшендә Башҡортостандың тәүге президенты вафат булды. Мортаза Ғөбәйҙулла улы Рәхимов 1934 йылдың 7 февралендә Күгәрсен районы Тәүәкән ауылында тыуған. 1956 йылда нефть техникумын тамамлағандан һуң, Өфө нефть эшкәртеү заводына эш башлай. 1990 йылдан Башҡортостан республикаһының Юғары Советы рәйесе. 1993 йылда ул Башҡортостан республикаһының беренсе Президенты итеп һайлана. 1998 йылдың 4 июнендә - икенсегә, 2003 йылдың 21 декабрендә - өсөнсө мөҙҙәткә Башҡортостан Президенты була. 2006 йылдың 10 октябрендә Рәсәй Президенты Владимир Путиндың тәҡдиме менән Дәүләт Йыйылышы-Ҡоролтай депутаттары Мортаза Рәхимовҡа Башҡортостан Президенты вәкәләттәрен йөкмәтә. 2010 йылдың 12 июлендә ул вазифаһын ваҡытынан алда тамамларға теләк белдерә. Рәсәй Президенты Дмитрий Медведев Мортаза Рәхимовтың отставкаһын ҡабул итә.

“Өлгөлө башҡорт ғаиләһе” асыҡ республика конкурсына ғаризалар ҡабул ителә

Ул Башҡортостан һәм Рәсәйҙең башҡорттар күпләп йәшәгән төбәктәре халҡы араһында башҡорт халҡының мәҙәниәтен, туған телен, ғөрөф-ғәҙәттәрен, йолаларын һаҡлаған һәм үҫтергән өлгөлө ғаиләне асыҡлау һәм ғаилә институтын нығытыу өсөн ойошторола. Конкурс “Ғаилә ижады”, “Ғаилә кәсебе”, “Ғаилә традициялары һәм ҡиммәттәре” номинациялары буйынса уҙғарыла. 2024 йыл Рәсәйҙә Ғаилә йылы тип иғлан ителде.

Күп балалы ғаиләләрҙе торлаҡҡа һалым түләүҙән бушатылыуы мөмкин

Владимир Путин күп балалы ғаиләләрҙе торлаҡҡа һалым түләүҙән бушатыу мәсьәләһен ҡарарға вәғәҙәләне. Президенты Чукотка автономиялы округына сәфәр ҡылды. Дәүләт башлығы Анадырь ҡалаһында халыҡ менән осрашты. Владимир Путин балалы ғаиләләргә ярҙам итеү саралары тураһында һөйләне. Осрашыуҙа күп балалы ғаиләләргә автомобиль һатып алыу өсөн льготалар бирергә тәҡдим ителде. 2024 йыл Рәсәйҙә Ғаилә йылы тип иғлан ителде.

Бөгөн халыҡ Башҡортостандың беренсе президенты Мортаза Рәхимовты иҫкә ала

Ул былтыр 88 йәшендә арабыҙҙан китте. “Мортаза Рәхимов – башҡорт халҡының бөйөк улы. Ғүмерен, тәжрибә һәм һәләтен республиканы үҫтереүгә, милләт-ара һәм дини дуҫлыҡты нығытыуға арнаны. Башҡортостанды көслө итеп, Рәсәйҙең ҡеүәтен арттырырға тырышты”. Төркмәндәр милли-мәҙәни үҙәге рәйесе Сапарморат Шанглиев шулай тип белдерҙе. Мортаза Рәхимов 1993 йылда Башҡортостан Президенты итеп һайлана. 2010 йылдың июленә тиклем ошо юғары вазифала ҡала. 7 февралдә Мортаза Рәхимовтың тыуыуына 90 йыл тула.

Мортаза Рәхимовҡа һәйкәл ҡуйыла

Башҡортостанда Мортаза Рәхимовтың 90 йыллығына бағышланған саралар уҙғарыла. Бөгөн ойоштороу комитеты ултырышы үтте. Республика Башлығы хакимиәте етәксеһе Максим Забелин белдереүенсә, Мортаза Рәхимовтың ҡаҙаныштарын иҫләйбеҙ. Уның хеҙмәте баһалап бөткөһөҙ. 7 февралдә төп сара - Башҡортостандың беренсе президентына һәйкәл асыу тантанаһы була. Ул Дәүләт Йыйылышы-Ҡоролтай бинаһы ҡаршыһында урынлаштырыла. Монументтың авторы - скульптор Салауат Щербаков. Ошо уҡ көндә, Өфөнөң Энгельс һәм Беренсе май урамдарында, Мортаза Рәхимов йәшәгән һәм эшләгән ике йортта мемориаль таҡтаташтар асыла. Башҡортостандың беренсе президенты бер йыл элек 88 йәшендә вафат булды.

