Башҡортостанда автомобиль хужаларына иғтибарлы булырға кәңәш итәләр

Баш автоинспектор Владимир Севастьянов яҙыуынса, ҡыш яҡынлаша. Төнгө һалҡындар ваҡытында юлдарҙа боҙлауыҡ барлыҡҡа килә. - Бөтә водителдәргә үтә иғтибарлы булырға кәңәш итәм. Автомобилдең төҙөклөгөн ҡарарға, машинаны ипле йөрөтөргә кәрәк. Йәйәүлеләр янынан ҙур тиҙлектә үтергә ярамай, - ти ул. Владимир Севастьянов шулай уҡ ҡышҡы резинаға күсергә кәңәш итте.

Башҡортостанда йылытыуға бәйле дәғүәләр кәмегән

Радий Хәбиров белдереүенсә, халыҡтан мөрәжәғәттәр өс тапҡырға аҙайған. Республика Башлығы йорттарҙы йылытыу буйынса мәсьәләләрҙе тиҙ арала хәл итергә ҡушты. Йылытыуҙы тейешле ойоштормаған өсөн 29 административ эш ҡуҙғатылған. Вазифалы кешеләргә 354 мең һум штраф һалынған.

Өфө аэропорты 4 миллион кешене хеҙмәтләндерҙе

Башҡортостан баш ҡалаһында юбилейлы пассажирҙы ҡаршы алдылар. 4 миллионынсы ханымға бүләктәр тапшырылды. Быйыл иҫтәлекле ваҡиға ике айға иртәрәк теркәлде. Пассажирҙар күберәк эске рейстар менән файҙалана, 600 меңдән ашыу кеше сит илгә осҡан, тип хәбәр итәләр “Өфө” халыҡ-ара аэропортынан.

Өфө районында бөгөн яугирҙарға ылау туплау буйынса махсус пункт эш башланы

Махсус хәрби операцияла ҡатнашыусыларға ярҙамға. Өфө районында бөгөн яугирҙарға ылау туплау буйынса махсус пункт эш башланы. Береселәрҙән булып Рәсәйҙең спорт федерацияһы вәкилдәре ҡушылды. Гуманитар ярҙам өсөн ангарҙы ла спорт мастеры үҙе тәҡдим иткән.

Октябрьский ҡалаһында ла махсус хәрби операциялағы хәрбиҙәргә гуманитар ярҙам өсөн кәрәкле әйберҙәр туплана

Илдәге хәлгә битараф булмағандар, эшҡыуарҙар, хәйриә фонды, кем нисек ярҙам итә ала, был эшкә ҡушылған. Яугирҙарға ебәрер өсөн йылы ойоҡбаштар, медикаменттар, аҙыҡ- түлек, тимер мейестәр әҙерләнгән. Уҡыусылар хәрбиҙәргә изге теләктәр менән хаттар яҙған. Көмөш ирекмәндәр ялан шарттарында йыуынырға «ҡоро душ» эшләй.

«Тамыр» телеканалы «ТЭФИ-KIDS»-2023 Рәсәй милли телевизион премияһына лайыҡ булды

«Тамыр»ҙың яңы еңеүе. «Тамыр» балалар-үҫмерҙәр телеканалының «Сәңгелдәк» тапшырыуы «ТЭФИ-KIDS»-2023 Рәсәй милли телевизион премияһына лайыҡ булды. Кескәйҙәр өсөн популяр телепрограмма «Балалар өсөн көндәлек мәғлүмәт-күңел асыу программаһы» номинацияһында билдәләнгән.

Сытырман - Үрге Сат юлының бер өлөшөндә ремонт тамамланды

Транспорт һәм юл хужалығы министрлығынан хәбәр итеүҙәренсә, Яңауыл районында 3 километрҙан ашыу юл тәртипкә килтерелгән. Бының өсөн 40 миллион һум тотонолған. - Трасса Сытырман, Ямаҙы, Иҫке Алдар, Тау, Мәсәғүт, Түбәнге Сат һәм Үрге Сат ауылдары аша үтә. Уларҙа мең ярым кеше йәшәй, - тине ведомство башлығы Александр Клебанов. Быйыл Сытырман һәм Үрге Сат араһында 12 километр ярым трассаны төҙөкләндереү планлаштырыла.

