Республикала фельдшер-акушер пункттары арта

Һаулыҡ һаҡлау министрлығынан хәбәр итеүҙәренсә, тиҙҙән Бәләбәй районы Рассвет ауылында, Борай районы Ҡушманаҡ ауылында медицина пункты асыла. Шулай уҡ Стәрлетамаҡ районы Золотоношка һәм Боғорослан ауылдары халҡы яңы бина сафҡа инеүен көтә. Был ауылдарҙа 1 мең 200-ҙән ашыу кеше йәшәй. Унда тәжрибәле фельдшер һәм акушерҙар эшләй. Яңы пункттар “Һаулыҡ һаҡлау” милли проектына ярашлы төҙөлә. Ведомствонан белдереүҙәренсә, учреждениелар халыҡты ҡабул итергә әҙер. Медицина һәм фармацевтика эше өсөн лицензия алыу менән уларҙы асырға була. ФАП-тарҙың майҙаны 63 квадрат метр. Унда диспансерлаштырыу һәм вакциналау үткәрелә, беренсе медицина ярҙамы күрһәтелә.

Мәскәүҙә «Рәсәй» Халыҡ-ара күргәҙмә-форумында Башҡортостан Республикаһы көнө үтте

3 декабрҙә Мәскәүҙә «Рәсәй» Халыҡ-ара күргәҙмә-форумында Башҡортостан Республикаһы көнө үтте. Сараға килеүселәр өсөн бай мәҙәни программа әҙерләгәйне. Халыҡ хужалығы ҡаҙаныштары күргәҙмәһендә республика бер нисә майҙансыҡта урынлашты. Унда башҡорт балы, үлән сәйҙәре, халыҡ кәсептәре өлгөләре менән бер рәттән «Башҡорт оҙон ғүмерлелеге», «Терра Ҡыш» кеүек проекттар менән яҡындан танышыу мөмкинлеге тыуҙы.

Радий Хәбиров «Башҡортостан» полкы яугирҙарына дәүләт наградаларын тапшырҙы

Башҡортостан Башлығы Радий Хәбиров неонацистарҙы юҡҡа сығарыуҙа яҡшы һөҙөмтәләргә ирешкән яугирҙарға дәүләт наградаларын тапшырҙы. Үҙ теләге буйынса «Башҡортостан» полкында хәрби бурысын үтәгән ир-егеттәр Республика менән идара итеү үҙәгендә тәбрикләнде. Оператив кәңәшмәлә хәрби журналистарҙың статусын раҫлау, госпиталдә дауаланған хәрбиҙәрҙең яҡындарына ярҙам һорауҙары ҡаралды. Көн тәртибенә Яңы йыл сараларына әҙерлек мәсьәләләре сығарылды.

Бөгөн тәүге тапҡыр Башҡортостандың атҡаҙанған халыҡ художество кәсептәре оҫтаһы исеме бирелде

Республика башлығы юғары дәүләт наградаһын тиҫтәгә яҡын кешегә тапшырҙы. Атҡаҙанған оҫта исеменә «Ағиҙел» башҡорт художество кәсептәре предприятиеһы һәм Ейәнсура районы оҫталары лайыҡ булды. Мәғлүм булыуынса, Радий Хәбиров был награда хаҡындағы указға август айында ҡул ҡуйғайны.

Башҡортостан Башлығы йәш ғалимдарҙы яңы вуз-ара кампуста эшләргә саҡырҙы

Радий Хәбиров «Рәсәй» халыҡ-ара күргәҙмә-форумы майҙансығында Өфөлә төҙөлгән Евразия ғилми-белем биреү үҙәге хаҡында һөйләне. Кампустың IQ-паркында 28 ғилми лаборатория урынлашасаҡ. Хәтерегеҙгә төшөрәбеҙ, Рәсәй Президенты Владимир Путин 2030 йылға 25 заманса кампустан торған селтәр булдырырға ҡушты, уларҙың 17-һендә төҙөлөш бара. Был Рәсәйҙең мәғариф һәм фән министрлығы тарафынан «Фән һәм университеттар» милли проекты ярҙамында ғәмәлгә ашырыла.

