Баймаҡ районының Аҡморон ауылында патриотик спорт сараһы үтте

Рәсәйҙә Ватанды һаҡлаусылар, Башҡортостанда махсус хәрби операцияла ҡатнашыусыларға һәм уларҙың ғаилә ағзаларына ярҙам йылы сиктәрендә мәҙәни, спорт саралары ла ойошторола. Баймаҡ районы Аҡморон ауылында уҙған волейбол турниры илһөйәр командаларҙы йыйҙы. Был хаҡта киләһе сюжетта.

Башҡортостанға инвестициялар 4 йылда ике тапҡырға артҡан

Был турала премьер-министр Андрей Назаров белдерҙе. 2021 йылда 338 миллиард һум йәлеп ителгән булған, хәҙер был һан 643 миллиардҡа еткән. Беренсе вице-премьер-Иҡтисади үҫеш һәм инвестиция сәйәсәте министры Рөстәм Моратов белдереүенсә, Башҡортостан Рәсәйҙең йылдам үҫешеүсе төбәктәре рәтендә. Инвестиция күрһәткестәре лә яҡшыра бара.

Башҡортостанда айлыҡ коммуналь түләү ваҡытын үҙгәртергә тәҡдим итәләр

Дәүләт Йыйылышы-Ҡоролтайҙа закон проекты әҙерләнгән. Әле Торлаҡ кодексы буйынса түләү һәр айҙың 10-сы көнөнә тиклем башҡарылырға тейеш. Дөйөм йорт өсөн иҫәпләү приборҙарындағы күрһәткестәр 23-сө 25-се көндәрҙә теркәлә. Был йортта уртаҡ милек өсөн коммуналь ресурстарға түләүҙе иҫәпләгәндә ҡатмарлыҡтар тыуҙыра. Депутаттар коммуналь түләү ваҡытын айҙың 25-се көнөнә тиклем билдәләргә тәҡдим итә.

Мутлашыусылар электр иҫәпләү приборын алмаштырыу һылтауы менән халыҡты алдай

Салауат ҡалаһында 72 йәшлек ҡатынға социаль селтәр аша шылтыратҡандар. Электр иҫәпләгесте бушлай алмаштырыу өсөн СМС-хәбәр менән килгән кодты әйтергә күндергәндәр. Бер аҙҙан яңы шылтыратыу булған. Ҡатындың дәүләт хеҙмәттәре порталындағы кабинеты мутлашыусылар ҡулында булыуы, аҡсаһын һаҡлап ҡалыу өсөн, уны тиҙ генә икенсе иҫәпкә күсереп өлгөрөргә кәрәк тип кәңәш иткәндәр. Ҡатын был кәңәште үтәгән һәм аҡсаһыҙ ҡалған, тип хәбәр итәләр Эске эштәр министрлығынан.

Башҡортостанда мәктәп туҡланыуын ойоштороу тәжрибәһе илдә иң яҡшыһы тип танылды

Был турала Башҡортостан башлығы Радий Хәбиров социаль селтәрҙә яҙып сыҡты. Ул белдереүенсә, республика мәктәптәре, балалар баҡсалары һәм дауаханаларҙа туҡланыу сифаты даими контролдә ҡала. Былтыр ғына социаль учреждениеларҙа аҙыҡ сифаты өсөн яуаплы ойошмалар тарафынан план буйынса һәм пландан тыш 700-ҙән ашыу күсмә, 3600-ҙән ашыу лаборатор тикшереү уҙғарылған. Етешһеҙлектәр теркәлһә лә, улар йылдан-йыл кәмей.

Дәүләт Йыйылышы-Ҡоролтайҙың Президиум ултырышында социаль закондар ҡаралды

Ауыл хужалығын үҫтереү, Бала хоҡуҡтары буйынса вәкилдең вәкәләттәрен арттырыу, социаль йүнәлешле коммерция булмаған ойошмаларға дәүләт ярҙамы.Бөгөн Дәүләт Йыйылышы-Ҡоролтайҙың Президиум ултырышында ошо һәм башҡа закон проекттары ҡаралды.

