Быйыл Башҡортостан урмансылары 49 миллионға яҡын үҫенте үҫтергән

Күләмле эштәр “Урмандарҙы һаҡлау” проекты буйынса тормошҡа ашырылған. Ҡиммәтле ылыҫлылар – ҡарағай һәм шыршыға өҫтөнлөк бирелгән. Был ағастарҙы һайлау осраҡлы түгел: улар климат өсөн оптималь үҫеш тиҙлегенә эйә һәм баҙарҙа ҙур ихтыяж менән файҙалана, урман хужалығының иҡтисади һөҙөмтәлелеген дә, ҡиммәтле урман биләмәләрен тергеҙеүҙе лә тәьмин итә, тип белдерәләр Урман хужалығы министрлығынан. Үҫентеләр урманды тергеҙеү һәм тәбиғәтте һаҡлау акцияларын үткәреү буйынса саралар комплексы өсөн файҙаланыла.

Башҡортостан һәм Үзбәкстан араһында яңы хеҙмәттәшлек йүнәлештәре барланды

Радий Хәбиров Рәсәй хөкүмәте рәйесенең беренсе урынбаҫары Динис Мантуров етәкселегендәге рәсми делегация составында Үзбәкстан Президенты Шәфҡәт Мирзиёев менән осрашыуҙа ҡатнашты. Көн тәртибенә иҡтисадтың өҫтөнлөклө йүнәлештәрендә берҙәм проекттарҙы тормошҡа ашырыу, мәғариф һәм фән өлкәһендә хеҙмәттәшлек, төбәк-ара бәйләнештәрҙе нығытыу мәсьәләләре сығарылды.

"Владимир Путин менән йыл йомғаҡтары" 19 декабрҙә була

Программа Өфө ваҡыты менән сәғәт 2-лә башлана. Кремлдән хәбәр итеүҙәренсә, Владимир Путин тура эфирҙа йыл ваҡиғаларына йомғаҡ яһай, журналистар һәм тамашасылар һорауҙарына яуап бирә. Һәр кеше москва-путину.рфсайты аша, шулай уҡ 0-40-40 һандарына СМС хәбәр менән, 8-800-200-40-40 телефонына шылтыратып һорауын ҡалдыра ала. Шулай уҡ социаль селтәрҙәр аша мөрәжәғәт итергә мөмкин.

Башҡортостанда 687 такси машинаһы эшмәкәрлеге туҡтатылды

Уларҙың хужалары гражданлыҡ яуаплылығын страховкалау тураһында килешеү төҙөмәгән. Транспорт һәм юл хужалығы министрлығынан хәбәр итеүҙәренсә, рейдтар барышында 189 компания һәм таксистың тейешле документтары булмауы асыҡланған. Уларға ошо етешһеҙлекте бөтөрөү өсөн бер ай ваҡыт бирелгән. Страховкалау тураһында килешеүгә ярашлы, такси машинаһы аварияға эләкһә пассажирға компенсация түләнә. Документ булмаһа таксист салондағы башҡа кешеләрҙең ғүмере һәм сәләмәтлеге өсөн яуап бирмәй.

Радий Хәбиров Үзбәкстан төбәктәре менән фән, сәнәғәт һәм агросферала хеҙмәттәшлек көсөйтә

Радий Хәбиров Үзбәкстандың Ташкент өлкәһе хакимы Зойир Мирзаев һәм Фирғәнә өлкәһе хакимы Хайрулло Бозоров менән осрашты. Республика башлығы менән Ташкент өлкәһе етәксеһе араһындағы һөйләшеүҙә эшҡыуарҙар һәм муниципалитеттар кооперацияһын үҫтереү юлдары барланды. Сәнәғәт үҫешкән төбәктә үзбәк-башҡорт технопаркын булдырыу ниәте тормошҡа ашырыла.

Башҡортостан менән Үзбәкстан музей эше һәм археология өлкәһендә лә хеҙмәттәшлек нығыта

Ташкентта Радий Хәбиров яңы төҙөлгән ислам цивилизацияһы үҙәген барып күрҙе. Был локация бөтә донъя тарихсыларын йәлеп итеүсе урын буласаҡ. Белгестәр араһындағы хеҙмәттәшлек Башҡортостанда Евразия күсмә халыҡтар цивилизацияһы музейын төҙөүҙә лә ҙур ярҙам, тип баһаланы республика етәксеһе.

