Башҡортостан йәш фехтование оҫталары Рәсәй беренселегендә алтын миҙалдар яуланы

Өфө спортсылары рапирала алыш финалында еңеп сыҡты. Радмир Ғәләүетдинов, Әмир Фәхретдинов, Дәүләт Хәйретдинов һәм Ростислав Хамдамов уңышҡа иреште тип хәбәр итәләр Фехтование федерацияһынан.

Бөрө районында һыуға батҡан һарыҡ кәүҙәләрен сығарыу дауам итә

Ғәҙәттән тыш хәлдәр буйынса дәүләт комитеты мәғлүмәттәре буйынса бөгөнгә 1 мең 332 һарыҡ сығарылған. Ҡотҡарыусылар көндөҙ эшләй. Боҙҙа мәкеләр уйыла, унан һуң водолаздар төшөрөлә. Уҙған йылда декабрҙә һауа шарттары арҡаһында һарыҡтар йоҡа боҙға сыға һәм һыуға бата. Өйөр хужаһы ҙур зыян күрә, уға ҡотҡарыусылар эше өсөн түләргә, үле һарыҡтарҙы юҡ итеү сығымын ҡапларға кәрәк.

Павловка һыуһаҡлағысында өшөп дауаханаға оҙатылған ҡыҙҙың хәле уртаса ауырлыҡта

Был турала Һаулыҡ һаҡлау министры Айрат Рәхмәтуллин хәбәр итте. Уҡыусы бала атаһы менән Ҡариҙел районына ял итергә килә. Ул иртән сығып китә, төшкө ваҡытҡа әйләнеп ҡайтмай. Атаһы ҡотҡарыусыларға хәбәр итә. Баланы табалар, ул аңын юғалтҡан була. Пациент Республика балалар клиник дауаханаһына һалынған.

ЗАГС идаралығы өйләнешеү өсөн матур даталарҙы атаны

2026 йылдың 26 ғинуары иҫтәлекле көндәрҙең береһе һанала. 6 һәм 26 июндә, шулай уҡ 8 августа законлы никахҡа инергә теләгәндәр күп булыр тип көтөлә. Былтыр матур даталарҙың береһе, 25 ғинуарҙа республикала 281 туй үткән. Өфөлә 100 пар өйләнешкән, Белоретта – 15, Октябрьскийҙа – 13, Иглин районында 11 рәсми никах теркәлгән.

Өфө районының Шмидтов ауылында мәғариф үҙәге сафҡа инде

Яңы йылда яңы мәктәпкә. Өфө районының Шмидтов ауылында мәғариф үҙәге сафҡа инде. Белем усағы Рәсәй Геройы Илдар Суфияров исемен йөрөтәсәк. Уны асыуҙа Башҡортостан башлығы Радий Хәбиров һәм яугирҙың ғаиләһе, туғандары ла ҡатнашты.

Өфө урамдарын ҡарҙан таҙартыуға 200-ҙән ашыу берәмек техника йәлеп ителгән

Өфө урамдарын ҡарҙан таҙартыуға 200-ҙән ашыу берәмек техника, 340 коммуналь хеҙмәткәр йәлеп ителгән. Баш ҡала хакимиәтенән хәбәр итеүҙәренсә, эш тәүлек әйләнәһенә ойошторолған. Уҙған тәүлектә генә муниципаль хеҙмәттәр 17 мең кубометр ҡар һәм 8 мең ярым кубометр сүп-сар сығарған. 282 тонна боҙға ҡаршы материал ҡулланылған.

Башҡортостанда ҡабанға һунар итеү ҡағиҙәләре ҡатмарлаштырылды

Ҡабандарға һунар иткәндә эт йәлеп итеп уларҙы эҙләү, ҡыуыу һәм тотоу тыйыла. Йыл башынан Башҡортостанда үҙ көсөнә ингән ҡағиҙәләргә ярашлы, һунарсыларға был хайуанды аулағанда коллектив рәүештә эш итеүгә лә ваҡытлыса сикләү индерелгән. Талаптарҙы үтәмәүселәргә 4 мең һумға тиклем штраф ҡаралған.

Мәләүез эшҡыуарҙары Бөтә Рәсәй «Туристик сувенир» конкурсында гран-при яуланы

Мәләүез ҡалаһында йәшәүсе эшҡыуар ғаилә Санкт-Петербургта үткән ун беренсе «Туристик сувенир» Бөтә Рәсәй конкурсында гран-при яулаған. Уларҙың «Башҡортостан ынйылары» 3d-панноһы «Vip Вәкиллек сувенир продукцияһы» номинацияһында иң яҡшыһы тип табылған.

