Радий Хәбиров Рәсәйҙең баш раввины Берл Лазар менән осрашты

Башҡортостанда төрлө дин вәкилдәре оҙаҡ йылдар татыулыҡта һәм тыныслыҡта йәшәй. Был дуҫлыҡты диндарҙарҙың әүҙем эшмәкәрлеге лә нығыта. Республика башлығы Радий Хәбиров Рәсәйҙең баш раввины Берл Лазар менән осрашыуҙа дин әһелдәренең йәмғиәттәге ролен юғары баһаланы.

Радий Хәбиров һәм Берл Лазар Өфөлә социаль үҙәккә нигеҙ һалды

Өфөлә «Үҙенсәлекле балалар үҙәге» төҙөлә. Социаль объектҡа нигеҙ ташы бөгөн тантаналы шарттарҙа һалынды. Сарала Башҡортостан башлығы Радий Хәбиров, Рәсәйҙең баш раввины Берл Лазар ҡатнашты.
Йәһүд милли-мәҙәни ойошмаһы менән синагога янында урынлашасаҡ үҙәк үҙенсәлекле балаларҙың ижади, спорт һәләттәрен, фекерләү ҡеүәһен үҫтереү буйынса махсуслашасаҡ. Бында төрлө түңәрәктәр асыу, дауалау өсөн шарттар тыуҙырыу ҡарала.

Радий Хәбиров хоҡуҡ һаҡлау органдарының һөҙөмтәле эшен билдәләне

Тәүлек эсендә республикала йәшәүселәр мутлашыусыларға 31 миллион һумдан ашыу аҡса күсергән. Мәғлүмәт технологиялары ҡулланып башҡарылған енәйәттәргә ҡаршылыҡ күрһәтеү - полиция өсөн көнүҙәк мәсьәлә. Дөйөм алғанда, төбәктә енәйәтселек кимәле Волга буйы федераль округы буйынса иң түбәндәренең береһе һанала. Был турала ведомствоның коллегия ултырышында билдәләнде. Ултырышта йыллыҡ оператив-хеҙмәт эшмәкәрлегенә йомғаҡ яһалды. Башҡортостан башлығы Радий Хәбиров хоҡуҡ һаҡлау органдарының һөҙөмтәле эшен билдәләп, бер төркөм хеҙмәткәрҙәргә дәүләт наградалары тапшырҙы.

Өфөлә производствола бәхетһеҙ осраҡтан зыян күргән 9 кешегә автомобиль асҡысы тапшырылды

Яңы машина хужаларының физик мөмкинлектәрен иҫәпкә алып йыһазландырылған һәм ҡул менән идара итеү системаһына көйләнгән. Әйткәндәй, былтыр махсус йыһазландырылған машиналар 66 кешегә тапшырылған.

Заманса медицина: Ҡыуатов исемендәге Республика клиник дауаханаһында яңы мөмкинлектәр

Ҡыуатов исемендәге Республика клиник дауаханаһы 2024 йылда сифат күрһәткестәре буйынcа Рәсәй Хөкүмәте премияһына лайыҡ булды. Бай тарихлы медицина учреждениеһы Башҡортостандың иң ҙур дауаханаһы иҫәпләнә. Йыл һайын бында 240 мең кеше мөрәжәғәт итә. Клиника табиптары Башҡортостан ауылдарына барып граждандарға медицина ярҙамы күрһәтә, тармаҡ белгестәрен әҙерләү йүнәлешендә күп яҡлы эш алып бара.

Белорет районы Манышты ауылында милли һәм этник спорт төрҙәренең республика ярышы үтте

Белорет районы Манышты ауылында Бигарыҫлан Солтанов иҫтәлегенә милли һәм этник спорт төрҙәренең республика ярышы үтте. Уның исеме күптәргә профессиональ башҡорт һынлы сәнғәтенә нигеҙ һалыусы Ҡасим Дәүләткилдиевтың «Башҡорт һунарсыһы» картинаһы аша таныш. Өсөнсө тапҡыр ойошторолған сарала республиканың 12 районынан 80-дән ашыу кеше ҡатнашты.

