Махсус хәрби операция ветераны мөхәббәтен тапты

Махсус хәрби операциянан һуң мөхәббәтен осратҡан. Хәрби бәрелештәр ветераны, «Ватанды һаҡлаусылар» дәүләт фондының төбәк бүлексәһе социаль координаторы Олег Мифтахетдинов Өфө ҡыҙы Альбина менән законлы никахҡа инде. Баш ҡаланың Киров районы ЗАГС-ында үткән тантанала йәштәрҙең туғандары, дуҫтары һәм коллегалары йыйылды.

Бүздәк районында Ғабдулла Ғиләжевтың 95 йыллығына арналған хәтер кисәһе үтте

Күренекле режиссер, актер, педагог Ғабдулла Ғиләжевтың тыуыуына 95 йыл. Тарихи дата айҡанлы бөйөк шәхестең уҡыусылары Ғабдулла Ғабдрахман улының тыуған төйәгендә-Бүздәк районы Ҡаңны -Төркәй ауылында хәтер кисәһе үткәрҙе. Сәхнә оҫталары остаздары тураһындағы хәтирәләре менән уртаҡлашты, уның спектаклдәренән өҙөктәр күрһәтте.

Герой-әсәләр өсөн айлыҡ түләү 72 мең һумға етеүе мөмкин

Хеҙмәт һәм социаль яҡлау министрлығы федераль закон проекты әҙерләгән. Ошондай уҡ сумманы Хеҙмәт Геройҙары өсөн билдәләү тәҡдим ителә. Түләү йыл һайын 1 февралдән индексациялана. Айлыҡ аҡсаны социаль хеҙмәттәргә льгота менән алмаштырырға мөмкин.

Радий Хәбиров «Башҡортостан геройҙары» республика кадрҙар программаһы старт алыуын иғлан итте

Оператив кәңәшмәлә Радий Хәбиров «Башҡортостан геройҙары» республика кадрҙар программаһы старт алыуын иғлан итте. Идара итеү системаһына махсус хәрби операцияла ҡатнашыусылар һәм демобилизацияға эләгеүселәр иҫәбенән белгестәр әҙерләнә башлай. Шулай уҡ фән өлкәһен үҫтереү ҙә - өҫтөнлөклө йүнәлештәрҙең береһе. Төбәк етәксеһе Указы менән «Йылдың йәш ғалимы» тип исемләнгән яңы премия булдырылды. Ултырышта күтәрелгән мөһим яңылыҡтар һәм көнүҙәк мәсьәләләр тураһында репортаж.

Башҡортостанда «Алға» махсус иҡтисади зонаһы ойошторолоуға 5 йыл

Ишембай районында эшләгән «За спорт» кейем тегеү фабрикаһы «Алға « сиктәрендә еңел сәнәғәт предприятиеларының уңышлы миҫалы. Сифатлы кейем тегеү цехтарында производствоның бөтә этаптары ойошторолған , районда 300 кешегә яңы эш урыны булдырылған

Башҡортостан журналистары һәм блогерҙары өсөн Рәсәйҙең иң көнбайыш төбәгенә матбуғат туры ойошторолдо

Өфөнән Калинградҡа. Башҡортостан журналистары һәм блогерҙары өсөн Рәсәйҙең иң көнбайыш төбәгенә матбуғат туры ойошторолдо. Үҙенсәлекле сәйәхәттә ҡатнашыусылар Калининград өлкәһе мәҙәниәтен, тарихын өйрәнде, төрлө ҡалаларында булып иҫтәлекле урындар менән танышты.

Өфө ирекмәндәре махсус хәрби операциялағы яугирҙарына бронялы УАЗ автомобиле тапшырҙы

«Башҡортостан» полкы хәрбиҙәре һорауын баш ҡаланың Октябрь районындағы төҙөлөш компанияһы үтәгән. Район хакимиәте яугирҙарға генератор һәм бензобысҡыс та алған. Машинаны отпуск ялына ҡайтҡан яугирҙар яҡын арала махсус хәрби операция биләмәһенә алып китәсәк. Һалдаттар Даян Мурзин исемендәге ирекле батальоны составында Ҡыҙыл Лиман йүнәлешендә хеҙмәт итә. Әйткәндәй, УАЗ автомобиле дрондарға ҡаршы тимер менән йыһазландырылған.

