Өфөлә Ағиҙел йылғаһы аша күпеҙә реконструкция дауам итә

Ҡала өсөн мөһим юл объектында күләмле төҙөлөш 50 процентҡа әҙер. Әле участкала 150 эшсе эшләй, тиҫтәләгән берәмек техника йәлеп ителгән. Реконструкция килешеү графигы буйынса алып барыла. Ҡала халҡы һәм ҡунаҡтар көтөп алған Ағиҙел күпере быйыл август аҙағында асыласаҡ тип күҙаллана.

Башҡортостан туңдырмаһы экспортҡа сыға

Башҡорт һөтөнән етештерелгән татлы ризыҡ Вьетнам, Евразия иҡтисади союзы илдәренә, шулай уҡ Әзербайжан һәм Үзбәкстанға оҙатыла. Әле Ҡытай һәм Тайланд баҙарына сығыу мәсьәләһе хәл ителә. Етештереү ҡеүәтен арттырыуға «Башҡорт туңдырмаһы» компанияһы менән Башҡортостан Хөкүмәте араһында төҙөлгән инвестиция проекты ярҙам итә. Уға ярашлы, предприятие базаһы тулыһынса яңыра, был туңдырманы етештереүҙе 20 процентҡа арттырырға мөмкинлек биргән.

Башҡортостан «Беренселәр хәрәкәте»нең грант еңеүселәре күплеге буйынса илдә алдынғы төбәктәрҙең береһе

Былтыр төбәктән 32 башланғыс конкурс еңеүсеһе тип табылған. «Беренселәр хәрәкәте»нән йәлеп ителгән грант күләме 124 миллион һумдан ашҡан. Был аҡсаларға тотош республикала алтмышҡа яҡын проект тормошҡа ашырыла. Бөгөн үткән йыл һөҙөмтәләре буйынса еңеүселәр тәбрикләнде.

Өфөләге "Еңеү" кинотеатрында реконструкция дауам итә

Черниковкала урынлашҡан бинаның нигеҙе нығытылған, ҡыйыҡта эштәр башҡарылған. Был турала Калинин район хакимиәтенән хәбәр итәләр. Капиталь ремонт өсөн ҡала бюджетынан 235 миллион һум бүленгән. "Еңеү" кинотеатры 2000-се йылдан коммерция ойошмаһы ҡарамағында була. 17-се йылдың йәйендә ваҡытлыса ябылды. 2022 йылда бина Өфө йәш тамашасы театрына тапшырылды.

Башҡортостанда 450 меңгә яҡын ғаиләгә Әсәлек капиталы тапшырылған

Социаль фондтан хәбәр итеүҙәренсә, был программа илдә 2007-се йылдан ғәмәлгә ашырыла. Ошо ваҡыт эсендә республика ғаиләләренә 160 миллиард һумлыҡ сертификат бирелгән. Әсәлек капиталы программаһы 2030 йылға тиклем оҙайтылды. Беренсе бала өсөн сертификат 676 мең һумға етте. Икенсе балаға тағы 217 мең һум өҫтәлә.

Рәсәйҙә электр самокатында йөрөгән полиция патруле барлыҡҡа килде

Проект һынау үтә. Әле шәхси мобиль саралар Сочи урамдарын тикшергән ваҡытта файҙаланыла. Яҡын арала был тәжрибәне башҡа ҡалаларға ла таратыу ҡарала. Һынау уңышлы үткән осраҡта, электр самокаттары хоҡуҡ һаҡсылары өсөн киң ҡулланылған транспорт буласаҡ.

Башҡортостан мәктәптәрендә ашатыу сифаты тикшерелде

Был мәсьәлә Республика хөкүмәтендә ҡаралды. Премьер-министр Андрей Назаров белдереүенсә, 13 ғинуарҙан башлап мәктәп һәм балалар баҡсаларына 37 рейд ойошторолған. Ризыҡ лабораторияла тикшерелгән. Уҙған йыл менән сағыштырғанда етешһеҙлектәр кәмегән. - Учреждениеларҙа ашатыу сифатын күҙәтеү дауам итә. Шулай уҡ белем биреү ойошмалары ашнаҡсылары араһында һөнәри конкурс ойошторола, тип белдерелде ултырышта.