Сибайҙан мәктәп уҡыусыһының хыялы тормошҡа ашты

Ул Башҡортостан башлығы менән осрашыу хаҡында хыяллана. Үҫмерҙең теләге тураһында уның әсәһе социаль селтәрҙә яҙып сыға. Был мөрәжәғәт Радий Хәбировтың тура бәйләнеше ваҡытында яңғыраны.Уҡыусы махсус хәрби операцияла ҡатнашыусының улы. Уның шулай уҡ өлкән ағаһы ла Ватан һағында.
Республика етәксеһе бөгөн йәш армеецты һәм уның әсәһен үҙ бүлмәһендә ҡабул итте. Радий Хәбиров ҡунаҡтарға эш кабинетын күрһәтте, ҡыҫҡаса үҙенең эшмәкәрлеге хаҡында һөйләне, ғаиләнең тормошо тураһында һорашып, иҫтәлекле бүләктәр тапшырҙы.

Өфөнөң 214-се балалар баҡсаһы программа ярҙамында биләмәләге юлды төҙөкләндерергә хыяллана

«Урындағы башланғыстарҙы хуплау программаһы» финанстарҙы берләштереп төрлө мәсьәләләрҙе хәл итергә мөмкинлек бирә. Өфөнөң 214-се балалар баҡсаһы программа ярҙамында биләмәләге асфальт ҡатламын алмаштырырға хыяллана. Бының өсөн миллион 600 мең һум аҡса талап ителә. Финанслауға ата-әсәләр ҙә, бағыусылар ҙа ҡушылырға әҙер.

Өфөнөң 27-се дөйөм белем мәктәбенә нигеҙ һалыныуға 85 йыл

Өфөнөң химия, физика, биология, математика фәндәрен тәрән өйрәтеүсе 27-се дөйөм белем мәктәбенә нигеҙ һалыныуға 85 йыл. Баш ҡаланың Совет районында урынлашҡан мәктәпте төрлө йылдарҙа тамамлаусылар яратҡан уҡытыусылары менән бергә балалар филармонияһында күркәм сараға йыйылды.

БСТ-ла АПТЫРАҒАН! 😶

Республика башҡорт мәҙәниәт һәм сәнғәт колледжы 90 йыллығын билдәләне

Стәрлетамаҡ ҡалаһындағы уҡыу йорто төрлө йылдарҙа мәктәп, унан һуң техникум, мәҙәниәт-ағартыу училищеһы булараҡ халыҡҡа хеҙмәт иткән. Мәғариф учреждениеһын тамамлаған белгестәр бөгөн ил кимәлендә тармаҡ үҫешенә ҙур өлөш индерә.

Баймаҡ районы ағинәйҙәре балаҫ һуғыусылар конкурсы ойошторҙо

Балаҫтарҙа - быуаттар тарихы. Баймаҡ районы ағинәйҙәре ошондай исем аҫтында балаҫ һуғыусылар конкурсы ойошторҙо. Бәйге һәр кемде тарих төпкөлөнә, ата-бабаларыбыҙ йәшәгән осорҙарға алып ҡайтты.

Башҡортостанда реабилитация үтеүгә сертификаттар бүленә башлаясаҡ

1 ғинурҙан инвалидтарға һәм махсус хәрби операцияла зыян күргән яугирҙар өсөн реабилитация үтеүгә сертификаттар бүленә башлаясаҡ. Был турала Башҡортостан башлығы Радий Хәбиров мөмкинлектәре сикләнгән граждандар менән осрашыуҙа хәбәр итте. 52 мең 500 һум тәшкил иткән сертификат ярҙамында граждандар йылына бер тапҡыр реабилитация үтеп һаулығын нығытасаҡ. Комплекслы ярҙам программаһы менән республикала йыл һайын 1715 инвалид файҙалана ала.

