Өфө «Бөтә донъя һөнәрселек ҡалаһы» статусын алыуға дәғүә итә

Был турала баш ҡала хакимиәтендә үткән матбуғат конференцияһында хәбәр ителде. Әле Бөтә донъя һөнәрселек советының жюри ағзалары эш сәфәре менән Өфөлә. Улар төрлө йүнәлештә ижад итеүсе оҫталар менән осраша, баш ҡаланың һөнәрселек йүнәлешен баһалай. Уның һөҙөмтәләре буйынса, юғары исемде биреү һорауы хәл ителәсәк.

Өфөнөң сауҙа үҙәктәренең береһендә «Йәшел шәмбе» экологик акцияһы уҙҙы

Сарала туҡыма ҡурсаҡтар, шәмдәр һәм ағастан картиналар эшләү буйынса оҫталыҡ дәрестәре ойошторолдо. Активистар кәрәкмәгән кейем-һалым ҡабул итте. Йыйылған әйберҙәр икенсел эшкәртеүгә ебәреләсәк, ә уларҙың бер өлөшө ғаиләләргә ярҙам итеү үҙәгенә тапшырыла.

Өфөлә Сергей Ғимаев кубогына хоккей буйынса турнир уҙҙы

Башҡортостанда йыл һайын Сергей Ғимаев кубогына хоккей буйынса турнир уҙа. Был хаҡта Башҡортостан башлығы Радий Хәбиров хөкүмәттең бөгөнгө оператив кәңәшмәһендә белдерҙе. 1 ғинуарҙа легендар шәхескә 70 йәш тулған булыр ине.
Сергей Ғимаев иҫтәлегенә арналған хәйриә матчы «Өфө-арена»ла үтте. Уйындың Башҡортостанда уҙыуы берҙә осраҡлы түгел, сөнки Сергей Наил улы хоккейҙағы тәүге аҙымдарын баш ҡалала башлай.

Башҡортостанда һыу буйҙарында хәүефһеҙлеккә иғтибар арта

Программаны ғәмәлгә ашырыу өсөн 247 миллион һум тотоноу ҡаралған. 250 -нән ашыу пляж булдырыу мөмкинлеге бар. Башҡортостан рәсми йыһазландырылған һыу инеү урындары буйынса Волга буйы округы төбәктәре араһында беренсе урында. Беҙҙең республикала 174 пляж булдырылған.

2026 йылда Өфөлә Дәүләт циркы төҙөкләндерелә башлай

Башҡортостан башлығы Радий Хәбиров хөкүмәттең оператив кәңәшмәһендә финанслау алған саҡта ҡатмарлыҡтар килеп тыумаһын өсөн эш проектын өйрәнергә ҡушты. Бынан тыш, ул республиканың мәҙәниәт министры Әминә Шафиҡоваға Рус драма театрын реконструкциялауҙы башлау өсөн аҡса бүлеү мәсьәләһен хәл итергә ҡушты. Шулай уҡ Радий Хәбиров Баймаҡ районының Урғаҙа ауылында социаль-мәҙәни үҙәк асыу тантанаһында ҡатнашырға йыйыныуы хаҡында хәбәр итте.

Башҡортостанда фатирҙа хайуандар һанын сикләргә тәҡдим итәләр

Республика {өкүмәтендә ошондай ҡарар проекты әҙерләнгән. Уға ярашлы, торлаҡтың һәр 18 квадрат метрында бер эт, йә ике бесәйҙән артыҡ аҫрарға ярамай. Шулай уҡ эттәр урамда хужаһыҙ йөрөмәҫкә тейеш. Уларҙы приютҡа оҙатасаҡтар. Йәмәғәт транспортында эттәрҙең мотлаҡ бәйле һәм морондоҡло булыуы шарт.

Радий Хәбиров Өфө хосписы пациенттарын Иҫке Яңы йыл байрамы менән ҡотланы

Республика башлығы Радий Хәбиров Өфө хосписы пациенттарын Иҫке Яңы йыл байрамы менән ҡотлап, изге теләктәрен еткерҙе. Учреждение асылғандан алып, йыл ярым эсендә тәүлек әйләнәһенә эшләгән стационар аша ауыр, ҡатмарлы сирҙәрҙән яфаланған, паллиатив ярҙамға мохтаж 1 меңдән ашыу өлкән кеше һәм 200-гә яҡын бала үткән.

