Дәүләкән ҡалаһынан Гөлназ Ҡорманаева «Герой-Әсә» ордены менән бүләкләнде

Дәүләт наградаһын тапшырыу тураһындағы указға ил Президенты Владимир Путин ҡул ҡуйҙы. 11 балаға ғүмер биргән Гөлназ Фәнил ҡыҙына республиканың «Әсәлек даны» миҙалы 2022 -се йылда тапшырылған. Бала тәрбиәләүҙәге уңыштары һәм ҡаҙаныштары өсөн ғаилә «Ата-әсә ҡаһарманлығы» миҙалына ла эйә.

Иглин ауылы «Звездный» биҫтәһендә 4 ҡатлы, заманса мәктәп төҙөлөшө дауам итә

Көтөп алынған объект. Иглин ауылы «Звездный» биҫтәһендә 4 ҡатлы, заманса мәктәп төҙөлөшө дауам итә. 1225 балаға иҫәпләнгән белем усағы «Мәғариф» милли проекты сиктәрендә сафҡа индерелә һәм уның төҙөлөшөнә бюджеттан 1 млрд самаһы аҡса йүнәлтелгән. Ҙур мәктәп ишектәре киләһе йылға декабрҙә асыласаҡ тип көтөлә.

«Башҡортостан» Телерадиокомпанияһы уҡытыу үҙәгендә сираттағы курс старт ала

20 ноябрҙә «Башҡортостан» Телерадиокомпанияһы Акционерҙар йәмғиәтенең уҡытыу үҙәгендә сираттағы курс старт ала. Был юлы Телерадиосәнғәт мәктәп-студияһында режиссерҙар төркөмө белемен камиллаштырасаҡ.

Республикала эшһеҙлек 23 процентҡа кәмегән

Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, әле 12 меңдән ашыу кеше эшһеҙ булып иҫәпләнә. Йыл башында уларҙың һаны 16 меңгә еткән. 10 айҙа эшһеҙҙәр 3 мең 700-гә аҙайған. Бөгөн Башҡортостанда 1 кешегә 4 вакансия тура килә.

Республика баш ҡалаһында алмағастар сәскә атҡан

Ҡала халҡы Аксаков аллеяһындағы аномаль күренеш тураһында социаль селтәрҙә яҙған. Улар шулай уҡ ҡыуаҡтарҙың бөрөләнә башлауы тураһында хәбәр иткән. Белгестәр әйтеүенсә, емеш ағастарының әле сәскә атыуы яҡшы түгел. Яҙ улар бөтөнләй сәскә атмаҫҡа мөмкин. Европа берлеге ғалимдары белдереүенсә, 2023 йыл 125 мең йылдағы иң эҫеһе булыуы ихтимал. Синоптиктар яҡын арала республикала ноябрҙә була торған һауа торошо көтөлә, тип хәбәр итә. Көндәр һыуыта, ҡар һәм ямғыр яуа.

Башҡортостан спорт объекттарын төҙөү өсөн 24 миллион һум субсидия ала

Ил Хөкүмәте рәйесе Михаил Мишустин төбәктәргә өҫтәмә сығымдар бүлеү тураһында ҡарарға ҡул ҡуйҙы. Әле республикала Көрәш һарайы, фехтование үҙәге, ишеү слаломы өсөн ҡоролмалар комплексы һалына. Киләһе йылда Өфөлә “Рәсәй – спорт державаһы” тигән халыҡ-ара форум ойошторола. Президент Владимир Путин донъя спортсыларын сарала ҡатнашырға саҡырҙы.

Учалы, Күгәрсен һәм Бөрйән райондарында 3 газ үткәргес төҙөлөшө тамамлана

Республика етәксеһе Радий Хәбиров ошо турала социаль селтәрҙәге сәхифәһендә яҙған. Трассаның оҙонлоғо 100 километр самаһы. 2 меңдән ашыу йорт һәм 30-ға яҡын социаль объект зәңгәр яғыулыҡҡа тоташа. Эштәр Башҡортостанды газ менән тәьмин итеүҙе үҫтереү программаһы буйынса башҡарыла. “26 мең ғаилә, социаль учреждениелар, сәнәғәт предприятиелары һәм туризм объекттары газ менән файҙалана ала. "Бөрйән турист кластеры һәм уның төп өлөшө - "Шүлгәнташ" музей комплексы ла ошо яғыулыҡҡа күсә”, тип яҙған Башҡортостан Башлығы.