Дәүләт Йыйылышы - Ҡоролтай Президиумының ултырышында киләһе йылдарға бюджет ҡаралды

Башҡортостандың киләһе йылдарға бюджеты, бала хоҡуҡтары буйынса вәкилдең өҫтәмә вәкәләттәре, бал ҡорттарын пестицидтарҙан һаҡлау. Дәүләт Йыйылышы - Ҡоролтай Президиумының бөгөнгө ултырышында ошондай көнүҙәк темаларға ҡараған закон проекттары ҡаралды.
Президиум ултырышында Парламенттың киләһе пленар ултырышына сығарылған закон проекттары тикшерелде. Ҡануни документтар араһынан тәү сиратта бюджет тураһындағы проектты атарға мөмкин.

Рәсәй ауыл хужалығы министрлығы Башҡортостан предприятиеларына льготалы кредиттар бирәсәк

Башҡортостандың ауыл хужалығы һәм аҙыҡ-түлек сәнәғәте предприятиеларына Рәсәй ауыл хужалығы министрлығы ҡыҫҡа мөҙҙәтле ташламалы кредитҡа 700 ғаризаны хуплаған. Уның дөйөм хаҡы 24 миллиард һумдан ашыу. Финанс ярҙам етештереү күләмен арттырыу, ҡеүәттәрҙе заман талаптарына яраҡлаштырыу өсөн файҙаланылған. Ташламалы кредит менән файҙаланыусы предприятиеларҙың береһе Өфө ҡала һөт заводы.

Башҡортостандан Ҡырым республикаһына 100-гә яҡын егет хәрби хеҙмәткә юлланды

Уларҙы Өфөнөң тимер юл вокзалынан оҙатырға ата-әсәләре, туғандары һәм дуҫтары килде. Яҡташтарыбыҙ хәрби бурысын Һауа-десант, ҡоро ер, һәм диңгеҙ-һауа флоты ғәскәрҙәрендә үтәйәсәк. Хәрби хеҙмәткә саҡырыу саралары махсус операция менән бер нисек тә бәйләнмәгән. Элекке кеүек үк, ул Рәсәй ҡануниәте менән билдәләнгән ваҡытта һәм планлы тәртиптә башҡарыла. Хәрби саҡырылыш буйынса алынғандар, һөнәре ниндәй булыуға ҡарамаҫтан, Рәсәй биләмәһендәге подразделениеларҙа хеҙмәт итәсәк, ә хеҙмәт ваҡыты тулғандар йәшәгән урындарына ҡайтарыла.

Башҡортостанда мәктәп уҡыусыларына Ҡаһарманлыҡ дәрестәре уҙғарылды

1941 йылдың 5 декабрендә Мәскәү эргәһендәге алышта Ҡыҙыл Армия фашистик көстәргә ҡаршы контрһөжүм башлай. Календарҙа Рәсәйҙең Хәрби дан көнө булараҡ билдәләнгән датаға арнап Рәсәй эҙәрмәндәр хәрәкәтенең Башҡортостан бүлексәһе мәктәп уҡыусыларына Ҡаһарманлыҡ дәрестәре уҙғарҙы.

Бүләккә - фотосессия!

Республика халыҡ ижады үҙәгенең Telegram-каналына https://t.iss.one/rcnt_rb яҙыл, бүләк уйнатыуҙа ҡатнаш һәм «Skandi 34» фотостудияһында яңы йыл фотосессияһына сертификат от. Фотограф – Регина Мөхитова.

Һөҙөмтәләр 15 декабрҙә буласаҡ! Ашығығыҙ!

Өфөнән хирург СВО-ла һәләк булған

Өфө хирургы Михаил Каменев яралы һалдаттарҙы ҡотҡарған мәлдә һәләк булған. Мәрхүмде һуңғы юлға оҙатыу ул эшләгән урында, Ғ. Ҡыуатов исемендәге Республика клиник дауаханаһында үтәсәк.