Өфөлә рәссам эпоксид ыҫмалаһынан уникаль паннолар һәм сувенирҙар яһай

Уникаль сувенирҙар һәм эпоксид ыҫмалаһынан үҙенсәлекле паннолар. Уларҙы Өфөлә йәшәүсе рәссам Юлия Сивоконь етештерә. Уның оҫтаханаһында беҙҙең ижади төркәм дә булды. Был хаҡта тулыраҡ киләһе яҙмала.

Өфө районының Шмидтов ауылында 640 урынға иҫәпләнгән мәғариф үҙәге сафҡа инде

Яңы йылда яңы мәктәпкә. Өфө районының Шмидтов ауылында 640 урынға иҫәпләнгән мәғариф үҙәге сафҡа инде. Бер ҡыйыҡ аҫтында ике йөҙ сабый һыйҙырышлы балалар баҡсаһы ла бар. Белем усағы Рәсәй Геройы Илдар Суфияров исемен йөрөтәсәк. Уны асыуҙа Башҡортостан башлығы Радий Хәбиров һәм яугирҙың ғаиләһе, туғандары ҡатнашты.

Радий Хәбиров махсус хәрби операцияла ҡатнашыусы Рөстәм Сафин һәм уның ғаиләһе менән осрашты

Башҡортостан башлығы Радий Хәбиров махсус хәрби операцияла ҡатнашыусы Рөстәм Сафин һәм уның ғаиләһе менән осрашты. Рөстәм Фәнис улы 2015-2022 йылдарҙа Салауат районы Миәшәгәр ауыл биләмәһе башлығы вазифаһында эшләй. Үҙ теләге менән ватан һағына баҫҡан яугир былтыр ноябрҙә төбәк башлығы менән тура бәйләнеш ваҡытында Радий Хәбировҡа видеоэлемтә аша мөрәжәғәт итте.

Башҡортостанда 2026 йыл Ҙур һәм татыу ғаилә йылы тип иғлан ителде

Радий Хәбиров республикала Ҙур һәм татыу ғаилә йылы тип иғлан ителгән 2026 йылға саралар планын әҙерләргә ҡушты. Был башланғыс Рәсәй халыҡтары берҙәмлеге йылы менән ауаздаш. Йылдың тәүге эш көнөндә үткән оператив кәңәшмәлә төрлө йүнәлештәр буйынса йомғаҡтар барланды, оҙайлы ғинуар каникулдарына эшләгән ашығыс хеҙмәттәргә баһа бирелде, киләсәккә маҡсаттар билдәләнде.

Баш ҡаланың электр транспорты паркы әүҙем яңыртыла

Депо паркы 5 троллейбус менән байытылды. Был машиналар Өфө трамвай-троллейбус заводында Белорусияның «Белавтомаз» автозаводы менән кооперацияға берләшеп йыйылған. Кузов һәм рессорҙар белорус партнерынан, ә ҡалған деталдәр башлыса Рәсәй комплектаторҙарынан. Әлеге ваҡытта линияға сығыр алдынан ҡала халҡы өсөн уңайлы транспорт махсус әҙерлек үтә.

Һеләүһендең бәлиғ булмаған балаға ташланыу осрағы буйынса тәфтиш комитеты енәйәт эше ҡуҙғатҡан

Ғәҙәттән тыш хәл Благовещен районындағы спорт лагерында теркәлгән. Ҡайһы бер мәғлүмәттәр буйынса, ҡырағай бесәй биләмәгә яҡындағы урмандан килеүе ихтимал. Һеләүһенде аулау һәм ҡазаға тарыусыға тейешле ярҙам күрһәтеү өсөн урынға дәүләт һунар инспекторы, ветеринар, медицина хеҙмәткәрҙәре, ҡырағай хайуандарҙы ребилитациялау үҙәге вәкилдәре килгән. Бер аҙҙан һеләүһен үлә. Белгестәр уның ҡотороу ауырыуы ихтималлығын фаразлай.

Әлшәй районындағы ҡошсолоҡ фабрикаһында күләмле инвестиция проектын ғәмәлгә ашырыу аҙағына яҡынлаша

Дөйөм етештереүсәнлек күләме йылына 40 миллион дана инкубатор һәм 3 миллион самаһы ашхана йомортҡаһы сығарыуҙы күҙ уңында тота. Предприятие республиканың көньяҡ-көнбайышында аграр инфраструктураны нығытырға һәм төбәктең үҙ ҡошсолоҡ продукцияһы менән тәьмин итеүҙе арттырырға мөмкинлек бирә.

