Рекультивация урынына йәшерен рәүештә алтын ҡаҙыу эшен дауам итәләр

Һүҙ Учалы районында эшмәкәрлек алып барған «Альтинвест» йәмғиәте һәм уның подрядсыһы «Гассад» компанияһы тураһында. Компания эшмәкәрлеге Ер аҫты байлыҡтарын файҙаланыу буйынса ведомство комиссия ултырышында тикшерелде. Комиссия Башҡортостан башлығы рәйеслегендә эшләй. Радий Хәбиров мәсьәләне даими рәүештә контролдә тота һәм был өлкәлә хоҡуҡ боҙоуҙарға юл ҡуймауҙы талап итә. Бөгөнгө ултырышҡа Учалы районы алтын ятҡылыҡтарындағы хәл осраҡлы ғына сығарылманы. Башҡортостанда ҡаҙылма байлыҡтар табыуға бирелгән 70 федераль лицензияның, 50-һе тап ошо төбәккә тура килә. Намыҫһыҙ эш итеүселәр ҙә бар. Бөгөнгө ултырышта ла «алтын биҙгәген» йоҡторған ойошмалар эшмәкәрлеге һәм был «сиргә» дауа табыу юлдары ҡаралды.

Дәүләт программаһы ярҙамында Бөрөлә бассейн төҙөкләндерелгән

«Урындағы башланғыстарҙы хуплау программаһы» ярҙамында төрлө мәсьәләләр хәл ителә. Бөрө ҡалаһының 7-се балалар баҡсаһы 19 проект араһында еңеп яулап, бассейнды төҙөкләндереүгә өлгәшә. Бының өсөн республика, ҡала бюджетынан аҡса бүленә, бағыусылар һәм ата-әсәләр ҙә ҡушыла. Яңырыу кисергән бассейнда йөҙөү буйынса дәрестәр башланған.

Заһир Исмәғилев исемендәге Өфө дәүләт сәнғәт институты ойошторолоуға 55 йыл

Музыка, театр, хореография һәм һынлы сәнғәт өлкәһендә белгестәр әҙерләүсе юғары уҡыу йорто юбилей датаһын лайыҡлы ҡаршылай.

Йәштәр баҫмалары бер быуатлыҡ юбилейын билдәләне

Йәштәр баҫмаларына 100 йыл. Өфөлә «Йәшлек», «Өмөт» һәм «Молодежная газета»ның бер быуатлыҡ юбилейын билдәләү сараһы ойошторолдо. Йәштәр баҫмалары бөгөн дә заман менән бергә атлай,рухиәтте үҫтереү, телде һаҡлау, йәштәр араһында илһөйәрлек, белемгә ынтылыу, өлкән быуынға хөрмәт менән ҡарау сәйәсәтен уңышлы алып бара.

Башҡортостан йорттарында ҡыйыҡтар яңыртыла

Был эш алдағы бер нисә йылда теүәлләнергә тейеш. Радий Хәбиров социаль селтәрҙә яҙыуынса, киләһе йылда йорттар ҡыйығын ремонтлау өсөн тәүҙә 100 миллион һум планлаштырылғайны, 430 миллион һум тотоноу тураһында ҡарар ҡабул ителде. 59 район һәм ҡалала 100-ҙән ашыу йорт тәртипкә килтереләсәк, - ти Республика Башлығы. Башҡортостанда ике йыл эсендә 62 ҡыйыҡ ремонтланған.

Оборона министрлығы менән контракт төҙөүселәргә өҫтәп тағы 100 мең һум түләнә

Республика Башлығы Радий Хәбиров айырым граждандарға өҫтәмә социаль ярҙам саралары тураһында Указға ҡул ҡуйҙы. Документҡа ярашлы, мобилизация, йә мотлаҡ саҡырылыш буйынса хәрби хеҙмәткә алынып, 10 ноябрҙән һуң контракт төҙөүселәр өсөн өҫтәмә түләү була. Был норма Шайморатов исемендәге һәм башҡа ирекле батальондар составына ҡағылмай. Республика хәрби комиссары Михаил Блажевич белдереүенсә, мобилизация буйынса алыныусылар араһында контрактлы хеҙмәткә күсергә теләүселәр байтаҡ. Мотлаҡ саҡырылыш буйынса алыныусыларҙың да закон буйынса контракт төҙөү мөмкинлеге бар, тине ул.

Быйыл Башҡортостанда 59 баланы уллыҡҡа алғандар

Был уҙған йылдың ошо осорондағынан күберәк. Ғаилә, хеҙмәт һәм халыҡты социаль яҡлау министры Ленара Иванова белдереүенсә, Башҡортостанда ата-әсә ҡарауынан мәхрүм һәм етем 10 мең 609 бала бар. Уллыҡҡа алыусы ғаиләләр өсөн Әсәлек капиталы күләмендә финанс ярҙам бирелә. Аҡсаны торлаҡ шарттарын яҡшырыу, һаулыҡты нығытыу, балаға белем биреү өсөн тотонорға мөмкин.

