Александр Жаровский карьераһын «Салауат Юлаев» клубында дауам итергә ниәтләй

Был хаҡта юлаевсылар етәксеһе Ринат Бәширов белдерҙе. Уның һүҙҙәренсә, 18 йәшлек хоккейсының Өфө командаһы менән контракты тағы ла йыл ярым ғәмәлдә буласаҡ. Иҫегеҙгә төшөрәбеҙ, быйыл йәй һөжүмсе НХЛ драфтында «Монреаль» тарафынан һайланды. Континенталь хоккей лигаһының быйылғы даими чемпионатында Александр Жаровский әлегә 20 мәрәй туплап өлгөргән.

Өфөләге предприятие һаҡсыл технологиялар ҡулланып етештереү ҡеүәтен ун процентҡа арттырған

Өфөләге предприятие һаҡсыл технологиялар ҡулланып етештереү ҡеүәтен ун процентҡа арттырған. Өфө быраулау ҡорамалдары заводы төбәк компетенциялар үҙәге менән берлектә яңы проект тормошҡа ашырып, икенсе ай яңыса алымдар буйынса продукция сығара. Предприятие етәкселеге производстволағы ыңғай үҙгәрештәрҙе билдәләй.

Махсус хәрби операцияла батырлыҡ күрһәткәндәр яугирҙар Шайморатов миҙалдары алды

25-се дөйөм ғәсҡәр армияһында, фиҙаҡәрлек күрһәткән яугирҙарға Башҡортостандың дәүләт наградалары-Шайморатов миҙалдары, армия командующийына Шайморатов ордены тапшырылды. Бүләкләү тантанаһынан хәрби хәбәрсебеҙ әҙерләгән яҙма.

Шаран районында яугирҙар өсөн «Быҡтырылған ит» акцияһы үтте

Ауыл халҡынан яугирҙарға ярҙам. Шаран районында урындағы башланғыстарға ярҙам итеү программаһында ҡатнашыусылар «Махсус хәрби операция яугирҙарына быҡтырылған ит» акцияһы ойошторҙо. Изге сарала райондың бер нисә ауыл вәкилдәре ҡатнашты.

Өфөлә «Ус төбөндәге бәхет» Бөтә Рәсәй премияһын тапшырыу тантанаһы үтте

Сараға етлекмәй тыуған сабыйҙарға үҫергә ярҙам иткән белгестәр саҡырылды. Конкурстың маҡсаты-табиптарға, шәфҡәт туташтарына, психологтарға, реабилитологтарға һәм көн һайын бәләкәй пациенттарҙы ҡотҡарған һәм тәрбиәләгән башҡа медицина хеҙмәткәрҙәренә фиҙаҡәр хеҙмәте өсөн рәхмәт белдереү.

Иглин районында тәүге тапҡыр 12 метрлыҡ яһалма шыршы ҡуйылды

Башҡортостандың барлыҡ төбәктәрендә лә Яңы йыл байрамына әҙерлек бара. Иглин район мәҙәниәт йорто алдындағы майҙанға ла тәүге тапҡыр 12 метрлыҡ яһалма шыршы ҡуйылды. Ул урман һылыуҡайынан бер ҙә ҡалышмай. Сағыу уттар һәм төрлө төҫтәге шарҙар менән биҙәлгән йәшел ҡупшыҡай бөгөндән үк байрам кәйефе өлөшә.

Ташкентта Башҡортостан менән Үзбәкстан араһында иҡтисади юл картаһына ҡул ҡуйылды

Бөгөн Башҡортостан башлығы Радий Хәбиров Ташкентта Үзбәкстан менән Рәсәй араһында иҡтисади хеҙмәттәшлек буйынса Хөкүмәт-ара комиссияның 26-сы ултырышында ҡатнашты. Уны Рәсәй Хөкүмәте рәйесенең беренсе урынбаҫары Денис Мантуров менән Үзбәкстан Премьер-министры урынбаҫары Жамшид Ходжаев үткәрҙе.

