Быйыл Башҡортостанда 86 ауылға юғары тиҙлекле интернет үткәрелә

Был турала Һанлы үҫеш министрлығынан хәбәр итәләр. Республика проекты киңәйтелгән. Хәҙер унда халыҡ һаны 100 кешенән артҡан ауылдар ҙа инә. 5 йылда операторҙар меңгә яҡын ауылда элемтә булдырҙы. Әле интернет сифатын яҡшыртыу буйынса эш алып барыла тине ведомство етәксеһе Геннадий Разумикин.

Халыҡ-ара башҡорт милли кейем конкурсы башлана

"Тамға" тигән был бәйгелә кейем тегеү оҫталары ҡатнаша. Тәүге этап 15 февралдән старт ала. Уның барышында семинарҙар һәм оҫталыҡ дәрестәре ҡаралған. Быйыл конкурс биш номинацияла уҙғарыла, тип хәбәр итәләр Республика халыҡ ижады үҙәгенән.

"Салауат Юлаев"тың 20 йыл эсендәге символик йыйылма командаһы төҙөлдө

"Алтын состав"ты көйәрмәндәр клубы әҙерләгән. Исемлектә Юха Метсола, Александр Радулов, Линус Умарк, Кирилл Кольцов, Виталий Прошкин, Виктор Козлов, Андрей Кутейкин, Патрик Торесен һәм башҡа хоккейсылар, тренерҙар - Сергей Михалев, Вячеслав Быков, Игорь Захаркин күрһәтелгән.

Башҡортостан эшҡыуарҙары махсус хәрби операция биләмәһенә автомобилдәр оҙатты

Яугирҙарға ярҙам йыйыу йыш ҡына бер-береһе менән бөтөнләй таныш булмаған кешеләрҙе берләштерә. Мәҫәлән, эшҡыуар Муса Мәзитов социаль селтәрҙәрҙә хәрби хеҙмәткәрҙәр өсөн УАЗ һатып алыуы тураһында пост яҙа. Уның был хәбәренә Өфө районы эшҡыуары Азат Нурлығаянов яуап бирә. Ул да әлеге көндә Ватан һағында торған туғандары өсөн ике внедорожник әҙерләүе, әммә транспорт сараларын ебәреү менән ҡыйынлыҡтар тыуыуы тураһында әйтә. Интернет аша барлыҡҡа килгән бизнес-берләшмә машиналарҙы оператив рәүештә фронтҡа оҙатыуҙы ойошторорға ярҙам итә.

Өфөнөң 308-се балалар баҡсаһынада МХО биләмәһенән ҡыҫҡа ваҡытлы ялға ҡайтҡан яугир менән осрашыу үтте

Балаларҙа ҡунаҡта. Өфөнөң 308-се балалар баҡсаһы тәрбиәләнеүселәре махсус хәрби операция биләмәһенән ҡыҫҡа ваҡытлы ялға ҡайтҡан яугир менән осрашты. Ватан һаҡсыһы менән үткән илһөйәрлек кисәһе хаҡында киләһе яҙмала.

Күгәрсен районы Туйымбәт ауылында Зәйнәб Биишева исемендәге район әҙәби премияһы тапшырылды

Күгәрсен районы Туйымбәт ауылында Башҡортостандың халыҡ яҙыусыһы, Салауат Юлаев исемендәге дәүләт премияһы лауреаты Зәйнәб Биишева исемендәге район әҙәби премияһы тапшырылды. Матур йолаға әүерелгән тантана быйыл 26-сы тапҡыр уҙғарылды.

Үҙенең тышҡы иҡтисади эшендә Башҡортостандың идара итеү командаһы бизнес өсөн юл асырға тырыша

Бының өсөн төбәк властары даими рәүештә сит илдәргә бара, эшлекле мөнәсәбәттәр өсөн инфраструктура тыуҙыра. Килеп тыуған иҡтисади шарттарҙа яңы ышаныслы партнерҙар эҙләй. Радий Хәбиров социаль селтәрҙәге сәхифәһендә яҙыуынса, предприятиеларға донъя баҙарына сығыуҙа ярҙам итеү бәләкәй һәм урта бизнесты үҫтереүҙә төп бурыстарҙың береһе.

