Хәйбулла районы Яңы Ергән ауылында махсус хәрби операцияла ҡатнашыусылар хөрмәтенә обелиск асылды

Тантанаға махсус хәрби операция яугирҙары,уларҙың туғандары һәм яҡындары, ауыл халҡы, уҡыусылар йыйылды. Ҡаһарман хәрбиҙәргә арналған бындай обелисктарҙы райондың 13 ауыл биләмәһендә лә асыу ҡарала. Митинг аҙағында ҡатнашыусылар яуҙа һәләк булған яҡташтарын бер минут тынлыҡ менән иҫкә алды.

Ауырғазы районы халҡы тағы ла бер проектты ғәмәлгә ашырҙы

Халыҡ теләге буйынса. «Урындағы башланғыстарҙы яҡлау» республика программаһы нигеҙендә Ауырғазы районы Сыуаш-Ҡарамалы ауылы мәктәбендә тәҙрәләр яңыртылған. Биләмәлә йәшәүселәр проектта тәүгә генә ҡатнашмай, быға тиклем быуаның тирә-яғы, мәҙәниәт йорто, мемориаль комплекс төҙөкләндерелгән. Белем усағында ла ремонт өсөнсөгә уҙғарылған.

Өфөлә торлаҡ-коммуналь хеҙмәттәр урамдарҙы һәм ихаталарҙы ҡарҙан таҙартыу менән мәшғүл

Башҡортостанда күпләп ҡар яуҙы. Өфөлә торлаҡ-коммуналь хеҙмәттәр урамдарҙы һәм ихаталарҙы ҡарҙан таҙартыу менән мәшғүл. Эшкә 1 мең 260-тан ашыу хеҙмәткәр, 570 берәмек техника йәлеп ителгән. Ҡар сығарыу төп йүнәлештәр буйынса алып барыла: магистралдәр механизация саралары ярҙамында таҙартылһа, социаль учреждениелар эргәһе, ихаталар һәм тротуарҙар ҡул менән көрәлә.

«Шүлгәнташ» йыл йомғаҡтары буйынса рәсми рәүештә ЮНЕСКО-ның бөтә донъя мираҫы исемлегенә инде

Был турала Рәсәйҙең ЮНЕСКО эштәре буйынса комиссияһының дөйөм йыйылышында хәбәр ителде. Осрашыуҙа Рәсәйҙең сит ил эштәре министры Сергей Лавров һәм Башҡортостан башлығы Радий Хәбиров ҡатнашты. Сергей Лавров үҙенең сығышында билдәле мәмерйәне исемлеккә индереү тураһындағы ҡарарҙың Рәсәй башланғысы менән ҡабул ителеүен билдәләне.

Мәскәүҙә Радий Хәбиров Мәскәү авиация институты ректоры Михаил Погосян менән осрашты

Яҡтар төбәктең Рәсәйҙең иң ҙур техник вуздарының береһе менән хеҙмәттәшлеген нығытыу мәсьәләләрен тикшерҙе. Михаил Погосян билдәләүенсә, Рәсәйҙең аэрокосмос вуздары консорциумы эшмәкәрлеге сиктәрендә юғары уҡыу йорто Өфө фән һәм технологиялар университеты менән үҙ-ара эшмәкәрлек итә. Әле университетта Башҡортостандан 169 студент белем ала, уларҙың 23-ө-маҡсатлы нигеҙҙә.

Яңы йыл байрамдарында сүп-сар сығарыу өҙлөкһөҙ ойошторолорға тейеш

Яңы йыл байрамдарында ҡаты көнкүреш ҡалдыҡтарын сығарыу буйынса саралар ваҡытында ойошторолорға тейеш. Хөкүмәт йортонда ойошторолған кәңәшмәлә был мәсьәләгә айырым иғтибар бүленде. Билдәле булыуынса, сүп-сар сығарыуға 436 берәмек техника йәлеп ителгән. Премьер-министр Андрей Назаров район-ҡалаларҙа был йүнәлештә эште өҙлөкһөҙ алып барырға, халыҡтың мөрәжәғәттәрен оператив эшкәртергә ҡушты.

Яңы йыл байрамдарында республикала юғары әҙерлек режимы иғлан ителде

Хөкүмәт йортонда Ғәҙәттән тыш хәлдәрҙе иҫкәртеү һәм бөтөрөү, янғын хәүефһеҙлеген тәьмин итеү буйынса комиссия киләһе йылға эш планын раҫланы. Ултырышта шулай уҡ халыҡты ашығыс иҫкәртеү буйынса комплекслы системаны үҫтереү буйынса сараларҙың юл картаһы билдәләнде. Һауа торошо шарттарына бәйле «Йоҡа боҙ» профилактик акцияһы 31 декабргә тиклем оҙайтылды.