Чат-бот ярҙамында тағы ла бер иҫерек водитель ҡулға алынды

Эскән ирҙең рулгә ултырыуын Ишембайҙан битараф булмаған кеше домофон камераһы аша күреп ҡала. Был хаҡта ул шунда уҡ дәүләт автоинспекторҙарына хәбәр итә. Полиция хеҙмәткәрҙәре тиҙ арала урынға сығып, урамдарҙың береһендә автомобилде туҡтата. 31 йәшлек водитель медицина тикшереүе үтеүҙән баш тарта, бының өсөн уға административ протокол төҙөлә.

Өфө урамдарындағы тәртипте Ситуация үҙәге көйләй

Баш ҡала хакимиәте биләмәһендә урынлашҡан берҙәм система ғәҙәттән тыш хәл, урамдарҙы таҙартыу, юл тығындары менән бәйле оператив мәғлүмәтте туплай. 117 экран аша йыйылған мәғлүмәт нигеҙендә белгестәр иғтибар талап ителгән проблеманы тиҙ арала хәл итә. Тулыраҡ мәғлүмәт киләһе яҙмала.

Рәсәйҙә сығарылыш уҡыусылары өсөн дәүләт аттестацияһын үткәреү ваҡыты асыҡланды

Мәғариф министрлығынан белдереүҙәренсә, 11 кластар өсөн берҙәм дәүләт имтихандары 23 майҙа башлана. Математиканан 27 майҙа, рус теленән 30 майҙа һынау үтә. 9-сы кластар өсөн төп дәүләт имтиханы 21 майҙан 16 июнгә тиклем дауам итә. 1 февралгә тиклем сығарылыш уҡыусылары имтихан тапшырыу буйынса ғариза бирергә тейеш.

БСТ каналы хәбәрсеһе Рәзилә Ғиниәтуллинаның туған телдәр буйынса репортажы иң яҡшыһы тип табылды

БСТ каналы хәбәрсеһе Рәзилә Ғиниәтуллина Башҡортостан дәүләт телдәрен һәм унда йәшәгән халыҡтарҙың телдәрен үҫтереүҙе иң яҡшы яҡтыртыу конкурсында беренсе урын алды.

Махсус хәрби операцияла ҡатнашыусыларҙың ғаиләләренә 40 төр ярҙам ҡаралған

Башҡортостанда махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылында мөмкин булғандың барыһын да эшләргә кәрәк. Төбәк етәксеһе Радий Хәбиров ошондай бурыс ҡуйҙы. Бөгөн республикала төрлө өлкәләргә ҡағылған 40 ярҙам сараһы әҙерләнгән.

Рәсәйҙең ҡайһы бер төбәктәре пилотһыҙ осоу аппараттары тәьҫирендә ҡалды

Ете субъект властары дрондар һөжүме тураһында хәбәр итте, тағы бер губернатор дошмандарҙың ракета һөжүме яһарға маташыуы тураһында белдерҙе. Зыян күреүселәр тураһында хәбәр ителмәй. Айырым төбәктәрҙә объекттарға зыян килтерелә. Өфө, Ҡазан, Калуга, Һарытау, Тамбов һәм тағы ла биш ҡала аэропорттарында рейстарҙы ҡабул итеүгә һәм ебәреүгә ваҡытлыса сикләүҙәр индерелә. Бер үк ваҡытта Ғәҙәттән тыш хәлдәр министрлығы яңы һөжүмдәр ихтималлығы тураһында иҫкәртә һәм граждандарҙы уяу булырға саҡыра. Шулай уҡ белгестәр дрондар һөжүм иткән осраҡта ҡайһы бер ҡағиҙәләрҙе теүәл үтәргә кәңәш итә.

27 йыллыҡ тәжрибә һәм һөнәренә һөйөү: Марат Ҡотлоевтың хеҙмәт юлы

Хеҙмәт геройҙары беҙҙең арала. «Яңылыҡтар» редакцияһына Ҡариҙел районы пассажирҙары тәжрибәле һәм иғтибарлы водителде төшөрөп күрһәтеүҙе һорап мөрәжәғәт итте. Марат Ҡотлоев Ҡариҙел-Өфө маршруты буйынса 27 йыл пассажирҙар ташый. Уның хеҙмәтен пассажирҙар ҙа, предприятие етәкселеге лә юғары баһалай. Тулыраҡ мәғлүмәт киләһе яҙмала.

Дүртөйлө районының Түрбейек ауылы халҡы яңы мәҙәниәт йортон туйланы

Заман талаптарына яуап биргән бина «Мәҙәниәт» милли проекты буйынса төҙөлгән. 15 йыл клубһыҙ йәшәгән халыҡ өсөн ул ҙур бүләк.

