Республикала эшҡыуарҙар һаны артҡан

Әле төбәктә 135 меңдән ашыу бәләкәй һәм урта бизнес вәкиле теркәлгән. Эшҡыуарҙарҙың күбеһе сауҙа һәм автотранспорт сараларын ремонтлау, төҙөлөш һәм эшкәртеү сәнәғәтендә шөғөлләнә. Быйыл 7 меңдән ашыу бизнес вәкиле яҡынса 6 миллиард һумға дәүләт ярҙамы алған. Бөгөн республикала эшҡыуарҙар һәм үҙмәшғүлдәрҙә һәр дүртенсе кеше эшләй.

Яңы йылға тиклем ике көн ҡалды!

Радий Хәбиров Мәсәғүттә балалар поликлиникаһы төҙөлөшө барышы менән танышты

Башҡортостанда бөгөн бер нисә һаулыҡ һаҡлау учреждениеһы асылды. Республика башлығы Радий Хәбиров Дыуан районы үҙәге Мәсәғүт ауылында балалар поликлиникаһында төҙөлөш эштәре барышы менән танышты. Шулай уҡ Баймаҡ ҡалаһында балалар поликлиникаһын, Мәсетле районының Оло Ыҡтамаҡ ауылында ашығыс ярҙам станцияһы менән дауахананы һәм Балаҡатай районының Урғалы ауылында табип амбулаторияһын асыуҙа видеобәйләнеш аша ҡатнашты. Төбәктең төньяҡ-көнсығыш райондарына эш сәфәре сиктәрендә Радий Хәбиров шулай уҡ бер нисә социаль һәм ауыл хужалығы объекттарында булды.

Радий Хәбиров Дыуан районынан МХО-ла һәләк булған яугирҙарҙың ғаиләләре менән осрашты

Мәсәғүт ауылында Башҡортостан башлығы Дыуан районынан махсус хәрби операцияла һәләк булған яугирҙарҙың ғаиләләре менән осрашты. Төбәк етәксеһе мәрхүмдәрҙең ата-әсәләренә, ҡатындарына һәм балаларына ҡайғы уртаҡлашыуын белдерҙе һәм Валерий Курбатовтың ағаһына Генерал Шайморатов орденын тапшырҙы.

Баймаҡта балалар поликлиникаһы асылды

Ҡала кескәйҙәре өсөн - Яңы йыл бүләге. Баймаҡта 2021 йылда нигеҙ һалынған балалар поликлиникаһы асылды. Объект 5,8 мең квадрат метр майҙандағы өс ҡатлы бина «Һаулыҡ һаҡлау» милли проекттар сиктәрендә сафҡа индерелде.

Белорет районы Тирлән ауылында социаль-мәҙәни үҙәк сафҡа индерелде

Яңы йылды заманса социаль-мәҙәни үҙәк менән. Белорет районы Тирлән ауылында мәҙәниәт йортон, музыка-сәнғәт мәктәбен, ололар һәм балалар китапханаһын, ижади түңәрәктәрҙе, спорт секцияларын үҙ эсенә алған заманса объект сафҡа индерелде. Тирлән ауылы халҡын, объектты асыу тантанаһында ҡатнашыусыларҙы онлайн рәүештә Башҡортостан Башлығы Радий Хәбиров тәбрикләне. Әйткәндәй, мәҙәниәт усағы тап Республика башлығы башланғысы менән төҙөлгән.

Республика йәмәғәтселеге Ришат Миндияровты һуңғы юлға оҙатты

Республика йәмәғәтселеге билдәле тележурналист, Башҡортостандың атҡаҙанған матбуғат һәм киң мәғлүмәт саралары хеҙмәткәре Ришат Миндияровты һуңғы юлға оҙатты. Хеҙмәттәшебеҙгә ни бары 57 йәш ине. Күренекле журналист менән хушлашырға Башҡортостан башлығы хакимәте етәксеһенең беренсе урынбаҫары Урал Килсенбаев, Матбуғат һәм киң мәғлүмәт саралары агентлығы етәксеһе Максим Ульчев, башҡа рәсми вәкилдәр килде.