Рәсәйҙә “Ауыл уҡытыусыһы” программаһы 2030 йылға тиклем оҙайтыла

Президент Владимир Путин Чукотка автономиялы округына сәфәр барышында шул турала белдерҙе. Программа буйынса ауыл йәки бәләкәй ҡалала мәктәпкә эшкә урынлашҡан уҡытыусыларға 1 миллион һум бирелә. Башҡортостанда “Ауыл уҡытыусыһы” программаһы буйынса дүрт йылда 150 педагогҡа сертификат тапшырылды.

Башҡортостан мотоспортсыһы Никита Богданов Рәсәй чемпионатында өсөнсө урын алды

Боҙҙа мотоуҙыш буйынса ярыштың икенсе этабы Каменск-Уральскиҙа уҙҙы. Унда Өфөнән Ғабдрахман Ҡадыров исемендәге Техник спорт төрҙәре үҙәге вәкилдәре ҡатнашты. Ярышта майҙан хужаһы – Дмитрий Колтаков еңеү яуланы, Тольяттиҙан “Мега-Лада” командаһы өсөн сығыш яһаған яҡташыбыҙ Динар Вәлиев икенсе урын алды. Ике этап һөҙөмтәләре буйынса Никита Богданов икенсе урында килә. Боҙҙа мотоуҙыш буйынса Рәсәй чемпионатының өсөнсө этабы 13-14 ғинуарҙа Шадринскиҙа үтә.

Ветеринар лабораторияларын үҙгәртеп ҡороуға субсидиялар ике тапҡырға артҡан

Былтыр “Халыҡ-ара кооперация һәм экспорт” милли проекты буйынса 11,5 миллион һум йүнәлтелгән. Был аҡсаға өс ветеринар лабораторияһында капиталь ремонт үткәрелгән һәм ҡорамалдар һатып алынған. Башҡортостан былтыр 44 илгә 314 миллион долларға тауар оҙатҡан. Сертификат алыу өсөн лабораториялар яңыртыла. Дәүләт ярҙамына өс йылда 9 объекта ремонт үткәреү ҡарала, тип хәбәр итәләр Ауыл хужалығы министрлығынан.

Башҡортостан халҡы мәҙәни проекттарын грантҡа тәҡдим итә ала

Мәҙәни башланғыстар президент фонды бөгөндән икенсе конкурсҡа заявкалар ҡабул итә башлай. Унда коммерция һәм коммерцияға ҡарамаған ойошмалар, муниципаль учреждениелар, шәхси эшҡыуарҙарға ҡатнашырға рөхсәт ителә. Проекттарҙы 9 йүнәлеш буйынса тапшырырға була. Заявкаларҙы 20 февралгә тиклем ебәреп өлгөрөргә кәрәк.

Алиментты ҡатын-ҡыҙҙар ҙа түләйәсәк

Башҡортостанда бала тәрбиәләгән яңғыҙ ир-егеттәрҙең хоҡуҡтары нығытыла. Дәүләт Йыйылышы–Ҡоролтайҙа Ғаилә кодексына үҙгәреш әҙерләнгән. Закон проектына ярашлы, бәләкәй бала тәрбиәләгән атай кеше элекке ҡатынына алиментҡа бирә ала. Ғәмәлдәге ҡануниәт буйынса әсәй кеше генә ошондай хоҡуҡҡа эйә. Закон проекты профилле комитетта хупланған һәм парламенттың пленар ултырышына ҡарауға сығарырға тәҡдим ителгән.

Өфөнөң Көнсығыш ҡапҡаһында фонарҙәр тоҡандырылған

Яҡтыртылған участканың оҙонлоғо 14 километр тәшкил итә. Был турала социаль селтәрҙә Башҡортостан Башлығы Радий Хәбиров хәбәр итте. Төбәк етәксеһе мәғлүмәттәренә ярашлы, подрядсы ойошма 780-дән ашыу мачта ҡуйған. Юл өҫтөн Рәсәйҙә етештерелгән диод лампалар яҡтырта. Дөйөм алғанда, Көнсығыш ҡапҡала эштәр тамамланыуға табан бара, уны йылдың тәүге кварталында тапшырырға тейештәр. тип белдергән Радий Хәбиров.

Радий Хәбиров ҡушыуы буйынса «Башавтотранс» компанияһы автопаркын киңәйтеү эше дауам итә

Махус ҡаҙна кредиты сиктәрендә бөгөн линияға 91 яңы автобус сыҡһа, ғинуар аҙағына тиклем республикаға тағы ла 159 йәмәғәт транспорты килеүе көтөлә.

