Арғаяш районы Ҡолой ауылында милли көрәш буйынса ярыш үтте

Асыҡ турнир Харис Йосоповтың яҡты иҫтәлегенә арналды. Харис Монасип улы Көньяҡ Уралда дзюдоға нигеҙ һалыусы, СССР-ҙың һәм Рәсәйҙең атҡаҙанған тренеры.
Үҙ көсөн һанарға Силәбе өлкәһе төбәктәренән, шулай уҡ Баймаҡ, Мәләүез һәм Салауат райондарынан командалар килде. Спортсылар 12 ауырлыҡ категорияһында һәм ике йәш төркөмөндә көслөләрҙе асыҡланы.

Бөгөн Өфөлә Полилингваль белем биреү буйынса халыҡ-ара форум башланды

Унда күп профилле мәктәптәрҙе булдырыу һәм үҫтереү мәсьәләһе ҡарала. Йыйын барышында лекция, оҫталыҡ дәрестәре, фекер алышыу, шулай уҡ күргәҙмә ойошторолдо. “Республика полилингваль мәктәптәре үҙенсәлекле программа буйынса уҡыта. Форумда ошо тәжрибәне күрһәтәбеҙ”, ти “Смарт” 2-се республика күп профилле полилингваль гимназия директоры Наил Әминев. Полилингваль белем биреү мәсьәләләренә арналған форум иртәгә лә дауам итә. Унда ил төбәктәре һәм Ҡаҙағстандан белгестәр ҡатнаша.

Республика парламенты Йәмәғәт палатаһына 10 кандидатты раҫланы

Бөгөн пленар ултырышта улар өсөн тауыш бирҙеләр. Олег Ротов, Диана Фәррәхова, Алина Хабирова, Юлай Ғәлиуллин, Кристина Недозерова, Рита Некрасова. Марина Таран, Артур Ғилманов, Айбулат Йәмилов һәм Александр Волков вәкәләттәр ала. Башҡортостан йәмәғәт палатаһы 30 ағзанан тора. Составтың өстән бер өлөшөн Республика Башлығы раҫлай, тағы 10 кешене Республика парламенты хуплай. Ҡалған ағзаларҙы йәмәғәт палатаһының раҫланған составы һайлай.

Башҡортостанда Хәләл тауарҙы тикшереү буйынса үҙәк эшмәкәрлеген дауам итә

Өфөлә Еңел сәнәғәт форумы барышында Республика Башлығы Радий Хәбиров “Рәсәй сифат системаһы” ойошмаһы етәксеһе Максим Протасов менән осрашты. Унда хеҙмәттәшлекте үҫтереү һәм хәләл тауарҙы тикшереү эшен ойоштороу буйынса фекер алышыу булды. Беҙҙең республикала илдә тәүге шундай үҙәк асылды. Халыҡ-ара эксперттар сифат билдәһенә ыңғай баһаһын бирҙе. Осрашыуҙа Башҡортостан Хөкүмәте һәм “Роскачество” ойошмаһы араһында килешеүгә ҡул ҡуйылды. Максим Протасов әйтеүенсә, республика сифат өлкәһендә башҡа төбәктәр өсөн өлгө булып тора.

Радий Хәбиров Салауат Юлаев исемендәге икенсе батальонға хәрби байраҡ тапшырҙы

Түбәнге Новгород өлкәһендә Башҡортостан башлығы Салауат Юлаев исемендәге икенсе бататльондың хәрби байрағын тапшырҙы. Радий Хәбиров яҡташ яугирҙар күнекмә үткән майҙанда булды. Уларҙың әҙерлек шарттары менән яҡындан танышты.

Башҡортостан парламенты рәйесе Рудольф Нуриевтың исеменә бысраҡ яғыуға йүнәлтелгән башланғысты тәнҡитләне

Бөгөн Дәүләт Йыйылышы-Ҡоролтайҙың пленар ултырышы үтте. Константин Толкачев «КПРФ» фракцияһының Башҡортостан бүлексәһе етәксеһе Юнир Ҡотлоғужин тәҡдим иткән мәсьәләне көн тәртибенән төшөрөп ҡалдырырға тәҡдим итте. «Коммунистар партияһы» депутаты Рудольф Нуриевты «һатлыҡйән» тип атай. Шул уҡ ваҡытта Президиумда ултырыусы Вадим Старов - коммунистар партияһы ағзаһы, был мәсьәлә фракцияла күтәрелмәне тип белдерҙе.