Башҡортостанда төбәк һәм муниципаль-ара юлдарҙа соҡорҙар ремонтлана

Эш уңайлы һауа торошонда ойошторола һәм махсус һалҡын асфальт-бетон ҡатнашмаһы ҡулланыла. Февралдең тәүге аҙнаһында Башҡортостан юлдарында 750 квадрат метр юл япмаһы ремонтланған. Билдәле булыуынса, 2020 йылдан төбәктә «Юл инфраструктураһы өлкәһен контролдә тотоу һәм планлаштырыу системаһы» махсус программаһы эшләй.

Сираттағы бер төркөм яугирҙарҙы махсус хәрби операция биләмәһенә оҙатыу тантанаһы уҙҙы

Кире алғы һыҙыҡҡа. Сираттағы бер төркөм яугирҙарҙы махсус хәрби операция биләмәһенә оҙатыу тантанаһы, ғәҙәттәгесә, «Өфө-арена» спорт һарайы алдындағы майҙанда уҙҙы.
Яугирҙарҙы Луганск һәм Донецк халыҡ республикаларында хәрби бурыс үтәү урынына тиклем тәүлектән ашыу юл көтә. Автобусты Ғәҙәттән тыш хәлдәр министрлығы һәм полиция хеҙмәткәрҙәре оҙатып барасаҡ.

Өфөлә юридик факультетын тамамлаған 70 белгескә диплом тапшырылды

Бөгөн Башҡортостан башлығы ҡарамағындағы Дәүләт хеҙмәте һәм идара итеү академияһының юридик факультетын тамамлаған 70 белгескә диплом тапшырылды. Уҡыу йорто республиканың дәүләт һәм идара итеү системаһына кадрҙар әҙерләү буйынса эҙмә-эҙлекле эш алып бара.

Өфөлә IX Йәштәр мәғариф форумы эш башланы

Ике көн дауамында барасаҡ сарала өс майҙансыҡ ойошторолған. «Социаль проектлау» модуле сиктәрендә Рәсәй йәштәре грант конкурсына бәйле оҫталыҡ дәрестәре үтә. Шулай уҡ бында ғариза тултырырға, хаталарҙы тикшереү буйынса консультация алырға, грант еңеүселәре менән осрашып, проекттарҙы алдан яҡларға ла мөмкин

Башҡорт аҫалы балаҫы Рәсәй патентты төбәк брендтары реестрына инде

Төбәктең яңы брендын теркәү тураһында Башҡортостандан сенатор Лилиә Ғүмәрова хәбәр итте. Бөгөн Рәсәйҙә 369 төбәк бренды теркәлгән. Федерация Советы рәйесе Валентина Матвиенко ҡушыуы буйынса 2018 йылдан алып комитет тарафынан брендтарҙы асыҡлау һәм теркәү буйынса эш алып барыла.

«Йәншишмә» Башҡортостан балалар һәм үҫмерҙәр гәзите бөгөн үҙенең 95 йыллығын билдәләй

Киләсәк һинән башлана. Тап ошо девизға тоғролоҡ һаҡлаған «Йәншишмә» Башҡортостан балалар һәм үҫмерҙәр гәзите бөгөн үҙенең 95 йыллығын билдәләй. «Йәш төҙөүсе», артабан «Башҡортостан пионеры» һәм бөгөн «Йәншишмә» исеме аҫтында нәшер ителгән баҫманың үҫеп килгән быуында дуҫлыҡ, берҙәмлек, илһөйәрлек тойғолары, хеҙмәткә һөйөү тәрбиәләүҙә роле баһалап бөткөһөҙ. Ул һәр ваҡыттағыса республиканың яратып уҡылған ваҡытлы матбуғат исемлегендә.

Башҡортостанда 645 уҡыусы грипп арҡаһында карантинда ҡала

Был турала беренсе вице-премьер Урал Килсенбаев хәбәр итә. - Һуңғы мәғлүмәттәр буйынса карантинға ябылған мәктәптәр юҡ. Республика буйынса 17 класта киҙеү арҡаһында уҡытыу туҡтатылған, тине ул. Мәктәптә һалҡын тейҙереп ауырыған уҡыусыларҙың 20 проценты булмаһа етәкселек белем биреүҙе туҡтатып тороу тураһында ҡарар ҡабул итә ала. Ҡулланыусылар хоҡуҡтарын яҡлау хеҙмәте мәғлүмәттәре буйынса Башҡортостанда ауырыусылар һаны артыуы күҙәтелә.

