Новосибирск ҡалаһында Континенталь хоккей лигаһының «Йондоҙҙар матчы» үтте

Чернышев дивизионы командаһы «Йондоҙҙар матчы»нда еңеү яуланы. Континенталь хоккей лигаһының сағыу сараһы быйыл Новосибирскиҙа үтте. Финалда Чернышев һәм Бобров дивизиондары осрашты. Уйын Виктор Козлов коллективы файҙаһына 9-8 иҫәбе менән тамамланды.

Илеш районында Ринат Хәйриҙең тыуыуына 75 йыл тулыуға арналған сара үтте

Тыуған яҡ йырсыһы. Илеш районында күренекле шағир, прозаик, публицист Ринат Хәйриҙең тыуыуына 75 йыл тулыуға арналған сара үтте. Ҡәләм оҫтаһын иҫкә алыуҙа туғандары, коллегалары, билдәле әҙиптәр, йәмәғәт эшмәкәрҙәре йыйылды. Осрашыуҙа ижади конкурстарға йомғаҡ та яһалды.

Баймаҡ ваҡиғалары башҡорт халҡы өсөн һабаҡ

Валитов Тимурҙың Баймаҡ фажиғәләренә арналған фильмын, ниһайәт, ҡарағандан һуң тыуған төп фекер ошо.
Фильм быға тиклем беҙҙең каналда тап Баймаҡ ваҡиғалары буйынса яҙылған фекерҙәр менән тулыһынса ауаздаш һәм уларҙы тағы ла бер тапҡыр дәлилләне. Бер генә фактка туҡталғанда.

Фәнзил Әхмәтшин видео яҙҙырып ябай халыҡтың хис-тойғоларында уйнап ҡыланыуҙан тыш, эйе, халыҡты беҙ ойошторҙоҡ, бының өсөн минең үҙемә лә алдан Баймаҡҡа барып, егеттәрҙе туплап ҡайтырға кәрәк булды тип белдерҙе.

Берәү ҙә теленән тартмай, көсләмәй, интервью барышында Фаил Алсынов* менән һөйләшеүҙәре хаҡында үҙ ирке менән бәйән итә. "Һине ултыртасаҡтар, бер ысул - Ҡуштау ваҡытындағы һымаҡ урамға халыҡты алып сығырға кәрәк" тигән кәңәш биреүен белдерә. Йәғни шантажлау, власты ҡурҡытыу өсөн улар халыҡты файҙалана. Урынға барып ойоштороу эштәрен (үҙе лә әйтеүенсә, Баймаҡта 40-лап ир-егетте туплай) тамамлағандан һуң ул ябай халыҡты суд бинаһы янында йыйыу өсөн "илай-илай" ана шул видеоһын төшөрә лә инде. "Егеттәр, ҡыҙҙар, Фаилды* яҡлап сыҡмаһағыҙ нисек йоҡларһығыҙ? " имеш.

Бөгөн 80-гә яҡын ир-егет төрмәлә. Фәнзил Әхмәтшин хәҙер үҙе нисек йоҡлай икән? Беҙҙеңсә нормально йоҡлай. Беҙҙә тыйылған социаль селтәрҙәрҙә ҡыҙының сәхифәһенән билдәле - Баймаҡ ҡорбандары халыҡтан аҡса йыйып, кредитҡа батып адвокаттар ялланғанда, Фәнзил Әхмәтшин Әбйәлил районында тотош Динопаркты ҡуртымға алып балаһына гөрләтеп туй үткәрә, районында мал үрсетә, ит-мал һатып аҡса эшләй. Һис тартынмай, ана, интервью бирергә лә йөрөгән.

Ә бына фильмды ҡарағанда күҙҙәргә йәш төйөлдө. "Яңылыш барып эләктек, үкенәбеҙ" тип рәшәткә артынан интервью биргән ир-егеттәрҙе йәлләп. Бигерәк тә тәү ҡарамаҡҡа
алтмышты күптән үткән оло ғына ағайҙың бер ҡатлы, үкенесле ҡарашы битараф ҡалдырманы. Уларҙы яҡлар өсөн Әхмәтшин да, блогерҙар ҙа халыҡты йыймай, үҙҙәре лә йөрөмәй. Сөнки һәр береһенә үҙҙәре, яҡындары, балалары ҡәҙерле.