Михаил Каменев йыл башында Красный Луч ҡалаһында эшләп ҡайта. Күптән түгел алғы һыҙыҡҡа медицина взводы командиры булып барырға ҡарар итә. 2 ноябрҙә яҡындарына бер аҙнаға бәйләнештән юғалыуы хаҡында хәбәр итә. «Уның алғы һыҙыҡҡа барғанын аңлағас, ни өсөн, был бит һинең яуаплылыҡта түгел, тип һораным. Бында һүҙ яуаплылыҡ хаҡында бармай, яралылар күп, уларҙы тылға сығарырға кәрәк», - тип яуапланы», - тип хәтерләй ҡатыны Анна.

Украина квадрокоптеры яралыларҙы эҙәрлекләгән мәлдә хирург яугирҙарҙы бер генә минутҡа ла ҡалдырмай. Яҡташтарыбыҙ урман эсенә инеп йәшенә. Тик пилотһыҙ осҡос һалдаттарҙы таба һәм шартлатҡыс ташлай. Ҡыҙғанысҡа ҡаршы, хирургтың ғүмере өҙөлә.

Михаилу Каменевҡа ни бары 48 йәш була. Уның ҡатыны һәм ике балаһы ҡалған.

Өфөлә ҡыҫҡа ваҡытлы ялға ҡайтҡан яугирҙарҙы оҙатыу тантанаһы үтте

Йәнә алғы һыҙыҡҡа. «Өфө-Арена» комплексы алдында ҡыҫҡа ваҡытлы ялға ҡайтҡан яугирҙарҙы оҙатыу тантанаһы үтте. Майҙанда Рәсәй һәм Башҡортостан гимндары яңғыраны, тигеҙ сафҡа баҫҡан яҡташтарыбыҙ алдында Башҡортостан Хөкүмәте премьер-министры урынбаҫары Ирек Сәғитов сығыш яһаны. Ир-егеттәрҙең күбеһе махсус хәрби операция башланыу менән Ватан һағына баҫҡан, мобилизацияға эләгеүселәр ҙә бар.

Башҡортостанда контракт буйынса хәрби хеҙмәткә туплау дауам итә

Хәрби хеҙмәткә һайлап алыу пункттарына 65 йәшкә тиклем ир-егеттәр мөрәжәғәт итә ала. Әлеге ваҡытта пилотһыҙ осоу аппараттары менән идара итеү ротаһында хеҙмәт итеү өсөн ир-егеттәр котракт төҙөй ала. Район һәм ҡала муниципалитеттарынан, предприятеларҙан контрактҡа ҡул ҡуйыусыларға өҫтәмә матди түләүҙәр ҡаралған. Контракт буйынса хәрби хеҙмәткә саҡырыу пунктына көнөнә йөҙләп ир-егет мөрәжәғәт итә.

Федоровка районы Бала Сытырман ауылы халҡы яугирҙарға кәрәк-яраҡтар әҙерләгән

Федоровка районы Бала Сытырман мәктәбе коллективы ауыл халҡы менән берлектә махсус хәрби операция зонаһы яугирҙары өсөн блиндаж шәмдәре һәм маскировка селтәрҙәре әҙерләгән.
Изге эштә өлкәндәр ҙә, балалар ҙа ҙур теләк менән ҡатнашҡан. Мәктәп педагогтары һәм техник хеҙмәткәрҙәре үҙ иҫәбенә яҡташтарыбыҙ өсөн мотобур һатып алған. Башланғыс класс уҡыусылары һалдаттарға тиҙерәк Еңеү менән менән ҡайтыуҙарын теләп хаттар яҙған. Шәмдәр, селтәрҙәр , мотобур һәм фронтҡа хаттар гуманитар ярҙам йыйыу пунктына, артабан хәрби операция зонаһына оҙатылған. Ауылдаштар яугир яҡтарштарға ярҙам күрһәтеүҙе артабан да дауам итмәксе.