Башҡортостанда “Атайсал” проектында ҡатнашҡандар 1,3 миллиард һум йәлеп иткән

Республика Башлығы Радий Хәбиров социаль селтәрҙә яҙыуынса, хәрәкәттә 5,3 мең кеше ҡатнаша, улар 22 меңдән ашыу проектты тормошҡа ашырған. “Атайсал” 2021 йылда старт алды. Быйыл Ҡалтасы, Стәрлетамаҡ, Краснокама райондары, Стәрлетамаҡ, Салауат, Ағиҙел ҡалаларынан меценаттар айырыуса әүҙем булған. Социаль объекттар ремонтлау һәм төҙөү, парктарҙы тәртипкә килтереү, фестивалдәр ойоштороу кеүек мөһим проекттар тормошҡа ашырылған. “Атайсал”да ҡатнашҡандарға ҙур рәхмәт. Ул беҙҙең берҙәмлек һәм көсөбөҙҙө сағылдыра”, - тип яҙа Радий Хәбиров.

Рәсәй Геройы Денис Чернавин Өфөнөң 128-се мәктәбендә уҡыусылар менән асыҡ дәрес үткәрҙе

Сарала авиация ветерандары ла ҡатнашты. Хәтерегеҙгә төшөрәбеҙ, Денис Чернавин илдең юғары наградаһы - «Алтын Йондоҙ» менән бүләкләнеүселәрҙең береһе.

Башҡортостан халҡы яңы йыл байрамдарында 10 көн ял итә

Ғаилә, хеҙмәт һәм халыҡты социаль яҡлау министрлығынан белдереүҙәренсә, быйыл эшләп йөрөгән халыҡ өсөн бөгөндән ҡышҡы каникул башлана һәм киләһе йылдың 8 ғинуарына тиклем дауам итә. Эш көнө, шишәмбе, 9 ғинуарҙа башлана. Раштыуаға тура килгән ялдар киләһе йылдың 10 майына һәм 31 декабренә күсерелә.

Һаулыҡ һаҡлау министры Айрат Рәхмәтуллин һәм уның водителе дауаханаға һалынған

Уларға Ҡыуатов исемендәге республика дауаханаһында ярҙам күрһәтелә. Һаулыҡ һаҡлау министрлығынан хәбәр итеүҙәренсә, хәлдәре тотороҡло. Ҡариҙел районында үлемесле авария булды. 4 машина бәрелеште. Ике кеше һәләк булды. Йәрәхәтләнеүселәр араһында Һаулыҡ һаҡлау министры Айрат Рәхмәтуллин бар.

Өфөлә яңы йыл байрамдарында поликлиникаларҙың эш тәртибе иғлан ителде

Медицина ойошмалары ял көндәрендә лә халыҡты ҡабул итә. Баш ҡала хакимиәтенән хәбәр итеүҙәренсә, бөгөндән 8 ғинуарға тиклем поликлиникалар иртәнге 8-ҙән көндөҙгө 5-кә тиклем асыҡ була. Табипты өйгә 16 сәғәткәсә саҡыртырға мөмкин. Травматология пункттары ғәҙәти тәртиптә эшләй. Яңы йыл каникулдары мәлендә медицина тикшеренеүе һәм диспансеризация ла үтергә була.

Өфө халҡы “Вәғәҙәләр йүгереше”ндә ҡатнаша

Спорт байрамы 1 ғинуарҙа уҙғарыла. Старт "Ҡунаҡһарай" сауҙа-күңел асыу комплексы янында 12-лә бирелә. Дистанция Яңы йыл иҫәбе буйынса, 2 мең 24 метрға иҫәпләнгән. Сараның маҡсаты – үҙеңә Яңы йылда ниндәйҙер эште атҡарып сығырға вәғәҙә биреү һәм йыл дауамында уға өлгәшеү. “Вәғәҙәләр йүгереше” Өфөлә туғыҙынсыға ойошторола.

Яңы йылға тиклем бер көн ҡалды!