Ә ни өсөн барған был ҡорбандар Баймаҡтың Суд бинаһы алдына? Был һорауға яуапты хөкөмгә тарттырылыусылар үҙҙәре белдерҙе. Баймаҡ, Урал аръяғы райондары халҡы араһында социаль селтәрҙәрҙә "ерҙәрегеҙҙе тартып алалар, яҡлап сығырға кәрәк" тигән саҡырыу таратылған. Кемдәр тарафынан икәне хәҙер инде аныҡ билдәле. Бер ҡатлы ябай халыҡ уларҙың алдағына ҡаба.

"Аҡсағыҙҙы һаҡлап ҡалырға кәрәк, банк картаһы номерын ебәрегеҙ" , йә "яҡынығыҙ ауыр хәлдә ҡалған тиҙ генә аҡса ебәрегеҙ" тип ябай халыҡты алдаған мошенниктарҙан былар күпкә ҡурҡынысыраҡ, яманыраҡ. Сөнки, халыҡ әйтмешләй, баш иҫән булһа, аҡса табыла. Ә былар күрәләтә үҙ халҡын ут эсенә алып барып тыҡты, уны уйынсыҡ итеп ҡулланды, яҙмыштар, ғаиләләр, бала бәхеттәрен емерҙе.

Я.Ө (яҙылғанға өҫтәп) Тимур Валитовтың ҡапыл сәйәси күҙәтеүсе, блогер, журналист булып китеүенә ҡараш икеле ине. Был хаҡта ла үҙ ҡарашыбыҙҙы белдергәйнек. Башҡортса һүҙ байлығы аҡһауы, фекерен еткереү ҡеүәһе етмәүе ышаныс уятмай килде. Ә русса сығарылыш шәп, ышаныслы килеп сыҡҡан✅

*Фаил Алсынов - террорсылар һәм экстремистар исемлегенә индерелгән.

Республика аграрийҙары яҙғы сәсеүгә техника әҙерләй

Илеш районында ер эштәрен башҡарыуға тағылмалы агрегат менән 364 трактор сыға. Әлегә уларҙың техник әҙерлек кимәле яҡынса 80 процент тәшкил итә. Куйбышев исемендәге хужалыҡта сәсеү комплекстарын ремонтлау көҙҙән үк башланған. Цехтарҙа эш бөгөн дә дауам итә.

Ҡырмыҫҡалы районында йәшәүсе ир ҡар аҫтында ҡалған баҙға ҡолаған баланы ҡотҡарған

Геройҙар беҙҙең арала. Ҡырмыҫҡалы районында йәшәүсе ир ҡар аҫтында ҡалған баҙға ҡолаған баланы ҡотҡарған. Бәхеткә, ваҡиға шаһиты булған әсә уҙып барған йәйәүлене ярҙамға саҡыра. Әйткәндәй, ҡатындың тормош иптәше, атаһы һәм ҡайныһы әлеге көндә махсус хәрби операцияла. Берәүҙәр хәрби бурысын үтәгәндә, тылдағылар уларҙың ғаиләһенә ярҙам итә. Тулыраҡ киләһе яҙмала.

Рима Баталова Бәләбәйҙән Михаил Һәм Дмитрий Буциктарҙың хыялын тормошҡа ашырҙы

Күктең етенсе ҡатында. «Теләктәр шыршыһы» Бөтә Рәсәй акцияһы сиктәрендә Рәсәй Дәүләт думаһы депутаты, Европа һәм донъяның күп тапҡыр Паралимпия чемпионы Рима Баталова Бәләбәйҙән Михаил Һәм Дмитрий Буциктарҙың хыялын тормошҡа ашырҙы. Уларға бүләктән тыш, махсус мәҙәни программа ла әҙерләнгәйне.