Өфөлә «Йыл һалым түләүсеһе» республика конкурсы еңеүселәре бүләкләнде

Башҡортостан Хөкүмәте менән Финанс министрлығы тарафынан етенсе йыл рәттән ойошторолған бәйгелә төрлө эшмәкәрлек алып барған предприятие-ойошмалар ҡатнашты. Республика Хөкүмәте премьер-министры Андрей Назаров еңеүселәрҙе һәм лауреттарҙы ҡотлап, төбәктең бюджет сәйәсәте, социаль-иҡтисади үҫеш күрһәткестәре менән таныштырҙы. Һалым килемдәре ҡуйылған бурыстарҙы ваҡытында һәм тулы кимәлдә тормошҡа ашырырға ярҙам итә.

Мишкә үҙәк район дауаханаһы яңы медицина техникаһы менән йыһазландырылды

Дауаханала «Парус» күсмә рентген-аппараты барлыҡҡа килде. Медицина ҡорамалын махсус бүлмәлә генә түгел, палаталарҙа ла ҡулланырға мөмкин. Был ауыр сирле пациенттарҙы диагностикалауҙа уңайлы. Заманса аппарат яһалма интеллект системаһы менән эшләй. Рентген һүрәте шунда уҡ табип эшләгән компьютерға килә.

Өфөлә Халыҡ-ара инвалидтар көнө уңайынан башҡорт параатлеттары өсөн тантаналы сара үтте

Республика Хөкүмәте премьер-министры урынбаҫары Руслан Хәбибов спорстыларға Рәхмәт хаттары тапшырҙы. Бөгөн төбәктә мөмкинлектәре сикләнгән 250 меңгә яҡын кеше йәшәй, уларҙың 20 меңдән ашыуы-балалар. Йыл һайын инвалидтар араһында тиҫтәләгән спорт сараһы үтә, паралимпия берләшмәһе лә йылдам үҫешә.

Вуз-ара студенттар кампусының Геном үҙәгендә Дөйөм Рәсәй юридик форумының пленар ултырышы үтте

Хоҡуҡтар өҫтөнлөгө. Вуз-ара студенттар кампусының Геном үҙәгендә Дөйөм Рәсәй юридик форумының пленар ултырышы үтте. Башҡортостан башлығы Радий Хәбиров сарала ҡатнашыусыларҙы сәләмләп, юристар ассоциацияһының 20 йыллыҡ эшмәкәрлек һөҙөмтәһендә закондар сығарыу һәм хоҡуҡтарҙы ҡулланыу практикаһына индергән өлөшөн юғары баһаланы.

Өфөлә бизнесты яҡлауға арналған федераль сессия үтте

Өфөнөң «Торатау» Конгресс-холында, бизнесты яҡлау һәм инвестиция мөхитен яҡшыртыу өлкәһендә һөҙөмтәле тәжрибәләр менән алмашыуға арналған сессия үтте. Халыҡ-ара бизнес аҙналығы сиктәрендә ойошторолған һөйләшеү федераль эксперттарҙы, бизнес-омбудсмендарҙы, контроль-күҙәтеү органдары, урындағы власть һәм эшлекле даирә вәкилдәрен йыйҙы. Федераль эксперттар, контроль-күҙәтеү, бизнесты яҡлау институттары, эшлекле берләшмәләр эшҡыуарҙар һәм ҡулланыусыларҙың хоҡуҡтарын яҡлау өлкәһендәге тәжрибәһе менән уртаҡлашты.

Өфөнөң Атаевка ауылындағы шәхси майҙансыҡта вертолет түңкәрелгән

Өфөнөң Атаевка ауылындағы шәхси майҙансыҡта вертолет түңкәрелгән. Ғәҙәттән тыш хәл осоу аппараты ергә ултырған мәлдә теркәлә. Төрлө тән йәрәхәттәре алған пилот дауаханаға оҙатылған. Башҡа зыян күреүселәр юҡ. Әле ваҡиға урынында тәфтишселәр эшләй.

Радий Хәбиров Яңы йылды хәүефһеҙ үткәреү бурысын ҡуйҙы

Яңы йылды фажиғәһеҙ һәм бәлә-ҡазаһыҙ. Бигерәк тә балалар айырым иғтибар үҙәгендә булырға тейеш. Башҡортостан Башлығы Радий Хәбиров байрамды хәүеф-хәтәрһеҙ ҡаршылау өсөн мөмкин булғандың бөтәһен дә эшләргә ҡушты. Пиротехника сраларын ҡулланғанда айырыуса хәүефһеҙлек ҡағиҙәләрен ҡәтғи үтәү мәжбүри. Ғәҙәттән тыш хәлдәрҙән ҡотолорға ярҙам иткән төп һаҡлыҡ саралары хаҡында репортаж.

Баймаҡ районы Мерәҫ ауылында яңы фельдшер-акушерлыҡ пункты үҙ ишектәрен асты

Урындағы халыҡ был объектты һорап Республика башлығы Радий Хәбировтың эш сәфәре барышында мөрәжәғәт иткәйне. Уларҙың хыялы тормошҡа ашты. Хәҙер ауылда яңы ФАП.