Балаҡатай районы Урғалы ауылында заманса модулле табип амбулаторияһы асылды

Халыҡҡа Яңы йыл бүләге. Балаҡатай районы Урғалы ауылында заманса модулле табип амбулаторияһы асылды. Беренсел медицина звеноһын модернизациялау Сәләмәтлек милли проекты сиктәрендә Башҡортостан Башлығы Радий Хәбиров ҡушыуы буйынса тормошҡа ашырылды.

Яңы йылға тиклем һанаулы ғына сәғәттәр ҡалды

Ҡуян хеҙмәт сафын Аждаһаға тапшырырға әҙерләнә. Халыҡ байрам мәшәҡәттәре менән мәшғүл. Туғандарға, яҡындарға бүләк барлауҙан башҡа, байрам табынына нимә әҙерләү, өҫкә нимә кейеү тураһында хәстәрләйбеҙ. Йыл уңышлы килһен өсөн был йәһәттән ниндәй кәңәштәр бар? Ентекләберәк киләһе яҙмала.

Радий Хәбиров Белгород өлкәһендәге фажиғәгә бәйле ҡайғы уртаҡлашты

- Ҡала мәкерле рәүештә утҡа тотолдо. Тыныс халыҡ зыян күрҙе, балалар, өлкәндәр һәләк булды. Был енәйәтте террор ғәмәле тип иҫәпләйем. Башҡортостан һәм бөтә Рәсәй Белгород халҡы менән бергә, - ти Радий Хәбиров. Был шәмбе Белгород Украинаға яғынан утҡа тотолдо. 21 кеше һәләк булды, 110 кеше йәрәхәттәр алды. 30 күп фатирлы йортҡа, мәктәп, лицей, балалар баҡсаһына зыян килде.

Яңы йыл төнөндә Өфөлә йәмәғәт транспорты сәғәт икегә тиклем эшләй

Бөгөн киске сәғәт ундан ҡала һәм район байрам майҙансыҡтарына 15-20 минут һайын автобустар йөрөй. Бөгөндән 8 ғинуарға тиклем пассажирҙар транспортының эше ял көнө теҙмәһе буйынса ойошторола. Ҡала маршруттарында үҙгәрештәр көтөлмәй.

Башҡортостанда сәнәғәт үҫешкән

Быйыл 11 айҙа күрһәткестәр 6,8 процентҡа яҡшырған. Һөҙөмтәләр ил буйынса һандарҙан яҡшыраҡ. Статистика хеҙмәтенән хәбәр итеүҙәренсә, иң ҙур үҫеш эшкәртеү сәнәғәтендә һәм энергетикала теркәлгән. Республикала тармаҡта ыңғай күрһәткестәр апрель айынан күҙәтелә.

Владимир Путиндан Яңы йыл менән ҡотлау килде

Президент Владимир Путин Республика Башлығы Радий Хәбиров исеменә Яңы йыл менән ҡотлау ебәрҙе. - Был байрамды иң изге хистәр менән ҡаршы алабыҙ. Теләктәр ҡабул булһын, - тиелә Президент ҡотлауында. Хөкүмәт рәйесе Михаил Мишустиндан да ҡотлау бар. - Уҙып барған йыл илебеҙ өсөн мөһим ваҡиғаларға бай булды. Ул беҙҙе тағы берләштерҙе. Ҡаршылыҡтарҙы үтергә, ҡуйылған маҡсаттарға ирешергә өйрәтте. 2024 йыл уңышлы булһын, ныҡлы һаулыҡ теләйем, - тиелә ҡотлау хатында. Радий Хәбиров исеменә Президенттың Волга буйы округындағы тулы хоҡуҡлы вәкиле Игорь Комаровтан да ҡотлау килде.

Республика кардиоүҙәгенә яңы медицина ҡорамалдары тапшырылды

“Йөрәк-ҡан тамырҙары ауырыуҙары менән көрәш” төбәк программаһына ярашлы, УЗИ һәм ИВЛ аппараттары ҡайтарылды. Бының өсөн 17 миллион һум бүленде. Яңы ҡорамалдар медицина ярҙамы күрһәтеү сифатын яҡшыртырға мөмкинлек бирә, тип хәбәр итәләр Һаулыҡ һаҡлау министрлығынан.