Өфө предприятиеһында һаҡсыл производство технологиялары индерелде

Бәләкәй бизнестың ҙур мөмкинлектәре. Өфөләге предприятиеларҙың береһе Төбәк компетенциялар үҙәгенең адреслы ярҙамын ҡулланып, һаҡсыл производство технологияһын индергән. Был хеҙмәткәрҙәргә эш процессын оптималләштерергә һәм компания ресурстарын һөҙөмтәлерәк файҙаланырға булышлыҡ иткән.

Октябрьскийҙан 10 йәшлек Әминә Шәңгәрәева Башҡортостан башлығының эш кабинетында ҡунаҡта булды

Хәтерегеҙгә төшөрәбеҙ, 4-се класс уҡыусыһы ноябрҙә Радий Хәбировҡа Республика көнөнә арналған һүрәтен бүләк итеү теләге менән тура бәйләнешкә сыҡҡайны. Осрашыуҙа төбәк етәксеһе үҙенең эше хаҡында һөйләне һәм уҡыусыға яңы йыл бүләге тапшырҙы. Аралашыу барышында ҡыҙ дизайнер булырға хыялланыуы, икенсе йыл балалар сәнғәт мәктәбендә уҡыуы хаҡында әйтте.

Өфөлә балалар өсөн изгелекле шыршы байрамы ойошторолдо

Өфөлә адмирал Бакаев исемендәге диңгеҙселәр үҙәгендә 3-сө мәктәп-интернатында тәрбиәләнеүсе утыҙ балаға шыршы байрамы ойошторолдо. Малай -ҡыҙҙар башлыса махсус хәрби операция яугирҙары һәм ауыр тормош хәлендә ҡалған ғаиләләрҙән. Улар өсөн хаҡлы ялдағы Юрий Иванов махсус рәүештә шыршы һатып алып биҙәгән, тәмлекәстәр әҙерләгән.

Өфөлә «Ағиҙел майҙаны» тип аталған биләмә барлыҡҡа килеүе ихтимал

Баш ҡала советы депутаттары иртәгә үтәсәк ултырышта ошо туралағы ҡарар проектын ҡараясаҡ. Биләмә «Дуҫлыҡ монументы» ҡаршыһында урынлашҡан. Майҙансыҡта башҡорт һәм абхаз халыҡтарының дуҫлығын күҙәләндергән колоннада урынлашҡан.

Өфө клиникаларының береһендә өҙөлгән ҡолаҡты тергеҙеү буйынса уникаль операция яһалды

Ҡолағын эт тешләп өҙгән пациент Белорет ҡалаһындағы травмпунктта беренсе медицина ярҙамы алғандан һуң баш ҡалалағы шәхси клиникаға мөрәжәғәт итә. Клиника директоры Артур Гасаев бер нисә этапта яһала торған операцияны бер юлы эшләп пациенттың ҡолағының эстетик матурлығын да ҡайтара. Пациент әле реабилитация үтә.

Бөрө районында күлгә батып һәләк булған һарыҡтарҙың хужаһы ҙур юғалтыуҙар кисерә

Күрелгән зыян күләме 20 миллион һумға етеүе мөмкин. Бөрө районында күлгә батып һәләк булған һарыҡтарҙың хужаһы ҙур юғалтыуҙар кисерә. Яҡынса мәғлүмәттәр буйынса, меңдән ашыу ваҡ мал боҙ аҫтына киткән. Ваҡиғаға сәбәпсе тип боҙҙоң йоҡа булыуы һәм һәләкәт көндө ҡыш миҙгеленә хас булмаған һауа торошо ҡарала. Фермерға ҡотҡарыусылар күрһәткән хеҙмәткә түләргә, һәләк булған хайуандарҙы Алабуға ҡалаһындағы мал ҡәберлегенә оҙатырға ла тура киләсәк.

Баш мөфтөй Тәлғәт Тажетдиндың тормош иптәше Сания Ғәбдерәүеф ҡыҙы вафат булды

Баш мөфтөй, Рәсәй мосолмандарының Үҙәк диниә назараты рәйесе Тәлғәт Тажетдиндың тормош иптәше Сания Ғәбдерәүеф ҡыҙының 81-се йәшендә йөрәге тибеүҙән туҡтаған. Улар алтмыш йылға яҡын бергә йәшәй. Мәрхүмәнең яҡындарының ауыр ҡайғыһын Башҡортостан башлығы Радий Хәбиров уртаҡлашты.