Башҡортостан менән Үзбәкстандың төрлө өлкәләрҙә күптәнге үҙ-ара хеҙмәттәшлек тарихы бар

Сәнәғәт кооперацияһы айырым урын биләй. Ташкент өлкәһендә берлектәге индустриаль парк булдырыу өҫтөндә эш алып барыла. Үҙ сиратында Стәрлетамаҡта «Толпар» технопаркын булдырыу буйынса проект тормошҡа ашырыла. Күптән түгел Наманган өлкәһенең туҡыма етештереү предприятиеһы Өфөлә үҙ кибетен асты. Ике республиканың сауҙа-иҡтисади бәйләнештәре генә нығынып ҡалмай, туризм өлкәһендә лә үҙ-ара мөнәсәбәттәр яйға һалына.

Өфөлә Халыҡ-ара эшҡыуарлыҡ аҙналығы старт алды

«Торатау» конгресс-холында уҙған сараның беренсе көнө хеҙмәт етештереүсәнлеге, шулай уҡ социаль һәм йәштәр эшҡыуарлығы мәсьәләләренә арналды. Йыл һайын форумда Рәсәйҙән һәм башҡа илдәрҙән эшҡыуарҙар ҡатнаша. Был юлы сарала Төркиә, Үзбәкстан, Белоруссия, Һиндостан һәм башҡа дәүләттәр вәкилдәре бар.

Саҡмағошта ауыл техникаһын яңы миҙгелгә әҙерләү буйынса республика семинары үтте

Санаңды йәй, арбаңды ҡыш әҙерлә. Саҡмағош районында ауыл хужалығы техникаһын ремонтлау һәм уны киләһе сәсеү миҙгеленә әҙерләү мәсьәләләренә арналған республика семинар-кәңәшмәһе үтте. Тәжрибә уртаҡлашыу, баҫыуҙарҙы эшкәртеүҙәге алдынғы ысулдар хаҡындағы форум хаҡында репортаж.

ӨФТУ-нда «Киләсәк моторы» алдынғы инженерлыҡ мәктәбе өсөнсө йыл уңышлы эшләй

Техникаға һәм фәнгә һөйөү мәктәп партаһынан башлана. Өфө фән һәм технологиялар университетында «Киләсәк моторы» алдынғы инженерлыҡ мәктәбе өсөнсө йыл уңышлы эшләй. Белгестәрҙең студенттар менән берлектә яһалған эшләнмәләре донъя аналогтарынан бер ҙә ҡайтыш түгел.

Өфөлә шәфҡәт туташтары роботлаштырылған операциялар серҙәрен өйрәнә

Башҡорт дәүләт медицина университетында операция шәфҡәт туташтары өсөн Рәсәйҙә беренсе махсуслаштырылған уҡытыу курсы асылды. 4 көн дауамында Мәскәү, Санкт-Петербург, Краснодар, Дондағы Ростов һәм Владивостоктың алдынғы клиникалары хеҙмәткәрҙәре роботлаштырылған хирургияла Башҡортостан табиптары тәжрибәһен үҙләштерәсәк.

Башҡортостанда ВИЧ инфекцияһын иҫкәртеү аҙналығы үтә

Уға ярашлы, табиптарҙан консультация алырға, аноним рәүештә анализ бирергә мөмкин. Профилактик сараларҙың бер өлөшө «Позитив мөхит» проекты сиктәрендә башҡарыла. Бында ВИЧ инфекцияһы менән зарарланған һәм әүҙем тормош алып барған ирекмән консультанттар күп яҡлы ярҙам күрһәтә. Тулыраҡ мәғлүмәт киләһе яҙмала.

Өфөнөң Калинин районында кер йыуыу пункты асылды

Унда башлыса инвалидтар эшләй. Һаулыҡ мөмкинлектәре сикләнгәндәр өсөн эш урыны булдырыу һәм ҡоролмалар һатып алыуҙа дәүләт ярҙамлаша.

Өфөлә Халыҡ-ара инвалидтар көнө уңайынан концерт ҡуйылды

Халыҡ-ара инвалидтар көнө уңайынан Мәкәрим Төхвәтшин исемендәге һуҡырҙар өсөн республика китапханаһында концерт ҡуйылды. Күреү һәләте насар булған 60 уҡыусы алдында Өфө сәнғәт училищеһының эстрада-джаз бүлексәһе студенттары сығыш яһаны.