“Дөрөҫлөк. Яуаплылыҡ. Батырлыҡ” тигән премия булдырылды

Башҡортостанда журналистарға яңы премия тапшырыла. Республика Башлығы Радий Хәбиров тейешле указға ҡул ҡуйҙы. “Дөрөҫлөк. Яуаплылыҡ. Батырлыҡ” тип аталған премияға Башҡортостанда ижад иткән журналистар дәғүә итә ала. Йәмәғәттә танылыу алған көнүҙәк мәғлүмәт еткергән 20 хәбәрсегә 300 мең һумлыҡ бүләк тапшырыла.

Өфөгә декабрҙә Ҡыш Бабай киләсәк

Яңы йыл тылсымсыһы 11 ноябрҙән ил буйлап сәфәргә сыға. Ҡыш Бабай Бөйөк Устюг ҡалаһынан Байкал-Амур тимер юлы буйлап сәйәхәт итә. Маршрутта 70-тән ашыу бәләкәй һәм ҙур ҡала күрһәтелгән. Өфөгә Ҡыш Бабай 19 декабрҙә килеп етә. Тимер юл вокзалында сағыу байрам сараһы ойошторола, балаларға тылсымсы вагондары буйлап экскурсия ойошторола, ҡурсаҡтар театры сығыш яһай.

Владимир Путин Эске эштәр органдары хеҙмәткәрҙәрен тәбрикләне

“Бөгөн беҙ закон һәм тәртип һағында тороусыларҙы, кеше хоҡуҡтарын яҡлаусыларҙы хөрмәтләйбеҙ. Уларҙың хеҙмәте хәүефле, ғәҙәттән тыш хәлдәрҙә лә эшләргә тура килә. Әммә полиция хеҙмәткәрҙәре енәйәт менән көрәштә алғы һыҙыҡта тора, ҡыйыулыҡ күрһәтә. Эске эштәр органдарының абруйын арттыра һәм легендар традицияларға нигеҙ һала”, - тине Рәсәй Президенты.

Башҡортостандың өс йылға социаль-иҡтисади үҫеш мөмкинлектәре тәҡдим ителде

Иҡтисади үҫеш һәм инвестицион сәйәсәт министрының беренсе урынбаҫары Айрат Фәхретдинов Дәүләт Йыйылышы–Ҡоролтай депутаттарын документ менән таныштырҙы. Ул өс вариантта әҙерләнә. Төп планға ярашлы 2024 йылда төбәк тулайым продукты 2,5 триллион һумға баһалана. Сәнәғәт һәм төҙөлөш тармаҡтарында үҫеш күҙәтелә, эш хаҡы 10 процентҡа артып уртаса 61 мең һумға етергә тейеш.

Башҡортостанға байраҡ тапшырылды

Участка полицияһы хеҙмәтенең 100 йыллығы уңайынан ойошторолған эстафета байрағы Башҡортостанға килеп етте. Эстафетала илдең 40 төбәге ҡатнаша. Ырымбур өлкәһе полицияһы флагты Күмертауҙа Башҡортостандағы коллегаларына тапшырҙы. Рәсәй участка полицияһы хеҙмәте байрағы Торатау һәм Ҡуштауҙа күтәрелде. Эстафета Рәсәй Геройы Миңлеғәли Шайморатов һәм 112-се Башҡорт атлы дивизияһы яугирҙәре иҫтәлегенә ҡуйылған мемориалда ла булды.

Башҡортостанда ит етештереүҙе 7 процентҡа арттырыу планлаштырыла

454 мең тоннаға еткереү маҡсаты ҡуйылған. Вице-премьер-Ауыл хужалығы министры Илшат Фәзрахманов белдереүенсә, быға малсылыҡ һәм ҡошсолоҡ фермаларында етештереү ҡеүәтен арттырыу аша ирешергә мөмкин. Әле Борай, Илеш, Көйөргәҙе һәм Федоровка райондарында мал һимертеү комплекстары төҙөлә.

Башҡортостан Башлығы Эске эштәр органдары хеҙмәткәрҙәрен ҡотланы

“Ил һәм республика өсөн был мөһим байрам. Беҙ ауыр мәлдәрҙә тап полиция хеҙмәткәрҙәренә мөрәжәғәт итәбеҙ. Ғәҙелһеҙлек һәм хоҡуҡ боҙоуҙар булғанда уларҙан ярҙам һорайбыҙ. Полиция закон һәм тәртип һағында тора, йәмғиәт именлеген тәьмин итә. Улар енәйәтселек һәм терроризм менән көрәшә. Бөтә полиция хеҙмәткәрҙәренең ҡулын ҡыҫам. Уларға сәләмәтлек һәм уңыштар теләйем. Иҫән-һау хеҙмәт итеп, өйҙәрегеҙгә ҡайтырға яҙһын” ти Полиция көнө уңайынан ҡотлауында Радий Хәбиров.