Салауат Юлаев музейының бинаһы капиталь төҙөкләндерелә

Ул Салауат районында урынлашҡан. Ремонт өсөн 124 миллион һум ҡаралған. Эште башҡарыусы компания ошо айҙа аныҡланырға тейеш. Капиталь ремонт милли проект буйынса башҡарыла. Төҙөкләндереүҙе 2027 йылда тамамлау маҡсаты ҡуйыла. Финанс федераль һәм республика ҡаҙналарынан бүленә, тип хәбәр итә "Башинформ".

Рәсәйҙә 13-сө пенсия түләү мөмкинлеге бар

Быйыл Думала ошо турала закон проекты ҡарала. Документ авторҙарының береһе, вице-спикер Борис Чернышев белдереүенсә, 2023 йылда әҙерләнгән закон проекты тулыланған, ул тағы бер тапҡыр депутаттар ҡарауына тапшырыла. Айлыҡ пенсия күләмендә бер тапҡыр бирелә торған түләүҙе һәр пенсионерҙың тыуған көнө уңайынан күсереү тәҡдим ителә.

Стәрлетамаҡта Ағиҙел йылғаһы аша яңы күпер төҙөлә

Был турала социаль селтәрҙә Радий Хәбиров хәбәр итте. Иҫке күпер һалыныуға быйыл 45 йыл тула. Тәүҙә уны төҙөкләндереү осорона халыҡҡа уңайһыҙлыҡтар тыуҙырмаҫ өсөн ваҡытлыса понтон күпер һуҙыу планлаштырыла, әммә һуңынан иҫкеһе урынына яңыһын төҙөргә ҡарар ителә.

Баш ҡаланан бер төркөм яугирҙар йәнә алғы һыҙыҡҡа юлланды

Яңы көс менән еңеү артынан. Бөгөн «Өфө-Арена» комплексы эргәһендәге майҙандан бер төркөм яугирҙар йәнә алғы һыҙыҡҡа юлланды. Ҡайһы бер хәрбиҙәр өсөн был алтынсы отпуск. Махсус хәрби операция бурыстарын үтәгән яҡташтарыбыҙҙы ғаиләләре, дуҫтары оҙатты.

Баймаҡ ҡалаһында йәшәүсе Ғәниевтар ғаиләһе яугирҙарға ярҙам әҙерләй

Махсус хәрби операцияла ҡатнашыусы ир-егеттәрҙе яҡташтары ярҙамдан өҙмәй. Балаларҙан алып оло йәштәгеләргә тиклем күңел ҡушыуы буйынса үҙ өлөшөн индерергә тырыша. Шундайҙарҙың береһе Баймаҡ ҡалаһында йәшәүсе Ғәниевтар ғаиләһе.

Әбйәлил районы Хәлил ауылы халҡы быйыл «Урындағы башланғыстарға ярҙам программаһы»нда ҡатнаша

Ауыл ерендә тракторһыҙ бер нисек тә йәшәп булмай. Сөнки транспорт сараһы күп кенә көнүҙәк проблемаларҙы хәл итә ала. Шуға ла Әбйәлил районы Хәлил ауылы халҡы быйыл «Урындағы башланғыстарға ярҙам программаһы»нда ҡатнашып, тәгәрмәсле трактор һатып алырға булған.

Өфөләге автомәктәптә йылына физик мөмкинлеге сикләнгән 10-15 кеше уҡыу үтә

Учреждение махсус йыһазландырылған ике автомобиль менән тәьмин ителгән. Ҡул менән идара итеү системаһы булған транспорт сараһы хәҙер Стәрлетамаҡтағы уҡыу-курс пунктына ла һатып алынған. Предприятие етәкселеге билдәләүенсә, мөмкинлеге сикләнгән граждандар араһында автомобиль йөрөтөргә өйрәнергә теләүселәр күп, шуға махсус транспортҡа ихтыяж юғары.