Баш ҡалала халыҡ-ара эшҡыуарлыҡ аҙналығы асылды

Бөгөн Өфөлә «Иртәгәнән һуң. Эшҡыуарлыҡ күҙлегенән» тип аталған халыҡ-ара эшҡыуарлыҡ аҙналығы асылды. Ун алтынсы халыҡ-ара бизнес аҙналығы быйыл 4 меңдән ашыу кешене берләштерә. Сарала Рәсәй төбәктәренән һәм 21 илдән, шул иҫәптән Ҡытай, Ҡаҙағстан, Үзбәкстан, Белоруссия, Төркиә, Иран һәм башҡа илдәрҙән делегациялар ҡатнаша.

Башҡортостанда тағы 19 меңдән ашыу кеше таҙа эсәр һыу менән тәьмин ителде

“Торлаҡ һәм ҡала мөхите” милли проектына ярашлы, Әлшәй районы үҙәге – Раевка ауылында һыу таҙартыу ҡоролмалары төҙөү тамамланды. Торлаҡ-коммуналь хужалыҡ министрлығынан хәбәр итеүҙәренсә, киләһе йылда Бөрө, Туймазы, Шишмә, Ҡыйғы, Кушнаренко райондары һәм Өфө ҡалаһында һыу системаларын яңыртыла. Һуңғы биш йылда 23 объекта төҙөкләндереү үткәрелгән. Милли проектҡа ярашлы, 2024 йылда республика халҡының 91 проценты таҙа эсәр һыу менән тәьмин ителергә тейеш.

Башҡортостан яугирҙары пехотаға ҡеүәтле ярҙам күрһәтә

Һөжүм иткәндә лә, һаҡлағанда ла бер тигеҙ дәһшәтле, улар махсус хәрби операция биләмәһендә төп ролдәрҙең береһен уйнай. Краснолиманск йүнәлешендә Мөғин Нагаев исемендәге артиллерия дивизионы менән «Башҡортостан» мотоуҡсылар полкының реактив артиллерия батареяһы пехотаға ҡеүәтле һәм һөҙөмтәле ярҙам күрһәтә. Нацистарға ҡаршы көрәштә объектив контролде пилотһыҙ осоу аппараттары тәьмин итә.

Бәләбәйҙә «Про-форум» Халыҡ-ара конкурсының һайлап алыу этабы үтте

Бәләбәй медицина колледжында йәмғиәт мәсьәләләрен хәл итерҙәй социаль проекттар ҡаралды. Ҡалала бөгөн сәләмәт йәшәү рәүешенә йүнәлтелгән «ПРО-форум» Халыҡ-ара конкурстың һайлап алыу этабы үтте. Дүртенсе йыл рәттән ойошторолған сарала тиҫтәнән ашыу команда сығыш яһаны. Улар йәмғиәт хәүефһеҙлеге һәм сәләмәтлегенә бәйле төрлө тәҡдимдәр менән сығыш яһаны. Уларҙың иң яҡшыһы тип табылғандары республика, ил кимәлендә һынау тотасаҡ.

Зәйнәб Биишева исемендәге Башҡортостан «Китап» нәшриәте яңы китаптар тәҡдим итә

Был юлы онлайн форматта. Нәшриәтселәр 3 башҡорт халыҡ әкиәте - «Моң сере», «Әбйәлил» һәм «Йомғаҡ»ты аудиокитап рәүешендә яҙҙырған. Халыҡ ижадын ике телдә тыңларға була. Башҡортса әҫәрҙәрҙе Башҡортостандың халыҡ артисы Рәсүл Ҡарабулатов, Рәсәйҙең атҡаҙанған мәҙәниәт хеҙмәткәре Флүрә Мурзина һәм Башҡортостандың халыҡ артисы Зәйнетдин уҡыған. Руссаға тәржемә ителгән әкиәттәрҙе билдәле рус йырсылары тауышландырыуында тыңларға мөмкин.