Башҡортостанда йәштәрҙе иҫәпләнеләр

Рәсәйҙә ҡабул ителгән законға ярашлы, 14 йәштән 35 йәшкә тиклемгеләр йәш тип һанала. Башҡортостанда ошо йәштәге 1 миллион 84 мең кеше бар. Уларҙың 550 меңе - ир-егеттәр. Ҡатын-ҡыҙҙар 15 меңгә аҙыраҡ. Бөгөн бөтә донъя йәштәр көнө билдәләнә.

Башҡортостан хәрбиҙәргә ярҙам итә

Башҡортостандан 100-сө гуманитар ылау махсус хәрби операция биләмәһенә барып етте. Йөк машиналарынан колонна 8 ноябрҙә Өфөнән ҡуҙғалғайны. Уны Республика Башлығы Радий Хәбиров оҙатып ҡалды. Гуманитар йөктө туплауҙа дәүләт һәм шәхси ойошмалар, район һәм ҡала хакимиәттәре, мәғариф учреждениелары, ябай халыҡ ҡатнашты. Яҡташ-яугирҙәргә «УАЗ» һәм «Нива» автомобилдәре, ағас-таҡта, мейес, квадроцикл, тепловизор, рация, генератор, квадрокоптер, аҙыҡ-түлек, дарыуҙар һәм туғандарынан күстәнәстәр тейәп ебәрҙеләр.

Радий Хәбиров Эске эштәр органдары хеҙмәткәрҙәрен Полиция көнө менән ҡотланы

Тәбрикләү һүҙҙәре менән Радий Хәбиров социаль селтәрҙәге сәхифәләрендә бүлеште. «Ил һәм республика өсөн был мөһим байрам. Беҙ ауыр мәлдәрҙә тап полиция хеҙмәткәрҙәренә мөрәжәғәт итәбеҙ. Ғәҙелһеҙлек һәм хоҡуҡ боҙоуҙар булғанда уларҙан ярҙам һорайбыҙ. Полиция закон һәм тәртип һағында тора, йәмғиәт именлеген тәьмин итә. Улар енәйәтселек һәм терроризм менән көрәшә. Бөтә полиция хеҙмәткәрҙәренең ҡулын ҡыҫам. Уларға сәләмәтлек һәм уңыштар теләйем. Иҫән-һау хеҙмәт итеп, өйҙәрегеҙгә ҡайтырға яҙһын» - тигән Полиция көнө уңайынан ҡотлауында Радий Хәбиров

Башҡортостан Халыҡ-ара хеҙмәттәшлекте үҫтереү буйынса лидерҙар рәтендә

Төбәк сәйәсәтен үҫтереү үҙәге санкциялар баҫымы шарттарында Рәсәй төбәктәренең сит ил бизнесы менән бәйләнеш булдырыуҙа яңы форматтар индереүе тураһында доклад баҫтырҙы. Дөйөм алғанда, был йүнәлештә әүҙемлектең кәмеүе билдәләнә.

Башҡортостан-Ҡаҙағстан араһында сәнәғәт бәйләнештәре үҫешә

Ике яҡлы килешелгән юл картаһы нигеҙендә сәнәғәт буйынса хеҙмәттәшлекте нығытыу күҙ уңында тотола. Башҡортостан Сода компанияһы, Баҡыр- Стальконструкция, Урал пружина заводы, нефть эшкәртеү линияһы буйынса булған инвестиция проекттары тауар әйләнешен арттырыу мөмкинлеге бирә.Санкция баҫымы булмаһын өсөн Төркиә, Азия баҙарҙарына тап Ҡаҙағстан аша етештереү һәм сығыу уңай. Башҡортостан предприятиелары аҡса һалырға әҙер. Сағыу миҫал, Радий Фәрит улы инвестиция сәғәтендә хуплағандан һуң яңы производствоны яйға һалған Урал пружина заводы Костанайҙа завод төҙөй. Бөгөн бында предприятие үҫешә, тауар әйләнеше күләме арта.

Эске эштәр органдары хеҙмәткәрҙәре көнө уңайынан тантаналы йыйылыш үтте

Эске эштәр органдары хеҙмәткәрҙәре көнө уңайынан бөгөн Өфөлә тантаналы йыйылыш үтте. Хоҡуҡ һаҡсыларын Башҡортостан Хөкүмәте Премьер-министры Андрей Назаров тәбрикләне.

Башҡортостан профсоюздары һөнәри байрамын билдәләй

Был дата быйыл тағы ла бер иҫтәлекле ваҡиға менән тап килә, социаль партнерлыҡ системаһы булдырылыуға 30 йыл. Ошо айҡанлы бөгөн Өфөлә Башҡортостан Профсоюздар федерацияһы советының ултырышы һәм социаль-хеҙмәт мөнәсәбәттәрен көйләү буйынса Республика өс яҡлы комиссияһының тантаналы ултырыш үтте. Сарала Рәсәй, Башҡортостан конкурстары еңеүселәре тәбрикләнде.