Мерәҫ ауыл мәҙәниәт йортонда Бибисара Азаматованың яҡты иҫтәлегенә арналған беренсе йыр бәйгеһе үтте

«Йәшәргә лә әле йәшәргә». Ошондай исем аҫтында Мерәҫ ауыл мәҙәниәт йортонда Бибисара Азаматованың яҡты иҫтәлегенә арналған беренсе йыр бәйгеһе үтте. Бында Баймаҡ, Хәйбулла, Ейәнсура райондарына үҙешмәкәр йырсылар ҡатнашты. Тулыраҡ киләһе яҙмала.

Өфөлә пассажирҙар навигацияһы тамамланды

Был аҙнала паром кисеүҙәренең күбеһе ябылды. Ҡала хакимиәтенән хәбәр итеүҙәренсә, бындай ысул менән йылғалар аша хәрәкәт киләһе йылда ташҡын ҡайтҡандан һуң башлана. Өфө районында "Князево" һәм ДОК паром кисеүҙәре 1 ноябргә тиклем эшләй. Шаҡша күперендә реконструкция бара, хәрәкәт тығыҙ, ҡарар ошо сәбәпле ҡабул ителгән.

Өфөлә "Бурыслы" операцияһы уҙғарыла

Ҡала автоинспекцияһынан хәбәр итеүҙәренсә, водителдәрҙең түләнмәгән штрафтары тикшерелә. Тейеш түләүҙәр тураһында мәғлүмәттәрҙе автоинспекция сайтында һәм дәүләт хеҙмәттәре порталында ҡарарға була. Штрафтарҙы 20 көн эсендә 50 процент ташлама менән түләп була.

Республика мәктәптәрендә агрокластар арта

Ауыл хужалығы министры урынбаҫары Ирек Сураҡов ошо турала белдерҙе. Проектты тормошҡа ашырыуҙа алдынғы ауыл хужалығы предприятиелары, Башҡорт дәүләт аграр университеты һәм аграр колледждар ярҙам итә. “Бындай кластарҙа балалар илһөйәр булып үҫә”, тигән фекерҙә Ирек Сураҡов.

Бөгөн Өфөлә Этнотуризм буйынса халыҡ-ара форум башланды

Сарала Рәсәйҙең 50 төбәгенән һәм Беларусь республикаһынан вәкилдәр ҡатнаша. Форумда туриндустрия тармағын үҫтереү мәсьәләләре ҡарала һәм этно-мәҙәни-туризм күргәҙмәһе эшләй. Халыҡ-ара форум өс көн дауам итә. Уның барышында “Йыл маршруты” Бөтә Рәсәй туристик премияһы тапшырыла. Еңеүсегә Илдең иң уңышлы маршруты тигән исем бирелә.

Башҡортостан Башлығы Ҡаҙағстандың Рәсәйҙәге ғәҙәттән тыш һәм тулы хоҡуҡлы илсеһе менән осрашты

Радий Хәбиров 2024 йылда Рәсәй һәм Ҡаҙағстан форумын Өфөлә үткәрергә тәҡдим итте. Башҡортостан башлығы был турала Ҡаҙағстандың Рәсәйҙәге ғәҙәттән тыш һәм тулы хоҡуҡлы илсеһе Даурен Абаев менән осрашыуҙа белдерҙе.
Башҡортостан менән Ҡаҙағстанды күптәнге дуҫлыҡ, сауҙа-иҡтисади, дуҫлыҡ мөнәсәбәттәре бәйләй. Һуңғы йылдарҙа ике аралағы сауҙа әйләнеше артыуы күҙәтелә, тәүге ярты йылда күрһәткес 5 процентҡа арткан һәм 300 миллион долларға еткән.

Республикала Өсөнсө халыҡ-ара этнотуризм форумы асылды

Уның эшендә илебеҙҙең 5 тиҫтәнән ашыу төбәге, шулай уҡ Белоррусия һәм Абхазия делегациялары ҡатнаша. Туриндустрия йыйынына килеүселәрҙе Башҡортостан Башлығы Радий Хәбиров сәләмләне.

