"Беренсе тирмә" проекты ирекмәндәре Луганск республикаһында эшләй

Был турала Радий Хәбиров социаль селтәрҙә яҙа. Госпиталдәргә 20-се смена килде. Уның составында Ауырғазы, Ҡырмыҫҡалы, Шишмә, Шаран райондары вәкилдәре. Проект уҙған йылдың ноябрендә ғәмәлгә ашырыла башланы. Ҡатын-ҡы:ҙҙар Луганск республикаһында яралы һалдаттарҙы ҡарай, медицина хеҙмәткәрҙәренә һәр төрлө ярҙам күрһәтә.

Һаулыҡ һаҡлау министрлығы “Сәләмәтлек поездары” маршрутын атаны

Был аҙнала күсмә медицина бригадалары Өфө, Нуриман, Көйөргәҙе, Ҡариҙел һәм тағы ла 4 районда була. “21 апрелдән башлап белгестәр 266 ауылда туҡталыш яһаған. 140 меңдән ашыу тикшереү уҙғарған. Онкология сирҙәре, туберкулез, йөрәк-ҡан тамырҙары ауырыуҙары асыҡланған. Пациенттар өҫтәмә тикшерелеү үтеү өсөн дауаханаларға ебәрелде”, - тип белдерҙе ведомство етәксеһе Айрат Рәхмәтуллин.

Башҡорт шихандарын ЮНЕСКО-ның Бөтә донъя мираҫы исемлегенә индереү ҡарала

Өфөлә ошо мәсьәлә буйынса фекер алышыу булды. Июлдә Шүлгәнташ мәмерйәһе халыҡ-ара статус алды, бөтә донъя ҡомартҡыһы исемлегенә ҡуйылды. Хәҙер Торатау, Йөрәктау һәм Ҡуштауҙы ошо исемлеккә теркәү буйынса эш бара. Объекттар буйынса мәғлүмәт әҙерләнгән. Баш ҡалаға Мысырҙан халыҡ-ара эксперт Мөхәммәт Әбделхәмид килде. Уның менән осрашыу барышында шихандарға халыҡ-ара статус биреүгә бәйле артабанғы аҙымдар ҡаралды. Тәбиғәт ҡоматҡылары буйынса белгес аҙна дауамында тауҙарҙы тикшерергә ниәтләй. Башҡортостан хөкүмәте премьер министрының беренсе урынбаҫары Урал Килсенбаев әйтеүенсә, республика тәбиғәт ынйыларын киләһе быуындар өсөн һаҡлауға әҙер. “Шихандар республика символы булып тора. ЮНЕСКО-ның быны таныуы беҙҙең өсөн ҙур ҡаҙаныш”, - тине ул. Воскресенск баҡыр иретеү заводын да Бөтә донъя мираҫы исемлегенә индереү ҡарала.

Өфөгә Запорожье уҡыусылары килде

"Университет сменаһы" тигән проект ғәмәлгә ашырыла. 37 бала ВУЗ-ара кампусты ҡараны, фәнни лабораторияларҙа булды. Делегацияның Өфөгә сәфәре иртәгә тамамлана. Рәсәйҙә президент Владимир Путин ҡушыуы буйынса заманса кампустар селтәре булдырыла. 2030 йылға 25 кампус ойошторолорға тейеш. Башҡортостан һынау уҙғарылған төбәктәрҙең береһе. Өфөлә ВУЗ-ара студенттар кампусының тәүге өөлөшө уҙған йылда файҙаланыуға тапшырылды.

Лугансҡ ҡалаһы госпиталдәрендә «Беренсе тирмә» ирекмәндәренең 20-се төркөмө эш башланы

Радий Хәбиров социаль селтәрҙәрендә Донбаста яраланған яугирҙарға ярҙам күрһәтеүсе Башҡортостан ҡатын-ҡыҙҙары тураһында яҙып сыҡты. Проект былтыр ноябрҙә башланғайны. Луганск халыҡ республикаһында ҡатын-ҡыҙҙарыбыҙ яралыларҙы ҡарай, ашата, процедураларға йөрөтә, ғөмүмән һәр ерҙә лә ярҙам итә. Смена ике аҙна дауам итә һәм күптәр бер генә барыу менән сикләнмәй. Яугирҙар уларҙы көтөп ала.

Бөгөн бөтә донъя гуманитар ярҙам көнө билдәләнә

Халыҡ-ара календарҙә был мөһим көн Берләшкән Миләттәр ойошмаһының генераль ассамблеяһы башланғысы менән 2008 йылда барлыҡҡа килә. Уның маҡсаты йәмғиәткә мохтаждарға ярҙам итеү мөһимлеген, гуманитар миссияла ҡатнашыусылар, эш ваҡытында зыян күреүселәр тураһында Һөйләү, иғтибар йәлеп итеү.

