Башҡортостанда «Профессионалдар» Бөтә Рәсәй оҫталыҡ чемпионатының һайлап алыу этабы бара

Бәйгелә өс көн дауамында 152 компетенция буйынса иң яҡшы йәш белгестәр һайлана. Өфө Күп профилле профессиональ колледжда үткән бәйгелә ҡатнашыусылар визажист, эстетик косметолог, онлайн саралар ойоштороусы, модельер кеүек 9 һөнәр буйынса һынау тотто.

Республикала «Башҡортостан геройҙары» программаһы эшләй башлаясаҡ

Был турала төбәк башлығы Радий Хәбиров Ватанды һаҡлаусылар көнө уңайынан ойошторолған тантаналы ултырышта хәбәр итте. Программа сиктәрендә махсус хәрби операция ветерандарын дәүләт һәм муниципаль идаралыҡҡа эшкә йәлеп итеү ҡаралған. Тантаналы ултырышта Бөйөк Ватан һуғышында, махсус хәрби операцияла ҡатнашыусылар , ҡотҡарыусылар , көс структуралары хеҙмәткәрҙәре һәм башҡа һөнәр эйәләре тәбрикләнде.

Башҡортостанда Оборона министрлығы менән хәрби контракт төҙөргә теләүселәр арта

Республика һайлау пунктында доброволецтарҙың айырыуса күп килеүе теркәлгән. Хәтерегеҙгә төшөрәбеҙ, процедураны Өфөләге «Черёмушки» балалар лагерында асылған махсус үҙәктә үтергә мөмкин. Урында банк иҫәбе асыу, медицина тикшеренеүе үтеү, хатта ҡайһы бер кәрәкле документтарҙы тергеҙеү өсөн белгестәр эшләй.

Баймаҡ районынан махсус хәрби операция биләмәһенә 30-сы ылау юлланды

Яҡташ яугирҙарға ярҙам. Баймаҡ районынан махсус хәрби операция биләмәһенә 30-сы ылау юлланды. Һалдаттарға адреслы ярҙам хеҙмәт ойошмаларынан, йәмәғәт берекмәләренән, шәхси эшҡыуарҙарҙан, шулай уҡ битараф булмаған граждандарҙан тупланды. Тулыраҡ киләһе яҙмала.

Башҡорт геройҙары иҫтәлегенә йәштәр парады

Рәсәй Геройы Миңлеғәле Шайморатов исемендәге 22-се Петровское мәктәбе уҡыусылары Ватанды Һаҡлаусылар көнө һәм 112-се Башҡорт кавалерия дивизияы командирының һәләк булған көнөнә арнап сафта йөрөү буйынса конкурс ойошторҙо. Йыл да уҙғарылған сараға мәктәптең барлыҡ кластары ҡушылды. Буласаҡ ил һаҡсыларының маршта үтеүен махсус хәрби операция яугирҙары ҡабул итте.

Өфөлә Халыҡ-ара туған телдәр көнө уңайынан колледж студенттары араһында интеллектуаль уйын үтте

Икенсе йыл рәттән Өфө сауҙа-иҡтисад колледжында ойошторолған ярышта былтыр баш ҡала урта һөнәри белем биреү учреждениелары ҡатнашһа, быйыл конкурсанттар географияһы киңәйгән. Интеллектуаль бәйгегә Салауат, Сибай ҡалалары һәм Мәсәғүт ауылы колледждары студенттары ҡушылған. Финалда ҡатнашҡан 6 команда ла алдан махсус һайлап алыу этабын үткән.

Хәҙисә Солтанбаева: тел ғилеменә арналған тормош

Башҡорт тел ғилемен юғары бейеклеккә күтәргән ғалимә. Билдәле телсе, филология фәндәре докторы Хәҙисә Солтанбаеваның 75 йәшлек юбилейы уңайынан бөгөн Өфө фән һәм технологиялар университетында Халыҡ-ара ғилми-методик конференция үтте. Фәнни уҡыу «Рәсәй субъекттары полилингваль мәғариф киңлегендә башҡорт теле» исеме аҫтында ойошторолдо.

БСТ телеканалының мәғлүмәт программалары редакцияһы коллективы 31-се «Башҡортостан» мотоуҡсылар полкы һалдаттарын Ватанды һаҡлаусылар көнө менән ҡотлай.

БСТ каналының «Яңылыҡтар» хеҙмәте алып барыусыһы Рита Шәмсетдинова 31-се «Башҡортостан» мотоуҡсылар полкы һалдаттарын Ватанды һаҡлаусылар көнө менән ҡотлай.

«Йәшлек» гәзитенең һәм «Ағиҙел» журналының баш мөхәррирҙәре Артур Дәүләтбәков һәм Мөнир Ҡунафин 31-се «Башҡортостан» мотоуҡсылар полкы һалдаттарын Ватанды һаҡлаусылар көнө менән ҡотлай.

Дыуан районында тыуған Дмитрий Авдонин - Рәсәй Геройы

Дыуан районында тыуған Дмитрий Авдонин - Рәсәй Геройы. Яҡташыбыҙға юғары исем биреү тураһындағы указға Рәсәй Президенты Владимир Путин ҡул ҡуйҙы. Башҡортотсан башлығы социаль селтәрҙә яҙыуынса, Гвардия капитаны Дмитрий Авдонин терәк пунктын обороналағанда батырлыҡ һәм ҡаһарманлыҡ күрһәтә.