Февралдә оҙайлы ялдар булмаясаҡ

23 февраль йәкшәмбегә тура килә. Өҫтәмә ял 8 майға күсерелә. 24 февраль – тулы хеҙмәт көнө. Рәсәйҙә Ватанды һаҡлаусылар көнө рәсми ял тип иғлан ителгән. Ҡанун буйынса, байрам эш көнөнә тура килһә, ул ял тип иғлан ителә. Шәмбе йәки йәкшәмбе булһа, ял дүшәмбе йәки йомаға күсерелә. Ҡыштың һуңғы айында байрамда оҙайлы ял итеү ҡаралмаған. Ил халҡын 8 майҙан 11-енә тиклем каникул көтә.

Быйыл Башҡортостан хужалыҡтары ҡара сиңерткәнән зыян күреүе ихтимал

Илдең 20 төбәгенә хәүеф янай. Айырыуса Ҡаҙағстан менән сиктәш субъекттарҙа хәл киҫкен буласаҡ. Ауыл хужалығын күҙәтеү хеҙмәтенән ошо турала белдерәләр. Ҡыш йылы тороуға бәйле, бөжәктәрҙең артыуы фаразлана. Ҡара сиңерткә менән көрәшеү маҡсатында төбәктәрҙә махсус отрядтар ойоштороу ҡарала.

Башҡортостан бокс федерацияһы илдә иң яҡшыһы тип танылды

Юғары награда Бөтә Рәсәй боксерҙар форумында тапшырылды. Әле республикала 4 меңдән ашыу кеше бокс менән профессиональ кимәлдә шөғөлләнә. 500 спортсы Рәсәйҙең спорт мастерына кандидат, 23-ө спорт мастеры, икәүһе халыҡ-ара класлы спорт мастеры исеменә лайыҡ булды, тип белдерәләр Спорт министрлығынан.

Көнбайышта - "Евровидение", беҙҙә - "Интервидение"

Президент Владимир Путин быйыл халыҡ-ара музыка конкурсын уҙғарыу тураһында указға ҡул ҡуйҙы. Документ менән рәсми мәғлүмәттәр порталында танышырға мөмкин. "Интервидение" Мәскәүҙә һәм Мәскәү өлкәһендә үткәрелә. Илдәр араһында мәҙәни һәм гуманитар бәйләнештәрҙе үҫтереү маҡсаты ҡуйылған. Конкурсты ойоштороу комитеты булдырыла, сараны уҙғарыу ваҡыты аныҡланмаған.

Сабыйҙарға ҡушылған үҙенсәлекле исемдәрҙе атанылар

ЗАГС реестры 1 ғинуарҙан 2 февралгә тиклемге мәғлүмәттәрҙе иғлан итте. Ҡыҙҙарға һирәк исемдәр араһында Роксалана, Сәлимә, Амилина, Богдана һәм Дияна. Малайҙарға Рауил, Абрам, Суан Ву һәм тигән үҙенсәлекле исемдәр ҡушылған. Иң популяр исемдәр Әминә, Йәсминә, Эмилия, Ева, Амилия, Эмир, Мирон, Әмир һәм Михаил булған.

Быйыл Башҡортостанда 94 йәмәғәт биләмәһе яңыртыла

Был турала Радий Хәбиров рәйеслегендә уҙған «Ҡала мөхите сәғәте» форматындағы кәңәшмәлә билдәләнде.Реновация «Уңайлы ҡала мөхитен булдырыу» федераль проекты буйынса үтә һәм уға миллиард һумдан ашыу аҡса йүнәлтелә. Өфөлә Башҡортостандың беренсе Президенты Мортаза Рәхимовҡа һәйкәл ҡуйылған Ленин исемендәге парк, Стәрлетамаҡта Киров исемендәге парк, Салауатта Космонавтар бульвары, шулай уҡ төбәктең башҡа мөйөштәрендәге йәмәғәт биләмәләре яңыртыла.

Өфө заводы динамик подзарядкалы яңы «Электробус» линейкаһы сығарырға йыйына

Халыҡта улар «гармошка» тип йөрөтөлә. Был электробустарҙа тәпәш иҙән майҙаны ҙурайтылыуы аҙ мобилле граждандарға уңайлы. Навигация һәм климат-контроль системалары, видеокүҙәтеү, медиакомплекс - яңы троллейбустың яҡшы яҡтары күп. Улар бер зарядка менән 20 километр араны үтә ала. Модель Минск автомобиль заводы менән берлектә эшләнгән.