Буранғол мәктәбе интернаты капиталь ремонттан һуң балаларҙы ҡабул итергә әҙер

Белем алыу өсөн шарттар. Әбйәлил районы Буранғол ауылы мәктәбе интернаты Белем көнөнә балаларҙы яңы шарттарҙа ҡабул итергә әҙерләнә. Капиталь ремонт районда баҡыр сығарыу буйынса яңы предприятие төҙөйәсәк инвестор аҡсаларына башҡарыла.

Өфөлә йәшәүселәр күп ҡатлы йорт баҙын һыу баҫа тип зарлана

Өфөлә йәшәүселәр күп ҡатлы йорт баҙын һыу баҫа тип зарлана. Өй подъезында һаҫыҡ еҫ, дым тора, хатта торлаҡтың нигеҙе боҙола башлаған. Өфө һыу каналы яуаплылығындағы участкаларҙа мәсьәлә бер нисә ай хәл ителмәй, ти дәғүә белдереүсе граждандар. Тулыраҡ мәғлүмәт киләһе яҙмала.

Башҡортостанда бәләкәй һәм урта бизнес үҫешә

Бәләкәй һәм урта эшҡыуарлыҡ вәкилдәре хәҙер республикала 147 меңдән ашыу иҫәпләнә. Үҙ эшен Благовар районында табыусылар ҙа етерлек. Фермер Алик Ғәниев мәҫәлән, баҡсасылыҡ йүнәлешендә махсуслашҡан. Йүнсел тиҫтәләп төр йәшелсәләрҙән тыш, селекция ярҙамында сығарған алмалар ҙа үҫтерә. Республика климатына яраҡлаштырылған «Башҡорт зөбәржәте» тип исемләнгән сортты өйрәнеүгә генә 40 йыл самаһы ваҡыт талап ителгән.

Мәсетле районының Оло Ыҡтамаҡ ауылы 225 йыллығын билдәләне

Кесе Ватанының юбилейын урындағы халыҡ юғары кимәлдә ҡаршыланы: тарих һәм тыуған яҡты өйрәнеү буйынса түңәрәк өҫтәл, мәҙәни һәм спорт саралары уҙғарылды. Биләмәнең үткәне, бөгөнгөһө һәм киләсәккә үҫеш мөмкинлектәре тураһында киләһе яҙма.

Башҡортостанда тағы 23 ауылға интернет үткәрелде

Халыҡ һаны 500-ҙән ашмаған ауылдарҙа юғары тиҙлекле элемтә булдырылды. Һанлы үҫеш министры Геннадий Разумикин белдереүенсә, бындай эш федераль проект буйынса алып барыла. Ауыл халҡының дәүләт хеҙмәттәре порталы менән ҡулланыу, яңылыҡтар уҡыу, аралашыу мөмкинлеге була. Республикала ике йыл эсендә 250-гә яҡын ауылға интернет үткәрелгән.

Йылайыр районында Крепостной Йылайыр йылғаһы аша күпер ремонтлана

Күпер Магнигорск-Ира юлында Ҡашҡар ауылы янында һалынған. Транспорт һәм юл хужалығы министрлығынан хәбәр итеүҙәренсә, Ҡашҡар, Исҡужа, Юлдыбай ауылдарында йәшәүселәр күпер аша район үҙәгенә бара. Был биләмәләрҙә ике меңдән ашыу кеше йәшәй. Күперҙе ремонтлау хәүефһеҙлек өсөн бик мөһим. Төҙөкләндереүҙе август аҙағына тиклем тамамлау планлаштырыла.

Башҡортостан башлығы Радий Хәбиров Мах мессенджерында үҙ каналын асты

Был турала төбәк етәксеһе социаль селтәрҙәр аша хәбәр итте. Яңы каналда ул иң мөһим яңылыҡтар, идара итеү командаһы ҡабул иткән ҡарарҙар, шулай уҡ республиканың нисек йәшәүе һәм яҡшы яҡҡа үҙгәрештәре менән таныштырып барасаҡ. Иҫегеҙгә төшөрәбеҙ, программа Рәсәй президенты Владимир Путин башланғысы менән булдырылды.

Владимир Севастьянов водителдәрҙе һәм йәйәүлеләрҙе юлда иғтибарлы булырға саҡырҙы

Башҡортостандың баш дәүләт автоинспекторы Владимир Севастьянов водителдәрҙе һәм йәйәүлеләрҙе юлда иғтибарлы булырға саҡырҙы. Республика төбәктәрендә ямғыр, урыны менән боҙборсаҡ яуа, елдең тиҙлеге секундына 20 метрға тиклем етә. Владимир Севастьянов иртәле-кисле томан һәм ямғыр ваҡытында киҫкен манёврҙарға бармаҫҡа, тиҙлек режимы һәм дистанция һаҡларға, боролоштар һәм йәйәүлеләр үткәүелдәре алдынан тиҙлекте алдан кәметергә кәңәш итә.