Радий Хабиров «Рәсәйҙә эш» модулле күп функциялы кадрҙар үҙәге эшмәкәрлеге менән танышты

Башҡортостан башлығы Радий Хабиров Сибайҙа асылған «Рәсәйҙә эш» модулле күп функциялы кадрҙар үҙәге эшмәкәрлеге менән танышты. «Демография» милли проекты буйынса төҙөлгән объект былтыр декабрҙә файҙаланыуға тапшырылғайны. Бында урындағы халыҡҡа эш табыу, өҫтәмә һөнәри белем алыу өсөн барлыҡ шарттар булдырылған, эшкә урынлашыу, резюме тултырыу буйынса консультациялар бирелә.

Радий Хәбиров Баймаҡ районынан МХО-ла һәләк булған яугирҙарҙың ғаиләләре менән осрашты

Баймаҡ районына эш сәфәре барышында Башҡортостан башлығы Радий Хәбиров махсус хәрби операцияла һәләк булған яугирҙарҙың ғаиләләре менән дә осрашты. Төбәк етәксеһе хәрбиҙәрҙең ата-әсәләре, ҡатындары, балаларының оло ҡайғыһын уртаҡлашып, уларға генерал Миңлеғәле Шайморатов орденын тапшырҙы.

Парламент ултырышында дини татыулыҡ мәсьәләһе ҡаралды

Дини мөнәсәбәттәр, грант, медицина ярҙамы буйынса мөрәжәғәттәр. Дәүләт Йыйылышы - Ҡоролтайҙың граждандар институты, мәғлүмәт сәйәсәте һәм дин эштәре буйынса комитеты ултырышының көн тәртибенә ошо һәм башҡа мәсьәләләр сығарылды.

«Өфө» халыҡ-ара аэропорты «Рәсәйҙең һауа ҡапҡалары» милли премияһында еңеү яуланы

Мостай Кәрим исемендәге «Өфө» халыҡ-ара аэропорты «Рәсәйҙең һауа ҡапҡалары» милли премияһында еңеү яуланы. Ул «Йылына 2-6 миллион пассажир ағымы булған иң яҡшы аэропорт» номинацияһында уңыш ҡаҙанды. Коллективтың юғары тармаҡ наградаһына лайыҡ булыуы менән Радий Хәбиров ҡотланы.

Өфө ғалимдары ялған балды асыҡлау юлын уйлап тапҡан

Башҡорт балы тип алдап булмаясаҡ. Өфө ғалимдары ялған балды асыҡлау юлын уйлап тапҡан. Улар башҡорт тоҡомло бал ҡорто йыйған балдың днк-һын асыҡлаған. Был уникаль алым фальцификация менән көрәшеү мөмкинлеге бирә. Ғалимдар бөгөн «Фән сәғәте» форматында үткән күсмә кәңәшмәлә был өлкәләге һуңғы асыштары менән таныштырҙы.

Рәсәй студенттары көнө уңайынан Өфөлә йәштәр фестивале үтте

Көрәш Һарайы майҙанында ойошторолған сарала 1700 студент ҡатнашты. Фестивалдә Башҡортостан башлығы Радий Хәбиров сығыш яһаны, йәштәр менән аралашты. Майҙанда профориентацияға арналған һөнәри күргәҙмә лә эшләне. Һәләтле йәштәр республика предприятиелары белгестәре менән аралашып, ойошма эшмәкәрлеге менән танышты, үҙҙәренә тап килгән вакансияларҙы ҡараны.

«Сәләмәт киләсәк»кә арналған онлайн-лекторий

«Берҙәм Рәсәй» партияһының Башҡортостандағы йәмәғәт ярҙамы штабы Ватан һаҡсыларын һәм уларҙың ғаилә ағзаларын ярҙам саралары менән таныштырҙы. Дистанцион форматта ойошторолған осрашыуҙа төрлө өлкә белгестәре көнүҙәк һорауҙарға яуап бирҙе.