Башҡортостандан беренсегә Литваға бал оҙатылды

Ауыл хужалығын күҙәтеү төбәк идаралығы 20,5 тонна татлы ризыҡты тикшереп экспортҡа рөхсәт бирҙе. Балдың сифаты шулай уҡ Германияла ыңғай баһаланды. Быға тиклем Польшаға бал оҙатылды. Ауыл хужалығы министрлығынан белдереүҙәренсә, быйыл экспорт икеләтә артыуы күҙәтелә. 10 айҙа 450 мең тонна тауар ситкә ебәрелгән.

Башҡортостанда күп фатирлы йорттарҙа подъездарҙы ремонтлау тамамлана

Республика Башлығы Радий Хәбиров социаль селтәрҙә яҙыуынса, быйыл 276 йорттағы 758 подъезд тәртипкә килтерелә. Бының өсөн республика бюджетынан 646 миллион һум тотонолған, тағы 72 миллион һум район һәм ҡалалар ҡаҙнаһынан өҫтәлгән. “Фатир хужалары ремонт барышын етди күҙәтә һәм етешһеҙлектәр бөтөрөлмәйенсә актҡа ҡул ҡуйылмай, подрядсыға аҡса күсерелмәй”, - тип яҙа Радий Хәбиров. Күп фатирлы йорттарҙа подъездарҙы комплекслы ремонтлау 2019 йылдан башланды. Программа барышында 2 мең 247 йорттағы 7 мең 413 подъезд төҙөкләндерелде.

Халыҡ-ара бизнес аҙналығында инновацион проекттар тәҡдим ителә

Өфөлә мәртәбәле форум башланды. Быйыл сарала 15 илдән вәкилдәр ҡатнашыуы көтөлә. Форумда эшҡыуарҙар алдынғы проекттар менән таныша ала, тәжрибә уртаҡлаша. Рәсәй инновацион төбәктәр ассоциацияһы етәксеһе урынбаҫары Дмитрий Митрошин әйтеүенсә, хәҙерге шарттарҙа төрлө илдәрҙән партнерҙар табып эшмәкәрлек алып барыу мөһим.

Өфөлә халыҡ-ара эшҡыуарлыҡ аҙналығының беренсе көнө үтте

Бөгөн Өфөлә «Иртәгәнән һуң. Эшҡыуарлыҡ күҙлегенән» тип исемләнгән халыҡ-ара эшҡыуарлыҡ аҙналығы асылды. 1 декабргә тиклем дауам итәсәк ун алтынсы халыҡ-ара бизнес аҙналығы быйыл 4 меңдән ашыу кешене берләштерә. Сарала Рәсәй төбәктәренән һәм 21 илдән, шул иҫәптән Ҡытай, Ҡаҙағстан, Үзбәкстан, Белоруссия, Төркиә, Иран һәм башҡа илдәрҙән делегациялар ҡатнаша.

Радий Хәбиров «Ватанды һаҡлаусылар Кубогы»ның абруйлы ҡунаҡтары менән осрашты

Башҡортостан Рәсәйҙең паралимпия хәрәкәте лидерҙарының береһе. Был хаҡта Паралимпия комитеты президенты Павел Рожков Башҡортостан башлығы менән осрашыуҙа белдерҙе. Фекер алышыуҙа спорт ойошмаһының элекке етәксеһе Владимир Лукин да ҡатнашты. Яҡтар республикала адаптив физик культураның үҫешен тикшерҙе. Радий Хәбиров хәрби хеҙмәткәрҙәр махсус операциянан һуң реабилитация үтергә мәжбүр булған хәҙерге шарттарҙа был эштең айырыуса мөһимлеген билдәләне.

Өфөлә «Ватан һаҡсылары кубогы» тамамланды

Ике көн дауамында барған форум спорт турниры менән бергә, эшлекле осрашыуҙарҙы ла үҙ эсенә алды. Бөгөн дәүләт һәм йәмәғәт ағзаларының иғтибар үҙәгендә махсус хәрби операция ҡатнашыусыларының ғаиләләре, улдарын юғалтҡан әсәләр сығыш яһаны.

