БабиТи МХО биләмәһендә

Ошондай исем аҫтында ижад иткән йәш йырсы МХО яугирҙары алдында сығыш яһаған.
Айнур Кәбиров видеояҙмаһы.

Рәсәйҙә Ҡоймаҡ аҙналығы башланды

Православ христиандар байрамы йыл һайын төрлө ваҡытҡа тура килә. Быйыл 24 февралдән 2 мартҡа тиклем дауам итә. Төп саралар алдағы йәкшәмбе була. 3 марттан христиандар ҡайһы бер ризыҡты ашауҙан тыйылып тора. 1 марттан иһә изге Рамаҙан айы башлана. Был ваҡытта мосолмандар ураҙа тота.

Ҡатын-ҡыҙҙар байрамында оҙайлы ял булмай

Быйыл 8 март шәмбегә тура килә. Әммә был көндәге ял алдағы дүшәмбегә түгел, 13 июнгә күсерелә. Хеҙмәт һәм социаль яҡлау министрлығы мәғлүмәттәре буйынса, мартта оҙайлы ял ҡаралмаған. Июндә Рәсәй көнө уңайынан 4 көнлөк ял көтөлә.

Республикала янғын хәүефе миҙгеленә әҙерлек бара

Хөкүмәт ҡарары буйынса быйыл ул 18 апрелдән 25 октябргә тиклем дауам итә. Урман янғындарын иҫкәртеү маҡсатында өҫтәмә 10 видеокамера ҡуйыла. Былтыр ошондай комплекстар ярҙамында бер нисә урында ут таралыу киҫәтеп ҡалынған.

Яндекс сервистары хәҙер башҡорт телен аңлай

Кеше туған телен өйрәнергә ынтылһын өсөн шарттар, яҡшы методик һәм техник программалар, һәм, иң мөһиме, йәмғиәттә мәҙәнилек булдырыу мөһим.

«Туған телдә һөйләшергә оялмау һәм шул уҡ ваҡытта бер-беребеҙҙе, республикабыҙҙа ғына йөҙләгән телдә аралашҡан кешеләреҙ хөрмәт итеү өсөн», — тип билдәләне Башҡортостан Башлығы Радий Хәбиров.

Алғы һыҙыҡта ике йырсы

Йырсы һәм актер Илнур Лоҡманов МХО биләмәһенә гуманитар ярҙам алып барған. Унда ул яугирҙарға, шул иҫәптән Башҡортостандың халыҡ артисы Радик Динәхмәтовҡа посылкалар тапшырған.

Үҙе лә полигонда һынау үткән. Имен-һау йөрөп ҡайтығыҙ, яугирҙар!

Махсус хәрби операцияла ҡатнашыусылар өсөн «Башҡортостан геройҙары» кадрҙар проекты башланды

Бөгөн махсус хәрби операцияла ҡатнашыусылар өсөн «Башҡортостан геройҙары» кадрҙар проекты башланды. Ул президент ҡушыуы буйынса Геройҙар ваҡыты федераль проектының дауамы булараҡ тормошҡа ашырыла.

Башҡортостан делегацияһы Петровское ҡалаһындағы Шайморатов мәктәбе уҡыусыларын тәбрикләне

«Берҙәм Рәсәй» партияһының төбәк бүлексәһе секретары урынбаҫары Руслан Насретдинов етәкселегендәге гуманитар миссия вәкилдәре Петровское ҡалаһындағы Шайморатов мәктәбен дә иғтибарһыҙ ҡалдырманы. Башҡортостан делегацияһы балаларҙы Ватанды һаҡлаусылар көнө менән тәбрикләне.

Урал аръяғы агросәнәғәт колледжында «Ватан» хәрби-спорт уйыны үтте

Йыл һайын «Дозор» ил сиге һаҡсылары үткәргән был сарала студенттар үҙҙәрен етеҙлектә, сослоҡта, әрме хеҙмәтенә әҙерлеккә һынай. Тулыраҡ киләһе яҙмала.