Башҡортостандан үҙәкләштереп оҙатылған 144-се гуманитар ылау Донбасҡа барып еткән

Уны республиканың исемле батальондары, «Башҡортостан» полкы һәм мобилизацияланған яугирҙар ҡаршы алған. Тыуған яҡтан һалдаттарға бронетехника, юғары үтемле автомобилдәр, квадроциклдар, көнкүреш кәрәк-яраҡтары оҙатылған. Йөк автомобилдәре уларҙы яугирҙар хеҙмәт иткән хәрби частәрҙең дислокацияһына тиклем алып барып еткергән. Ә бына аҙыҡ-түлек, шәхси посылкаларҙы яҡташтарыбыҙ республика етәкселеге ойошторған логистика үҙәге келәттәренәнән ала. Унда инде йөк машиналарындағы әйберҙәр хәрби техника кузовына күсерелә.

Махсус хәрби операция биләмәһенә сираттағы яугирҙар төркөмө оҙатылды

Ике аҙналыҡ отпуск ваҡытында улар өйҙә булып донъя мәшәҡәттәре менән булышҡан. Яугирҙарҙы хеҙмәт урынына оҙатырға яҡындары, туғандары һәм республика хөкүмәте вәкилдәре килде. Ир-егеттәр республика тарафынан бүленгән уңайлы автобустарҙа ҡуҙғалды. Тәүлектән ашыу юлда уларҙы Ғәҙәттән тыш хәлдәр министрлығы хеҙмәткәрҙәре оҙатып бара. Үҙҙәре менән хәрбиҙәр күстәнәс, яуҙаштарына посылкалар ҙа алған.

Иглин районы «Бөтәһе лә фронт өсөн» ирекмәндәр штабы ике йыллығын билдәләй

Ошо ваҡытта битараф булмаған халыҡ махсус хәрби операция биләмәһенә меңдәрсә хәрби кәрәк-яраҡ яһап ебәргән. Ошо көндәрҙә район хакимиәтендә иң әүҙем ирекмәндәрҙе бүләкләү тантанаһы уҙҙы.

«Башҡортостан» мотоуҡсылар полкының тыл районында байрам концерты үтте

Ротациялағы яугирҙар алдында Мәскәү хәрби округының «Патриот» фронт концерт төркөмө сығыш яһаны. Улар төрлө йылдарҙағы хиттарҙы башҡарҙы. Был төркөм яҡташтарыбыҙ алдында тәүге тапҡыр сығыш яһамай. Төркөмдөң солисы-яҡташыбыҙ. Сығышы менән Белорет районынан.

Өфө дәүләт нефть техник университеты лицейында Андрей Мигунов иҫтәлегенә герой партаһы асылды

Өфө дәүләт нефть техник университеты лицейында Рәсәй Геройы Андрей Мигунов иҫтәлегенә герой партаһы асылды. Уның эргәһенә Рәсәй Геройының хәрби кейемдәре, шәхси әйберҙәре, наградалары менән витрина ла урынлаштырылды.

Әбйәлил районында хәйриә хоккей турниры үтте

Профессиональ хоккейсылар менән бер боҙҙа. Әбйәлил районында хәйриә хоккей турниры үтте. Яҡтыкүлдә ойошторолған ярышта Сергей Мозякин, Егор Яковлев, Василий Кошечкин, Егор Коробкин һәм Илья Набоков ҡатнашты. Көйәрмәндәргә яҡшы таныш уйынсылар махсус хәрби операцияла ҡатнашыусыларҙың балалары менән көс һынашты. Сатлама һыуыҡта боҙҙо иретерлек уйын барышын БЮТ ижади төркөмө күҙәтте.

Өфөлә «Ҡышҡы Шайморатов уйындары»ның йомғаҡлау этабы үтте

Өфөлә Рәсәй Геройы, генерал-майор Миңлеғәле Шайморатов Кубогына «Ҡышҡы Шайморатов уйындары»ның йомғаҡлау этабы үтте. Республика район-ҡалаларынан йыйылған шайморатов класстарында белем алыусылар физик әҙерлеген күрһәтеп, етеҙлектә, мәргәнлектә көс һынашты.

БабиТи МХО биләмәһендә

Ошондай исем аҫтында ижад иткән йәш йырсы МХО яугирҙары алдында сығыш яһаған.
Айнур Кәбиров видеояҙмаһы.

Рәсәйҙә Ҡоймаҡ аҙналығы башланды

Православ христиандар байрамы йыл һайын төрлө ваҡытҡа тура килә. Быйыл 24 февралдән 2 мартҡа тиклем дауам итә. Төп саралар алдағы йәкшәмбе була. 3 марттан христиандар ҡайһы бер ризыҡты ашауҙан тыйылып тора. 1 марттан иһә изге Рамаҙан айы башлана. Был ваҡытта мосолмандар ураҙа тота.

Ҡатын-ҡыҙҙар байрамында оҙайлы ял булмай

Быйыл 8 март шәмбегә тура килә. Әммә был көндәге ял алдағы дүшәмбегә түгел, 13 июнгә күсерелә. Хеҙмәт һәм социаль яҡлау министрлығы мәғлүмәттәре буйынса, мартта оҙайлы ял ҡаралмаған. Июндә Рәсәй көнө уңайынан 4 көнлөк ял көтөлә.