Борай районында Танып йылғаһы аша күпер яҡын көндәрҙә файҙаланыуға тапшырыла

Әле объектта төҙөлөш эштәре тамамланыу алдында . Мәғлүм булыуынса, күпер сентябрҙә сафҡа индерелергә тейеш ине. Әммә материал менән тотҡарлыҡтар арҡаһында эш туҡтап ҡалды. Был хаҡта Башҡортостандың транспорт һәм юл хужалығы министры Александр Клебанов белдерҙе. Танып йылғаһы аша һалынған объект Өфөнө республиканың төньяғы менән бәйләй, быйыл йәй ул авария хәлендә тип табылды. Фажиғәләргә юл ҡуймау маҡсатында белгестәр транспорт хәрәкәтен ябырға мәжбүр булды. Ә эргәлә ваҡытлыса яңы күпер төҙөлә башланы.

Өфөлә бөгөн полилингваль мәғариф буйынса Халыҡ-ара форум эш башланы

Сараны рәсми асыу Колоннолар залында үтте. Форум сиктәрендә баш ҡаланың бер нисә уҡыу йортонда түңәрәк өҫтәлдәр үтте.

Ҡырмыҫҡалы икмәк бешереү комбинаты ҡулланыусылар кооперативы сиктәрендә алдынғы күрһәткестәргә ирешкән

Башҡортостан ауыл хужалығы ҡулланыусылар кооперативы ярты йыл эсендә 3 миллиард һумдан ашыу килем алған. Башлыса ауыл хужалығы продукцияһын етештереү, сауҙа тармағында эшләгән кооперативтарҙы эшмәкәрлеген киңәйтеү өсөн республикала субсидиялар һәм башҡа дәүләт ярҙамы ҡаралған. Ҡырмыҫҡалы икмәк бешереү комбинаты ҡулланыусылар кооперативы сиктәрендә алдынғы күрһәткестәргә ирешкән.

Өфөлә өсөнсө халыҡ-ара этнотуризм форумы тамамланды

Күләмле сарала илебеҙҙең 56 төбәге, Белорусия, Абхазия делегациялары ҡатнашты. «Торатау» Конгресс-холында үткән йыйында «Йыл маршруты» Бөтә Рәсәй премияһы конкурсы еңеүселәре тәбрикләнде. Эколгия, энотуризм, һауыҡтырыу, йәштәр, сәнәғәт туризмы маршруттары буйынса иң яҡшы проекттар асыҡланды. Финалистар араһында эксперттар ете эште гран-при менән баһаланы. Еңеүселәр араһында Башҡортостан вәкилдәре лә бар.

Өфөлә Республика Башлығы ҡушыуы буйынса балалар поликлиникаһы төҙөкләндерелде

Сипайлово биҫтәһендә травматология бүлексәһендә капиталь ремонт үткәрелде. Һаулыҡ һаҡлау министры Айрат Рәхмәтуллин социаль селтәрҙә яҙыуынса, дауаханала иркен яҡты бүлмәләр йыһазландырылды, электрон сират барлыҡҡа килде, пациенттарға коридорҙа көтөү өсөн уңайлы шарттар булдырылды. Өфө дауаханаларын төҙөкләндереү яңы программа буйынса тормошҡа ашырыла. Уны быйыл июндә Радий Хәбиров иғлан итте. Бының өсөн ике йылда 500 миллион һум бүленә.

Рәсәйҙә киләһе йылда минималь хеҙмәт хаҡын күтәрергә тәҡдим ителде

Дәүләт Думаһында закон проекты ҡаралды. Уны Рәсәй Хөкүмәте индергәйне. Документҡа ярашлы, минималь хеҙмәт хаҡын 18,5 процентҡа арттырырға тәҡдим ителә. 2024 йылда ул 19 мең 242 һумға етә. 5 миллионға яҡын кешенең хеҙмәт хаҡы минималь кимәлгә еткерелергә тейеш.

Өфөлә милли проект буйынса 5 урам тәртипкә килтерелде

Транспорт һәм юл хужалығы министрлығынан белдереүҙәренсә, баш ҡалала 11 урында ремонт бара. Бының өсөн 2,5 миллиард һум бүленгән. “Хәүефһеҙ сифатлы юлдар” милли проектына ярашлы, Новороссийск, Һалле, Демьян Бедный, Шәфиев, Менделеев урамдарында 6,5 километр арауыҡ төҙөкләндерелде. Зинин ҡасабаһы янында юл үткәргес төҙөлә, Бейек һәм Эшсе хәбәрселәр урамдарында ремонт дауам итә. Өфөлә Интеллектуаль транспорт системаһы ҡулланыла. Ул тығындар ваҡытында автомобилдәр хәрәкәтен көйләргә мөмкинлек бирә.

Республикала быйыл 6 айҙа 1 мең 700-гә яҡын кеше исемен алмаштырған

Юстиция эштәре буйынса дәүләт комитетынан шул турала белдерәләр. Былтыр 3 мең 200-ҙән ашыу кеше исем алмаштырыуҙы үтенеп мөрәжәғәт иткән. Законға ярашлы һәр кем исемен үҙгәртергә хоҡуҡлы. Бының өсөн ЗАГС-ҡа барырға кәрәк.