Бөгөн - шәкәр диабеты менән көрәш көнө

Был дата 1991 йылда булдырылды. Йыл һайын сиргә юл ҡуймауға йүнәлтелгән саралар уҙғарыла. Статистика буйынса диабет менән ауырыусылар һаны йыл һайын арта бара.

Башҡортостанда халыҡ мәшғүллеге үҙәктәре төҙөкләндерелә

Киләһе йылдан федераль проект тормошҡа ашырыла башлай. 68 кадрҙар үҙәген яңыртыу өсөн 760 миллион һум тотонола. Ғаилә, хеҙмәт һәм халыҡты социаль яҡлау министры Ленара Иванова әйтеүенсә, республикала тиҙ төҙөлгән модулле мәшғүллек үҙәктәре барлыҡҡа килә. Бындай проект илдә тәүгеләрҙән булып Башҡортостанда һынала.

Башҡортостанда берҙәм транспорт картаһы менән ҡулланыусылар арта

Йыл башынан 210 меңдән ашыу кеше “Алға” картаһын алған. Был күрһәткес былтырғынан 28 процентҡа күберәк, тип хәбәр итәләр Транспорт һәм юл хужалығы министрлығынан. “Алға” картаһы менән ҡулланыусылар өсөн төрлө льготалар ҡаралған. Өфөлә, мәҫәлән, бер сәғәт дауамында бер билет менән дәүләт автобустарында күсеп ултырып йөрөргә була. Яңы йылға тиклем мобиль телефон аша банк картаһы менән түләгәндәр ташлама менән файҙалана ала. Электричкалар өсөн дә льготалы тариф бар.

Башҡортостанда йыл башынан янғында 214 кешенең ғүмере өҙөлгән

Ял көндәрендә 7 кеше ут ҡорбаны булған. Бөгөн иртән Ауырғазы районы Кешәнне ауылында ағас йорт янған. Утта оло йәштәге ир үлгән. Ғәҙәттән тыш хәлдәр буйынса дәүләт комитетынан белдереүҙәренсә, быйыл 10 айҙа 9 меңдән ашыу янғын теркәлгән. “Һалҡын миҙгелдә хәүефһеҙлек ҡағиҙәләренә айырыуса иғтибарлы булырға кәрәк”, ти комитет вәкиле Шамил Харисов.

Коммуналь хеҙмәт өсөн түләү киләһе йылда артасаҡ

Торлаҡ-коммуналь хеҙмәттәр өсөн түләү үҙгәреү индексы билдәләнде. Премьер-министр Михаил Мишустин тейешле документҡа ҡул ҡуйҙы. Башҡоростанда уның кимәле 10,9 процент була. Коммуналь түләүҙәрҙең июлдән үҙгәреүе көтөлә. Быйыл хаҡ арттырылманы. Уҙған йылдың июлендә һәм декабрендә түләү ҡиммәтләнгәйне.

Башҡортостанда 2024 йылға йәшәү минимумы раҫланды

1 ғинуарҙа ул 13 мең 753 һум кимәлендә билдәләнде. Хеҙмәт йәшендәге халыҡ ҡатламы өсөн ул 14 мең 991, хаҡлы ялдағыларға 12 мең 530, балаларға 13 мең 340 һум булараҡ ҡабул ителде.
Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, йәшәү минимумы аҙ тәьмин ителгән ҡатламдың йәшәү кимәлен билдәләү өсөн ҡулланыла. Был күрһәткестән сығып дәүләт социаль ярҙамы тәғәйенләнә.

Балтас районында ер убылған

Балтас районында Көнтүгеш ауылы тирәһендә, урманда ер ишелеү һөҙөмтәһендә ҙур соҡор барлыҡҡа килгән. Упҡындың диаметры яҡынса утыҙ метр. Тәрәнлеге 20-30 метрға етә. Ошо урындан бер нисә метр алыҫлыҡта элегерәк ер ишелгән урын да бар. Соҡор ҡоро. Уның киҫелешендә ике-өс метр ҡыҙыл балсыҡ ҡатламын аҡ балсыҡ алмаштыра. Ун биш метр түбәнерәк-дымлы ҡатлам башлана. Яңы упҡын иҫке йырын менән тоташыуы ихтимал, тип фаразлай урындағы халыҡ.