Башҡортостанда йәшәүселәр менән Дәүләт Думаһы һәм Дәүләт Йыйылышы - Ҡоролтай депутаттары осраша

«Берҙәм Рәсәй» фирҡәһенең төбәк йәмәғәт ҡабул итеү бүлмәһендә граждандарҙы социаль мәсьәләләр буйынса ҡабул итеү аҙналығы башланды. Башҡортостанда йәшәүселәр менән Дәүләт Думаһы һәм Дәүләт Йыйылышы - Ҡоролтай депутаттары осраша. Аҙна дауамында ҡабул итеүгә килгән кешеләргә төбәктең социаль фонды һәм федераль мотлаҡ медицина страховкаһы фонды, Рәсәй юристар ассоциацияһы кеүек ведомстволар һәм республиканың Кеше һәм Бала хоҡуҡтары буйынса вәкилдәренә һорауҙар менән мөрәжәғәт итеү мөмкинлеге тыуҙырыла.

Бүздәк районы ирекмәндәре махсус хәрби операциялағы яҡташтарына даими ярҙам күрһәтә

Бөтәбеҙгә бер еңеү. Бүздәк районы ирекмәндәре махсус хәрби операциялағы яҡташтарына даими ярҙам күрһәтә. Гуманитар ылау әҙерләүгә барлыҡ учреждениелар, эшҡыуарҙар, ябай халыҡ ҡушылған.

Ҡыштың йылы тороуына бәйле, республика йылға-күлдәренә рейдтар ваҡытынан алда башланыуы ихтимал

Ҡыштың йылы тороуына бәйле, республика йылға-күлдәренә рейдтар ваҡытынан алда башланыуы ихтимал. Иҫкәртеүсе саралар бөгөн Кушнаренко районының Сәрмәсән йылғаһында үтте. Эште урындағы хакимиәт ҡарамағындағы ҡотҡарыу хеҙмәте вәкиле алып барҙы. Ул күптән түгел махсус хәрби операцияла хеҙмәт итеп, тыуған яғына эшкә ҡайтҡан.

Башҡортостанда студент отрядтарын үҫтереү буйынса оператив штаб ойошторола

Ул республика предприятиеларында вакансиялар булдырыу менән бәйле мәсьәләләрҙе хәл итергә тейеш. Беҙҙә 120-нән ашыу студент отряды эшләй. Былтыр 4 меңгә яҡын кеше хеҙмәт урыны менән тәьмин ителгән. Әйткәндәй, иртәгә Өфөлә студенттар фестивале үтә. Унда Башҡортостан һәм Рәсәй вуздарында белем алған ҡыҙҙар һәм егеттәр ҡатнаша. Шулай уҡ ойошма һәм компания етәкселәре саҡырылған.

Радий Хәбиров Баймаҡ районы Урғаҙа ауылында яңы социаль-мәҙәни үҙәкте асыу тантанаһында ҡатнашты

Башҡортостан башлығы Радий Хәбиров Баймаҡ районы Урғаҙа ауылында яңы социаль-мәҙәни үҙәкте асыу тантанаһында ҡатнашты. Биләмәлә медицина ярҙамы сифаты ла яҡшырған, яңы модулле участка дауаханаһы сафҡа индерелгән. Эш сәфәре барышында Урал аръяғы агросәнәғәт колледжы биләмәһендә күренекле дәүләт эшмәкәре, сирек быуатҡа яҡын БАССР-ҙың Министрҙар Советын етәкләгән Зәкәриә Аҡназаровҡа бюст та асылды.

Өфөлә Ағиҙел йылғаһы аша күпеҙә реконструкция дауам итә

Ҡала өсөн мөһим юл объектында күләмле төҙөлөш 50 процентҡа әҙер. Әле участкала 150 эшсе эшләй, тиҫтәләгән берәмек техника йәлеп ителгән. Реконструкция килешеү графигы буйынса алып барыла. Ҡала халҡы һәм ҡунаҡтар көтөп алған Ағиҙел күпере быйыл август аҙағында асыласаҡ тип күҙаллана.

Башҡортостан туңдырмаһы экспортҡа сыға

Башҡорт һөтөнән етештерелгән татлы ризыҡ Вьетнам, Евразия иҡтисади союзы илдәренә, шулай уҡ Әзербайжан һәм Үзбәкстанға оҙатыла. Әле Ҡытай һәм Тайланд баҙарына сығыу мәсьәләһе хәл ителә. Етештереү ҡеүәтен арттырыуға «Башҡорт туңдырмаһы» компанияһы менән Башҡортостан Хөкүмәте араһында төҙөлгән инвестиция проекты ярҙам итә. Уға ярашлы, предприятие базаһы тулыһынса яңыра, был туңдырманы етештереүҙе 20 процентҡа арттырырға мөмкинлек биргән.