Ике аҙна ял иткәндән һуң мобилизацияланыусы ир-егеттәр махсус хәрби операция биләмәһенә юлланды

Яугирҙар төркөмө тиҫтәнән ашыу кешенән тора. Ҡәҙерлеләрен яуаплы сәфәргә оҙатырға ғаиләләре, дуҫтары килде. Ике аҙна ял итеп, туғандары, балалары менән аралашҡан ир-егеттәрҙең кәйефтәре көр, күңелдәре күтәренке.Ҡыҫҡа ғына ял ваҡытында хәрбиҙәр тыуған ер һауаһын һулап, көс туплап өлгөргән.

Отпускыға ҡайтҡан Доставалов исемендәге батальон яугиры өйләнде

Миналар шартлауын Мендельсон маршына, хәрби кейемде туй костюмына. Доставалов исемендәге батальон яугиры өйләнде. Отпускыға ҡайтҡан хәрби яратҡан ҡыҙына тәҡдим яһаған. Йәштәр мөхәббәттен законлы никах менән теркәне. Ауырғазы районы Талбазы ауылында үткән туйҙа БЮТ ижади төркөмө лә булды.

Октябрьский ҡалаһында аяҡһыҙ ҡалған пенсионер ҡатын махсус хәрби операция яугирҙарына йыуғыстар бәйләй

89 йәшлек Нурикамал Ғиләжетдинова был изге эшкә телевизорҙан ирекмәндәр эшмәкәрлеге тураһында ишеткәс, тотона. Ентекләберәк киләһе яҙмала.

Күренекле ҡурайсы Ришат Рәхимов 70 йәшлек юбилейын билдәләй

Күренекле ҡурайсы, Башҡортостандың Халыҡ артисы, халыҡ музыка ҡоралдары ансамбленә нигеҙ һалыусы шәхес - Ришат Рәхимовҡа - 70 йәш. Милли уйын ҡоралын пропагандалаусы, уны донъя сәхнәләрендә танытыусы ҡурай оҫтаһы Баймаҡ районы икенсе Этҡол ауылында тыуған. Өфө сәнғәт училещеһында эш дәүерендә Ришат Рәшит улы бер нисә быуын профессиональ ҡурайсылар әҙерләй, фольклор эҙләнеүҙәренә таянып уҡыу әсбаптарын баҫтыра.

Башҡортостан иген экспортлауҙы арттырған

Быйыл 9 айҙа сит илдәргә 342 мең тонна ашлыҡ һатылған. Был уҙған йылдың ошо осоронан 3 тапҡырға күберәк. Ауыл хужалығын күҙәтеү хеҙмәтенән хәбәр итеүҙәренсә, оҙатылған игендең ҙур өлөшө - бойҙай, 106 мең тонна сығарылған. Шулай уҡ арпа, етен, борсаҡ, арыш, һоло экспортланған.

“Мөғжизәләр яланы” тыуған көнөн билдәләй

ВИД телекомпанияһының проектының тәүге сығарылышы 1990 йылдың 25 октябрендә төшөрөлә, 26-ыһында эфирға сыға. “Мөғжизәләр яланының” беренсе алып барыусыһы Владислав Листьев. Ул һәләк булғандан һуң, 1991 йылдың ноябренән тапшырыуҙы эфирға Леонид Якубович алып сыға. Ул бөгөн дә “Мөғжизәләр яланының” алыштырғыһыҙ алып барыусыһы. Программа һәр йома күрһәтелә. Унда Рәсәй генә түгел, элекке Советтар Союзы республикаларынан да күпләп ҡатнашалар.

Башҡортостанда йылытыу миҙгеленә әҙерлек барышында 7 мең ярым йортта етешһеҙлек асыҡланған

Торлаҡ һәм төҙөлөштө күҙәтеү буйынса дәүләт комитетынан хәбәр итеүҙәренсә, май айынан сентябргә тиклем тикшереү уҙғарылған. Йорт һәм подъездарҙа быяла ҡуйылмауы, торбаларҙа йылы изоляция булмауы, иҫәпләү приборҙары төҙөкһөҙлөгө асыҡланған. Бөтә етешһеҙлектәрҙе идарасы компаниялар бөтөрөргә тейеш була. Яуаплы ойошмаларға штрафтар һалынған.