Баймаҡта Мәктәпкәсә белем биреү учреждениелары хеҙмәткәрҙәре семинары үтте

Йәш быуынды тәрбиәләүҙә «Урал батыр» эпосының әһәмиәте. Баймаҡ ҡалаһының «Айыуҡай» Башҡорт балалар баҡсаһында район һәм ҡала тәрбиәселәре өсөн семинар ойошторолдо. Мәктәпкәсә белем биреү учреждениелары хеҙмәткәрҙәре балаларға рухи-әхлаҡи тәрбиә биреүҙә «Урал батыр» эпосы тәғлимәттәре ҡулланыуҙа тәжрибә уртаҡлашты.

Өфө машинистары хәйриә акцияһын ойошторған

Хеҙмәт хаҡын етем балаларға. Өфө машинистары хәйриә акцияһын ойошторған. Куйбышев тимер юл хеҙмәткәрҙәре Өфө-Силәбе рейсы өсөн тәғәйенләнгән хеҙмәт хаҡы өлөшөн етем балаларға ебәрергә ниәтләгән. Рейс ошо көндәрҙә булған. Йәмғеһе 25 мең һумлыҡ хеҙмәт хаҡын ирекмәндәр Бөрө балалар йортона оҙатмаҡсы.

Башҡортостан йәштәре 11 миллион һум федераль грантҡа эйә булды

Йәштәр эштәре буйынса федераль агентлыҡ конкурс һөҙөмтәләре менән таныштырҙы. Унда айырым кешеләр ҡатнашты. Беҙҙең республиканан 21 автор грант алған. Иң ҙур суммаға, 822 мең һумға, Валерий Пивоваров лайыҡ булған. Ул “Һөнәрҙәр ҡалаһы” тигән проект әҙерләгән. Балаларға йылға буйлап поход ойоштороу, студент отрядтары эшмәкәрлеген алып барыу, йәш журналистар мәктәбен ойоштороу, эшҡыуарлыҡты үҫтереү кеүек проекттар федераль грантҡа тормошҡа ашырыла.

Республика парламентында эксперт советтары булдырыла

Улар даими комитеттар янында эшләп килә, тине спикер Константин Толкачев. Тәүге советтар ойошторолған. Мәғлүмәт сәйәсәте буйынса советты депутат Шамил Вәлиев етәкләй. Спорт буйынса совет етәксеһе вазифаһын Рөстәм Әхмәҙинуров алды. Дин эштәре буйынса советты Вячеслав Пятков, Мәғариф буйынса советты Айбулат Хажин етәкләне.

Өфө халыҡ-ара бизнес аҙналығына әҙерләнә

Ул 22 ноябрҙә башлана һәм өс көн дауам итә. Быйыл форумда Ҡытай, Ҡаҙағстан Үзбәкстан, Беларусь Төркиә, Иран һәм башҡа дәүләт вәкилдәре ҡатнашыуы көтөлә. Өфө ҙур халыҡ-ара саралар уҙғарыу урынына әүерелә, тип яҙа социаль селтәрҙә Премьер-министр Андрей Назаров. Был сара ла ҙур һөҙөмтә бирергә тейеш, Башҡортостандың халыҡ-ара майҙанда тағы нығыныуы көтөлә.

Башҡортостанда илһөйәрлек тәрбиәһен ойоштороуға грант булдырыла

Яртышар миллиондан 10 грант. Башҡортостан башлығы киләһе йылдан республиканың дөйөм белем биреү ойошмаларында илһөйәрлек тәрбиәһен ойоштороуға грант булдырыу тураһында указға ҡул ҡуйҙы. Документҡа ярашлы, уҡыу йылы һөҙөмтәләренән сығып 500 мең һумлыҡ 10 грант бүлеү ҡарала. Еңеүселәр мәғариф һәм фән министрлығы ойошторған конкурс нигеҙендә һайлап алына.

Башҡортостан мәктәптәре техника паркын яңырта

Бөгөн республиканың төрлө райондарында урынлашҡан 39 белем усағы яңы автобус алды. Транспорт сараһы асҡыстарын мәктәп директорҙарына Мәғариф һәм фән министры Илдар Мәүлитбирҙин тапшырҙы.