Баймаҡ лицей-интернатында йыр һәм строй конкурсы үтте

Киләсәккә йәш көс. Баймаҡ полилингваль күп профилле лицей-интернатында хәрби-патриотик айлыҡ сиктәрендә уҡыусыларҙа рух, илһөйәрлек, ил тарихына һөйөү тәрбиәләү маҡсатында йыр һәм строй конкурсы үтте. Тулыраҡ киләһе яҙмала.

Һанлы тигеҙһеҙлекте бөтөрөү: ауылдарҙа яңы мөмкинлектәр

«Һанлы тигеҙһеҙлекте юҡ итеү» проекты буйынса быйыл Башҡортостанда 86 ауылда мобиль бәйләнеш база станцияһы урынлаштырыу ҡаралған. Тораҡ пункттар республика халҡының тауыш биреү һөҙөмтәләре буйынса һайлап алынған. Оператив кәңәшмә барышында электромобилдәр өсөн заряд станциялар төҙөлөшө, ауылдарҙы, баҡсасылар ширҡәттәрен газ менән тәьминәт мәсьәләләре лә ҡаралды.

Өфө-Минск маршруты буйынса аҙнаһына икенсе тура авиарейс асыу планлаштырыла

3 марттан Өфө-Минск маршруты буйынса аҙнаһына икенсе тура авиарейс асыу планлаштырыла. Был хаҡта республика премьер-министрының беренсе урынбаҫары - иҡтисади үҫеш һәм инвестиция сәйәсәте министры Рөстәм Моратов хәбәр итте.

Башҡортостан спорт объекттары һаны буйынса илдә өсөнсө урынды биләй

Был хаҡта Радий Хәбиров Рәсәйҙең спорт министры Михаил Дегтярев менән осрашҡанда һөйләне. Төбәктә уларҙың иҫәбе 13 меңдән аша. Былтыр ғына Өфөлә Көрәш һарайы, Фехтование үҙәге, ишкәкле слалом комплексы эшләй башланы. Нефтекамала бассейнлы «Амфибия» күп функциялы спорт үҙәге асылды. Әлеге ваҡытта тағы ла 16 ҙур объект өҫтөндә эш бара.

Радий Хәбиров МХО-ла ҡатнашҡан ике яугирҙы генерал Миңлеғәле Шайморатов миҙалы менән бүләкләне

Республика башлығы Радий Хәбиров махсус хәрби операцияла ҡатнашҡан ике яугирҙы генерал Миңлеғәле Шайморатов миҙалы менән бүләкләне. Дәүләт наградаһы «Башҡортостан» мотоуҡсылар полкынан Радмир Байегетов менән Доставалов исемендәге батальондың медицина взводы командиры Арыҫлан Мырҙағоловҡа тапшырылды.

«Защитник» берҙәм үҙәгендә буласаҡ яугирҙар өсөн хәрби әҙерлек дәрестәре үтә

«Черемушки» шифаханаһы базаһында улар ҡорал менән эш итеү ҡағиҙәләренә өйрәнә. Шулай уҡ Башҡорт дәүләт медицина университеты хеҙмәткәрҙәре тактик медицина буйынса махсус уҡыу-уҡытыу сараларын алып бара. Ошо рәүешле яугирҙар тәүге ярҙам күрһәтеү ҡағиҙәләренә төшөнә.

Башҡорт филологияһы факультеты ойошторолоуға 95 йыл

Башҡорт филологияһы, шәрҡиәт һәм журналистика факультеты ошо уңайҙан ҙур байрам ойошторҙо. Тантанала Башҡортостан башлығы хакимиәте етәксеһе Азат Бадранов факультет уҡытыусыларына дәүләт наградалары тапшырҙы. Тулыраҡ мәғлүмәт киләһе яҙмала.