Өфөлә иң шәп педагогтарҙы билдәләйҙәр

Баш ҡалала “Йыл уҡытыусыһы”, “Башҡорт теле һәм әҙәбиәте йыл уҡытыусыһы” “Класс етәксеһе” һәм “Балаларға йөрәгемде илтәм” конкурстары уҙа. Педагогтар бәйгеһендә 70 уҡытыусы һынау тота. Ҡала кимәлендә ойошторолған конкурс лауреаттары еңеүселәре 14 февралдә билдәле була.

2024 йылда Башҡортостанда 4 балалар лагерында 5 яңы корпус асылған

Вице-премьер Ирек Сәғитов белдереүенсә, беҙҙең республика федераль проектта ҡатнаша. Уға ярашлы, уҙған йылда лагерҙарҙа 250-гә яҡын урын булдырылған. Бының өсөн 147 миллион һум тотонолған. - "Патриот" паркында ике заманса модуль, шулай уҡ Стәрлебашта "Орленок", Ҡыйғы районында "Маяҡ", Өфөлә "Чайка" лагерҙарында корпустар асылды. Башҡортостан балалар ялын ойоштороу шарттарын яҡшыртыуға йүнәлтелгән проектта киләсәктә лә ҡатнашасаҡ, тине премьер-министр урынбаҫары.

Республикала “Иң яҡшы баҡсасылыҡ ширҡәттәре” асыҡлана

Ауыл хужалығы министрлығынан хәбәр итеүҙәренсә, Башҡортостан Башлығы грантына заявкалар ҡабул итеү башланды. Быйылдан 500 мең һумлыҡ 20 грант бирелә. Конкурс һөҙөмтәләре “Смарт-баҡсасы” халыҡ-ара форумында иғлан ителә. Ул 27 февралдә үтә.

Йома көндө матур яңылыҡ!

Радий Хәбиров шатлыҡлы яңылыҡ менән уртаҡлашты. Әр-Рәхим мәсете манаралары әҙер. Республика етәксеһе әйтеүенсә, яҡын киләсәктә мәсеттең емерек хәлгә төшкән түбәһен ремонтлау ҡарала.

– Ә быйылғы йылға төп бурыс – фасад эштәрен тамамларға. Кәрәкле бөтә тикшереүҙәр үткәрелде, техник документтар әҙер. Хоҙай ярҙамы менән барыһын да эшләйәсәкбеҙ, – тип уртаҡлашты республика етәксеһе.

Өфөлә ҡар таҙартыусылар штаты 70 процентҡа тупланған

Был турала ҡаланың коммуналь хужалыҡ идаралығы етәксеһе Арсен Латыпов белдерҙе. 380 техника әҙерләнгән. Көслө ҡар яуғанда ҡуртымға алынған трактор-машиналар йәлеп ителә. Көн һайын ҡарҙы 300 хеҙмәткәрҙә таҙарта, тине ул.

«Әр-Рахим» йәмиғ мәсетенең манараларын көпләү тамамланды

Бөгөн башҡарылған эш һөҙөмтәһе менән республика башлығы Радий Хәбиров танышты. Манаралар Грециялағы «Тассос» ятҡылығының тәбиғи ташы менән тышланды. Артабан эшселәр мәсеттең ҡыйығын ябыуға тотонасаҡ. Республика етәксеһе ҡулланыласаҡ материалдар һәм эш темпы менән ҡыҙыҡһынды.

Өфөнөң Дим биҫтәһендә глэмпинг-парк төҙөләсәк

Проект менән «Инвестиция сәғәте»ндә «Феникс» компанияһы етәксеһе Евгения Машко таныштырҙы. Майҙансыҡты әҙерләүгә һәм рекреацион объекттар төҙөүгә 250 миллион һум йүнәлтеү күҙаллана. Башҡортостандың Үҫеш корпорацияһы ярҙамында ер участкаһы һайланған һәм кәрәкле проект документацияһы әҙерләнгән.

Ике аҙналыҡ ялдан һуң хәрбиҙәрҙең бер төркөмө йәнә алғы һыҙыҡҡа юлланды

Күптәр өсөн был иҫәп буйынса бишенсе отпуск булған. Мобилизация буйынса махсус хәрби операция бурыстарын үтәгән яҡташтарыбыҙҙы ғаиләләре, дуҫтары оҙатты. Яугирҙар «Өфө-Арена» комплексы эргәһендәге майҙандан хеҙмәт урынына тиклем уңайлы шарттарҙа биш автобуста бара.