Былтыр Башҡортостанда 21 меңдән ашыу бала бушлай һөт ризығы менән тәьмин ителгән

«Һөт кухняһы» төбәк социаль ярҙам программаһы 7 йыл элек эшләй башланы. Ошо ваҡыт эсендә республиканың төрлө төбәктәрендә 7 етештереү майҙансығы асылды. Былтыр улар 3 мең 200 тоннанан ашыу сеймал эшкәрткән һәм 2 мең ярым тонна әҙер продукция сығарған. Ташлама менән файҙаланыусылар категорияһы ла киңәйтелгән.

Ғафури районында туристарҙы атта йөрөү һәм иппотерапия йәлеп итә

Тәбиғәт һәйкәлдәре, тарихи һәм мәҙәни объекттар: йылдан-йыл Ғафури районына туристар ағымы арта. Өфөнән 145 саҡрым арауыҡта ғына туристик база урынлашҡан, ял итеүселәр ағас йорттарҙа ял итеүҙән тыш, атта һыбай йөрөргә өйрәнә ала. Шулай уҡ бында мөмкинлектәре сикләнгән балаларға эскурсиялар ҙа ойошторола. Туғыҙ йыл дауамында уңышлы эшмәкәрлек алып барған «Ат ихатаһы»нда БЮТ ижади төркөмө лә булды.

Шыршы тапшыр - бүләккә мандарин ал

Өфөлә яңы йыл ҡупшыҡайҙарын эшкәртеүгә тапшырыу буйынса экологик акция уҙа. Баш ҡалала ылыҫлы ағастарҙы ҡабул итеү буйынса 11 пункт булдырылған. Уларҙың адресы менән Өфө ҡала хакимиәте сайтында танышырға мөмкин. Эшкәртелгән шыршылар мебель етештереүҙә ҡулланыла. Шыршыларҙы 17 һәм 18 ғинуарҙа көндөҙгө сәғәт 12-нән 4-кә тиклем тапшырырға мөмкин. Былтыр экологик акция барышында ике меңдән ашыу ылыҫлы ағас тупланған.

Өсөнсө балалар фольклориадаһы гимнына конкурс иғлан ителде

Ижади ярышта профессиональ, шулайуҡ һәүәҫкәр шағирҙар һәм композиторҙар ҡатнаша ала. Заявкалар 9 февралгә тиклемҡабул ителә. Конкурс положениеһы менән Республика халыҡ ижады үҙәге сайтындатанышырға була. Бәйгелә еңгән йыр Бөтә Рәсәй балалар фольклориадаһы сараларындаҡулланыла. Ҙур форум быйыл Өфөлә уҙғарыла. Ил төбәктәренән йыр, бейеү һәммузыка ҡоралдары коллективтары килеүе көтөлә.

Радий Хәбиров республика журналистарын Рәсәй матбуғаты көнө менән ҡотланы

Төбәк етәксеһе билдәләүенсә, беҙҙә абруйлы һәм әһәмиәтле мәғлүмәт саралары күп. Шуларҙың иң өлкәндәренең береһе-«Республика Башкортосан» гәзите. Быйыл баҫма үҙенең 120 йыллығын билдәләй. 1906 йылда сыға башлаған гәзит тәүҙә «Уфимский рабочий» тип аталған.

Бөгөн Өфөлә "Аксаков шыршыһы" уҙғарылды

Хәйриә байрамына төрлө ҡала һәмрайондарҙан һаулыҡ мөмкинлеге сикләнгән һәм махсус хәрби операцияла ҡатнашыусыларҙың балалары йыйылды. Сара башҡорт дәүләт опер һәм балеттеатрында үтте. Балаларға спектакль күрһәтелде. БайрамдаРеспублика башлығы Радий Хәбиров ҡатнашты. - Бөгөн Иҫкесә яңы йыл. Һеҙ иң яҡшы, матур, аҡыллы,көслө балалар. Ныҡлы һаулыҡ, яҡшы уҡыуығыҙҙы,ата-әсәләрегеҙҙе тыңлауығыҙҙы,хыялдарығыҙҙың тормошҡа ашыуын теләйбеҙ,тине Радий Хәбиров. "Аксаков шыршыһы" 2019 йылдан алып уҙғарылып килә.