Быйыл Башҡортостан урмансылары 49 миллионға яҡын үҫенте үҫтергән

Күләмле эштәр “Урмандарҙы һаҡлау” проекты буйынса тормошҡа ашырылған. Ҡиммәтле ылыҫлылар – ҡарағай һәм шыршыға өҫтөнлөк бирелгән. Был ағастарҙы һайлау осраҡлы түгел: улар климат өсөн оптималь үҫеш тиҙлегенә эйә һәм баҙарҙа ҙур ихтыяж менән файҙалана, урман хужалығының иҡтисади һөҙөмтәлелеген дә, ҡиммәтле урман биләмәләрен тергеҙеүҙе лә тәьмин итә, тип белдерәләр Урман хужалығы министрлығынан. Үҫентеләр урманды тергеҙеү һәм тәбиғәтте һаҡлау акцияларын үткәреү буйынса саралар комплексы өсөн файҙаланыла.

Башҡортостан һәм Үзбәкстан араһында яңы хеҙмәттәшлек йүнәлештәре барланды

Радий Хәбиров Рәсәй хөкүмәте рәйесенең беренсе урынбаҫары Динис Мантуров етәкселегендәге рәсми делегация составында Үзбәкстан Президенты Шәфҡәт Мирзиёев менән осрашыуҙа ҡатнашты. Көн тәртибенә иҡтисадтың өҫтөнлөклө йүнәлештәрендә берҙәм проекттарҙы тормошҡа ашырыу, мәғариф һәм фән өлкәһендә хеҙмәттәшлек, төбәк-ара бәйләнештәрҙе нығытыу мәсьәләләре сығарылды.

"Владимир Путин менән йыл йомғаҡтары" 19 декабрҙә була

Программа Өфө ваҡыты менән сәғәт 2-лә башлана. Кремлдән хәбәр итеүҙәренсә, Владимир Путин тура эфирҙа йыл ваҡиғаларына йомғаҡ яһай, журналистар һәм тамашасылар һорауҙарына яуап бирә. Һәр кеше москва-путину.рфсайты аша, шулай уҡ 0-40-40 һандарына СМС хәбәр менән, 8-800-200-40-40 телефонына шылтыратып һорауын ҡалдыра ала. Шулай уҡ социаль селтәрҙәр аша мөрәжәғәт итергә мөмкин.

Башҡортостанда 687 такси машинаһы эшмәкәрлеге туҡтатылды

Уларҙың хужалары гражданлыҡ яуаплылығын страховкалау тураһында килешеү төҙөмәгән. Транспорт һәм юл хужалығы министрлығынан хәбәр итеүҙәренсә, рейдтар барышында 189 компания һәм таксистың тейешле документтары булмауы асыҡланған. Уларға ошо етешһеҙлекте бөтөрөү өсөн бер ай ваҡыт бирелгән. Страховкалау тураһында килешеүгә ярашлы, такси машинаһы аварияға эләкһә пассажирға компенсация түләнә. Документ булмаһа таксист салондағы башҡа кешеләрҙең ғүмере һәм сәләмәтлеге өсөн яуап бирмәй.

Радий Хәбиров Үзбәкстан төбәктәре менән фән, сәнәғәт һәм агросферала хеҙмәттәшлек көсөйтә

Радий Хәбиров Үзбәкстандың Ташкент өлкәһе хакимы Зойир Мирзаев һәм Фирғәнә өлкәһе хакимы Хайрулло Бозоров менән осрашты. Республика башлығы менән Ташкент өлкәһе етәксеһе араһындағы һөйләшеүҙә эшҡыуарҙар һәм муниципалитеттар кооперацияһын үҫтереү юлдары барланды. Сәнәғәт үҫешкән төбәктә үзбәк-башҡорт технопаркын булдырыу ниәте тормошҡа ашырыла.

Башҡортостан менән Үзбәкстан музей эше һәм археология өлкәһендә лә хеҙмәттәшлек нығыта

Ташкентта Радий Хәбиров яңы төҙөлгән ислам цивилизацияһы үҙәген барып күрҙе. Был локация бөтә донъя тарихсыларын йәлеп итеүсе урын буласаҡ. Белгестәр араһындағы хеҙмәттәшлек Башҡортостанда Евразия күсмә халыҡтар цивилизацияһы музейын төҙөүҙә лә ҙур ярҙам, тип баһаланы республика етәксеһе.