Башҡортостанда күп балалы әсәйҙәр бүләкләнә

Радий Хәбиров 5 һәм унан күберәк бала тәрбиәләүселәргә "Әсәлек даны" миҙалын тапшырыу тураһында указға ҡул ҡуйҙы. Документ рәсми мәғлүмәттәр порталында урынлаштырылған. "Әсәлек даны" миҙалы 1998 йылдан бирелә. Республикала был наградаға 9 меңдән ашыу әсә лайыҡ булған.

Азат Асҡаров Башҡортостандың Сауҙа һәм хеҙмәттәр министры итеп тәғәйенләнде

Указға Башҡортостан Башлығы Радий Хәбиров ҡул ҡуйған. Быға тиклем Азат Асҡаров Рәсәй Федерацияһының Үзбәкстандағы Сауҙа вәкиллегендә Башҡортостан вәкиле вазифаһын биләгән. Әлегәсә Сауҙа һәм хеҙмәттәр министры вазифаһын башҡарған Алексей Гусев үҙ теләге менән эшенән бушатылған. Алексей Гусев йәмәғәт башланғысында Республика башлығының бизнес менән стратегик бәйләнештәр мәсьәләләре буйынса кәңәшсеһе итеп тәғәйенләнгән.

Махсус хәрби операцияла ҡатнашыусылар өсөн «Башҡортостан геройҙары» кадрҙар проекты старт алды

Бөгөн махсус хәрби операцияла ҡатнашыусылар өсөн «Башҡортостан геройҙары» кадрҙар проекты старт алды. Ул ил Президенты Владимир Путин ҡушыуы буйынса «Геройҙар ваҡыты» федераль проектының дауамы булараҡ тормошҡа ашырыла. Төбәк башлығы Радий Хәбиров социаль селтәрҙәрҙә яҙыуынса, программаның маҡсаты - хәрби хеҙмәткәрҙәр араһынан идарасыларҙың яңы быуынын әҙерләү. Был хаҡта тулыраҡ киләһе яҙмала.

Баҡалы районында яңы фельдшер-акушерлыҡ пункттары асылды

Заманса медицина. Баҡалы районында яңы фельдшер -акушерлыҡ пункттары асылды. Ахман һәм Юлтимер ауылдарында урынлашҡан учреждениеларҙа пациенттарҙы ҡабул итеү өсөн уңайлы шарттар тыуҙырылған. Урындағы халыҡ өсөн мөһим социаль объекттар һаулыҡ һаҡлау милли проекты сиктәрендә сафҡа ингән . Быйыл Баҡалы районында тағы ла 6 фельдшер-акушерлыҡ пунктын төҙөү күҙаллана.

Мәләүез районында шыттырылған бойҙай һәм башҡа башаҡлы культураларҙан тәбиғи продукция етештерелә

Талҡан, әҙер иртәнге аш, смузи һәм башҡалар. Мәләүез районында шыттырылған бойҙай һәм башҡа башаҡлы культураларҙан тәбиғи продукция етештерелә. Был эш менән күп йылдар дауамында Ҡолбаевтар ғаиләһе шөғөлләнә.

Рәшит Ғәзизов: спорттан – һынлы сәнғәткә

Ижад өсөн йәш сикләүе юҡ. Бар ғүмерен тренерлыҡ эшмәкәрлегенә арнаған Рәшит Ғәзизовтың хаҡлы ялға сыҡҡас яңы таланты асыла.
70 йәшендә уның тәүге картиналары яҙыла һәм ошо ваҡыттан алып ул һынлы сәнғәт менән даими шөғөлләнә башлай. Бөгөн Рәшит Хаҡҡул улы дүрт тиҫтәнән ашыу картина авторы. Эштәрҙең күбеһе Республика халыҡ ижады үҙәгенең «Урал» этноүҙәгендә асылған шәхси күргәҙмәгә ҡуйылған.

Бөрйәндә ат спорты яңы кимәлгә күтәрелә

Бөрйән районында ат спортын үҫтереүгә бәйле, яңы бәйгегә нигеҙ һалынды. Бөтә донъя күсмә халыҡтары уйындары программаһына индерелгән атта сапҡан килеш тәңкә алыу республикала тәүге тапҡыр ойошторолдо. Байрамда «Урал батырҙың ҡышҡы уйындары» уҙҙы, халыҡ «Ылаҡ» , «Ауҙарыш» уйындарын ҡараны, уҡсылар «Мәргән уҡсы»ла ярышты, батырҙар суҡмар ырғытты, сәмлеләр арҡан тартыуҙа көс һынашты. Оҫтабикәләр үҙен сергетыштар буйынса конкурста һынаны балалар өсөн айырым уйындар ойошторолдо.