Республикала Башҡортостандың беренсе Президенты Мортаза Рәхимовты хөрмәтләп иҫкә алдылар

Башҡортостан Башлығы Хакимиәте етәксеһе Максим Забелин Өфөнөң мосолман зыяратында күренекле дәүләт эшмәкәре ҡәберенә сәскә һалды.
Башҡортостандың беренсе Президенты 2023 йылдың 11 ғинуарында 89-сы йәшендә вафат булды. Хәтерегеҙгә төшөрәбеҙ, былтыр 13 февралдә Башҡортостан Башлығы Радий Хәбиров Мортаза Рәхимовтың иҫтәлеген мәңгеләштереү тураһындағы Указға ҡул ҡуйҙы.

Константин Толкачев махсус хәрби операцияла Башҡортостан батальондарының рухи остаздары менән осрашты

Бөгөн Дәүләт Йыйылышы - Ҡоротай рәйсе Константин Толкачев махсус хәрби операцияла Башҡортостан батальондарының рухи остазы булған Хәмзә хәҙрәт Хафизов һәм отец Виктор менән осрашты.
Мәғлүм булыуынса, отец Виктор менән Хәмзә хәҙрәт махсус хәрби операция башланғандан алып алғы һыҙыҡта, дин әһелдәре бар яҡлап та яугирҙарҙың терәк-таянысы, рухи ярҙамсыһы булып тора. Бөгөн дә улар Парламент етәкселегенә егеттәрҙең үтенестәре, теләк-тәҡдимдәре менән килгән. Һорауҙар гуманитар ылауҙарҙы ойоштороуға ла, яугирҙарҙың ғаиләләрен яҡлауға ла, социаль ярҙам сараларына ла ҡағыла.

Мәләүез ирекмәндәре махсус хәрби операцияла ҡатнашыусыларға әүҙем ярҙам итә

Бер ярым йылға яҡын бер сафта. Мәләүездә ойошторолған «Йөрәк ҡушыуы буйынса» ирекмәндәр хәрәкәте 90-дан ашыу битараф булмаған ҡалала йәшәүселәрҙе берләштергән. Көн һайын улар махсус хәрби операцияла ҡатнашыусы яҡташтарыбыҙға ярҙам итә. Өлкән йәштәге ҡатын-ҡыҙҙар маскировка селтәрҙәрен үреү менән мәшғүл. Тағы бер төркөм гүзәл заттар баш һәм өҫ кейемдәре, носилка һәм башҡа әйберҙәр тегә. Тегеү цехында хатта төнгө сәғәттәрҙә лә тауыш тынмай.

Төбәктә Рәсәй Президенты вазифаһына кандидат Владимир Путинды хуплап ҡултамғалар йыйыу дауам итә

Башҡортостанда Рәсәй Президенты вазифаһына кандидат Владимир Путинды хуплап ҡултамғалар йыйыу дауам итә. Был эш менән ирекмәндәр һәм республиканың йәштәр ойошмалары шөғөлләнә. Улар рәтендә йәштәр сәйәсәте лигаһы ла бар. Бөгөн команданың лидеры Башҡортостандың төбәк һайлау штабында үҙ ҡултамғаһын ҡуйҙы.

Республикала тын юлдары инфекциялары йоҡтороуға бәйле 20 меңдән ашыу осраҡ теркәлгән

Яңы йылдың тәүге аҙнаһында ғына республикала тын юлдары инфекциялары йоҡтороуға бәйле 20 меңдән ашыу осраҡ теркәлгән. Сирлеләрҙең яртыһы тиерлек 14 йәшкә тиклемге балалар. Бер юлы тымау, грипп һәм ковид йоҡтороусылар ҙа бар. Декабрь менән сағыштырғанда, әле сирлеләр һаны кәмерәк, тик белгестәр ауырыуҙарҙы иҫкәртергә кәңәш итә.

Республиканың алты башҡорт балалар баҡсаһы «Һомай»лы булды

Мәктәпкәсә учреждение тәрбиәселәре Өфөгә килеп, башҡорт телендә һөйләшкән тәүге аҡыллы колонка менән эшләргә өйрәнде.
«Һомай» менән башҡорт һәм рус телдәрендә аралашырға мөмкин, һорауҙарға яуап бирә, тәржемә итеү функцияһы бар, халыҡ ижады өлгөләре менән таныштыра. Балалар баҡсаларына таратылған колонкалар башта һынау үтәсәк, уның һөҙөмтәләре буйынса ҡоролманы тағы ла камиллаштырыу ҡаралған.