Өфөнөң һөт заводтарының береһе сеймал эшкәртеүҙе ике тапҡырға арттырырға ниәтләй

Ошо маҡсатта предприятие модернизацияға 5 миллиард һумдан ашыу аҡса һалып, тәүлегенә 500 тонна һөт етештереүҙе күҙ уңында тота. Киләһе биш йыллыҡта компания ассортиментты киңәйтеү бурысын да ҡуйған. Башҡортостандың Ауыл хужалығы министрлығынан белдереүҙәренсә, республикала 2030 йылға тиклем 50 ферма барлыҡҡа килергә тейеш.

Ҡазанда «Һөнәр» фестивале: «Аҡбуҙат» тамашасылар күңелен яуланы

XVII Бөтә Рәсәй «Һөнәр» йәш режиссура фестивалендә Мостай Кәрим исемендәге Милли йәштәр театры сығыш яһаны. Ижади коллектив башҡорт халыҡ эпосы буйынса әҙерләнгән «Аҡбуҙат» спектаклен тәҡдим итте. Күләмле мәҙәни сара быйыл илдең 10 ҡала театрҙары ҡатнашлығында үтә.

Өфөлә «Бизнес һаҡсылары» бүләкләнде

Премия эшҡыуарҙар өсөн уңайлы мөхит булдырыусыларҙы һәм уларҙың мәнфәғәттәрен яҡлаусыларҙы билдәләүгә йүнәлтелгән. Ҡатнашыусылар араһында-коммерсанттар, бәләкәй һәм урта бизнесҡа ярҙам итеү институттары вәкилдәре, шулай уҡ юристар бар. Уларҙың хеҙмәте 8 номинация буйынса баһаланды.

Салауатта «Ғаилә ҡунаҡханаһы» клубы осрашыуы үтте

Ауыр юғалтыу кисереүселәр тураһында хәстәрлек. Салауатта «Ғаилә ҡунаҡханаһы» клубы осрашыуы үтте. Махсус хәрби операцияла һәләк булғандарҙың яҡындары өсөн эшләп килгән ойошма «Ватан һаҡсылары» дәүләт фонды филиалы һәм «Башҡорт ҡатын-ҡыҙҙар йәмғиәте» менән берлектә булдырылған. Бындай осрашыуҙар яҡындарын юғалтыусыларға ярҙам һәм көс бирә, яраланып ҡайтҡан яугирҙарға киләсәккә өмөт уята.

Башҡортостанда вертолеттың ҡолау сәбәбе булып техник етешһеҙлек һәм пилотаж хатаһы кеүек версиялар ҡарала

Был хаҡта Рәсәй тәфтиш комитетының үҙәк төбәк-ара транспорт тәфтиш идаралығы хәбәр итә. Тикшереүгә Волга буйы транспорт прокуратураһы белгестәре лә ҡушылған. Улар осоштар хәүефһеҙлеге тураһындағы ҡануниәттең үтәлешен тикшерә, нигеҙ булғанда тейешле сара ҡабул ителәсәк. Иҫегеҙгә төшөрәбеҙ, һауа судноһы кисә Өфөнөң Атаевка ауылы эргәһендә урынлашҡан шәхси вертолет майҙансығында ҡазаға тарый. Йәрәхәтләнгән пилотҡа медицина ярҙамы талап ителгән.

Өфөлә «Уҡытыу, тәжрибә, профессионализм» 2-се Евразия торакаль хирургтар конгресы асылды

Өс көн дауам иткән форумда Рәсәй төбәктәре һәм Ҡытайҙан, Ҡаҙағстандан, Үзбәкстандан, Төркмәнстандан, Беларусь республикаһынан, Ирандан, Төркиәнән, Тажикстандан 700-ҙән ашыу кеше ҡатнаша.

Республикала күренекле дипломат Кәрим Хәкимовтың тыуыуына 135 йыл тулыу айҡанлы хәтер саралары үтә

Өфө фән һәм технологиялар универсиетында асылған ғилми-ғәмәли конференцияла ҡатнашыусылар шәхестең тормош юлын һәм дәүләт эшмәкәрлеген иҫкә алды. Совет дипломаты, ғәрәп илдәрендәге тәүге тулы хоҡуҡлы илсе Кәрим Хәкимов Сәғүд дәүләтенең барлыҡҡа килеүендә ҡатнаша һәм ил менән идара иткән хакимдың яҡын дуҫына әйләнә, ярымутрау халҡының ышанысын яулап дәүләт-ара хеҙмәттәшлекте нығыта.