Башҡортостанда тәүге тапҡыр ауыр сирҙәрҙе дауалауҙың яңы ысулы индерелде

Республика кардиология үҙәгендә идара ителеүсе катетерлы ультратауыш тромболиз ысулы менән үпкә артерияһы тромбоэмболияһын дауалау буйынса беренсе операция эшләнде. Был операция әлегә илдең тик өс федераль үҙәгендә яһала. Пациенттың хәлен БЮТ ижади төркөмө лә белеште.

Өфөлә Роза Аҡкучукованың тыуыуына 75 йыл тулыуға арналған күргәҙмә асылды

Алтын балдаҡ. Ошондай исем аҫтында Өфөлә Башҡортостандың халыҡ артисы Роза Аҡкучукованың тыуыуына 75 йыл тулыуға арналған күргәҙмә асылды. Экспозицияларҙа сәхнә оҫтаһының шәхси әйберҙәрен, афишаларҙы, автографлы китаптарын һәм башҡа ҡомартҡыларҙы күрергә мөмкин.

Өфөлә «Башҡорт дәүләт ҡурсаҡ театры» әҙәбиәтенең библиографик күрһәткесе менән таныштырыу үтте

Республика Милли китапханаһында «Башҡорт дәүләт ҡурсаҡ театры» әҙәбиәтенең библиографик күрһәткесе менән таныштырыу үтте. Ул милли театрҙың тыуған көнөнә донъя күргән. Бөгөн республиканың алдынғы мәҙәниәт учреждениеларының береһе 93 йыллығын билдәләй.

Бөгөн Башҡортостанда халыҡ артисы Әхәт Мортазинды иҫкә алалар

Уның тыуыуына 66 йыл тула. Әхәт Мотаһар улы халыҡ араһында башҡорт Левитаны булып танылды. Ул утыҙ йылдан ашыу радиола эшләне, телевидениела, сәхнәлә хеҙмәт итте, ҙур сараларҙың рәсми тауышы булды. Бөгөн Учалыла Әхәт Мортазинға арналған “Диктор тауышы” республика конкурсы еңеүселәрен бүләкләү тантанаһы була. Ижади ярышты “Юлдаш” радиоһы, Бөтә донъя башҡорттары ҡоролтайы һәм Учалы районы хакимиәте ойоштора.

Башҡортостан аграрийҙарына бер миллиард һумлыҡ ярҙам күрһәтелә

Республика хөкүмәте премьер-министры Андрей Назаров белдереүенсә, субсидия башлыса ауыл хужалығы техникаһы, тоҡомло мал, минераль ашлама алыуға бирелә. Быйыл яҙ Башҡортостанда 2 миллион 800 мең гектар ер сәселә.

Башҡортостанда ир-егеттәр контракт килешеүе буйынса хәрби хеҙмәткә ҡабул ителә

Егеттәр «Һаҡсы» үҙәгендә «берҙәм тәҙрә» ысулы буйынса медицина тикшереүе үтә, банк картаһы аса һәм документтарҙы туплап алғы һыҙыҡҡа юллана ала. Үҙәктә анализдар тапшырыу һәм медицина тикшереүе үтеү өсөн тейешле шарттар тыуҙырылған. Өс тапҡыр туҡланыу, йәшәү бүлмәләре ҡаралған. Бөтә хеҙмәттәр бушлай күрһәтелә.

Ирекмәндәр республика хәрби дан музейына «Бук» зенит ракета комплексының ҡойроҡ өлөшөн тапшырҙы

Нацистар махсус хәрби операция биләмәһендә Рәсәй вертолетын бәреп төшөрөргә маташҡанда, ул беҙҙең ғәскәрҙәрҙең позицияһына ҡолай. Бәхеткә күрә, бер кем дә зыян күрмәй.
Волонтерҙар вәғәҙәһен үтәй. Меңәрләгән саҡрым юл үтеп «Бук» ЗРК ракетаһының ҡойроҡ өлөшө Өфөгә килтерелә. Уның ауырлығы бер нисә тиҫтә килограмм. Республика хәрби дан музейы хеҙмәткәрҙәре әйтеүенсә, бындай экспонат әлегә булмаған.