Канада һөжүмсеһе Джошуа Ливо «Салауат Юлаев» клубы менән контрактты ике йылға оҙайтты

Ҡайһы бер мәғлүмәттәр буйынса, легионерҙың эш хаҡы йылына 100 миллион һум тәшкил итәсәк. Алдан хәбәр итеүебеҙсә, Континенталь хоккей лигаһының иң мәргән уйынсыһына «Авангард», «Амур», «Металлург» һәм башҡа командалар ҙур ҡыҙыҡһыныу күрһәтә. Улар күберәк аҡса вәғәҙә итә. Шуға ҡарамаҫтан юлаевсылар менеджменты Джошуа Ливоны Өфөлә ҡалдырыуға өлгәшә.

Башҡортостанда йәшәүселәр бер нисә көндә аферистарҙы 15 миллионға байытҡан

Республика буйынса Эске эштәр министрлығына мутлашыу осрағы тураһында 50 хәбәр килгән. Асҡын районынан ҡаҙанлыҡта эшләгән ир сим-карта хеҙмәтләндереүгә бәйле килешеүен оҙайтырға теләй. Әммә ул аферистар тоҙағына эләгә. Кредитҡа алынған 1 миллион 500 мең һум аҡсаһын уларҙың иҫәбенә күсерә. Баймаҡ районында йәшәгән пенсионер ҡатын 1 миллион 400 мең һумын “ялған” электр иҫәпләгес ҡуйыусыларға бирә. Полиция хеҙмәткәрҙәре айырыуса балаларға һәм оло йәштәгеләргә аферистарҙың алдау ысулдары тураһында һөйләргә кәңәш итә.

Өфөлә МХО яугиренең улы тыуған

Шатлыҡлы хәбәр менән баш ҡаланың Орджоникидзе районы хакимиәте башлығы Рөстәм Хәмитов уртаҡлашты. Сабый ҡала клиник перинаталь үҙәгендә донъяға килгән. Бәхетле ата-әсә Илья менән Элина улдарына Демид тип исем ҡушҡан.

«Ошо уңайҙан Илья ҡыҫҡа ял алып, өйөнә ҡайтты. Йәш ғаиләнең ҡыуанысы сикһеҙ. Ата-әсә бәхетле мәл кисерә. Уларҙы сабыйҙары тыуыуы менән ихлас ҡотлайым. Балалар – оло бәхет», — тип яҙа Рөстәм Хәмитов социаль селтәрҙәге сәхифәһендә.

Рәсәйҙә таҙа метанол етештереү һәм һатыу тыйыла

Ил хөкүмәте ошо турала документты хупланы. Метанол кеше сәләмәтлеге өсөн хәүефле. Ул төҫө, ҡуйылығы, еҫе менән этанолға оҡшаш. Шуға ағыуланыу хәүефе ҙур, ти белгестәр. Рәсәйҙә алкоголь менән күпләп ағыуланыу осрағы 2023 йылдың йәйендә булды. Ул ваҡытта 50 кеше контрафакт сидр эсеп үлде.

Башҡортостан урмандарын һауанан күҙәтәләр

Республика урман янғындарын иҫкәртеү һәм һүндереү үҙәге авиация патрулен ойоштороу буйынса контракт төҙөнө. Бының өсөн 30 миллион һум бүленә. Янғын хәүефе миҙгелендә республикала 4 мең квадрат метр биләмә өҫтәнән осоштар башҡарыла. 13 маршрут ҡаралған. Самолеттар Өфө, Стәрлетамаҡ, Белорет, Нефтекама ҡалаларында, Иҫке Собханғол, Йылайыр, Оло Ыҡтамаҡ, Аҡъяр, Иҫәнғол, Ҡолғона һәм Оло Кәркәле ауылдарында урынлаша.