Синоптиктар һауа торошоноң тиҙҙән яҡшырыуы тураһында хәбәр итә

Ел-ямғырҙы эҫе көндәр алыштырасаҡ. Аҙна аҙағына термометр бағаналарының ике-дүрт градусҡа юғары күтәрелеүе көтөлә. Иртәгә көндөҙ 23 градус йылы булһа, артабанғы көндәрҙә 26 градус күрһәтә. Гидрометүҙәк мәғлүмәттәренә ярашлы, йәкшәмбегә һауа 30 градусҡа тиклем йылынасаҡ.

«Ғәҙел Рәсәй» минималь эш хаҡын һәм пенсияны 50 меңгә еткереү яҡлы

Дәүләт Йыйылышы-Ҡоролтайҙа «Ғәҙел Рәсәй-патриоттар-Хәҡиҡәт өсөн» сәйәси партияһының матбуғат конференцияһы үтте. Осрашыуҙа көнүҙәк тема булараҡ эш хаҡы һәм пенсиялар, шул иҫәптән хеҙмәткә түләүҙең минималь хаҡына бәйле мәсьәләләр сығарылды. Депутаттар билдәләүенсә, даими рәүештә индексация уҙғарылыуға ҡарамаҫтан, граждандарҙың сығымдары килемгә ҡарағанда тиҙерәк үҫә, ә эш хаҡы үҫеше инфляцияны ҡыуып етә алмай.

1 сентябрҙән Рәсәйҙә рөхсәт ителмәгән социаль селтәрҙә реклама ҡуйыу тыйыла

Яңы талаптарҙы үтәмәгән осраҡта, физик шәхестәргә 2500 һумға тиклем, ә юридик шәхестәргә ярты миллион һумғаса штраф һалыныуы мөмкин. Санкциялар тағы ла ҡатыраҡ булыуы-аккаунтты бөтөнләй ябыуҙары ла ихтимал. Компаниялар һәм блогерҙар социаль селтәрҙәрҙе продукцияны танытыу маҡсатында файҙалана, шул уҡ ваҡытта ул-килем сығанағы ла.

Мәләүез районының «Ашҡаҙар» агрокомплексы штат һанын ике тапҡырға арттырырға йыйына

900 миллиард һумлыҡ 2 меңдән ашыу инвестиция проекты. Республикала өҫтөнлөклө социаль-иҡтисади үҫеш проекттары иҡтисадтың төрлө тармаҡтарында яңы эш урындары булдырыуҙы ла күҙ уңында тота. Мәләүез районындағы «Ашҡаҙар» предприятиеһы, мәҫәлән, республиканың көньяҡ биләмәһендәге иң ҙур агрокомплекстарҙың береһе. Үҫемлекселек һәм малсылыҡ йүнәлешендә махсуслашҡан хужалыҡ йөҙҙән ашыу кешене эш урындары менән тәьмин иткән.

Ейәнсура районы Малиновка ауылында мәҙәниәт йорто капиталь төҙөкләндерелде

Район хакимиәте башлығы Дәмин Юланов хәбәр итеүенсә, клубты ремонтлау өсөн аҡса урындағы бюджеттан бүленгән. Бында тәҙрәләр, иҙән, ҡыйыҡ алмаштырылған, яҡтыртыу системаһы яңыртылған.

Башҡортостанда иң яҡшы комбайнерҙар билдәләнә

Ауыл хужалығы министрлығы конкурс иғлан итте. Унда уңыш йыйыу һөҙөмтәләре иҫәпкә алына. Еңеүселәр 3 номинацияла асыҡлана. Ғаризаларҙы 21 октябргә тиклем тапшырырға мөмкин. Конкурс һөҙөмтәләре 10 ноябрҙә иғлан ителә.

Башҡортостанда мутлашыусыларҙан алданыусылар бар

Өфөнән 26 йәшлек ҡатынға шылтыратыусылар үҙҙәрен Үҙәк банк хеҙмәткәре тип танытҡан. Дәүләт хеҙмәттәре порталында шәхси кабинетҡа мутлашыусылар үтеп инеүе тураһында белдергәндәр. 300 мең һум аҡсаһын йәнәһе лә хәүефһеҙ иҫәпкә күсерергә күндергәндәр. Стәрлетамаҡтан 34 йәшлек ҡатынды ошондай уҡ юл менән 450 мең һумға алдағандар. Октябрьскийҙан 63 йәшлек ҡатындан түләнмәгән пенсияһын түләргә вәғәҙәләп СМС кодты әйттергәндәр, уның 750 мең һумы юҡҡа сыҡҡан. Был турала Эске эштәр министрлығынан хәбәр итәләр.