Өфөлә Башҡортостандың бер төркөм журналистары ведомство наградалары менән бүләкләнде

Рәсәй матбуғаты көнө уңайынан Өфөлә Башҡортостандың бер төркөм журналистары ведомство наградалары менән бүләкләнде. Тантаналы сарала республика кимәлендә матбуғат һәм киң мәғлүмәт хеҙмәткәрҙәре араһында уҙғарылған төрлө конкурстарға йомғаҡ яһалды. БСТ телеканалының «Яңылыҡтар» хеҙмәте хәбәрсеһе Рәзилә Ғилметдинова «Дәүләт телдәрен һәм Башҡортостан халыҡтары телдәрен үҫтереүҙе иң яҡшы яҡтыртыу» бәйгеһендә беренсе урын алһа, рус редакцияһынан коллегаларыбыҙ араһында Артур Шәмсетдинов менән Эмиль Басареев «Алға» айырым иҡтисади биләмәһе эшмәкәрлегенә арналған репортаждар конкурсы еңеүселәре тип танылды.

Өфөлә Шәйехзада Бабичтың 130 йыллығына арналған түңәрәк өҫтәл үтте

Әхмәтзәки Вәлиди исемендәге Милли китапханала билдәле башҡорт шағиры, журналист һәм дәүләт эшмәкәре Шәйехзада Бабичтың 130 йыллығына арналған түңәрәк өҫтәл үтте. Фекер алышыуҙа ҡатнашыусылар шәхестең тормош һәм ижад юлына байҡау яһаны, ҡыҙыҡлы мәғлүмәттәр еткерҙе.

Өфө янында автозаправка станцияһы төҙөлә

Бының өсөн 50 миллион һум тотонола. Күп функциялы комплекстың проекты өҫтөнлөклө статус алды. Бында яғыулыҡ ҡойоу станцияһынан тыш, магазин, кафе, балалар өсөн майҙансыҡ була. Республикала юл яны объекттарын төҙөүселәр өсөн һәр төрлө ташлама ҡаралған. 2021 йылдан башлап Башҡортостанда 900-ҙән ашыу ошондай объект төҙөлгән һәм яңыртылған.

Мәктәп уҡыусылары араһында Башҡортостандың халыҡ артисы Әхәт Мортазин иҫтәлегенә арналған «Диктор тауышы» асыҡ республика конкурсына эштәр ҡабул ителә.

Быйыл ул «Юлдаш» радиоһының 25 йыллығына арнала. Конкурста ҡатнашыусылар ике видеояҙма ебәрә: тасуири мәғлүмәт шәлкеме уҡыу һәм «Беҙҙең мәктәп тормошо» темаһына репортаж. Ижади эштәр 20 ғинуарға тиклем ҡабул ителә.

Белешмәләр өсөн телефон:
☎️ 8 (34791) 6-02-18.

🎙Диктор тауышы - радио-телевидение донъяһына әйҙәүсе берҙән-бер конкурс! Ҡатнашығыҙ, үҙегеҙҙе һынағыҙ, еңегеҙ!

Башҡортостанда спортҡа һәләтле балаларҙы асыҡлайҙар

Дәүләт Йыйылышы-Ҡоролтай депутаттары закон проекты әҙерләгән. Ул балаларҙы физик яҡтан үҫтереү үҙәктәре эшмәкәрлегенә ҡағыла. Парламент спикеры Константин Толкачев белдереүенсә, бындай үҙәктәр тәү сиратта балаларҙы сәләмәт тормош алып барыуға ылыҡтыра. Шулай уҡ улар һәләтле балаларҙы асыҡлап, йәш спортсының һәләтен үҫтереү буйынса йүнәлеш бирергә бурыслы була. Закон проекты ғинуар аҙағында парламенттың пленар ултырышында беренсе уҡыуҙа ҡарала.

Башҡортостан һәм Һиндостан спорт өлкәһендә хеҙмәттәшлек итә

Вице-премьер-спорт министры вазифаһын башҡарыусы Руслан Хәбибов видеоэлемтә аша "Һиндостан Рәсәй йәштәр диалогы"нда ҡатнашты. - Ике арала хеҙмәттәшлек инфраструктураны үҫтерергә, инвестиция йәлеп итергә, спортсыларҙы әҙерләргә булышлыҡ итә, - тине Руслан Хәбибов. Башҡортостан һәм Һиндостан март айында көрәш буйынса турнир уҙғарыу тураһында килеште.