Рәсәй Оборона министрлығы яҡташтарыбыҙҙың хеҙмәте видеояҙмаһы менән уртаҡлашты

Рәсәй Оборона министрлығы герой-фронтовик Мөғин Нагаев исемендәге артиллерия дивизионы хеҙмәте видеоһын социаль селтәргә һалған. Яугирҙар Украина хәрби көстәренең артиллерия батареяларын юҡ итеү буйынса утты туҡтатмай. Разведчиктар ебәргән бөтә маҡсаттар ҙа - идара итеү пункттары, хәрби припас, ҡорал һәм техника келәттәре шартлатыла. Разведка төркөмө дошман биләмәһен пилотһыҙ осоу аппараттары ярҙамында тикшерә. Мөғин Нагаев исемендәге дивизион артиллеристары дошман позицияларын 122 миллиметрлыҡ снарядтар менән юҡ итә. Үҙәк хәрби округы разведчиктары һәм артиллеристары хеҙмәте ярҙамында дошман хәрби припастар һәм шәхси составты арттыра алмай.

Психологтар көнө айҡанлы баш ҡалала ғилми-ғәмәли конференция үтте

Бөгөн - психологтар көнө. Һөнәри байрам айҡанлы Өфөлә ғилми-ғәмәли конференция үтте. Сара мәғариф системаһында заманса психологик хеҙмәттең проблемаларына һәм үҫеш мөмкинлектәренә арналды. Конференцияла Башҡортостанда берҙәм психологик хеҙмәт булдырыу мөкинлектәре ҡаралды.

Өфө ҡалаһы мәктәбе «Иң яҡшы мәктәп ашханаһы» Рәсәй конкурсында еңеү яуланы

Өфөнөң Нуғай ауылындағы 147-се мәктәп «Иң яҡшы мәктәп ашханаһы» Рәсәй конкурсында еңеүсе тип табылды. Миллиондан ашыу кеше йәшәгән ҙур ҡалалар араһында ойошторолған ярышта Башҡортостан данын Нуғай, Нефтекама ҡалаһы һәм Ҡыҙыл Шишмә ауылы мәктәптәре яҡланы.

Республика мәктәптәрендә ашатыуҙы ойоштороу системаһы илдә иң яҡшыһы тип танылды

Стратегик башланғыстар агентлығы платформаһында 600-ҙән ашыу тәҡдим араһынан беҙҙең республика тәжрибәһенә өҫтөнлөк бирелгән. Был турала Премьер-министр Андрей Назаров белдерҙе. - Мәктәптә ашатыу сифатын анализлағанда халыҡ фекерен дә иҫәпкә алырға кәрәк, - тине ул. Быйыл республика мәктәптәре ашханаларында 570 мониторинг уҙғарылған. 28 тикшереү халыҡ мөрәжәғәтенән һуң ойошторолған.

Башҡортостанда ҡош-ҡорт кәмегән

Статистика хеҙмәтенән хәбәр итеүҙәренсә, әле республика хужалыҡтарында 4 миллион 900 мең ҡош бар. Бер йыл элек был һан ике тапҡырға ҙурыраҡ булған. Башҡа мал-тыуарҙың һаны үҙгәрмәгән. Предприятиеларҙа 253 мең һыйыр малы, 541 мең сусҡа, 22 мең 800 йылҡы, 18 мең 600 һарыҡ һәм кәзә аҫрала. Ҡош-ҡорт кәмеүен Өфө районында киҙеү асыҡланыуы менән аңлаталар. Ҙур хужалыҡта бөтә ҡош-ҡорт юҡ ителде.