Ватанды һаҡлаусыларға ярҙам: Ишбирҙелә фәһемле осрашыу һәм концерт үтте

Баймаҡ районы Ишбирҙе ауылы биләмәһендә Махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылын асыу тантанаһы үтте. Ошо уңайҙан фәһемле осрашыу, хәрби-патриотик концерт ойошторолдо.

Башҡортостанда юл буйы сервисын үҫтереү программаһы ойошторолоуға - 5 йыл

Ошо ваҡыт эсендә республика трассаларында йөҙләп объект сафҡа индерелгән, иҫке биналар төҙөкләндерелгән. Кафе, дарыухана, йылы бәҙрәф, ҡунаҡхана, кибет төҙөлгән, башҡа уңайлыҡтар булдырылған. Рәсәй юл буйы сервистары исемлегендә иң яҡшы тәжрибә тип табылды.

Асҡын районы ирекмәндәре маскировка селтәрҙәре үрә

Дошман күҙенә күренмәй, тимәк,яугирҙарҙың ғүмерен яҡшыраҡ һаҡлай. Маскировкалау селтәрҙәренең яңы төрө махсус хәрби операция биләмәһендә ҙур ихтыяж менән файҙалана. Был турала Асҡын районы хәрбиҙәренең береһе ҡайтҡан саҡта һөйләгән. Яҡташтары өсөн был ябай һүҙ генә булмай. Улар шунда уҡ пенопласт һәм капрон ярҙамында һаҡланыу сараһының яңы төрөн үрергә тотона. Ҡош осошонан ҡарағанда, селтәр аҫтындағы техника емерелгән бина ҡалдыҡтары һәм күмерләнгән кирбес кеүек тойола. Был эштә Асҡын ауылының беренсе мәктәбе уҡыусылары һәм уҡытыусылары ла әүҙем ярҙамлаша.

Үҙ проектыңа миллион һум: Өфөлә грант алыу буйынса интенсив үтте

Үҙ проектыңа миллион һумға тиклем нисек грант йәлеп итеү тураһында Өфөлә үткән интенсивта һүҙ барҙы. Башҡортостан Йәмәғәт палатаһының Ресурстар үҙәге белгестәре грант шарттары һәм тәртибе менән таныштырып, ҡатнашыусыларҙың проекттарын баһаланы. Тәжрибә уртаҡлашыуға республика район - ҡалаларынан 200-гә яҡын кеше килгәйне. Улар төрлө йүнәлеш буйынса үҙ проекттарын тәҡдим итте.

Ҡаңны ырыуы башҡорттары ҡор йыйҙы

Бүздәк башҡорттары ҡор йыйҙы. Ҡаңны ырыуы вәкилдәренең ҡоролтайы бөгөн район үҙәгендә үтте. Сарала ҡатнашыусылар Бөтә донъя башҡорттары ҡоролтайының алтынсы съезында ҡабул ителгән ҡарарҙар, Бүздәк районында алып барылған эштәр менән танышты.

Өфөлә Факиһа Туғыҙбаеваның тыуыуына 75 йыл тулыуға арналған түңәрәк өҫтәл үтте

«Фатихамды бирәм һиңә». Тап ошо исем аҫтында «Торатау» Конгресс-холлында Башҡортостандың халыҡ шағиры, Салауат Юлаев исемендәге дәүләт премияһы лауреаты Факиһа Туғыҙбаеваның тыуыуына 75 йыл тулыуға арналған түңәрәк өҫтәл үтте. Һөйләшеүҙә танылған әҙиптәр, музей-китапхана хеҙмәткәрҙәре, әҙәбиәтселәр, тел белгестәре ҡатнашты.

Хәйбулла районы Федоровка ауылында ҡышҡы балыҡ тотоу буйынса ярыш уҙҙы

«Айыҡ ауыл» республика конкурсы сиктәрендә Хәйбулла районы Федоровка ауылында ҡышҡы балыҡ тотоу буйынса ярыш уҙҙы. Уны яңы ғына ойошторолған «Таяныс» атайҙар клубы үткәрҙе. Балыҡ ҡармаҡларға күрше ауыл вәкилдәре лә килде, тотош ғаиләләре менән ҡатнашыусылар ҙа булды.