Күгәрсен районынан «Айыҡ ауыл» республика конкурсында быйыл тәүәкәндәр һынау тота

Ошо уңайҙан Башҡортостандың беренсе президенты Мортаза Рәхимовтың тыуған төйәгендә сираттағы ултырыш үтте. Йыйындың төп маҡсаты - Бөтә донъя башҡорттары ҡоролтайының алтынсы съезы йомғаҡтары һәм маҡсаттары хаҡында фекер алышыуға ҡоролғайны. Шулай уҡ урындағы ойошма эшмәкәрлегенең киләһе йылдарға ҡуйған бурыстары барланды . Халыҡ мәнфәғәтендә әүҙем эшләүселәр дәүләт һәм йәмәғәт наградалары менән бүләкләнде.

Быйыл Башҡортостанда 86 ауылға юғары тиҙлекле интернет үткәрелә

Был турала Һанлы үҫеш министрлығынан хәбәр итәләр. Республика проекты киңәйтелгән. Хәҙер унда халыҡ һаны 100 кешенән артҡан ауылдар ҙа инә. 5 йылда операторҙар меңгә яҡын ауылда элемтә булдырҙы. Әле интернет сифатын яҡшыртыу буйынса эш алып барыла тине ведомство етәксеһе Геннадий Разумикин.

Халыҡ-ара башҡорт милли кейем конкурсы башлана

"Тамға" тигән был бәйгелә кейем тегеү оҫталары ҡатнаша. Тәүге этап 15 февралдән старт ала. Уның барышында семинарҙар һәм оҫталыҡ дәрестәре ҡаралған. Быйыл конкурс биш номинацияла уҙғарыла, тип хәбәр итәләр Республика халыҡ ижады үҙәгенән.

"Салауат Юлаев"тың 20 йыл эсендәге символик йыйылма командаһы төҙөлдө

"Алтын состав"ты көйәрмәндәр клубы әҙерләгән. Исемлектә Юха Метсола, Александр Радулов, Линус Умарк, Кирилл Кольцов, Виталий Прошкин, Виктор Козлов, Андрей Кутейкин, Патрик Торесен һәм башҡа хоккейсылар, тренерҙар - Сергей Михалев, Вячеслав Быков, Игорь Захаркин күрһәтелгән.

Башҡортостан эшҡыуарҙары махсус хәрби операция биләмәһенә автомобилдәр оҙатты

Яугирҙарға ярҙам йыйыу йыш ҡына бер-береһе менән бөтөнләй таныш булмаған кешеләрҙе берләштерә. Мәҫәлән, эшҡыуар Муса Мәзитов социаль селтәрҙәрҙә хәрби хеҙмәткәрҙәр өсөн УАЗ һатып алыуы тураһында пост яҙа. Уның был хәбәренә Өфө районы эшҡыуары Азат Нурлығаянов яуап бирә. Ул да әлеге көндә Ватан һағында торған туғандары өсөн ике внедорожник әҙерләүе, әммә транспорт сараларын ебәреү менән ҡыйынлыҡтар тыуыуы тураһында әйтә. Интернет аша барлыҡҡа килгән бизнес-берләшмә машиналарҙы оператив рәүештә фронтҡа оҙатыуҙы ойошторорға ярҙам итә.

Өфөнөң 308-се балалар баҡсаһынада МХО биләмәһенән ҡыҫҡа ваҡытлы ялға ҡайтҡан яугир менән осрашыу үтте

Балаларҙа ҡунаҡта. Өфөнөң 308-се балалар баҡсаһы тәрбиәләнеүселәре махсус хәрби операция биләмәһенән ҡыҫҡа ваҡытлы ялға ҡайтҡан яугир менән осрашты. Ватан һаҡсыһы менән үткән илһөйәрлек кисәһе хаҡында киләһе яҙмала.

Күгәрсен районы Туйымбәт ауылында Зәйнәб Биишева исемендәге район әҙәби премияһы тапшырылды

Күгәрсен районы Туйымбәт ауылында Башҡортостандың халыҡ яҙыусыһы, Салауат Юлаев исемендәге дәүләт премияһы лауреаты Зәйнәб Биишева исемендәге район әҙәби премияһы тапшырылды. Матур йолаға әүерелгән тантана быйыл 26-сы тапҡыр уҙғарылды.