Теләге булғандар махсус хәрби операцияла ҡатнашыу өсөн контракт төҙөй ала

Республика хәрби комиссариатында буласаҡ яугирҙарға хәрби хеҙмәткә инеү тәртибен, льготалар һәм түләүҙәр тураһында консультация бирә, ниндәй документтар кәрәклеген аңлата. Контракт төҙөүгә запастағы граждандар, яңы хәрби хеҙмәтен тултырыусылар, шулай уҡ хәрби хеҙмәттә булмаған, әммә юғары йәки урта һөнәри белем алған ир-егеттәр хоҡуҡлы. Ошо һәм башҡа һорауҙарға яуапты район-ҡалаларҙа асылған хәрби хеҙмәткә саҡырыу буйынса мобиль мәғлүмәт пункттарында ла алырға мөмкин. Контракт буйынса хәрби хеҙмәткә 65 йәшкә тиклемге ир-егеттәр ҡабул ителә.

Дәүләт Йыйылышы - Ҡоролтайҙа махсус хәрби операцияға арналған күргәҙмә асылды

Экспозицияла тиҫтәләгән экспонат һәм һынлы сәнғәт өлгөләре урын алған. «Рәсәй эҙәрмәндәр хәрәкәте»нең Башҡортостан бүлексәһе менән Хәрби дан музейы яугирҙарҙың форма һәм амуницияһын, Рәсәй Ҡораллы көстәренең хәрби ҡорал фрагменттарын алып килгән. Шулай уҡ «Беҙҙекеләр өсөн тегәбеҙ һәм бәйләбеҙ» хәрәкәте үҙҙәре етештергән продукция өлгөләрен тәҡдим итте.

Ҡырғыҙстан менән Башҡортостан уҡыу йорттары араһында хеҙмәттәшлек юлдары нығый

Ҡырғыҙстан Республикаһының юғары уҡыу йорттары ректорҙары, Ҡырғыҙстан мәғариф академияһы һәм төбәк мәғариф департаменттары етәкселәре, мәктәп директорҙарынан торған делегация Мифтахетдин Аҡмулла исемендәге Башҡорт дәүләт педагогия университетына тәжрибә уртаҡлашырға килде.

Урал аръяғында Башҡорт аты паркы булдырыла

Ул “Ирәндек” музей-ҡурсаулығы нигеҙендә асыла. Туристар тәбиғәттә утлап йөрөгән йылҡы малын күрә ала. “Мәжитов уҡыуҙары” халыҡ-ара конференцияһы барышында ошо турала белдерелде. “Башҡорт аты беҙҙең халыҡ өсөн йәшәү мәғәнәһе. Һуңғы өс йылда аттарҙың артыуы күҙәтелә. Ауыл һәм райондарҙа йылҡысылыҡ менән шөғөлләнеүселәр күбәйә”, - тип белдерҙе республика хөкүмәте вице-премьеры - Ауыл хужалығы министры Илшат Фәзрахманов. 28 ноябрҙә Мәскәүҙә Башҡортостан ауыл хужалығы аҙналығы башлана. Ул “Рәсәй” күргәҙмә-форумы барышында ойошторола. Аҙналыҡтың тәүге өс көнө Башҡорт балы һәм Башҡорт атына арнала.

Луганск һәм Донецк менән хеҙмәттәшлек киңәйә

Башҡортостан Дәүләт Йыйылышы – Ҡоролтай ике республиканың Халыҡ Советтары менән килешеү төҙөй. Документ тейешле тикшереү үткән. Уға йыл аҙағына тиклем ҡул ҡуйыу ҡарала. “Республика парламенттары закондарҙы камиллашытырыу йүнәлешендә бәйләнештәрҙе нығыта. Шулай уҡ тәжрибә уртаҡлашыу, делегациялар менән алмашыу, стажировка үтеү, берлектә саралар ойоштороу ҡарала”, - тип белдерҙе Дәүләт Йыйылышы – Ҡоролтай рәйесе Константин Толкачев. Башҡортостан тәжрибәһе илдең яңы төбәктәренә парламент эшен уңышлы ойошторорға ярҙам итәсәк.