Муай-тай буйынса халыҡ-ара турнир еңеүсеһе Зарина Исламова Башҡортостанға ҡайтты

Уҙған айҙа Сибай ҡыҙы Японияла чемпион исемен яуланы. Ул Камбоджа вәкилен нокаутта еңеп, алышты ваҡытынан алда тамамланы. Шулай уҡ Зарина быйыл кикбоксинг ҡағиҙәләре буйынса үҙенең беренсе профессиональ алышын үткәргән, унда тәжрибәле дәғүәсеһен еңгән.

Радий Хәбиров республика халҡын Башҡортостан Конституцияһы көнө менән ҡотланы

«Бөгөн, 24 декабрҙә Башҡортостан Конституцияһы көнө билдәләнә. Конституция-республиканың төбәккә үҫеш мөмкинлеге биргән ҡануни нигеҙе. Булған ҡиммәттәребеҙгә таянып алға барырға кәрәк. Быуаттар дауамында Башҡортостан бөйөк Рәсәйҙең мөһим өлөшө булып ҡала һәм беҙҙең Конституция ошо берҙәмлекте нығыта. Барығыҙҙы ла Башҡортостан Республикаһы Конституцияһы көнө менән ҡотлайым!» тип белдергән Радий Хәбиров.

Дәүләт Йыйылышы депутаттарынан кескәйҙәргә яңы йыл бүләге

Яңы йыл алды мөғжизәләргә бай. Дәүләт Йыйылышы-Ҡоролтай депутаттары 200-ҙән ашыу баланы Мәжит Ғафури исемендәге Башҡорт дәүләт академия драма театрына саҡырҙы. Кескәй тамашасылар араһында физик мөмкинлеге сикләнгән балалар ҙа, етем һәм аҙ тәьмин ителгән ғаиләләрҙә тәрбиәләнеүселәр ҙә, алғы һыҙыҡтағы яугирҙарыбыҙҙың ул-ҡыҙҙары ла бар.

Республика йортонда Шәйехзада Бабич исемендәге дәүләт йәштәр премияһы лауреаттары тәбрикләнде

Тантана Башҡортостан башлығы Хакимиәте етәксеһе вазифаһын башҡарыусы Искәндәр Әхмәтвәлиев рәйеслегендә үтте. 2023, 2024 йылдарҙағы ижады өсөн бер төркөм йәштәргә абруйлы премия тапшырылды.

Республикала көндәрҙең кинәт һыуытыуы, һауа температураһының 30 градустан түбән төшөүе көтөлә

Синоптиктар хәбәр итеүенсә, алдағы төндә термометр бағаналарының аяҙайтҡанда 32-36 градусҡаса түбәнәйеүе ихтимал. Көндөҙ бер аҙ ҡар яуыуы, һауа температураһының ҡырҡа үҙгәреүе һөҙөмтәһендә юлдарҙа боҙлауыҡ булыуы ихтимал. Ошоға бәйле водителдәргә һәм йәйәүлеләргә иғтибарлы булыу кәңәш ителә. Белгестәр һыуыҡтан һаҡланыу саралары тураһында онотмаҫҡа саҡыра.

Салауат Юлаев батальоны яугирҙары Донецк халыҡ республикаһындағы дислокация урынында сиркәү төҙөнө

Ғибәҙәтхананы Башҡортостан яугирҙарының рухи остазы Отец Виктор изгеләндерҙе. Күптән түгел генә яҡташтарыбыҙ ошо уҡ урында мәсет һалғайны. Иман йорто һәм сиркәүҙең йәнәш урынлашыуы тотош илдәге конфессия- ара татыулыҡ, толерантлыҡ өлгөһө. Тап ошо дуҫлыҡҡа шына ҡағыу ниәте коллектив көнбайышҡа тынғылыҡ бирмәй, ти диндарҙар.

Башҡортостан туристарҙы йәлеп итеү индексында ТОП-10 төбәк иҫәбенә инде

Башҡортостан бөтә Рәсәй туристарҙы йәлеп итеү индексында 9-сы урынға сығып, илдең ТОП-10 төбәге исемлегенә ингән. 11-се позициянан алға күсеү этнографиянан алып әүҙем ял итеүгә тиклем төрлө планлы туристик продукт булдырыу буйынса системалы эштең уңышлы булыуын иҫбатлай. Был йәһәттән фәнни-популяр туризм айырым стратегик йүнәлеш булып тора: республикала милли проект сиктәрендә 9 дисциплина-ара маршрут булдырылған.