Рәсәйҙә яңы спорт объекттары булдырыла

Улар адреслы федераль инвестиция программаһына ярашлы төҙөлә. Һәр проекттың суммаһы 3 миллиард һум тип хәбәр итәләр Төҙөлөш һәм торлаҡ-коммуналь хужалыҡ министрлығынан. Объекттарҙың береһе - Өфөләге Көрәш үҙәге. Был комплекста донъя һәм ил кимәлендәге турнирҙар уҙғарыу планлаштырыла.

Баймаҡта ауыл хужалығы һәм эшкәртеү сәнәғәте хеҙмәткәрҙәрен ҙурлайҙар

Районда тантаналы сара үтә. Унда тармаҡтың алдынғы эшсәндәре һәм ветерандарға дәүләт бүләктәре тапшырыла. “Һауа торошона бәйле быйылғы уңыш былтырғынан әҙерәк. Әммә һөҙөмтәләр беҙҙе шатландыра”, тип белдерҙе район хакимиәте башлығының беренсе урынбаҫары Азат Шәрипов.

Башҡортостанда Ҙур этнография диктантын яҙалар

3 ноябрҙән 8-енә тиклем 8-се "Бөтә Рәсәй мәғариф акцияһы" уҙғарыла. Уның маҡсаты халыҡ иғтибарын тарих, мәҙәниәт һәм йолаларҙы өйрәнеүгә йәлеп итеү. Бындай белем милләт-ара татыулыҡты нығытыуға булышлыҡ итә, ти ойоштороусылар. Акцияла һәр кеше ҡатнаша ала. 16 йәшкә тиклемгеләр 20 һорауға яуап бирә. Өлкәнерәктәр өсөн 30 һорау әҙерләнгән. Һөҙөмтәләр декабрҙә Рәсәй Конституцияһы көнө алдынан иғлан ителә.

Ил бюджеты социаль йүнәлешле булып ҡала

Дәүләт Думаһында финанс документ беренсе уҡыуҙа ҡабул ителде. Депутаттар киләһе йылдарға ҡаҙна проекты буйынса фекер алышты. Балалы ғаиләләргә берҙәм пособие түләү өсөн алдағы өс йылда 4,4 триллион һум һалына. 10 миллион кеше ярҙамға эйә була. Мохтаждарға дарыуҙар тапшырыу, медицина ойошмалары һәм мәктәптәрҙе төҙөкләндереү, торлаҡ шарттарын яҡшыртыу өсөн етерлек аҡса бүленә. 2024 йылда бюджет 35 триллион һумға тулылана.

Башҡортостанда санитар авиация 100-ҙән ашыу осош яһаған

Ғүмәр Ҡыуатов исемендәге Республика клиник дауаханаһында вертолет бар. Санитар авиация ауыр хәлдәге пациенттарҙы медицина ойошмаларына тиҙерәк алып барырға мөмкинлек бирә. Күптән түгел Көйөргәҙе районынан тәне бешкән хаҡлы ялдағы ҡатынды вертолет ярҙамында Өфөгә алып килделәр. “Сәләмәтлек” милли проектына ярашлы 2020 йылдан республикала санавиация эшләй. Ошо ваҡыт эсендә тиҫтәләгән кеше ғүмере ҡотҡарылған.

Салауат Юлаев исемендәге икенсе ирекле батальон хәрби әҙерлеген тамамлай

Тиҙҙән яугирҙар махсус хәрби операция биләмәһенә юллана. Улар янына Башҡортостан Башлығы ла барҙы һәм батальонға байрағын тапшырҙы. Радий Хәбиров яугирҙар йәшәгән казармаларҙы ҡарап сыҡты, ашханала, хәрби дан бүлмәһендә булды. Ватан һаҡсылары менән яҡындан аралашты. Башҡортостан башлығы, федераль һәм республика ярҙам сараларына нигеҙләнеп, яугир ғаиләләрен хәстәрләүҙе Башҡортостан үҙ иңенә алыуын да белдерҙе.

Радий Хәбиров Салауат Юлаев исемендәге икенсе ирекле батальонға хәрби байраҡ тапшырҙы

Башҡортостан Башлығы Түбәнге Новгород өлкәһендә яугирҙәр менән осрашты. Бында Рәсәй милли гвардияһы доброволецтары хәрби әҙерлек үтә. Радий Хәбиров махсус операцияға барырға теләк белдергән яҡташтарыбыҙға рәхмәт белдерҙе һәм уңыштар теләне.
Радий Хәбиров Волга буйы округында Рәсәй милли гвардияһы ғәскәрҙәренең командующийы Сергей Просяникка яугирҙәрҙе әҙерләүҙә ярҙам иткәндәре өсөн рәхмәт белдерҙе. Осрашыуҙа Башҡортостан батальондары дини әһелдәре имам Хәмзә хәҙрәт һәм протоиерей Виктор Иванов сығыш яһаны.