Башҡортостанға яҡынлашып килгән сатлама һыуыҡтар һөҙөмтәһендә мәктәптәрҙә дәрестәр туҡтатылыуы ихтимал

Был хаҡта республиканың мәғариф һәм фән министры Илдар Мәүлетбирҙин хәбәр итте. Метеорологтар фаразлауынса, яҡын арала төбәктә һауа температураһы түбәнәйеүе көтөлә. Шуға ла ауыл ерендәге башланғыс кластар - 23, ҡалала - 25, 5-9 кластар - ауылда - 25, ҡалала 27, өлкән кластар ауылда - 30, ҡалала 32 градусҡа тиклем һыуыҡта мәктәпкә бармаҫҡа мөмкин.

Өфө дәүләт нефть техник университеты аспиранттары роботты башҡортса һөйләшергә өйрәткән

Тимер ярҙамсының телмәр һүҙлеге әлегә ҙур түгел, тик ғалимдар уны камиллаштырыу өҫтөндә эшләй. Киләсәктә иһә ул Евразия кампусында башҡортса экскурсиялар ойошторорға тейеш, тигән маҡсат ҡуйылған.

Башҡортостанда исемен алмаштырырға теләүселәр һаны артҡан

Юстиция эштәре буйынса дәүләт комитеты мәғлүмәттәре буйынса уҙған йылда 4 мең 456 кеше ошондай мөмкинлек менән файҙаланған. Был 2023 йылдағынан 17 процентҡа күберәк. Исем алмаштырыусыларҙың күбеһе Өфө, Стәрлетамаҡ, Салауат, Октябрьский ҡалаларында теркәлгән.

Өфөлә хужаһыҙ хайуандарға ярҙам буйынса акция уҙғарыла

Ул ҡала хакимиәте башлығы Ратмир Мәүлиев башланғысы менән ойошторола. 25 ғинуарҙа Урмансылар паркында приюттарҙа аҫралған эттәр өсөн кәрәк-яраҡ йыйыла. Аҙыҡ-түлек, медицина препарттары, уйынсыҡтар килтерергә була. Тәүге тапҡыр был акция уҙған йылдың декабрендә үтте. Уны ай һайын уҙғарыу планлаштырыла.

Луганск Халыҡ Республикаһы Хөкүмәте ҡарамағында Башҡортостандың тулы хоҡуҡлы вәкиллеге булдырылды

Ул Красный Луч ҡалаһында урынлашасаҡ. Был туралағы указға Радий Хәбиров ҡул ҡуйҙы. Яңы структура Башҡортостан менән Луганск Халыҡ Республикаһы араһында сауҙа-иҡтисади, фәнни-техник, мәҙәни һәм гуманитар бәйләнештәрҙе киңәйтеү менән шөғөлләнәсәк. Башҡортостан башлығы хакимиәтенә ойошманың структураһы һәм штат һаны буйынса тәҡдимдәр әҙерләргә ҡушылды.

Стәрлетамаҡтағы «Ҡыҙыл пролетарий» предприятиеһында самосвалдар йыя башлау планлаштырылған

Евразия киңлегендә яңы техника. Стәрлетамаҡтағы «Ҡыҙыл пролетарий» предприятиеһында самосвалдар йыя башлау планлаштырылған. Ошо маҡсатта Белоруссия, Ҡаҙағстан һәм Рәсәйҙең машиналар төҙөлөшө йүнәлешендәге компаниялары менән хеҙмәттәшлек тураһында килешеү төҙөлгән.

Өфөлә МХО-ла ҡатнашыусылар һәм уларҙың ғаиләләренә ярҙам итеү йылын асыу тантанаһы уҙҙы

Өфөнөң Ленин районында Махсус хәрби операцияла ҡатнашыусылар һәм уларҙың ғаиләләренә ярҙам итеү йылын асыу тантанаһы уҙҙы. Һуңғы өс йылда райондан Ватан һағына 600-ға яҡын кеше баҫҡан, уларҙың күп өлөшө - ирекмәндәр һәм контракт төҙөүселәр. Район хакимиәтендәге һәр бер хеҙмәткәргә бер яугир ғаиләһе теркәлгән, улар төрлө яҡлап ярҙам күрһәтергә бурыслы. Район даими рәүештә фронт биләмәһенә гуманитар ылау оҙата. Ирекмәнлек эшендә әүҙемлек күрһәткән эшҡыуарҙар тантаналы сарала Рәхмәт хаттары һәм миҙалдар менән бүләкләнде.

Махсус хәрби операция башланыу менән «Беҙ бергә» девизы менән тылда халыҡ берләште

Баймаҡ районы халҡы һалдаттарға ярҙам итеүҙе бер минутҡа ла туҡтатмай. Тулыраҡ киләһе яҙмала.

«Белый» ҡушаматлы яугирҙың ғаиләһендә шатлыҡлы яңылыҡ – улы тыуҙы

«Башҡортостан» мотоуҡсылар полкының радиоэлектрон көрәш ротаһында хеҙмәт итеүсе «Белый» ҡушаматлы яугирҙың улы тыуған. Атай кеше фронтта булғанлыҡтан Бала табыу йортонан сабыйҙы «Ватан яугирҙары ғаиләләре» комитеты ағзалары ҡаршы алды.

Башҡортостанда өлөшләтә төҙөлөшкә аҡса индереп 200-гә яҡын кеше зыян күргән

«ӨфөХаус» төҙөлөш компанияһы килешеү буйынса граждандарға әҙер йорттарҙың асҡыстарын тапшырырға тейеш булған. Әммә республиканың төрлө раойндарында төҙөлөш эштәре уҙған йылдың авгусында туҡтатылған, компания етәкселеге бәйләнешкә сыҡмай, уларҙың офисы ябылған.

Бөрйән районының Ырғыҙлы ауылы «Айыҡ ауыл» конкурсында ҡатнашырға әҙерләнә

Милләт һәм конфесссия-ара татыулыҡ өлгөһө. Бөрйән районының төрлө милләт халыҡтары йәшәгән Ырғыҙлы ауылы «Айыҡ ауыл» конкурсында ҡатнашырға әҙерләнә. Күркәм тәбиғәт ҡосағында урынлашҡан ауыл әле күмәк эштәрҙән, төрлө сараларҙан гөрләп тора. Урында спорт ярыштары ла, мәҙәни программалар ҙа, патриотик рухтағы кисәләр ҙә ойошторола.

Республикала ҡырағай хайуандар өсөн 300 тонна аҙыҡ әҙерләнгән

Айырым һаҡланған биләмәләрҙә уларға ҡышлау өсөн бөтә шарттар булдырылған. “Урман кейектәренә ҡышты еңелерәк үткәреү өсөн ашлыҡ, бесән, еләк-емеш һалына”, - тип хәбәр итәләр Тәбиғәттән файҙаланыу һәм экология министрлығынан. Ҡырағай хайуандарҙы ашатыу айырым һаҡланған биләмәләрҙә уларҙың популяцияһын һаҡлап ҡалырға ярҙам итә, ти белгестәр.

Башҡортостан композиторҙары әҫәрҙәре Брайль шрифы менән нәшер ителә

Республика һуҡырҙар өсөн махсус китапханаһы әҙерләгән проект Президент гранттары конкурсында еңеп сыҡты. Уға ярашлы, һуҡыр һәм насар күргән кешеләр өсөн композиторҙар әҫәрҙәренең нота-музыка баҫмаларын уҡыу мөмкинлеге булдырыла. Был уларҙың музыкаға һәләтен үҫтерергә ярҙам итә. Брайль шрифы менән нәшер ителгән баҫмалар Башҡортостанда 14 уҡыу йортона тапшырыласаҡ.

Һунар менән шөғөлләнергә теләүселәр мотлаҡ имтихан тапшырырға тейеш була

1 сентябрҙән шундай талап көсөнә инә. Тәбиғәттән файҙаланыу һәм экология министры Нияз Фазылов хәбәр итеүенсә, билет алыу өсөн теория һорауҙарына яуап бирергә кәрәк, шулай уҡ ҡоралды ҡуллана белеү тикшерелә. Башҡортостанда 80 меңдән ашыу һунарсы теркәлгән.

Башҡортостанда яңыртылған халыҡ мәшғүллеге үҙәктәре һаны арта

Бөгөн Башҡортостанда яңыртылған 50 халыҡ мәшғүллеге үҙәге эшләй, быйыл тағы ла төҙөкләндерелгән 18 учреждение асыла. Был турала социаль селтәрҙәрҙә Радий Хәбиров яҙған.